Genesis 49

In-inged na hilan Jacob ye Aanak na

1Pangayadi, impaingat na hilan Jacob ye aanak na, ket hinabi na, a wana, “Humaley kawo kangko, ta habiyen ko kanyo ye malyadi lano kanyo.

2Aanak ko, humaley kawo kangko

boy leng-en yoko a bapa yo.

3Hika Reuben a punganay ko,

ket nianak ha panaon nin kakakhawan ko.

Maiigit kan angkabalitaan boy makapalyadiyan dinan kanlan kakatongno mo.

4Noba ba-mo kan lanab, ulita agmo nabenben ye maloke a kalabayan nin laman mo,

ta nilalay mo yay ahawa kon ipoh.

Ket uli yain a dinyag mo, agkaynan maiigit kanlan kanayon.

5Hikawo Simeon boy Levi a mikatongnon ampaytagem,

anggawien yoy almah yo ha pamaidap kanlan kanayon.

6Ahe ako makilakew

o makew ha paytitipon yo,

ulita no mapoot kawo, tampol kawon mamatey,

boy ampilayen yo hilay aayop no labay yo.

7Maihumpa kawo,

ulita matubag kawo boy mahama.

Payngihyayen katawo

boy paytayaken ha Israel.

8Hika met Juda, ket galangen

boy dangalen la kan kakatongno mo,

ta hamboten mo hila lanoy kakaaway mo.

9Ba-mo kan anak nin liyon

pangayadi nan mamatey nin ayop,

ket ampag-udong a mida ha yukib na.

Ket homain ayaman a magngaya a makibalabala kana.

10Pahulong kan mamoon. Mangibat ya lano ha lalahi mo ye mag-ilyadin poon.

Kaya-bay mamayad hila nin bowih ye nanahyon boy pahakop hila kamo.

11Mahbol lanoy pupol ha lugal mo.

Kaya-bay agya ih-el yay ahno ha haley nin pinakamanged a tanaman a kawat obah,

ket ahe na mauboh uli ha kalabong na.

Ket agya pag-ilbah ye habaw ubah,

ket ahe ya mauboh.

12Uli ha paminom mo nin alak ubah, tumibya ye mata mo,

ket uli ha paminom mo nin gatah, ampumoti ye ngingipen mo.

13Ket hika Zebulun, ihtew ka kumonin ha gilid dagat.

Hiyay lugal mo ket mag-ilyadin tanghadan nin daong.

Hiyay lugal mo, miabot ya anggan ha Sidon.

14Hika Isacar, ba-mo kan maghay makhaw a ahno,

a ampagpainawa ha kulongan nin tutupa.

15Anteehen moy paipoh boy mag-obda nin mabyat,

dapot tana manged ye kunaan mo.

16Hika Dan, manuhga ka lano kanlan tatao mo,

bilang magha kanlan lalahi nin Israel.

17Ba-mo kan bikat a madita

a anti ha gilid nin dān

a ampanuka nin bibitih nin kakabayo a anhumapid.

Kaya-bay angkaampag hilay nakahakay.”

18Pangayadi hinabi nan Jacob, “Apo Dioh, an-agaden koynay pangiligtah mo.”

19Ket nagpahulong ya ha paghabi na,

“Hika Gad ket dawohongen laka lanon tutulihan,

noba dawohongen mo hila boy kamaten mo hila met.

20Hika Asher, luhbo ya lanoy pamangan mo.

Hiyay pupol mo ket katanggap-tanggap a kanen nin poon.

21Hika Naftali, ba-mo kan maghay naibohan a oyha

a ampanganak nin manganged a ooybon.

22Hika met Jose, ket malabong hila lanoy lalahi mo

a omen ha poon kawat ubah a naitanem ha haley nin hubol,#49:22 o mahilib a ahno ha gilid nin hubol

ket hiyay kawat na, kumayapkap ya ha babe alad.

23Dawohongen laka lanon kakaaway mo a mahipat a mamana,

ket uli ha poot la, panaen laka.

24Noba pamanapana mo met kanla

boy pahulong a makhaw ye takyay mo

makauli ha haglap nan Makapalyadiyan a Dioh nan Jacob,

a māgpahtol boy kalahag nin Israel.

25Hiyabay ye Makapalyadiyan a Apo Namalyadi lan nangaunan tutoa mo a ampanaglap

boy ampanginged kamo.

Inged na kan Apo Namalyadi nin udan boy lanom ibat ha huhubol.

Biyan na kan malabong a aanak boy aayop.

26Hiyay panginged nan bapa mo,

ket igit yan manged dinan ha kangedan

a ampangibat ha alan a nagmamapantay.

Matanggap mo hila dayi hilatin kangedan, Jose,

hika a umiigit kanlan kakatongno mo.

27Hika Benjamin ket ba-mo kan ahontawon a ampamatey,

ampangamoyok nin ayop ha mahanib,

ket ha madeglem, andakayen nay nahamham na.”

28Hilayain ye 12 aanak nan Israel a nangibatan nin lalahi lan Israelita. Ket yain ye kapohpohan a panginged nan Jacob a kaeteban nin balang magha kanla.

Hiyay pagkamatey nan Jacob

29Pangayadi, binilinan na hilan Jacob ye aanak na, hinabi na kanla, “Haanin, madanon ko hilaynan mapagkalamo ye papaltido ko a nangamatey ana. Ihtew yo kon ilbeng ha nakailbengan lan nangaunan tutoa ko, ha yukib a anti ha bangkag nan Efron a Heteo. 30Yain a bangkag, ket anti ya ha Macpela, ha Mamre, ha lugal a Canaan. Hinaliw na yan aking kon Abraham yatew a bangkag kanan Efron ta-omen na yan diyagen a pangilbengan. 31Ket ihtew ya nailbeng agya yay baing kon Sara a ahawa na. Ihtew la hila met in-ilbeng ye tutoa kon Isaac boy Rebeka boy ihtew koya met in-ilbeng ye Lea. 32Hiyay bangkag boy yukib, ket hinaliw kanlan Heteo.”

33Pangayadi nan maghabi ye Jacob kanlan aanak na, nida yayna man, ket naboytoan yaynan angeh. Ket napagkalamo na hilaynay papaltido na a nangamatey ana.

Currently Selected:

Genesis 49: AABPV+

Highlight

Copy