2 ເທສະໂລນິກາ 3
3
ໂທ້ ເຖງ ເຢຍ ບົວ ເຕົ໋າ ເກົ໋າ
1ຕສວັ໋ງ ກໍ໋-ໂຢ໌ວ ອ່າ, ເຊດ ເມວີ໌ຍ ແອ໋ງ ມ່າຍ ເຕີ໋ຍ ຫວ່າ. ໂທ້ ເມີ່ຍ ບົວ ເຖງ ເຢຍ ບົວ ເຕົ໋າ ເກົ໋າ ເຫວີ່ຍ ປຸນ ຕສ໊ຽວ ເຍີຍ ໂຕ໌ ຊຽບໆ ເຍີຍ ຕສຸ້ນ ຕຸ໊ ອກອຍ ຢ່າ ຕຸ໊ ມ່ຽນ ທ່າຍ ຮນັ້ງ ເມີ່ຍ ບົວ ທ່າຍ ນໍ. 2ຢ່າ ໂທ້ ທິນ-ຮູ່ງ ໂອຈ໋ວ ເຢຍ ບົວ ເລີ່ຍ ດຸ໊ດ ຫວ່າຍ ໄຫ່, ເອ໊າະ ໄຫ່ ເຍີຍ ມ່ຽນ, ເຫວີ່ຍ ຕສຸ ໄມ້ ເຕສີ໌ຍ ເຕົ້າໆ ມ່ຽນ ມ່າຍ ສຽນ ຟິມ. 3ມປ່າ ຕສ໊ຽວ ເຊ ຕສຽບ ຕສົ໊ວະ ເຍີຍ. ນິ່ນ ອ໋ອຍ ເຖງ ເມີ່ຍ ບົວ ມ່າຍ ທຈະ ຢ່າ ເປວ ຈ໊ຽນ ໄມ້ ປຸນ ຮຢວັງ ເອ໊າະ ວົ້ວ ເຕົ້າ ຫ່ອຍ ເມີ່ຍ ບົວ. 4ຕສ໊ຽວ ປຸນ ເຢຍ ບົວ ໄຮ່ ປູ໋ງ ຕຸ໊ ໂຮຍ້ວ ເມີ່ຍ ບົວ. ເຢຍ ບົວ ສຽນ ຕີ່ງ, ຕົ້ງ ເຢຍ ບົວ ບົ໋ວ ເມີ່ຍ ບົວ ໂຕສ໋ວ ເຍີຍ, ເມີ່ຍ ບົວ ຕສະເກ້ງ ໂຕສ໋ວ ຢ່າ ອ໋ອຍ ໂຕສ໋ວ ຈ໊ຽນ ມີ່ງ. 5ໂທ້ ຕສ໊ຽວ ຢ໌ຽນ ເມີ່ຍ ບົວ, ປຸນ ເມີ່ຍ ບົວ ມ່າຍ ໂຮຍ້ວ ຮນ້ຳ ທິນ-ຮູ່ງ, ຢ່າ ປຸນ ເມີ່ຍ ບົວ ມ່າຍ ກີຕູ່ ປຸນ ເຍີຍ ໜ່ອຍ.
ຂວິນ ມ່ຽນ ໄມ້ ຕູ໋ງ ເຫລວີ່ຍ
6ຕສວັ໋ງ ກໍ໋-ໂຢ໌ວ ອ່າ, ເຢຍ ບົວ ເຕ໊ງ ຕສ໊ຽວ ເຢຊູ ກີຕູ່ ເຍີຍ ບົ໋ວ ຫັດ ເມີ່ຍ ບົວ, ຫາຍ ເຕົ້າ ກໍ໋-ໂຢ໌ວ ເຫລວີ່ຍ ໄຫ່, ໄມ້ ອ໋ອຍ ໂຕສ໋ວ ກົງ ຢ່າ ໄມ້ ກັນ ເຢຍ ບົວ ອຈ໋າວ ເຈ໋ຍ ເມີ່ຍ ບົວ ວົ້ວ ເຕີ໋ຍ ຫວ່າ, ເມີ່ຍ ບົວ ອ໋ອຍ ຕສຸ ຊິ້ມ ອກອຍ. 7ເມີ່ຍ ບົວ ກັ້ນ ຮິ້ວ ຕຸ໊ ເມີ່ຍ ບົວ ອ໋ອຍ ຕສຸ ຮນັ້ງ ຫາຍ ນໍ ຕສວດ ເຢຍ ບົວ ເຍີຍ ຫຍູ່ງ ໂຕສ໋ວ. ເຢຍ ບົວ ເຖສົາ ເມີ່ຍ ບົວ ຢຽມ ວົ້ວ ຕສັ່ນ ເຢຍ ບົວ ໄມ້ ເຫລວີ່ຍ. 8ເຢຍ ບົວ ຢ່າ ໄມ້ ຫຍັ່ນ ຫາຍ ເຕົ້າ ເຍີຍ ແປະ ຫຮນາງ, ໄມ້ ທສວດ ຍ່ານ. ຕ໋າວ ດສ໋ວນ ເຢຍ ບົວ ຮນອຍໆ ມ໌ວນໆ ໂຕສ໋ວ ກົງ ໂຄ້ວ ໄຫ່ ເຫວີ່ຍ ໄມ້ ອ໋ອຍ ເຝີຍ ຫລຸ່ຍ ເມີ່ຍ ບົວ ຫາຍ ເຕົ້າ. 9ເຢຍ ບົວ ຮນັ້ງ ນ້າຍ ນໍ ໂຕສ໋ວ, ໄມ້ ເຕສີ໌ຍ ເຫວີ່ຍ ຕສຸ ໄມ້ ມ່າຍ ເລີ໌ຍ ເຫ່ວ ມ່ຽນ ຈວັງ ເຢຍ ບົວ, ເຊ ເຢຍ ບົວ ອ໋ອຍ ໂຕສ໋ວ ຫຍູ່ງ ເຕສີ໊ຍ ປຸນ ເມີ່ຍ ບົວ ຕສວດ. 10ເຢຍ ບົວ ເຖສົາ ເມີ່ຍ ບົວ ຢຽມ ວົ້ວ ຕສັ່ນ ເຢຍ ບົວ ບົ໋ວ ເມີ່ຍ ບົວ, “ເຊ ກ໊ອງ ຫາຍ ເຕົ້າ ໄມ້ ຄັ້ງ ໂຕສ໋ວ ກົງ, ໄມ້ ຕູ໋ງ ປຸນ ຫຮນາງ ນິ່ນ ຫຍັ່ນ.”
11ເຢຍ ບົວ ຮນັ້ງ ນ້າຍ ນໍ ກ໊ອງ ເຫວີ່ຍ ຕສຸ ເຢຍ ບົວ ໄຮ໌ ມ່ຽນ ກ໊ອງ, ຢຽມ ເມີ່ຍ ບົວ ໜ່າຍ ມ່າຍ ເຕີ໋ຍ ມ່ຽນ ເຫລວີ່ຍ ໄຫ່, ໄມ້ ໂຕສ໋ວ ກົງ. ຂູງ ມີ່ງ ຫລະເຍົ້າ ມ່ຽນ ໂຕສ໋ວ ເຍີຍ ສີ່ ຮນັ້ງ. 12ເຢຍ ບົວ ເຕ໊ງ ຕສ໊ຽວ ເຢຊູ ກີຕູ່ ເຍີຍ ບົ໋ວ ຫັດ ນ້າຍ ຫຍູ່ງ ມ່ຽນ ຢ່າ ຂວິນ ນິ່ນ ບົວ ອ໋ອຍ ຕສຸ ໂຕສ໋ວ ສ່ວນ ເຍີຍ, ຈ້ຽນ ໂຕສ໋ວ ກົງ ເຫວີ່ຍ ຢູ໌ງ ກັ້ນ ເຍີຍ ແໝ່ງ.
13ກໍ໋-ໂຢ໌ວ ອ່າ, ເມີ່ຍ ບົວ ໂຕສ໋ວ ຄູ້ ສີ່, ໄມ້ ຕູ໋ງ ໂຮຍ້ວ ໜຳ. 14ເຊ ກ໊ອງ ຢຽມ ເມີ່ຍ ບົວ ໜ່າຍ ຫາຍ ເຕົ້າ ໄມ້ ໝວັງ ເຢຍ ບົວ ເຟ້ຍ ນ້າຍ ເຕສີ໊ຍ ຝຽນ ເຍີຍ ຫວ່າ, ອ໋ອຍ ຕສຸ ຈັ໋ງ ຈ໊ຽນ ນິ່ນ, ຢ່າ ໄມ້ ຕູ໋ງ ເຖສົາ ນິ່ນ ຈິວ ທົງ ເຫວີ່ຍ ປຸນ ນິ່ນ ໄຍ້. 15ມປ່າ ໄມ້ ຕູ໋ງ ຝຸນ ນິ່ນ ໂຕສ໋ວ ວິນ-ວັ້ງ. ຕ໋າວ ດສ໋ວນ ອ໋ອຍ ຕສຸ ຂວິນ ນິ່ນ ຮນັ້ງ ຂວິນ ກໍ໋-ໂຢ໌ວ ນໍ.
ເຊດ ເມວີ໌ຍ ຫວ່າ
16ໂທ້ ເຖສີຍ ແປ້ງ ອອນ ເຍີຍ ຕສ໊ຽວ ກັ້ນ ຕສັ່ນໆ ຢຽມ ຫຍູ່ງໆ ເຈົ໊າ ເຖສີຍ ແປ້ງ ອອນ ປຸນ ເມີ່ຍ ບົວ. ໂທ້ ຕສ໊ຽວ ເຖສົາ ເມີ່ຍ ບົວ ຕສວັ໋ງ ມ່ຽນ ຢຽມ.
17ເຢຍ ກັ້ນ ນັ້ນ ປັ໊ດ ເຟ້ຍ ນ້າຍ ເຕີ໋ຍ ຫວ່າ, “ເຢຍ, ເປົາໂລ, ຈັ໋ງ ເຖົາ ເມີ່ຍ ບົວ.” ເຢຍ ເຟ້ຍ ເຍີຍ ເຕສີ໊ຍໆ ຝຽນ ມ່າຍ ນ້າຍ ເຕີ໋ຍ ຫວ່າ ໂຕສ໋ວ ຈັ໋ງ-ໂຫ່. ເຢຍ ກັ້ນ ເຍີຍ ດສັ່ງ-ແຫວະ ຢ່າ ຮນັ້ງ ນ້າຍ ນໍ ເຟ້ຍ.
18ໂທ້ ຕສ໊ຽວ ເຢຊູ ກີຕູ່ ເຖສີຍ ເອນ ປຸນ ເມີ່ຍ ບົວ ຕສວັ໋ງ ມ່ຽນ.
Currently Selected:
2 ເທສະໂລນິກາ 3: IuMiLAO
Highlight
Share
Copy
Want to have your highlights saved across all your devices? Sign up or sign in
Mien Bible (Lao Script) © 2007 Thailand Bible Society, 2007.