Mark 15

Jisua Pilat makunga ânding

(Mat 27:1-2,11-14; Luk 23:1-5; Joh 18:28-38)

1Jînga inmânin innottakin, ochaisingei ha upangei le Balam minchupungei, le Roijêkpungei murdi leh an intônga male mintuonangei an sina. Jisua ha zingjirûi leh an khita an tuong paia, male Pilat kuta an bânga. 2Pilat'n chong a rekela, a kôm, “Judangei rêngpa ni ni mo?” a tia.

Jisua'n, “Nangman ke mi ni ti duo” tiin a thuona.

3Ochaisingei han abi tamtakin Jisua an nônna, 4masikin Pilat'n Jisua kôm chong a rekel nôka, “Nangman nu thuonloi rang mo? nang an nônnangei nâm hih rangâi roh!” a tia.

5Avêlin Jisua'n chongbâi khat luo ti rang nuom maka, male Pilat'n a kamâm sabak zoia.

Jisua hih thi rangin a roijêkmasat ani

(Mat 27:15-26; Luk 23:13-25; Joh 18:39—19:16)

6Pilat'n chu Kalkân Kût zora zeta mi intâng ina aom inkhat mingeiin an ngên tak ha a mojôk pe ngei ngâi a baisi ani. 7Ma zora han mi inkhat a riming Barabbas hah, mi ânhelngei pâla mi, le loko injêlna kâra mi that sika intâng ina a oma. 8Lokongei an intûpa male anni ranga a lei tho pe ngei ngâi anghan tho rangin an ngên lâihan, 9Pilat'n an kôm, “Judangei rêngpa hih nangni mojôk pe inlang nin jôt mo?” tiin a rekel ngeia. 10Ochaisingei han an narsa sika Jisua hah a kut chunga an hong bâng ani ti a riet minthâra.

11Aninâkachu Ochaisingei han mipuingei hah Barabbas a mojôk pe ngei ranga ngên rangin an misiet ngeia. 12Hanchu Pilat'n an kôm, “Aninte, Judangei rêngpa nin tipu hih imo ko lo rang ani zoi?” tiin a rekel ngei nôka.

13Anni han, “Khrosa jêmdel roh!” tiin an iniek nôka.

14Hannirese Pilat'n an kôm, “Imo a tho minchâi?” tiin a rekel ngei nôka.

Anni ngei han, “Khrosa jêmdel roh!” tiin ânring uolin an inieka.

15Pilat'n lokongei râiminsân a nuoma, masikin Barabbas hah a mojôk pe ngeia. Hanchu Jisua hah a vîka male Khrosa jêmdel rangin an kuta a bâng zoia.

Râlmingeiin Jisua an phengsan

(Mat 27:27-31; Joh 19:2-3)

16Râlmingei han Jisua hah râiôt inmâi khalâidunga an tuong lûta, an champui ngei murdi an koi mintûpa. 17Jisua hah puon senduk an minsila, riling amachangngei hah tapor an phana, male a lua an minkhuma. 18Hanchu ama chibai an pêka: “Judangei Rêngpa, ringsôt roh!” an tia. 19A lua tôkmol leh an jêma, an michila, khûkinbilin chibai an mûka. 20Munuiinjanân an sin suole chu puon senduk hah an lîka, male a puonngei nanâk hah an minsil nôka. Hanchu khrosa jêmdel rangin an tuong zoi.

Jisua hih khrosa jêmdelin aom

(Mat 27:32-44; Luk 23:26-43; Joh 19:17-27)

21Hanchu lampuia mi inkhat ram renga khopuilien hongpan a riming Simon an intôngpuia, male râlmingeiin Jisua khros ruput rangin an dânderita. (Simon hah Cyrene Kurini mi, Alexander le Rufus ngei an pa ani.)#Rom 16:13 22Jisua hah Golgotha an ti muna han an tuonga maha aomtie chu “Luru Mun” tina ani. 23Ha muna han a pang ânhipna rangin uain murra loi leh ânpol pêk rangin an pûta, aninâkachu Jisua'n nêk jôt mâka. 24Hanchu khrosa an jêmdela, male a puonsilngei hah an insema, kho ahâr ha mo an chang rang chit rietna rangin taruo an sânna.#Lap 22:18 25Jisua an jêmdel zora hah jîng dâr kuo inringa ani. 26Ama doia an nônna minrietna chong hah “Judangei Rêngpa” tiin a lu chunga an târra. 27Jisua leh munkhatin mi inru inik a changtieng inkhat, male a voitieng inkhat an jêmdel sa.#15:27: Miziek senkhat ngei chu arachang 28 dôn mak ngei: Ma angdên han, Pathien lekhabu'n, “Ama khom mi puoloingei lâia telsân aom zoi” ati hah ahong tung zoi ani (Luk 22:37 en roh). 28Ma angdên han, Pathien lekhabu'n, “Ama khom mi puoloingei lâia telsân aom zoi” ati hah ahong tung zoi ani.#Isa 53:12

29Hataka mingei ânloi murdi'n an lu an thuka Jisua an êroa, “Ohoi! Biekin set na ta, sûnthumin ni minding nôk rang na!#Lap 22:7; 109:25; Mk 14:58; Joh 2:19 30Atûn khros renga juong chum inla, nethenin insan mojôk roh ba!” an tia.

31Ha angdênin ochaisingei le Balam minchupungei khomin Jisua an phengsana, “Midangngei chu a mojôk thei ngâia, hannirese ama le ama chu insan mojôk thei mak! 32Tho atûn chu Messiah, Israelngei rêngpa hih khros lêr renga a juong chum lei en rei u, male ama ei iem rang ani!” an tia.

Ama leh an jêmdel sa mi inik ngei khomin Jisua an êro sa zoi.

Jisua thina roi

(Mat 27:45-56; Luk 23:44-49; Joh 19:28-30)

33Sûnchima konta inthum sûng chu rammuol ajîng khapa. 34Chonûk dâr inthum inring han chu Jisua rôl inringtakin ân-ieka, “Eloi, Eloi, lama sabakthani?” a tia, maha, “Ka Pathien, ka Pathien, Ithomo mi ni mâksana?” tina ani.#Lap 22:1

35Ha muna omngei senkhatin a he an rieta, male “Rangâi ta u, Elijah a koi ke!” an tia. 36An lâia mi inkhat a tânna, patjôn, uain thûra a michiejûta, tôkmol monga a târra. Hanchu Jisua ner a hong min tônna, male “La ôt rei u! Khros renga ama musum rangin Elijah mo a juong pe lei en rei u!” a tia.#Lap 69:21

37Jisua'n rôl inringtakin ân-ieka, a rangachat zoi.

38Hanchu, Biekina puondal dûnga om hah inikin achung renga among dênin akêr phata.#Jôk 26:31-33 39Râlmi ulien khros motona ândingpu hah Jisua a rangachat#15:39: a thi zoi; miziek senkhat ngei an dôn chu ân ieka male a thi zoi. tie hah a mua “Hi mi hih Pathien Nâipasal ani khet!” a tia.

40 # Luk 8:2,3 Ha muna, nupang senkhat ngei khom alazanna renga thîrin an oma; ma ngei hah Mary Magdalene, Mary Jacob nâipang le Joseph ngei an nû, le Salome ngei an ni. 41Ma ngei hah Jisua Galilee rama a om lâihan an jûi ngâia, male an san ngâi ani. Nupang tamtak Jerusalema ama leh a se ngei khom hah an om sa.

Jisua an phûm

(Mat 27:57-61; Luk 23:50-56; Joh 19:38-42)

42-43Kholoi ahongnin chu Arimathea mi Joseph a hongtunga. Ama hah Roijêkpungei lâia jâ omtak ania, Pathien Rêngram juong tung rang lei ngâkpu ani. Maha Incherêlni (maha, Sabbathni motona sûn hah ani), masikin Joseph'n hâitakin Pilat kôm a va sea Jisua ruok ha ava zonga. 44Pilat'n Jisua chu a thi zoi tiin a riet lehan a kamâm tataka, râlmi ulien inkhat a koia, Jisua thina asôt zoi mo? tiin a rekela. 45Râlmi ulien bâi renga chong ânthârin a riet suole chu a ruok hah Joseph chôi rangin a phal pe zoia. 46Joseph'n rosompuon a rochôka, ruok hah a musuma, rosompuon lehan a tuoma, lungpuia hel thânkhura han a min jâla. Hanchu thân kotbâi hah lung lienpa muluoiin a hîpa. 47Mary Magdalene le Joseph nû Mary han Jisua ruok an min jâlna hah an ena, an mu chien zoi ani.

Currently Selected:

Mark 15: SAKNT

Highlight

Copy