Luke 17

Inpalna

(Mat 18:6-7; 21:22; Mk 9:42)

1Jisua'n a ruoisingei kôma, inpalna hih omloi thei nimak, ania inpalna min ompu chung chu ântak bah na! 2Hi mi chînte ngei lâia inkhatlam minpal chu, a minpalpu ringa han bunôilung minlîn tuikhangliena vôrpai ni senla, ata rangin sa uol a tih.

3Singthei roi,#Mat 18:15 na lâibungin nunsie a thôn chu ngo roh, ânsîrin chu ngâidam roh. 4nu chunga sûnkhatin voi sari saloi a thôn, voi sari kênsîr tiin, no kôm a hongin chu, na ngâidam ngêt rang ani.

Taksônna

5Ruoisingei han a kôma, “Pumapa, kin taksônna mi min detpe uol roh,” an tia.

6Hanchu, Pumapa han, “Ancham ru dôra hih taksônna nin neia anîn chu hi thingtheimu kung hih hong inphôi inla, tuikhangliena hong inphun roh, tîng nin ta nin he rangâi kelen atih,” tiin a thuona.

Tîrlâm sintum

7“Hanchu, nin lâia tumakhatin, tîrlâm pil tukin mo, belri hôlin mo, nei ungla, chuon a hong tungin, ‘Bukhalâi hong ot kelen roh’ tumo a ti rang nin nia? 8Manêkin, ‘Ku bukhalâi ni do bak inla, rovo tho inla, ka sâk ke nêk suo mâka ni ngâk roh, masuole nêk ni tih,’ tumo a ti loi ranga? 9Suokin chong a jôm sikin tumo râisânchong a ril ngâi? 10Ma ang tak han, nin sintum nin sin suonûk khomin, tîrlâm papai kêng ei ni, ei sintum ei sin chak kêng nin ti rang ani.”

Jisua'n miphâr sôm a mindam

11Hanchu, Jisua'n Jerusalem a se malamin, Samaria le Galilee kâra ramria a lôna. 12Khuo inkhat a lûtin chu miphâr sômin an intongpuia. Lâtaka an indinga, 13an inieka, “Jisua Minchupu, inrieng mi mu roh!” an tia. 14Jisua'n a mu ngeia an kôma, “Se ungla, ochaingei kôma vân en roi”#Och 14:1-32 a tipe ngeia. Lampuia chu an dam zoia.#17:14 an inthieng zoia: 5:12. en roh 15Inkhatin chu a dam zoi iti a rietin chu, rôl inringtakin, Pathien minpâk pumin a hongkîr nôka. 16Jisua ke bula inbokin râisânchong a rila, ha mi hah Samaria mi ani. 17Jisua'n, “A damngei hah mi sôm nin nia, adang ikuo ngei hah khonmo an om? 18Ithomo hi ramdangmi vai himo Pathien minpâk ranga hongkîr nôk?” a tia. 19Hanchu, a kôma, “Inthoi inla se ta roh, na taksônna hin nang a mindam ani,” a tipea.

Pathien Rêngram juongtung

(Mat 24:23-28,37-41)

20Pharisee senkhat ngeiin Pathien Rêngram juongtung rang roi an rekela, Jisua'n, “Pathien Rêngram chu mu theiin juongtung no nih. 21Tutên ‘En roh,’ hin kêng a om, son kêng a om ti no nih. Pathien Rêngram chu nin lâia kêng a om,”#17:21 nin sûnga; nônchunin kâra, nônchuharenghan nin lâia inlang a tih. tiin a thuona.

22Hanchu, a ruoisingei kôma, “Miriem Nâipasal ringlâi sûn hi sûnkhat te luo nin mu nuom ni, la om a tih; ania mu khâi no tunui.” 23Mîn nin kôma, “ ‘En roh sô soh!’ ‘En roh hi hih,’ tîng an tih, ania, a en rangin vase no roi. 24Invâna kôl ânleka, kôlkung renga kôlmong dêna ai vâr ngâi anghan, Miriem Nâipasal juong ni lechu, nîng a tih. 25Ania, ma mâna han tuong ok a ta, atûnlâi mingei hengpaiin om a tih.”

26Noah zora lâia anghan Miriem Nâipasal zora khom nîng a tih.#Aph 6:5-8 27Noah, rukuonga a lûta, tuilienin a that riei mâka chu mitinin an sâkin an nêka, nupang pasal omsiet an tho ngâi.#Aph 7:6-24 28Lot zora anghan mi tinin an sâkin an nêkin, an rochôka, an juora, an linga, in an sin ngâia.#Aph 18:20—19:25 29Lot'n Sodom a mâk nin chu mei leh kât invân renga a juonga, a that riei ani. 30Ma anghan, Miriem Nâipasal juong inlâr nîn chu juong om a tih.

31Ha nîn chu inchunga ompûn, a neinun lâk rangin chum no rese. Ha angdênin, loia om khomin a ina hongkîr no rese.#Mat 24:17-18; Mk 13:15-16 32Lot lômnu riettit ngâi roi.#Aph 19:26 33Tutu a ringna mojôk rang bôk kaiin machân an ta, a machân kaiin jôk an tih.#Mat 10:39; 16:25; Mk 8:35; Luk 9:24; Joh 12:25 34Nangni ki ril, ha ni jânin chu, jâlmun khata mi inik jâl an ta, inkhat tuong nîng a ta, inkhat mâk nîng a tih. 35Nupang inikin sângsuk an ta, inkhat tuong nîng a ta, inkhat mâk nîng a tih. 36Loia mi inik om an ta, inkhat tuong nîng a ta, inkhat mâk nîng a tih, a tia. #17:36: Senkhatin rachang 36 na dôn mak ngei: Mi inik loia chuonsin an ta: inkhat tuongpaiin om a ta, adang hah mâksan nîng a tihen roh, Mat 24:40.

37Hanchu, ruoisingeiin, “Pumapa khotieng mo?” an tia. Jisua'n, “Ithi ruok omna kipa sêlkurungei intûp an tih,” a tia.

Currently Selected:

Luke 17: SAKNT

Highlight

Copy