Johanes 6

Jesus jeft 5 000 Mana to äten

1No däm jinkj Jesus wajch no de aundre Sied vom galiläischen Mäa, ooda von Tiberias; 2un daut kjeem am väl Volkj hinjaraun, wiels see de Wunda (Tieekjens) sagen, dee hee aun de Kranke deed. 3Oba Jesus jinkj enopp oppem Boajch un sad sikj doa met siene Jinja dol. 4Daut wia oba daut Passafast dicht bie, de Juden äa Fast. 5Aus Jesus de Uagen opphoof un sach, daut väl Menschen no am kjeemen, säd hee to Filippus: Wua kjennen wie Broot kjeepen, om daut dise äten kjennen? 6Dit säd hee oba, om am to vesieekjen; dan hee selfst wist, waut hee doonen wull. 7Filippus auntwuad am: Fa 200 Dinoa Broot rieekjen fa an nich too, om daut een jiedra een bät kjricht. 8Eena von siene Jinja, Andreas, Simon Petrus sien Brooda, säd to am: 9Hia es een kjliena Jung, dee haft fief Joaschtbrood un twee Fesch; oba waut es daut fa soo väl?

10[Oba] Jesus säd: Lot de Menschen sikj dolsaten. Oba doa wia väl Grauss opp de Städ. Doa saden sikj de Mana, onjefäa 5 000. 11Oba Jesus naum de Brood, un aus hee jedankt haud, deeld hee daut an ut, dee doa sauten; soo uk de Fesch, sooväl aus see wullen. 12Aus see oba saut wieren, säd hee to siene Jinja: Saumelt dee äwajebläwne Brocken, daut nuscht vekjemt (schlajcht woat). 13Donn saumelden see 12 Hauntkjarw met Brocken von dee 5 Joaschtbrood, von dän, de doa jejäten hauden, äwableewen.

14Aus de Menschen daut Wunda sagen, daut Jesus deed, säden see: Disa es Woarhauft de Profeet, dee enne Welt komen sull. 15Doa Jesus erkjand, daut see komen un am jriepen wullen, om daut see am toom Kjennich muaken, veschwinjt hee wada, auleen oppem Boajch.

Jesus jeit äwa daut Wota

16Oba aus et Owent jeworden wia, jinjen siene Jinja rauf nom Mäa, 17un see stieejen en daut Schepp, un fuaren äwa daut Mäa no Kapernaum. Un daut wia aul diesta jeworden, un Jesus wia noch nich no an jekomen; 18un daut Mäa wort onruich, endäm een stoakja Wint blosd. 19Aus see onjefäa 25 ooda 30 Stadien (vea ooda fief Kilomeeta) jeroodelt hauden, sagen see Jesus oppem See gonen un noda nom Schepp komen, un see enjsten sikj. 20Oba hee säd to an: Ekj sie daut, enjst junt nich! 21See wullen am em Schepp nämen, un plazlich wia daut Schepp aum Launt, wua see hanfuaren.

Vom Läwensbroot

22Aum näakjsten Dach, aus daut Volkj, daut aun de aundre Sied vom Mäa stunt, sagen daut doa kjeen aundret Schepp wia, aus blooss jant, en däm siene Jinja jestäajen wieren, un daut Jesus nich met siene Jinja em Schepp jestäajen wia, oba siene Jinja auleen wajch jefoaren wieren 23(doa kjeemen oba aundre Schäp von Tiberias, dichtbie aun däm Plauz, wua see daut Broot jejäten hauden, nodäm de Har jedankt haud), 24aus daut Volkj sach, daut Jesus nich doa es, siene Jinja uk nich, stieejen see enne Schäp un kjeemen no Kapernaum un sochten Jesus.

25Un aus see am aune aundre Sied vom Mäa jefungen hauden, säden see to am: Rabi, wanea best du hiahäa jekomen? 26Jesus auntwuad an un säd: Woarhauft, woarhauft, saj ekj junt: Jie sieekjen mie nich wiels jie Wunda (Tieekjens) sagen, oba wiels jie von de Brood jejäten haben un saut worden. 27Oabeit nich fa daut Äten, daut vejenkjlich es, oba fa daut Äten, daut doa em eewje Läwen blift, daut de Menschensän junt jäwen woat; dan däm haft Gott de Voda bestädicht. 28Donn säden see to am: Waut sell wie doonen, om de Woakjen Gottes to wirkjen? 29Jesus auntwuad un säd to an: Dit es daut Woakj Gottes, daut jie aun däm jleewen, däm hee jeschekjt haft.

30Donn säden see to am: Waut deist du fa een Wunda, om daut wie seenen kjennen un die jleewen? Waut wirkjst (deist) du? 31Onse Vodasch auten de Maunajrett enne Wieste, soo aus jeschräwen steit: Broot utem Himmel jeef hee an to äten. {Neh.9,15} 32Donn säd Jesus to an: Woarhauft, woarhauft, saj ekj junt: Nich Moses jeef junt daut Broot vom Himmel, oba mien Voda jeft junt daut woarhauftje Broot utem Himmel. 33Dan daut Broot Gottes es dee, dee utem Himmel erauf kjemt un de Welt daut Läwen jeft. 34Donn säden see to am: Har, jeff ons aulentiet dit Broot. 35Oba Jesus säd to an: Ekj sie daut Läwensbroot: Wäa no mie kjemt, woat nich hungren, un wäa aun mie jleeft, woat niemols mea darschten. 36Oba ekj ha junt daut jesajcht, daut jie mie uk jeseenen ha un doch nich jleewen. 37Aules, waut mie de Voda jeft, woat no mie komen, un wäa no mie kjemt, däm woa ekj nich rut steeten; 38dan ekj sie vom Himmel raufjekomen, nich om mienen Wellen to doonen, oba däm sien Wellen, dee mie jeschekjt haft. 39Dit es oba däm sien Wellen, dee mie jeschekjt haft, daut ekj von aul däm, waut hee mie jejäft haft, nuscht velia, oba daut ekj dee aum latsten Dach oppwakj. 40Dan dit es mien Voda sien Wellen, daut jiedra, dee däm Sän sitt un aun am jleeft, daut eewje Läwen haft; un ekj woa am aum latsten Dach oppwakjen.

41Donn grunsten de Juden äwa am, wiels hee säd: Ekj sie daut Broot, daut vom Himmel rauf jekomen es; 42un see säden: Es disa nich Jesus, Josef sien Sän, däm sien Voda un Mutta wie kjanen? Woo sajcht dan disa: Ekj sie vom Himmel rauf jekomen?

43Doa auntwuad Jesus un säd to an: Grunzt nich unjarenaunda. 44Kjeena kaun no mie komen, buta, daut de Voda, dee mie jeschekjt haft, am trakjt; un ekj woa am aum latsten Dach oppwakjen. 45Daut steit enne Profeeten jeschräwen: «Un see woaren aula von Gott jelieet sennen». {Jes.54,13} Een jiedra, dee von Voda jehieet un jelieet haft, kjemt no mie. 46Nich daut irjentwäa däm Voda jeseenen haft, buta däm, dee von Gott es, dee haft däm Voda jeseenen. 47Woarhauft, woarhauft, saj ekj junt: Wäa [aun mie] jleeft, haft eewjet Läwen. 48Ekj sie daut Läwensbroot. 49June Vodasch ha Maunajrett enne Wieste jejäten un sent jestorwen. 50Dit es daut Broot, daut vom Himmel rauf kjemt, om daut maun doavon at un nich stoaft. 51Ekj sie daut läwendje Broot, daut utem Himmel rauf jekomen es; wan wäa von disem Broot at, soo woat hee en Eewichkjeit läwen. Oba daut Broot, daut ekj jäwen woa, es mien Fleesch, daut ekj jäwen woa fa daut Läwen de Welt (ooda om daut de Welt läwen kaun).

52De Juden streeden sikj unjarenaunda un säden: Woo kaun disa ons sien Fleesch to äten jäwen? 53Donn säd Jesus to an: Woarhauft, woarhauft, ekj saj junt: Wan jie nich dän Menschensän sien Fleesch äten un sien Bloot drinkjen, (jejäten, jedrunken ha) soo ha jie kjeen Läwen en junt selfst. 54Wäa mien Fleesch at un mien Bloot drinkjt, haft eewjet Läwen, un ekj woa am aum latsten Dach oppwakjen; 55dan mien Fleesch es daut rechtje (woarhauftje) Äten, un mien Bloot es woarhauftja Drunk. 56Wäa mien Fleesch at un mien Bloot drinkjt, blift en mie un ekj en am. 57Soo aus de läwendja Voda mie jeschekjt haft un ekj läw derch (wäajen) däm Voda, soo uk, wäa mie at, woat uk derch mie läwen. 58Dit es daut Broot, daut utem Himmel rauf jekomen es. Nich soo aus de Vodasch auten un storwen; wäa dit Broot at, dee woat läwen en Eewichkjeit. 59Dit säd hee enne Sienagog, aus hee lieren deed en Kapernaum.

Jesus siene Räd woat nich aunjenomen – Daut Bekjantnis von Petrus – Een Hanwies opp däm Veroda

60Väle von siene Jinja, dee daut jehieet hauden, säden: Dise Räd es hoat; wäa kaun de hieren? 61Doa oba Jesus bie sikj wist, daut siene Jinja doaräwa grunzten, säd hee to an: Oajat junt dit? 62Wan jie dan däm Menschensän seenen woaren doahan noppfoaren, wua hee verhäa wia? 63De Jeist es daut, dee läwendich moakt; daut Fleesch nuzt nuscht. De Wieed, dee ekj to junt jerät ha, sent Jeist un sent Läwen; 64oba doa sent atelje mank junt, dee nich jleewen. Dan Jesus wist von Aunfank aun, wäa daut sent, dee nich jleewen, un wäa daut es, dee am veroden wudd. 65Un hee säd: Doarom ha ekj junt jesajcht, daut kjeena no mie komen kaun, daut es am blooss vom Voda jejäft.

66Von doa aun jinjen väle siene Jinja trigj un jinjen nich mea met am. 67Donn säd Jesus to de 12: Veleicht well jie uk wajch gonen? 68Simon Petrus auntwuad am: Har, no wäm sell wie gonen? Du hast eewje Läwenswieed; 69un wie ha jejleeft un erkjant (jleewen un weeten), daut du [de Christus] de [Sän vom läwendjen Gott] Heilja Gottes best. 70Jesus auntwuad an: Ha ekj nich junt, de 12, utjewält? Un von junt es eena een Diewel? 71Hee räd oba vom Judas, Simon sien Sän, dän Iskariot, dan disa sull am veroden, hee, dee eena von de 12 wia.

Currently Selected:

Johanes 6: PBJHF

Highlight

Copy