Luka 14

Yesu aposha umulwele

1Pakasuba kamo ake Sabata, Yesu ayile mukulya kunanda yamukulu umo wa Bafalisi. Nomba abantu balikumulolesha. 2Elo umuntu umo uwo amolu namaboko afimbile, ayishile kuli Yesu. 3Yesu afumbile abasambishi ba Mafunde na Bafalisi ati, “Napo ifunde lyesu lyalisuminisha ukuposha pe Sabata nangula iyowo?”

4Nomba bo tabasoselepo akantu. Elo Yesu abulile umuntu ngulya nokumuposha. Panuma yaku mfi, amwebele ukuti aye. 5Elo Yesu asosele kuli bo ati, “Kati umo uwaku mwebo ali nomwana umwalalume nangula intungu, elo nga chakuti chimo ichaku mfi chawila muchilindi pe Sabata, napo tekuti muye bwangu penka pe Sabata nokumufumyamo?”

6Nomba bo tabakwetepo chakwasuka pali nchi.

Ukuyichefya nokupokelela

7Ulo Yesu abwene bambi abayitilwe balikusala ififulo ifiweme, bonse abebele ichelusho nchi. 8Asosele ati, “Ulo umuntu akwita kukulya ukwapabwinga, wiyikalapo pachipuna ichamuchinshi pantu kwingaba umuntu umbi uuchindeme uwitilwe ukuchila webo. 9Nomba, uumwitile bonse babili, kuti ayisa kuli webo nokukweba ati, ‘Leka ngu abule nchi chifulo.’ Epo webo wakuba nensoni pakwikala pachipuna ichitali chamuchinshi. 10Ulo wayitwa koya ukekale pachipuna ichitali chamuchinshi. Nga uukwitile ayisa kuli webo nokusosa ati, ‘Isa nkuno, we munanji, pachifulo ichamuchinshi,’ kuti chakuletela umuchinshi pali bonse abetilwe. 11Pantu onse uuyikusha akuchefekwa, nangulya uuyichefya akuchinshikwa.”

12Yesu asosele kuwamwitile mukulya ati, “Ulo watebeta ifyakulya fyakasuba nangula ifyachungulo, wiyesha ukwita ifibusa fyobe, nangula bawenu, nangula abamukowa obe, nangula abena mupalamano bobe abachindama. Pakuti nabo bakwisa kukwita, namuli nji nshila wakupelelwamo fimo mufintu wabachitile. 13Nomba ulo wawamisha ifyakulya, ita abachula, abafungauka imibili, efilema nempofu. 14Elo webo wakupelwa ishuko, pakuti tabakwetepo ifyakukubwesesha. Lesa akwisa kukulambula ulo abalungama bakwisa kubuka kubafwa.”

Ichelusho chamutebeto uukulu

(Mat. 22.1-10)

15Ulo umuntu umo pali bo abali na Yesu pakulya aumfwile mfi, aebele Yesu ati, “Bakuba nokusekelela abo abakwisa kulya umutebeto Mubufumu bwaku Lesa!”

16Elo Yesu asosele kuli ye ati, “Kwali umuntu uwawamishe ifyakulya ifinji nokwita abantu abenji. 17Ulo yafikile inshita yamutebeto, atumine umupyungi wakwe ukuya kweba abayitilwe ati, ‘Iseni, ifintu fyonse tulipekenye!’ 18Nomba bonse batatikile ukufwaya umwakukanina. Uwakubalilapo aebele umupyungi ati, ‘Nebo elo nashita ibala, nkoya mukubona ifyo lili. Napapata banakilileko.’ 19Umbi asosele ati, ‘Nebo nashita intungu ishamakongwa asano, ndi munshila ukuya mukushesha. Napapata banakilileko.’ 20Umbi naye asosele ati, ‘Nebo naupa lelo, napamulandu ngu tanshayiseko iyowo.’

21“Elo ngu mupyungi alibwelele nokweba wishikulu mfi fyonse. Umwine wananda alikalipile ukwinekantu nokweba umupyungi wakwe ati, ‘Endesha, koya mumisebo namutushila tunini utwamumusumba. Wite abachula, abafungauka imibili, impofu nefilema.’ 22Ulo umupyungi abwelele, asosele ati, ‘Bashikulu, ifyo mwasosa filichitikilwe, nomba ichifulo eko chili umwakwikala nabambi.’ 23Elo wishikulu amwebele umupyungi wakwe ati, ‘Koya mumisebo iyalola mumisumba namutushila tunini, ubakakatishe abantu ukuti bese benjile munanda ukuti yiwule. 24Nkomweba ati, pabantu mbalya abakene ubwite tapakabepo nangu umo uwakwisa kulyako imitebeto yanji iyachungulo!’”

Ichilambu chingapelwa mukuba uwakusambila

(Mat. 10.37-38)

25Ulo amabumba abantu alikuya pamo na Yesu, alyalukile nokuti kuli bo, 26“Onse uwakwisa kuli nebo tekuti abe uwakusambila wanji, kuntu antemwe ukuchila bawishi nabanyina, abakashi nabana bakwe, bawakwe nabankashi shakwe, nangula ubumi bwakwe. 27Onse uutapintapo umutashi wakwe nokunkonka talingile ukubapo uwakusambila wanji. 28Nga umo uwaku mwebo akopekanya ukwimaka ichiteba, pakubala alekala nokupenda indalama alinokuposapo pakuti abone kati alikwete indalama shakushilisha umulimo. 29Atachitile mfi, ye tekuti abepo nefiso fyakupwa ukwimaka ichiteba panuma yakwimba umufulwa. Bonse abakubona mfi bakwisa kumusekuluka. 30Elo abantu bakusosa ati, ‘Ngu muntu atatikile ukwimaka, kuntu afilwa ukupwisha ngu mulimo!’ 31Nimfumu ndo iyishibile ukuti umulwani wayiko akofwaya ukulwisha ichalo chakwe alikwete abashilikali amakana amakumi abili, utangekala bwangu panshi nokulanguluka kati abashilikali bakwe abali amakana ikumi nga kuti balwa nokuchimfya imfumu inakwe iikoyisa? 32Kati tayikoselepo, ikotuma intumi ukuya kukumanya njilya yinakwe ulo yena ichili apatali ukuti basoshanye ifyamutende. 33Yesu ashilishe nokuti, ‘Munshila imo yenka, takupo nangu umo uwingaba uwakusambila wanji, kuntu nga asha fyonse ifyo aakwata.’”

Umuchele uukubulukile

(Mat. 5.13; Mk. 9.50)

34“Umuchele uuweme, kati umuchele wakubuluka, mba ukoyisa kulowa nendo? 35Taulingilepo ukubika mwibala nangula pamufundo, kuntu ukoposwa bwaka. Uyo uukwete amatwi aakumfwa, omfwe!”

Currently Selected:

Luka 14: LalaNT

Highlight

Copy