Luka 13

Fuma kumabifyo obe nangula ukufwa

1Pali njilya nshita, abantu bambi baebele Yesu ifyabena Galili, abo Pilato#13.1 Pilato: Aali intungulushi ku Yudeya. Abena Galili balishile ku Yudeya mukulomba kunanda yaku Lesa. Nomba bo balikwimya inkondo inshita ishinji. Elo Pilato alengele ukuti bamo muli bo bepayikwe ulo balikupupila. Tapapo pambi apo twingapenda pali mfi. ayipeye nokusankanya umulopa wabo pafipupo ifyo balikupela kuli Lesa. 2Yesu abasukile ati, “Pamulandu wakuti abena Galili babepayile muli nji nshila, napo mwebo mukolanguluka ukuti mba bantu bali nimbifi ukuchila abena Galili bonse? 3Iyowo! Nakambi nkomweba nati, kati tamukolekapo ukuchita ububi, bonse mwakwisa kufwa kubati nimulya bafwilile. 4Mba balya bantu ikumi na basano na batatu abamu Siloamu#13.4 Siloamu: Amashiwi nga asangwa bwaka penka mpa. Boneni ubulondoloshi pali Yoh. 9.7. abafwile ulo ichiteba chabawilile? Napo mwebo mukolanguluka ukuti mba bali ababi ukuchila abantu bonse abali mu Yelusalemu? 5Iyowo! Nomba nga tamwalapilepo, mwakwisa kufwa kubati nimulya bafwilile.”

Ichelusho chamukunyu uutatwalapo ifitwalo

6Epo Yesu abebele nchi chelusho ati, “Kwalipo umuntu uwali nechiti chamukunyu ichalikukula mwibala lyampesha. Bumbi bushiku, alile mukufwayako ifitwalo, kuntu tafisangileko. 7Elo asosele kumulimi webala ati, ‘Bona mumyaka itatu nji yapita ndesa mukufwayako ifitwalo fyamakunyu, kuntu nshisangako nangu amo. Chiteme! Mba nindo chikolila bwaka umushili?’ 8Nomba umulimi ayasukile ati, ‘Bashikulu, chilekeni nguno wenka umwaka, nakwimba mumbali nokubikamo umufundo. 9Kati chakutwala umwaka ukoyisa, chiweme, kuntu kati tachakatwalepo, elo mwakwisa kuchitema!’”

Yesu aposha umwanakashi ichilema pe Sabata

10Pakasuba kamo ke Sabata, Yesu alikusambisha munanda yakulombelamo Lesa. 11Mulya mwali umwanakashi uwali nomupashi uubi uwamulengele ukuti abe umulwele imyaka ikumi na isano na itatu. Echo alikonkomene umusana, talikololokapo. 12Ulo Yesu amubwene, alimwitile. Elo amwebele ati, “We mwanakashi, wakakulwa kubulwele bobe!” 13Abikile amaboko akwe pali ye, bwangu-bwangu alyololokele, epo atatikile nokutota Lesa.

14Nomba umukulu uwamunanda iyo alikalipile pantu Yesu aposeshe umuntu pe Sabata. Epo asosele kubantu ati, “Kwaba inshiku shisano nabumo isho tulingile ukupyunga, iseni muli nshilya nshiku mukuposheka, kuntu pe Sabata tepopo!”

15Elo Bashikulu balimwasukile ati, “Mwe bakutumpayika! Kanshi mukati kenu tekuti mukakulepo ing’ombe yenu nangula punda wenu mwichinka nokuyitwala mukunwa amenshi pakasuba ke Sabata? 16Nomba ngu wamulupwa lwakwa Abulahamu uwo Satana asunga imyaka ikumi na isano na itatu, kanshi tekuti akakulwepo pakasuba ke Sabata?” 17Ukwasuka kwaku Yesu kwalengele utupondo twakwe ukuba nensoni, kuntu abantu bonse balisekelele pafintu fyonse ifyakushimbwisha ifyo achitile.

Ichelusho chaluseke lwa Masitadi

(Mat. 13.31-32; Mk. 4.30-32)

18Yesu afumbile ati, “Mba bufumu bwakumulu bwapalana nendo? Nikundo ningabulinganyako? 19Bwaba kubati kaluseke kamasitadi akanini ako umuntu abulile nokukabyala mwibala. Kalikulile nokuba kubati chiti ichikulu, nefyuni fyalishile nokupikamo ifinsa mumisambo yachiko.”

Ichelusho chamimena

(Mat. 13.33)

20Nakambi Yesu alifumbile ati, “Nikundo ningabupalanyako Ubufumu bwaku Lesa? 21Ningabupalanyako nemimena iyo umwanakashi ayabikile muli bansako batatu, nokufuba umufuba ukufikila onse watutumuka.”

Umulyango uunini

(Mat. 7.13-14,21-23)

22Yesu apitile mumisumba namumishi, alikusambisha ulo ali mulwendo lwakuya ku Yelusalemu. 23Umuntu umo alimufumbile ati, “Mwe Mfumu, kanshi bantu banini bakupuluka?”

Yesu alibasukile ati, 24“Esheni ukwinjila pamulyango uuche, pakuba mukasuba kakumupwilo abantu abenji bakafwaya ukwinjila, nomba bakwisa kufilwa. 25Umwine wananda akwisa kwimakana nokwisalako kumulyango, ulo mwebo mwakwimakana kunse nokutatika ukukonkonsha kuchibi nokweba ati, ‘Twiswileniko we Mfumu!’ Ye akwisa kumwasuka ati, ‘Tanshishibilepo noko mwafuma!’ 26Elo namwe mwakwasuka mwati, ‘Twalile nokunwa nenu, mwasambishe namumusumba wesu!’ 27Nomba akusosa nakambi ati, ‘Tanshishibilepo noko mwafuma mwebo. Fumeni mpa mwe bachita ububi!’ 28Echo kukaba ukulila nokukwesanya ameno ulo mwakubona Abulahamu, Isake, Yakobe na basoseshi bonse mu Bufumu bwaku Lesa, ulo mwebo mwakuposwa panse! 29Abantu bakufuma konse kumutule-suba nakumboshi, kukapinda kamulyo nakuchipiko, bakwisa kwikala pamo mukulya umutebeto mu Bufumu bwaku Lesa ubutapwa. 30Epo abali abapanuma ebakuba abapantanshi, nabo abali pantanshi ebakuba abapanuma.”

Yesu atemwesha umushi wa Yelusalemu

(Mat. 23.37-39)

31Penka pali njilya nshita, bamo abamuba Falisi bayishile kuli Yesu nokuti kuli Ye, “Ukowamina ukufuma mpano, pantu Helodi akofwaya ukukwipaya.”

32Yesu alibasukile ati, “Kamuya mukamwebe uyo mumbwe ati, ‘Nebo nkofumya imipashi iibi mubantu nokubaposha muli nkano kasuba namayilo, elo pakasuba akakulenga shitatu eko nakushilishamo umulimo wanji.’ 33Nomba nebo ningile ukuba palwendo lelo, mayilo, nobushiku bwakonkapo. Nachine tachawamapo ukuti umusoseshi epayilwe kumbi, kuntu mu Yelusalemu mwenka.

34“Yelusalemu, Yelusalemu! We wipaya abasoseshi nokulasa amabwe abatumwa baku Lesa! Ilinji line nafwayile ukulonganya abana bobe nga mfilya nyina-nkoko afukatila utwana mumapindo akwe, kuntu webo walikene! 35Bona, inanda yaku Lesa yenu, yakuba ichibolya. Nachine nkomweba ati, tamwakambonepo nakambi iyowo, ukufikila mukasuba mwakwisa kusosa ati, ‘Alishuka uyo uukoyisa mwishina lyaku Bashikulu.’”

Currently Selected:

Luka 13: LalaNT

Highlight

Copy