Yohane 21
21
Yesu abwenekela kubakusambila basano na babili
1Panuma yamfi, Yesu abwenekele nakambi kubakusambila bakwe kuli Bemba wa Tibeliyasi.#21.1 Bemba wa Tibeliyasi: Ebemba wa Galili wine (Yoh. 6.1). Mfi efyo ayilangile. 2Simoni Petulo, Tomasi (Uyo uwalikwitwa Mpundu), na Natanayeli (uyo uwafumine ku Kana waku Galili), nabana baku Sebedi, nabambi babili abakusambila baku Yesu, bali pamo bonse. 3Simoni Petulo asosele kubakusambila banakwe ati, “Nkoya mukwipaya inswi.”
Nabo basosele ati, “Nafwe tukoya nobe.” Epo baliile kwinjila mubwato. Nomba muli mbulya bushiku tabayipeyemo inswi nangu imo. 4Ulo akasuba kali kufuma, Yesu ayimakene pamulundu. Elo abakusambila bakwe tabayishibilepo ati eye. 5Elo Yesu abafumbile ati, “Mwe balumbwana, napo tamwipeyepo nangu kamo?”
Balimwasukile ati, “Iyowo, tatwipeyepo nangu kamo.”
6Elo asosele kuli bo ati, “Poseni isumbu lyenu kulubali lwamulyo lwabwato, elo mukoyipaya.” Epo baposele nokwipaya inswi ishinji ichakuti chalibakangile ukukulila isumbu kubwato.
7Penkapo uwakusambila uwo Yesu atemenwe asosele kuli Petulo ati, “Ni Bashikulu!”
Ulo Petulo aumfwile ati ni Bashikulu, abulile ilaya lyakwe nokufwala. (Pakuba alifulile amalaya pamulandu wamulimo.) Ulo ashilile ukufwala, achilukile mumenshi. 8Abakusambila bambi bayishile kumulundu mubwato uku balekula isumbu umwayiwile inswi. Bali bwaka apepi nakumulundu nangula amatabi umwanda umo. 9Ulo bafumine mumenshi nokuya pamulundu, babwene inswi ishakocha shili pamulilo wamafyanga nomufuba pambali. 10Elo Yesu asosele ati, “Leteni inswi shimo isho mwayipaya.”
11Elo Simoni Petulo achilukile mubwato nokufumya isumbu umo umwali inswi ishikulu shenka-shenka. Shonse pamo shali umwanda umo namakumi asano nashitatu. Nangu inswi shafulile mfi, kuntu isumbu talyalepukilepo iyowo. 12Yesu asosele kuli bo ati, “Iseni mwikule.” Takupo nangu umo uwabakusambila uwafumbile ati, “Niwe nani?” Pantu balishibile ati ni Bashikulu. 13Yesu abulile umufuba nokubapela ukuti balye. Achitile mumo mwenka nenswi.
14Nji yali nomba enshita yachitatu iyo Yesu ayilangile kubakusambila panuma yakubuka kubafwa.
Yesu na Petulo
15Panuma yakulya Yesu asosele kuli Petulo ati, “Simoni mwana Yohane, napo walintemwa ukuchila mba?”
Simoni alyasukile ati, “Ina Bashikulu, mwebo mwalishiba ati nalimutemwa.”
Elo Yesu amwebele ati, “Lisha twana twambelele shanji.” 16Inshita iyachibili Yesu amufumbile ati, “Simoni, mwana Yohane, napo walintemwa?”
Naye alimwasukile ati, “Ina Bashikulu, mwebo mwalishiba ati nalimutemwa.”
Yesu amweba ati, “Lisha imbelele shanji.” 17Inshita iyachitatu, Yesu amufumba nakambi ati, “Simoni, mwana Yohane, napo walintemwa?”
Petulo abele nechikonko pantu Yesu amufumbile nomba umuku wabutatu ati, “Napo walintemwa?” Epo naye aasukile ati, “Bashikulu, mwebo mwayishiba ifintu fyonse. Mwalishiba ukuti nalimutemwa!”
Yesu amwebele ati, “Lisha imbelele shanji. 18Nachine nkokweba ati, ulo wali umulumbwana, walikwifwika wemwine nokuya konse walikufwaya ukuya, kuntu ulo wakukota, wakwisa kutambulula amaboko obe, umuntu umbi akwisa kukukaka nokukutwala uko utakofwayapo.” ( 19Mukusosa mfi, Yesu alikumusontela inshila iyo Petulo akufwilamo ukuleta umuchinshi kuli Lesa.) Ulo Yesu asosele mfi, amwebele ati, “Nkonka.”
Yesu nowakusambila umbi
20Petulo alyalukile nokubona uwakusambila umbi uwo Yesu atemenwe akomukonka. Engulya uwapalamine kuli Yesu ulo bali pakulya umulalilo uwakumupwilo, nokumufumba ati, “Bashikulu, mba niwisa uukoyisa kumwembula?”#Yoh. 13.25 21Ulo Petulo amubwene, afumbile Yesu ati, “Bashikulu, mboyu muntu nishani?”
22Yesu alimwasukile ati, “Kati nebo nkofwaya ukuti ekalilile ukufikila apo nakubwelela, ngechi chindo kuli webo? Nkonka nebo epela!”
23Nga mashiwi asalanganine mubakusambila baku Yesu ati ngu uwakusambila takafwepo. Nomba Yesu taebelepo ukuti tayise kufwapo. Asosele ati, “Kati nebo nkofwaya ukuti ngu ekalilile ukufikila apo nakubwelela, ngechi chindo kuli webo?”
24Uwakusambila ngu ewapele bukamboni kuli mfi fintu, nakambi nokufilemba ewafilembele. Epo twalishiba ukuti bukamboni bwakwe bwakwebesha.
Amashiwi aakumupwilo
25Nomba ekofili ifintu ifinji ifyo Yesu achitile. Nga chakuti fyonse fyalembelwe chimo-chimo, nkolanguluka ukwebati ichalo nga tekuti chibonepo inchende yakubikapo amabuku aangalembwa.
Currently Selected:
Yohane 21: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
