Imilimo ya batumwa 1
1
1Mwe batemwekwa ba Teyofilasi:
Mwibuku lyanji lyakwamba nalilembele fyonse ifyo Yesu atatikile ukuchita nokusambisha ukufuma pakwamba 2ukufikila akasuba apintilwemo kumulu. Ulo tangapintwa kumulu, Yesu abalile akonkobesha, nefiso fya Mupashi Wabuta, abantu abo asalile ukuba abatumwa bakwe. 3Panuma yakufwa nokubuka, aliilangile kuli bo munshila shapusana-pusana. Abonekele kuli bo nokusosa nabo ifyabumi bwaku Lesa munshiku amakumi ane. 4Ulo Yesu ali nabo pamo, alibakonkobeshe ati, “Mwifumamo mu Yelusalemu iyowo, kuntu mulindile ichabupe icho Bata bamulayile ukubati nimfilya namwebele kale. 5Yohane alikubatisha mumenshi, kuntu munshiku ishinini mwebo mwakubatishiwa no Mupashi Wabuta.”
Yesu apintwa kumulu
6Ulo abatumwa balongene pamo, bafumbile Yesu ati, “Napo ninduno lwenka mukobwesesha aba Isilaeli ubufumu?”
7Yesu abasukile ati, “Inshita nenshiku ni Bata ebapima abene mufiso fyabo. Temulimo wenu ukwishiba ulo mfi fyakuchitika. 8Nomba ulo Mupashi Wabuta wakwisa palimwe, nachine mwakukwata ifiso ifyakuba bakamboni banji mu Yelusalemu, mu Yudeya monse, pamo namu Samaliya, kufikila nakumpelo yachalo chonse.” 9Ulo Yesu ashilile ukusosa mfi, apintilwe kumulu nabakusambila bakololesha ukufikila ulo ikumbi lyamufishile.
10Ulo bali kulolekesha kumulu uko Yesu alikuya, abalalume babili abafwite ifitubile bayishile kwimakana apo bali. 11Abalalume mba basosele ati, “Mwebo mwe bena Galili, Nindo mwimakanine mpano nokulolesha kumulu? Ngu Yesu uwapintwa kumulu ukufuma apo muli, akubwela nakambi kubati fintu mwamubona akoya kumulu.”
Uwabulile ichifulo chakwa Yuda
12Nomba abatumwa balibwelelemo ku Yelusalemu, ukufuma ku Lupili lwa Maolife, ulwaba apepi na Yelusalemu, ulwendo ulwipi ukwinekantu. 13Ulo bayinjile mumushi, bayile munanda muchipinda chapamulu umo balikwikala. Mba niba Petulo, Yohane, Yemusi, Andileya, Filipo na Tomasi, Mateyo, Yemusi mwana Alifeyo na Simoni uwachinchila na Yuda mwana Yakobe umbi. 14Mba bonse balikulongana libili-libili mukulomba pamo na Maliya banyina baku Yesu nabawakwe Yesu pamo nabanakashi bambi.
15Ulo papitile inshiku shinini, kwali ukulongana kwabachetekela bonse. Pamo bafikile kubati mwanda umo namakumi abili. Elo Petulo ayimakene pakati kabo nokusosa ati, 16“Mwe bawesu, ifyalembwa Mumalembo ifyakwa Yuda fyali nokuchitika. Pakuti Mupashi Wabuta asosele ukupitila muli Davide pamulandu wakwa Yuda, uwatanjilile abantu abayikete Yesu. 17Yuda ngulya ali umo wakufwebo ukuti abombe umulimo umo pamo nafwebo.”
(18Yuda ashitile ibala nendalama isho asangile ukufuma kububi ubo achitile. Nkulya eko awile panshi ubwifuneme nokupanduka, namala akwe kaafuma panse. 19Abantu bonse abekala mu Yelusalemu balyumfwile amashiwi nga. Elo mululimi lwabo baliinikile ibala ndilya ati Akelidama, ekweba ati, “Ibala lya Mulopa.”)
20“Pakuba chalilembwa mwibuku lya Malumbo ati,
‘Inanda yakwe ibe chibolya.
Elo kwibapo nomuntu uwakwikalamo iyowo!’
Nakambi chalilembwa ati,
‘Umuntu umbi akubula ichifulo chamulimo wakwe.’
21“Pamulandu ngu katusale umuntu umo uwali pamo nafwebo panshita Bashikulu Yesu bali nafwebo. 22Ukutatikila kunshita Yohane alikushimika ifyalubatisho ukufikila mukasuba ako Yesu apintilwemo kumulu ukufuma pali fwebo. Ngu abe kamboni pamo nafwebo ukuti Yesu alibukile kubafwa.”
23Elo babulilepo abalalume babili, Yosefe walikwitwa Basabasi,(nakambi uwayishibikwe nelyaku Yusitasi) pamo na Matiyasi. 24Elo balombele ati, “Mwe Mfumu, mwebo mwalishiba imitima yabantu bonse. Kanshi tulangeni uyo mwasalapo pali mba babili 25ukuti abule umulimo wabutumwa uyo Yuda ashile nokuya kuchifulo ichimulingile.” 26Ulo bapwile ukulomba, bachitile bumwine-mano. Elo Matiyasi asalilwe. Ngu apendelwe pamo nabatumwa ikumi naumo.
Currently Selected:
Imilimo ya batumwa 1: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
