Mateo 14

Eta maepenira ema Juan tikachasirikara'i

(Mc 6.14-29; Lc 9.7-9)

1Etaichu'i jena sacheana'i ema Aluresi, ema'i akenuka'i taye'e eta Galilea, masamairikapa eta náechejisi'a'i ema Jesús, 2tási'a maichapa, ena máewanachana: “Émara ema Juan Tikachasirikara'i, tichawa'i téchepuka te máekari, táitusiawa máituruka'i makuchuka eta tiáramikareana.”

3Taicha ema Aluresi mave'a'i esu Herodías, esu mayena'i ema maparape Filipo, taka'e étapa temerataka'i ema Juan. 4Taicha ema Juan maichapa ema Aluresi: “Wa'i tiuri eta pichakene'i pive'a'i esu pichinena, mayena'i ema piparape.” 5Taka'e ema Aluresi, mawara'a'i makapaka ema Juan, tipika'isera ema nasema'ini ena achaneana, taicha ema Juan, tétavikawa'i eta nasuapira'i, náimati'i ema eta émaira'i profeta. 6Tási'asera, títekapapa eta sache máijaremu'u ema Herodes, sutiari'i'i esu amaperu, suchicha esu Herodías. Tiúchukapa tírimaika te mamira'u ema Herodes, énapa ena machimarana'i, ema Herodes máurikaine'i ichape 7taka'e, ema majuracha eta maijarasiraya jákani suyasearuyare'i. 8Tási'a, esu amaperu suyaserekapa esu suena tája'a'ipuka eta suyasearuyare'i. Esu suena suímitukapa: Piyaseakayare ani píchaya:

–Píjarakanu eta ñichuti eñi Juan te kuruja.

9Taka'e, eta masamira'i eta juka suyasearu'i, ema rey Herodes ichapeine'i eta mapanerechira'i, tájinapasera máicharakawa'ini, taicha máechejiriruwaipa'i majurachaipa'i te namira'u ena machimarana'i eta máijarasirayare eta suyasearuyare'i esu. 10Taka'e, makawanairipipa nayuchatipikenu'apana ema Juan te makaerataiya'i; 11taka'e, námapaipa te kuruja eta machutini, náijarakapa esu amaperu, tási'a esu sujakapapa, suíjarakapa esu suena.

12Títekapanapa ena máimitureana'i ema Juan, nave'apa eta máke'eni, náekarapanapa. Tási'a, tiyananapa nametapana'i ema Jesús.

Ema Jesús máenikawaka ena kamurikeneana achaneana

(Mc 6.30-44; Lc 9.10-17; Jn 6.1-14)

13Te masamairikapa ema Jesús eta techakareana'i, tiawaku'apa te pakure makarichu'i tiyanapa terajikawa'i. Énasera ena achaneana náechapa eta mayanira'i, tiyananapa tipaikana'i nakapayapana. 14Te tiúkupaikapa ema Jesús te pakure, máima'apa ena kamurikeneana achaneana; majapanuwakaine'i eta máimairawaka'i ena, makanarakawakapa ena nakajumakeneana'i námakeneanapa'i. 15Taka'e te yatiyarepa, nakachakayapa ena máimitureana tási'a náichapa:

–Pimetakawaka ena achaneana, kápere'ipa, tiyere'iwaka'i eta pétiana. Táurikapa piwanekawaka ena nayanapa, nawachareka eta nanika, taicha ani tájina naviyawaima'i eta nanika.

16Ema Jesús májikapawakapa:

–Wa'i takamesa viwanekawaka nayana, íjaraka étina eta nanika.

17Ena nájikapapa:

–Wa'i tarataima'i, sinkuine eta juka pan, tási'a apikipa eta jima.

18Ema Jesús máichawakapa:

–Iáminanu ani.

19Taka'e, makawanairipipa náeja'a'apaika ena achaneana te muíjipa'i. Mave'apa eta sinkukene pan étapa eta apiki jima, máesenikapa te anuma, ma'asulupayachapa ema Viya, mayuvetukawakapa eta pan, tási'a, máijarakapa ena máimitureana, tási'a ena naijarakawakapa ena achaneana. 20Taka'e, námutupa, tisatu'eanapa eta nanisira'i, tási'a, tikaemachawanaicha'aware dóse'ikene saye ichape'iana eta tainikacha eta náemacharajiana'i. 21Ena tinikana'i, sinku milkeneana'i ena ajairana, eta náichapemuriwa'i, wa'ineni náimitupacha'ini ena esenana énapa ena amaperuana.

Ema Jesús mapaikanaucha eta une

(Mc 6.45-52; Jn 6.16-21)

22Te tamutupa, enewanepa mawaneka'i ema Jesús tiáwaku'ana eta te pakure ena máimitureana, tínapukanayare'i tiánuekana te apachara eta kákiure émasera manasiyarecha'a'i kametawanumayarecha'a'i naye'e ena achaneana. 23Te tamutupa eta makametawaira'i ema Jesús naye'e ena achaneana, tiyanapa tiápana'i taye'e eta mari. Tiyujarakayare'i taye'e. Étapa tavine'i eta yati, manasipa makarichu'i taye'e. 24Taka'e, te túpierekanapa eta napakure, tachimarakapa eta muraka tékatikawa, nákapaki'apa'i. Taka'e eta taepaku tae'acheyechapa'i eta napakure. 25Te tijararamapepa, naíma'apa ema Jesús mapaikanauchapa'i eta une. 26Eta naímaira'i ena máimitureana, tiaramekanaine'i tipiararemuri'anapa naka'epa:

–¡Kunare eta juka!

27Émasera ema Jesús maéchejikapa:

–¡Wa'i ekupika! ¡Nútichucha: Étumechawa!

28Tási'a, ema Pedro majikapapa:

–Te yátupipuka pítikene'i, piti Tata, piwanekanu núti apanaware nupaikanaucha eta une, nuwara'a nuyana nupauchavi te piavi'a'i.

29–Yare –majikapapa ema Jesús.

Enewanepa tiúkupaika te pakure ema Pedro. Tiyanapa mapaikanauchapa eta une, makapayakapa te mavi'a'i ema Jesús. 30Étasera eta máramesira'i taicha eta muraka tékatikawa, timutsera'awapaipa térikapaipa. Tási'a, tipiararekapa:

–¡Tata, nérikainapa!

31Énewanepasera makaratawauchapa ema Jesús eta makuchukuirayare'i. Tási'a, máichapa:

–¡Taja'a takayema ánipichu eta pikasiñawaira me Viya! ¿Taja'a takayema memaituka'i?

32Te tiáwaku'anapa ena apinana te pakureju'e, enewanepa temajakawa eta tékatikawa. 33Taka'e, namutu ena tiavi'ana'i te pakureju'e, tépuyumuri'anapa te mamira'u ema Jesús natsiukapa, naka'ewarepa:

–¡Jé'eware piti Tata, Machichakenévi'i ema Viya!

Ema Jesús makanaraka ena nakajumakeneana te Genesaret

(Mc 6.53-56)

34Taka'e, te apanapa sache, tiápechawanawarepa tiánuekana eta kákiure, títekapapa te awasare tikaijare Genesaret. 35Taka'e, ena achaneana náimatiwanepa eta émaira'i ema Jesús. Timetajirikakanapa náechapa namutu ena achaneana tikawasana'i te awasareana. Tiyananapa maye'e ema Jesús, námawakapaipa'i namutu ena nakajumakeneana, 36nayaseakawarepa ema eta máisapiraina'ini náemamajiaka eta tacheyarapi eta mamuiri'a, taka'e, nákani témamajiakanapa'i, enewanepaipa tinarakanapa'i.

Currently Selected:

Mateo 14: IGB

Highlight

Copy