Nyingnam 2

Darwknv Dowv aakunam

1 # Leb 23:15-21; Det 16:9-11 Vdwlo Pintikost aluv aakunamv, mvngjwngnv vdwv lvkobv dooku akin lo dookum toku. 2Dvminmabv nyido gvngv doogumdoori ngv gumnam jvbv kai alvbv svdu duto, okv bunu vdwgv dooku naam lo dulwk toku. 3Vbvrikunamv bunu ogu vmv mvriak taakar nam aingbv kaapatoku okv hoka akinakin lo mvsit karto. 4Darwknv Dowv lvkobv ho mvnwng nga aaku namv Dowv kvvbi gaam aingbv japdu kubv bunua mvtoku.

5Jerusalem lo Jius vdwv dookunamv, nyiamooku mvnwng lokv diringmooku mvnwng dormo nyi vdwv aakum toku. 6Vdwlo bunu so svdua tvvpapvdw, nyi nyitwnggo aakum toku. Bunu mvnwng ngv yaa mvngtoku, ogulvgavbolo akinakin bv mvnwng ngv mvngjwngnv vdwa bunu atugv gaambv japdubv tvvtoku. 7Mvngrimvngma okv kaasartabo mvngdukla bunu gokto, “So nyi japnv vdwv si Galili nyi jvbv! 8Si oguaingbv, vbvrikunamv, ngonu mvnwng ngv ho bunua ngonugv atugv gaam nga japdubv tvvdunv? 9Ngonu Partia lokv, Media, okv Elam; Mesopotamia lokv, Judia, okv kapadosia; Pontus okv Asia lokv gvngv, 10Prigia lokv, okv Pampilia lokv, Ijipt okv Sairen nvchi Libya mooku lokv. Ngonu kvvgonv Rom lokv gvngv, 11Jius okv Jentail judaism lo aakunv nyitwng anyiv, okv ngonu kvvgonv Kret okv Arabia lokv gvngv vjvka ngonu mvnwng ngv bunua ngoogv gaambv japdubv tvvdu Pwknvyarnv gv ogu kairungnv go rinam lvgabv!” 12Lamnam okv mvngbwk mabv, bunu akonv akonyi tvvka minsuto, “Si ogu gubvri?”

13Vbvritola kvvgonv mvngjwngnv vdwa giokw nyala, minto, “So nyi vdwv tvngkium nyapv!”

Pitar gv Doin

14Vbvrikunamv Pitar vringgola akin Apostol am lvkobv daktoku okv gamtv alvbv milinto bunua: “Okv yvvdw Jerusalem lo doonv vdwv nonu mvnwng ngv Jius aingbv ritoku, nga tvvriato okv klai ngo nonua mintodv si oguvdw. 15So nyi vdwv tvngmanv, oguaingbv no mvngdudw; si arugv kia baje mvngchikdu. 16Vmabvya, so si nyijwk Joel gv ogugo mingkunamv vvkv:

17 # Jol 2:28-32 ‘Pwknvyarnv minto, ogu gunyi ngo rirungre so sung ataranya alu lo:

Ngoogv Dowa ngo mvnwng gv aolo pwlwk jire.

Ngoogv doina, noogv kuunyilo okv nyimv vdwv minkar riku;

noogv nyipayapa vdwv nyikrw kaare,

okv noogv nyikam vdwv yuma maare.

18Vvka tikmabv, ngoogv nyira anyi, pakbu okv paknv loka,

Ngo aamure ngoogv Dow ho alunyi,

okv bunu minjire ngoogv doina.

19Ngo nyido aolo lamrwpadubv kaatamre

okv sichingmooku lvkwnglo kaasartabo more.

Hoka ka oyi, vmv, okv mvkwv doore;

20Donyiv nyikumare,

okv Pooluv oyi jvbv yalwngre,

Ahtu gv aamadvbv kairungnv okv yunglitnam alu lo.

21Okv vbvrikunamv, yvvdw Ahtunyi ringkudubv gokdunv um ringreku.’

22“Tvvgapto soogv gamchar am, Israel ribam vdwv! Jisu Najaret gv nyi go vv darwknv tulwkkunama kaatamto nonua lamrwpadubv okv kaasartabo bv Pwknvyarnv ninyigv lokv kaatamto. Nonu atubongv chinsudo sum, si nonugv pingkolo ritoku. 23#Mt 27:35; Mk 15:24; Lk 23:33; Jn 19:18 Ninyigv atubongv mvngdung lokv Pwknvyarnv mvngpv kunam ho Jisunyi bunu gvlo laklwk jitoku; okv nonuno rimurnv nyi vdwa ninyia daapo lo takki motoku. 24#Mt 28:5,6; Mk 16:6; Lk 24:5 Vbvritola Pwknvyarnv ninyia sinam lokv turkur motoku, ninyia jwkrw jitoku, ogulvgabv ninyia hv rila mato sinamv patwk doonv nyi jvbv naatung nyomare. 25#Miri 16:8-11 Dabid ninyigv lvkwnglo minto,

‘Hoogv dw mvnwng lo ngo Ahtunyi kaato,

hv ngoogv nvchilo dooto okv ngo adwkakunam kaamare.

26Okv vkvlvgabv ngo gvlo himpuv puulvk duku,

okv ngoogv gamcharv achialvbv alv duku.

Okv ngo, sidajvka ngo ka,

mvngjwng ngv doming gvvriku,

27vkvlvgabv no nga achialvbv siku sichingmooku lo tulatua mare;

noogv mvngjwngnv nyira nga nyibunglo yaalwk momare.

28No nga kaatamto singjiku lamtv nga,

okv noogv doonam lokv nga lvkobv himpu moto.’

29“Ngoogv ajin vdwa, Ngo nonua minda kalabv mindunv ngoogv yungnam abuapa Dvbv Dabid gv lvkwngbv. Hv sitoku okv svma nga ritoku, okv ninyigv nyibung ngv silu gudvbv ngonua lvkobv dooming gvdo. 30#Miri 132:11; 2Sam 7:12,13 Hv nyijwk gubv ritoku, okv Pwknvyarnv ogugo ninyia milv pvdw um hv chindu: Pwknvyarnv milv toku Dvbv Dabid aingnvgo, ninyigv husi lokv akonyi Dvbv bv mvre. 31Dabid kaapato Pwknvyarnv ogugo vngtvritv dunvdw aarinvlo, okv hv minto Kristo gv turkur kunam lvkwng lo,

‘Hv siku sichingmooku soka tulatua kumare;

ninyigv ayak vv nyibung boloka yaaku mare.’

32Pwknvyarnv Jisunyi sikunam lokv tukur motoku, okv sung ngonu mvnwng ngv jvjv nga kaarianvngv. 33Hv ka turkur kunv ngv Pwknvyarnv gv lakbik peelvbv doonv, ninyigv Abu lokv okv Darwknv Dowa ninyi naarwk sitoku, ninyigv milvnam lokv. No ogu gunyi vjv kaadunv okv tvvdunv si ninyigv jinamgo ho hv ngonua Darwknv Dowa jilwk toku. 34#Miri 110:1 Hv Dabid mato yvvdw nyidomooku tolobv chaakunv; vbvritola Dabid atuv mintoku,

‘Ahtu ngoogv Ahtunyi minto:

Soka dooto ngoogv lakbik kiambv

35ngo noogv nyimak am lvchu arwnglo vvpvma dvdvlo.’

36“Israel gv nyi mvnwng ngv, vbvritola hoka nonu chirungto si Jisu, yvvnyi nonu daapolo takipvdw, ho angv Pwknvyarnv gv mvkunam Ahtu okv Messiah!”

37Vdwlo nyi vdwv sum tvvpa pukudw, bunu mvnwng ngv achialvbv adwkakuto okv Pitarnyi minto okv kvvbi Apostol vdwaka, “Achiboru vdwv ngonu ogubv rire?”

38Pitar bunua minto, “Nonuno akinakinv rimur lokv lirung tokuka okv Jisu Kristo gv amin bv baptisma laato kuka, vbvribolo nonugv rimur am mvngnga jiriku; okv nonuno Pwknvyarnv gv jinam nga naarwk siriku, Darwknv Dowa. 39Pwknvyarnv gv milvpvvnamv nonua okv nonugv umvuu vdwa, okv mvnwng nga yvvbunu adu lokv—mvnwng nga ngonugv Ahtu Pwknvyarnv ninyi atubogv lvgabv goklwkto.”

40Pitar bunua dinchinam gaam minto okv hv mindwkkrwkla minto, “Alvmanv nyi vdwgvlo mvritririt aarinvpv nonuno ringsu laka!” 41Bunu vdwv awgonv mvngjwngto ninyigv doina okv baptisma naakunam, okv ho alulo hejar aom dvsv gobv nyitwnggo apam hoka aapwng toku. 42Bunugv dwa jila Apostol vdwgvlo risar sunya toku, kumkulo kumbam nyato, dvnam am jimi suto okv kummi suto.

Mvngjwngnv vdwgv lokv singdung

43Aigo lamrwpanam okv kaasartabo namgo ritoku Apostol lokv okv nyi mvnwng ngv kaalam paktola mvngto. 44#Nyim 4:32-35 Mvngjwngnv mvnwng ngv lvkin gubv nvchibv kumkulo kumbv ribv nyatoku okv bunugv yikungyira am ajinanying nga jimi sunya toku. 45Bunu vdwv atugv yikungyira okv ayi nga pyoktokula okv morko nga mvnwng ngv pingkolo akinakin gv ogugo dinchinam nga orpinorin sito. 46Alu logo yayaku bunu lvkobv Pwknvyarnv gv Naam arwnglo apam gubv kaarwksuto, okv bunugv dvnamtvngnam nga bunugv naamlo lvkobv, hapokv mvngpula okv nyaknyak bv dvbamto, 47Pwknvyarnv hartv la, okv nyi mvnwng gv alvbv mvngnam saknama himpala himpu nyatoku. Okv alu lokia Ahtu ringlin kunam vdwa bunugv apumlo aapwng momu toku.

Currently Selected:

Nyingnam 2: TAG

Highlight

Copy