Maarko 8

Laayɗaŋ mbuuruuca, wa kanakɗoh

1Ŋ mbeh caam, mboolo laayiɗ cohissa. Wa ɓa kaɗ po ɓa raakisɗi ñamaah, Yeesu ɓeeɗukka taalubeeciŋ ɗe, a woosa ɓa ne : 2« Ɓooɓii miskiɗ to, neeh kaahay ceɗi cii, ɓii na so, te ɓa raakisɗi ali ñamaah ; 3ŋ woo ɓa ne ɓa haadaat rook ɓarang ɗah, ɓa keenan ŋ waas. Raakiɗ ɓi puloh ɗisik usiɗ. » 4Taalubeeciŋ ɗe loffa ɗe ne : « Moo ! Ɓo' ɓayohan mbuuruuci min ɓa kap nde ŋ bilaf fii ? » 5A meekissa ɓa ne : « Ɗu raak mbuuru hend na ? » Ɓa loffa ɗe ne : « Mbuuru yasna-kanak. »

6Ŋ ineem, Yeesu woosa mboolnda ne ɓa ɓoofaat ŋ kehƴa. A ɓayya mbuuruuca yasna-kanak ca, a corkiɗta Kooh, a nguɗsoheeɗa ca, a eɗeeɗa taalubeeciŋ ɗe ca ne ɓa paysoh ca ; ɓa paysohha ca ɓooɓa. 7Ɓa nameen raak ɓi cuurund ƴin ndaam, a ɓayya ca, a corkiɗta Kooh nga ca, a woosa ne ɓa paysohaat ca mboolnda. 8Ɓooɓa ñammba po ɓa kappa ; tasiɗ ca nangɗohuusa, ca nikee dammba yasna-kanak. 9Ɓooɓa ñamee nikeen ŋ ɓak junni-nikiis (4000). Ƴutta, Yeesu woosa ɓa ne ɓa haadaat. 10Jaarra a aassa ŋ gaal na taalubeeciŋ ɗe, ɓa kaɗta ɗiska na woyse Dalmanuta.

Lawiiraŋ Farisen ca

11Wa ɓa ree ndaam, Farisen ca hayya, ɓa markiskeeɗa Yeesu an : Ɓa woosa ɗe ne a haɓɗaat firndeeni puloh ŋ Eel ci. 12Yeesu fuuppa sagu keeñ riifiɗ, a woosa ne : « Wa ye tah ɓooɓi woti meeksohee firnde ? Ñam na woyee ɗu wa te wa keeh, ɓa eɗsanɗi ali firnde. » 13A faɗta ɓa ndaam, a aasissa gaal ne ɓa coot ɓaka faahaŋ cookma.

14Taalubeeca alkoheen ɓayndoh mbuuru, ɓa raakee mbuuru yino dong ŋ gaala. 15Yeesu dennga ɓa an : « Tumaat moɗoɗ, wortukaat lawiiriŋ Farisen ci na wiŋ Herod. » 16Taalubeeca woyeeɗa ŋ harmban ɓa ne wa ina ɓa raakɗi mbuuru tah. 17A inahha ina ɓa woye, a woosa ɓa ne : « Wa ye tah ɗu woye ne : “ A ini ɓoo raakɗi mbuuru ? ” Ɗu inhisohɗi te ɗu inahɗi poyi e ? Ɗu raak keeñ ndengiɗ e ? 18Ɗu raakiɗ has. Ɗu minɗi minɗi hot e ? Ɗu raakiɗ nof. Ɗu minɗi minɗi kerah e ? Hanaa ɗu alkoh alkoh 19wa ŋ nguɗsoh mbuuruuca yatuus ca ŋ paysohha ca mboolnda raakee ƴaar junni-yatuus (5000) ? Tasɗohiica ɗu ɓayndohee nikee pañe riifiɗ hend na ? » Ɓa loffa ɗe ne : « Pañe ndaŋkiyaah na kanak (12). » 20A woyissa ɓa ne : « Moo wa ŋ nguɗsoh mbuuruuca yasna-kanak ca, ŋ paysohha ca ɓooɓa junni-nikiis (4000) ca nak ? Tasɗohiica ɗu ɓayndohee mbaɗi, ca nikee dammba riifiɗ hend na ? » Ɓa loffa ɗe ne : « Ca nikee dammba yasna-kanak. » 21A woosa ɓa ne : « Ɗu ris inhaaɗi poyi e ? »

Yeesu wirɗiɗ fuuliɗ ŋ Betsayda

22Wa ɓa kaɗ po Betsayda, a komuusa fuuliɗ, a kiimuusa ne a laal ɗe. 23Yeesu ammba fuulɗa ŋ yaah, a ɓayya ɗe po ɓa pulla kur ka, a tuhussa ŋ has ciŋ ɗe, a degga ɗe yaah ciŋ ɗe, a woosa ɗe ne : « Fu yii hot in e ? » 24Ƴaara marakka, a loffa ɗe ne : « Mi yii hot ɓi ɓo', ɓa mand ndo na kidig waaye ɓa na tiinde. » 25A degissa ɗe yaah ciŋ ɗe ŋ has, ƴaara markissa ; a wirra, a hoteeɗa hooliɗ. 26Yeesu woosa ɗe ne : « Haada kahan fu, kina taamb ŋ ɗooƴ kur ki. »

Yeesu woyiɗ ŋ kakaan kiŋ ɗe na hultiŋ ɗe

27Wa Yeesu na taalubeeciŋ ɗe kurkohis ndaam, ɓa kaɗeeɗa ŋ ɓak kur ka na woyse Seesare-Filip, ŋ kur ca ƴin ƴin ca wilee wa. Ŋ waasa, a meekissa ɓa ne : « Ɓooɓi na woye ne ñam ɓa ? » 28Ɓa loffa ɗe ne : « Raakiɗ ɓi na woye ne a fu Yahya Ɓoktohi, ɓum woyee ne a fu Ilyas, ɓinooɓi woyee ne fu woosuuɗ wiiriis. » 29A meeksissa ɓa ne : « Moo ɗu nak ? Ɗu na woye ne ñam ɓa ? » Piyeer loffa ɗe ne : « A fu Mucɗohi Gapohse. » 30Yeesu dennga ɓa baahiɗ ne ɓa kinaat woo ali ɓo' ŋ ini kaɗ nga.

31Weɗi a camboh ɓa teeɓ ne : « Kuɓkiŋ ɓoyi joyiɗ yaaɓ keeh-keeh ŋ yaah ciŋ yakak ci na kilifaaciŋ seeƴkiɗoh ciŋ waasiŋ Musaa na jangɗohoh ciŋ wa, ɓa hey ɗe sange, a apu, te a hulit ŋ neeha kaahayɗoh. » 32A woyeeɗa woo ceem halang. Piyeer gukka ɗe, ngaseeɗa ɗe. 33Yeesu yurhiɗkohha na taalubeeca, a marakka ɓa, a ngassa Piyeer an : « Kurka ndii, kaɗa ŋ finhooso, seytaaniini ! Liiɓohaaɗiŋ ɗa hunɗi na wiŋ Kooh, fu na liiɓe findi ɓo'. »

34Weɗi Yeesu ɓeeɗkoh mboolnda na taalubeeciŋ ɗe, a woosa ɓa ne : « Ɓo' nu waaɗ nik taalubeeniŋ ngo ɗah, a joyɗi liiɓ haf ce, a degkaat kurwaani aa hee daaƴohse, a ñaakiɗ to. 35Laam ɓo' nu waaɗ muciɗ kipes kiŋ ɗe ɗah, a hey wa ñake. Waaye ɓo' nu ñak kipes kiŋ ɗe saguuso na Yegɗohiŋ Muci ɗah, a heya mucɗe. 36Ɓo' raak adinaani jen na in ci nik nga te a ñak kipes kiŋ ɗe, ineem raakiɗ ɗe winde njiriñ ? 37Ɓo' min romkoh kipes kiŋ ɗe na ye ?

38Ɓooɓi woti-woti, ɓa tumoh moɗaaɗi, ɓa topɗi ŋ Kooh po haa njaalo'oh ; ɓo' nu supuk hun na so na woo ciŋ ngo ŋ fikiiɓa ɗah, Kuɓkiŋ ɓoyi hey ɗe supke inah ne a hayee ŋ yaki Baabiŋ ɗe yak, a hun na malaakaaci hooliɗ ci ɗah. »

Currently Selected:

Maarko 8: YM

Highlight

Copy