Maarko 7

Farisen ca na mbaah caŋ ɓa

1Wa raakka mbeh, Farisen ca cohha ŋ ɗiska na Yeesu na ɓi ɓo' ɓaah ŋ jangɗohoh caŋ waasiŋ Musaa puloh Yerusalem. 2Ɓa hotta ɓi taalube ŋ ɓiŋ Yeesu ñameeɗa na yaah hoolaaɗi, weɗ ne ɓa ɓokteeɗi ca na masuɓ wa ɓa hee ñame. 3Te Farisen ci na Yawuut ci jen sah na ñameeɗi muk feeh ɓa ɓohñukohɗi yaah masuɓ, findi mbaahiŋ yakak ci waaɗoha. 4Ali ɓa puloh ɗiska na toonohse sah, feeh ɓa farsukɗi ɗah, ɓa na ñameeɗi. Ɓa na name taambiɗ in laayiɗ ŋ mbaah ci ɓa lam, mand na findi ɓa na ɓohñohe kaas, na meeme, soƴe, na bool.

5Tahha po ɓa meekissa Yeesu ne : « Wa ye tah taalubeeciŋ ɗa na taambɗeeɗi mbaahiŋ caac ciŋ ɓoo, ɓa ñamee na yaah hoolaaɗi ? » 6A loffa ɓa ne : « Naafeehaaci ! Woo kiŋ Kooh wi woosuuɗi Esayi woyee nga ɗu, wa keeh, findi wa fiisohu, ne :

“ Cuuɓii,

eɗiŋ ɓa na so cir top ŋ nguɓ ciŋ ɓa ;

keeñ ciŋ ɓa usiɗ to lool.

7Ñaamkiŋ ɓa na so ɓarang ɓarang.

Ɓa na jangɗohe in ci ɓo' nakoh

po mand haa ne

mi yi Kooh,

ñam woo ca.#Esayi 29:13 ” »

8Yeesu woyissa ne : « Ɗu na faɗe nakohiŋ Kooh, ɗu taambɗee mbaah ɓo'. »

9A taalndiɗta a woyissa ne : « Ee, ɗu faɗ nakohiŋ Kooh moɗoɗ daal, ne ɗu taambiɗ mbaahiŋ ɗu. 10Ŋ hot Musaa woyiɗ ne : “ Eɗa yaay ɗu na baab ɗu cir.#Pula 20:12 ” A woyissiɗ ne “ Ɓo' nu kiimiɗ yaay ɓa wala baab ɓa moɗaaɗi ɗah, a apaah apu.#Pula 21:17 ” 11Waaye ɗu, ɗu na jangɗohe ne, ɓo' woo yaay ɓa wala baab ɓa ne : “ Ini ŋ joyee ɗa eɗ, wa korban ” ɗah (weɗ ne wa wuu Kooh, ɓo' wiiriis minɗi wa njirñiɗkoh), 12teemb ndeem, ɗu hondoh ɗe tumiɗ yaay ɓa wala baab ɓa ali in. 13Ɗu na heefohe woo kiŋ Kooh ɗaa, sagu taambiɗ mbaahiŋ ɗu ɗu na lamtiɗohe. Te sah, ɗu na name haɓiɗ in wiiriis laayiɗ mand ɗaa. »

14Wa Yeesu ƴut ɓa lof, a ɓeeɗkissa mboolnda, a woosa ɓa ne : « Ɗu jen sikɗukaat to te ɗu inah inii : 15Ali in ngaŋ in ci na aase ɓo' minɗi ɗe ɓek hoolaaɗi. Waaye a ini na pulohe ŋ ɓoyi, weɗ na hoolaaɗi'ɗee ɗe. [16Ɓo' nu raak nof ɗah, kerhaat.] »

17Wa Yeesu kurkoh ŋ mboolnda, a aassa kahna. Taalubeeciŋ ɗe meekissa ɗe ŋ ini kaɗ ŋ woo keem. 18A loffa ɓa ne : « Ɗu sah, ɗu namɗi raak liiɓohaaɗ moɗiɗ e ? Ɗu inahɗi ne in ci nik ŋ hari te ca aasee ŋ ɓo' jen, ca minɗi ɗe ɓek hoolaaɗi e ? 19Ca na aaseeɗi ŋ keeñiŋ ɗe, ca na kaɗe ŋ rookiŋ ɗe, ƴut ɗah ca bilafsuku. » Ŋ woo ceem, Yeesu hooliɗta kañam ci jen. 20A woyissa ne : « Ini na pulohe ŋ ɓo' weɗ na ɓekee ɗe hoolaaɗi. 21Laam in cii na pulohe ŋ ɗooƴ keeñ ɓo' : liiɓohaaɗ moɗaaɗi, faankoh sangohuuɗ, rok, ap ɓo', 22njaaloo, waaɗ raak in laayiɗ, cakaay, njuucnjaac, nduuɗuk, siis, ɗooɓoh, hotsiɗuk na naandɗuk. 23In ci moɗaaɗiiceem jen na pulohe ŋ ɗooƴ ɓo', ca ɓek ɗe hoolaaɗi. »

Ɓitiɓ nikaaɗi Yawuut kosiɗ Yeesu

24Wa Yeesu kurkoh ndaam, a kaɗ ɓak caŋ Tiir, a dalla ŋ kahan. A waaɗeeɗi ne ali ɓo' inaha, waaye wa mineeɗi ɗemb.

25Wa raakeen ɓitiɓ nga, kuɓkaŋ ɗe ɓitɓa ƴina, a jiini nikee na ɗe. A kerahha ɓooɓa woyeeɗa ŋ ini kaɗ ŋ Yeesu, a jaarra hay nga ɗe, a ƴekka ŋ kot ciŋ ɗe. 26Ɓitɓeem nikeeɗi Yawuut, a nikee Gerek#7:26 Gerek : ŋ maañ ɗah, e ɓooɓi genee Geres, ɓeɗ teeksee Gerek. Kur keem degga kur laayiɗ yaah. Ɓa woyɗukoheeɗa ɓa peɗeem gerek, ɓa tumɗukoheeɗa ɓa mbaah gerek. Kaɗta poo, ɓooɓi degsee yaah ɓeem te ɓa Gerek haa, laayiɗ ɓeendukka nga po ɓa mirndohha tumu Gerek. Ɓitɓii, a ɓaahee ŋ ɓooɓeem. Wi ɓi Rom deg kur ceem jen yaah sah, ɓa risee na mbaahi na peɗmiŋ Gerek ci. Te Fiis ciŋ Ambtiɗohi Asi fiisu ŋ gerek. , a ɓaahee Feniis caŋ Siri ; a kiimmba Yeesu ne a aañiɗ ɗe jiinndi amb kuɓkiŋ ɗe. 27Yeesu loffa ɗe ne : « Komaakci ñamaat paaɗ po ɓa kap ; wa waas haa ɓuu ci na koɗse teengu kañam kiŋ komaakci. » 28Ɓitɓa loffa ɗe ne : « Wa keeh kilifaani, waaye ɓuu ci na koɗse na name ñam ŋ ñamohiiciŋ komaakci, ci na keene. » 29Yeesu woosa ɗe ne : « Sagu woo keem, jiinnda faɗiɗ kuɓkiŋ ɗa, fu miniɗ haad. » 30Ɓitɓa haadda, a raakka kuɓka faankiɗ moɗoɗ ŋ fiƴaanga, raak jiinnda faɗiɗ ɗe.

Yeesu wirɗiɗ ɗik minaaɗi woo baahiɗ

31Wa Yeesu kurkoh ɓakaŋ Tiir, a taamb ŋ Sidoon, ne a dokuk ɓakaŋ Cookmaŋ-Galile, ngaŋ kur caŋ Dekapool#7:31 Dekapool : wa nikee kur-taah ndaŋkiyaah nangɗukohiɗ. Ɓooɓi genee nga, ɓa nikee Yawuut haa, ɓa taambɗeeɗi waasiŋ Musaa.. 32A komuusa ɗik minaaɗi woo baahiɗ. A kiimuusa ne a degaat ɗika yaah, a wiriɗ ɗe. 33Yeesu ɓayya ɗe po ɓa ussa mboolnda, a degga ndukun ciŋ ɗe ŋ nof ciŋ ƴaara, a tuhussa, a laalla peɗmiŋ ƴaara. 34Ƴutta, Yeesu marakka ŋ ɗafki, a iikka iik duu'in, a woosa ne : « Effata ! » Weɗ ne "Rangsuka !" 35Jaarra nof ciŋ ƴaara rangsukka, peɗmiŋ ɗe toksukka, a jombeeɗa moɗoɗ. 36Yeesu dennga mboolnda ne ɓa kinaata woo ali ɓo'. Waaye findi a uupee ɓa dengoh ne ɓa kinaata woo, ɓa uupee wa laamtohoh ɗaa.

37Ɓooɓa feyseen po ɓa minisɗi, ɓa woyeeɗa ne : « In nu a haɓiɗ ɗah, wa in baahiɗ. A tumiɗ po kotii, ɗik ci ɓii kerah, muum ci ɓii jomb. »

Currently Selected:

Maarko 7: YM

Highlight

Copy