Macce 9

Yeesu wirɗiɗ lafañ

1Wa Yeesu kurkoh ndaam, a aassa gaal a huussa cookma, a kaɗta Kapernawum, kur ɓa. 2Ŋ ndaam, a komuusa ƴaar lafñiɗ faanuuɗ ŋ faankoha. Yeesu hotta findi ɓooɓa kosoh, a woosa lafñiɗa ne : « Ndengɗuka ƴaariŋ ngo ! Fu ɗaasuuɗ bakaaɗ ciŋ ɗa. »

3Ŋ woo keem, ɓi ɓo' ɓaah ŋ jangɗohoh caŋ waasiŋ Musaa woyeeɗa ŋ harmban ɓa ne : « Ƴaarii na ɗale Kooh ! » 4Yeesu inheen liiɓ ciŋ ɓa, a woosa ɓa ne : « Wa ye tah ɗu raakka liiɓohaaɗ ci moɗaaɗiiceem ? 5Ŋ woo ɗe ne “ Fu ɗaasuuɗ bakaaɗ ciŋ ɗa ”, wala “ Kurka fu tiind. ” A winde uup yooɓ ? 6Ɗu hey inhe woti ne Kuɓkiŋ ɓoyi raakiɗ min-min ɗaasoha bakaaɗ ŋ kehƴi. » Weɗ a woyoh ƴaara kosaayɗa ne : « Kurka, ɓaya faankohaaniŋ ɗa, fu haad. » 7Ƴaara kurukka, haadda kahan ce. 8Wa mboolnda hot ineem, ɓa feyuusa, ɓa yakɗeeɗa Kooh yi on ɓo' ci min-mineem.

Yeesu ɓeeɗkiɗ Macce ne yeem ñaakiɗ ɗe

9Yeesu kurkohha ndaam, wa a kaɗe, a hotta ƴaar teeku Macce ɓoofiɗ ŋ ɗiska a na juuti'ohe. A woosa ɗe ne : « Ñaakiɗ to. » Macce kurukka, ñaakiɗta ɗe.

10Ŋ finho ineem, Yeesu ñameeɗa ŋ kahan Macce, juuti'oh laayiɗ na ɓi bakaaɗoh laayiɗ hayya ne ɓa ñam na ɗe, a yi na taalubeeciŋ ɗe.

11Wa Farisen ca hot ineem, ɓa woosa taalubeeciŋ ɗe ne : « Wa ye tah jangɗohohiŋ ɗu ñamee na juuti'oh ci na bakaaɗoh ci ɓinooɓi ? » 12Yeesu kerahha ɓa, a woosa ɓa ne : « Ɓooɓi kosaayɗi etohɗi paƴoh, e kosaayiɗ ci etoh paƴoh. 13Jangaat ini Fiis ci woo wii : “ Ŋ waaɗ ne ɗu teeɓoh baah kiŋ ɗu ŋ ɓinooɓi, weɗ ngisoh ɗu seeƴkee wuu so.#Hose 6:6; Gonaah ci 21:3 ” Laam ŋ hayɗi ne ŋ ɓeeɗuk yurhiɗ ci waaye ŋ hay ne ŋ ɓeeɗuk bakaaɗoh ci. »

Yeesu woyiɗ ŋ ini kaɗ ŋ or

14Ŋ ineem taalubeeciŋ Yahya Ɓoktohi hayya ŋ Yeesu, meekissa ɗe ne : « Wa ye tah taalubeeciŋ ɗa na oreeɗi te ɓoo na Farisen ci ɓoo na ore or ? » 15A loffa ɓa ne : « Hanheeci hay ŋ kilook miniɗ nik ŋ neɓaaɗi te heɗ kilooki yii na ɓa e ? Waaye wa hey raake jamano, heɗ kilooki kooɗohu nga ɓa ; ŋ ndeem, ɓa hey ore.

16Ali ɓo' na daafeeɗi kulɓa maañiɗ na seeket as, mbaa seeketi hey nookɗohe kulɓaaki, kulɓaaki uup nga faaruk. 17Ali ɓo' na nameeɗi tum biiñi asi na soñe ŋ mbohos und maañiɗ ; mbaa mbohosi hey pooke, biiñi aamuk, mbohosi yahrukoh. Biiñ as kay na tumse ŋ mbohos as, jaar ca kanak, ca min maañ. »

Yeesu wirɗiɗ ɓitiɓ, a hultiɗta komaaki cafaƴ

18Wa Yeesu woyee na ɓa ndeem, raakka kilifaani hay, ƴekka ŋ fikiice woosa ɗe ne : « Kuɓkiŋ ngo cafƴi kaaniɗ señci, waaye haya fu deg ɗe yaah, a hey pesisse. » 19Yeesu kurukka, ñaakeeɗa nga ɗe, a yi na taalubeeciŋ ɗe.

20-21Wa raakeen ɓitɓa fu inah ne ñif miŋ ɗe meeɗ meeɗ aamuk, a tumiɗ na kosaay keem kiis ndaŋkiyaah na kiis kanak (12) ; a woyee ŋ ɗooƴ ce ne : « Ŋ laal kulɓaakiŋ ɗe dong ɗah, ŋ hey wire ! » A lahha Yeesu finho, a laalla lecmiŋ kulɓaakiŋ ɗe. 22Yeesu heelukka hotta ɗe, woosa ɗe ne : « Ndengɗukka ɓitɓi ! Kosi fu kos wirɗiɗ ɗa. » Ŋ ɗiska ɗiska ɓitɓa wirra.

23Wa Yeesu ree kahan kilifaana, a hotta ɓooɓa mbiiɓee, na mboolnda findi wa ɗuuɗohe, 24a woosa ɓa ne : « Kurkaat ndii, cafƴi kaanɗi, a na neehe. » Waaye ɓa njembteeɗa ɗe. 25Wa mboolnda cootɗu, Yeesu aassa, ammba kuɓka cafƴa ŋ yaah, njaanja kurukka. 26Jaarra ɓooɓa laamtoheeɗaa ŋ kur kaam jen.

Yeesu wirɗiɗ fuuliɗ kanak

27Wa Yeesu kurkoh ndaam, kaɗeeɗa, fuuliɗ kanak ñaakɗeeɗa ɗe, leehkeeɗa ŋ ɗafka an : « Setiŋ Dawuuda, ɓoo miskaat ɗa ! » 28Yeesu reesa kahna, fuuliɗ ca reɓpa nga ɗe, a woosa ɓa ne : « Ɗu kosiɗ ne ŋ miniɗ haɓiɗ ineem e ? » Ɓa loffa ɗe ne : « Ee kilifaani. » 29A laalla has ciŋ ɓa, a woosa ne : « Wa raakohaat ɗaa nga ɗu findi ɗu kosoha ! » 30Ŋ ineem has ciŋ ɓa marakka. A woosa ɓa ndengiɗ ne : « Wortukaat, ali ɓo' kinaata yeg ! » 31Waaye wa ɓa pul, ɓa laamtoheeɗaa ŋ kur kaam jen.

Yeesu wirɗiɗ muum

32Ɓa cootee coot rek, Yeesu komissuusa ƴaar, a jiini ambee ɗe, muumiɗta ɗe. 33Yeesu aannja jiinnda, muum ma cammba jomb. Mboolnda feyuusa woyeeɗa ne : « In mand an moosɗi hotohu ŋ Israayel. » 34Waaye Farisen ca woyee ne : « A kilifaaniŋ jiiniici na onee ɗe hatili a na aañohee ca. »

Yeesu tuuƴiɗ Apootar ci

35Yeesu wileeɗa kur ca yakak ca na ca ƴin ca jen, a jangɗoheeɗa ŋ sinaagog ca, a woyeeɗa ɓooɓa Yegɗohiŋ Muci, wi kaɗ ŋ Nguuriŋ-Ɗafki, a wirɗeeɗa kosaay ca na ɓeenduk ca jen. 36A hotta ɓooɓaŋ mboolnda, ɓa misikka ɗe lool ; ɓa nikee goyiɗ, yaaɓoh na yaaɓoh findi mbaal raakaaɗi niiɗoh. 37Ŋ ineem, a woosa taalubeeciŋ ɗe ne : « Yohni laaɓiɗ waaye nguɗoh ci laayɗi. 38Kon kiimaat Heɗ yohni a woosoh ɓi pangkoh, ɓa nguɗ yohni. »

Currently Selected:

Macce 9: YM

Highlight

Copy