Macce 6

Findi ɓo' joy onohoh

1Wortukaat, kinaat teeɓoh kiyurhiŋ ɗu ŋ fiki ɓooɓi ne ɓa hot ɗu, ɗu tuma ɗah, ɗu rahsanɗi aafiŋ Baabiŋ ɗu yi nik ŋ Eel ci.

2Te fu onee ñakiɗ ci ɗah, kina tip haan#6:2 "tip haan" : ndii, ini fiisu ŋ gerek, wa "kuluɓ". ne ɓooɓi hot ɗa ; findi naafeehaaci na tumohee wa ŋ ɗooƴ sinaagog ci na ɗisik ci mbeeddaaci coh ne ɓa waak tiik. Ñam na woyee ɗu wa te wa keeh, ɓa rahsiɗ aafiŋ ɓa po ƴutiɗ.

3Waaye fu sarhohee ɗah, yaahiŋ ɗa singi kinaat inah ini yaahiŋ ɗa ñaahmi na haɓɗe, 4ne sarhiŋ ɗa nik ini ɗemb, te Baab ɗu, yi na hote ŋ ini ɗemb, hey ɗa aafe.

Findi ɓo' joy kiimoh Kooh

5Ɗu kiimee Kooh ɗah, kinaat mand na naafeehaaci, ɓi inah ne ɓa kiimee Kooh ɗah, ɓa na waaɗe tufuk ŋ ɗooƴ sinaagog ci na ɗisik ci mbeeddaaci coh, ne ɓa teeɓ ɓooɓi jen ne ɓii kiim Kooh. Ñam na woyee ɗu wa te wa keeh, ɓa rahsiɗ aafiŋ ɓa po ƴutiɗ. 6Waaye fu, fu kiimee Kooh ɗah, aasa ŋ ɗooƴ tuuƴ fu, fu rang yahndeeri, fu kiim Baab ɗu, yi nik ŋ ɗiski ɗemb, yi na hote ŋ ɗiski ɗemb, a hey ɗa aafe.

7Te ɗu kiimee Kooh ɗah, kinaat amb ŋ woo yino, ɗu woyee wa, ɗu woyissee wa findi ɓooɓi inahɗi Kooh ; ɓa liiɓ ne e woo kiŋ ɓa laayɗi weɗ na hee ɓa tahe teyɗukɗu. 8Kinaat mand na ɓa, laam Baabiŋ ɗu inhiɗ ini ɗu etoh bala ɗu kiiman ɗe ɗah. 9Weɗ tah kiimohaat Kooh an :

Baabiŋ ɓoo yi ŋ Eel ci,

tiikiŋ ɗa teyɗuksaat ne wa tiik hooliɗ.

10Nguuriŋ ɗa hayaat.

Ini fu waaɗ raakaat ŋ kehƴi

findi wa raakoh ŋ Eel ci.

11Ona ɓoo kañam ki ɓoo etoh woti.

12Ɗaasa ɓoo ɗal ci ɓoo na ɗalee ɗa

findi ɓoo na ɗaasohe ɓi na ɗale ɓoo.

13Te kina tum po ɓoo jaɗɗu fiir.

Waaye mucɗa ɓoo ŋ yi baahaaɗi.

[Ya fu Heɗ Nguur, na hatil na kiyak po faw, Amiin.]

14Inhaat ne ɗu ɗaas ɓooɓi na tumee ɗu in moɗaaɗi ɗah, Baabiŋ ɗu yi nik ŋ ɗafki hey ɗu namee ɗaas tumohaaɗ ciŋ ɗu moɗaaɗiici ; 15waaye ɗu ɗaasɗi ɓooɓi ɗah, a heyɗi ɗu namee ɗaas.

Findi ɓo' joy oroh

16Ɗu oree ɗah, kinaat teeɓ ɓooɓi ne ɗu na haɓɗe in miskiɗ, findi naafeehaaci na tumohee wa. Ɓa oreesa ɗah, ɓa ñuusiɗ fikiiciŋ ɓa ne ɓa teeɓ ɓooɓi jen ne ɓa oriɗ. Ñam na woyee ɗu wa te wa keeh, ɓa rahsiɗ aafiŋ ɓa po ƴutiɗ.

17Waaye fu, fu oree ɗah, muktuka, fu laackoloñuk, 18ne fu teeɓuu ɓooɓi ne fu na ore, waaye Baab ɗu yi nik ŋ ɗiski ɗemb, yi na hote ŋ ɗiski ɗemb, a hey ɗa aafe.

Ini joy waaku

19Kinaat nangɗoh raak-raak ŋ Adina, ɗiski inah ne ñuhuk miniɗa yahroh wala wa hoy, wala rokoh ci ngul, ɓa aas, ɓa roka. 20Waaye nangɗohaat raak-raak ŋ Eel ci, ɗiska fu inah ne ñuhuk minɗaa yahroh, wa hoyanɗi te rokoh minɗi ngul, a aas ne a roka. 21Inhaat ne ɗiski raak-raakiŋ ɗa nik, keeñiŋ ɗa na name nik nga.

22Has weɗ laampaaniŋ faan. Hasiŋ ɗa wir ɗah, faaniŋ ɗa jen nikan ŋ siñaar. 23Waaye hasiŋ ɗa wirɗi ɗah, faaniŋ ɗa jen nikan ŋ ñuus. Te ñiini nik nga ɗa jen nik ñuus ɗah, ñuuseem nikan taruus !

24Ɓo' yino minɗi raak heɗ kanak, mbaa a hey waaɗe yino a sang yi tas, wala a ŋoɗ ŋ yii, a heef yi tas ; kon ɗu minɗi ñaamuk Kooh, ɗu ñaamkee raak-raak.

25Weɗ tah mi na woyee ɗu ne : Kinaat jaahiɗ ŋ kipes kiŋ ɗu, ŋ ini ɗu ñaman [na ini ɗu anan]. Kinaat jaahiɗ ŋ faan ciŋ ɗu, ŋ ini ɗu ɓekkan. Kipes uupiɗɗi kañam njiriñ e ? Te faan namɗi uupiɗ ɓekkaah njiriñ e ? 26Markaat sel ci, ca na sokeeɗi, ca na nguɗeeɗi ; te ca raakɗi ndap ɗaakkoha, waaye Baabiŋ ɗu yi nik ŋ Eel ci yii ñamiɗ ca. Ɗu uupiɗɗi ca njiriñ e ?

27Ya ɓa min jaahiɗ nga ɗu, po a ɓaat wahtu yino ŋ kipes kiŋ ɗe ? 28Wa ye tah ɗu jaahɗe book ŋ ini ɗu ɓekkan ? Markaat paangfiŋ yohon ci na pos ciŋ ca findi ca na kifsohe. Wa na pangkeeɗi, wa na teɗeeɗi. 29Moona mi na woyee ɗu ne Suleymaan, na raak-raakaŋ ɗe jen, a moosɗi ɓekkoh mand na yino nga ca.

30Kooh ɓekɗe paangfiŋ yohon ci ɓekuk hend an moɗ woti te kim waa kee ɓeksa ŋ yongkaah ɗah ; kon wa leeriɗ ne Kooh hey ɗu name ɓekiɗ. Kosi ɗu kos ƴissuutiɗ !

31Mbaa kinaat jaahiɗ ɗu woyee ne : “ Ɓoo na hee ye ñame ? Ɓoo anan ye ? Ɓoo ɓekkan ye ? ” 32In ceem jen, e ɓooɓi inahɗi Kooh ɓeɗ na gene ŋ waakiŋ ca, waaye Baabiŋ ɗu yi nik ŋ ɗafki inhiɗ ne ɗu etohiɗ ca.

33Waakaat ini na kaɗɗe fiki Nguuriŋ ɗe na kiyurhiŋ ɗe paaɗ, a hey ɗu ca one, a ɓaatiɗ ɗu cinooci jen nga. 34Kinaat jaahiɗ ŋ ini raakan kim, kim na kimaŋ wa, mbeh nu nik ɗah miskiɗ ci nik nga doyiɗa.

Currently Selected:

Macce 6: YM

Highlight

Copy