Camba 33
33
Cohaŋ Esaaw na Yaŋhooɓa
1Wa Yaŋhooɓa puloh Peni'eel, ɗekka po a hotta Esaaw hayeeɗa na ƴaar teemet-nikiis (400). A paysohha komaakca ŋ harmban Leya na Rasel na ñaam ca kanak ca. 2A adgiɗ ñaam ca kanak ca na kuɓuuca a raak na ɓa, a degga Leya nga na ɓaŋ ɗe, a mirndohiɗta Rasel na Yuusufa. 3Ƴutta, a hannda adug ŋ fikiira a kaɗeeɗa, a ƴekɗeeɗa taambɗoh ce Esaaw poo a raakka waas yasna-kanak bala a reyan nga ɗe ɗah. 4Esaaw nuppa, a kaɗta coha na ɗe. Wa a ree, a morgiɗukka ɗe, ɓa ambsukohha kanak, ɓa fuɗeeɗa.
5Wa Esaaw hot ɓitiɓ ca na komaakca, a meekissa Yaŋhooɓa ne : « Ɓooɓi fu hun na ɓa ɓii, ɓa ye nga ɗa ? » Yaŋhooɓa loffa ɗe ne : « E kuɓuuci Kooh baahoh ho, kilifaani. » 6Ñaam ca na kuɓuucaŋ ɓa reɓpa, ɓa ƴekiɗta Esaaw. 7Leya na ɓaŋ ɗe nammba reɓ, ɓa tummba ɗaa. Ƴutta, Yuusufa na Rasel nammba tum ɗaa.
8Esaaw meekissa ɗe ne : « An wa ye tah ɗa woosoh gat ci ŋ coh na ca jen ? » Yaŋhooɓa loffa ɗe an : « Ne fu teyɗuk ko moɗoɗ kilifaani. » 9Esaaw woosa ɗe ne : « Ƴaariŋ ngo, ŋ raakiɗ po ŋ doyɗiɗ, fu miniɗ amb ini fu raak. » 10Yaŋhooɓa loffa ɗe ne : « Muk ŋ kiim ɗa wa kiim ne fu ambɗisɗi so aay-keeñ ɗah, teya in ci ŋ on ɗa ; laam wi ŋ coh na ɗa fu teyɗukiɗ to moɗoɗ po haa ŋ coh na Kooh jahran. 11Mbaa teya in ci ŋ on ɗa, laam Kooh oniɗ to po ŋ raakiɗ lool. » Yaŋhooɓa ñaakiɗta ɗe na ca po Esaaw mirndohha ca ɓay.
12Esaaw woosa ɗe ne : « Haya ɓoo kaɗ, ŋ ɓend ɗa. » 13Yaŋhooɓa woosa ɗe ne : « Kilifaani, fu inhiɗ ne komaakci ndengɗi te ŋ waaɗ seeskiɗ ɗoopaat ci na ɓapɗe ɗah, noh yino dong ca kaan jen. 14Kon kilifaani, fu na hee so hey adge, ŋ hun na komaakci na gat ci, ŋ taambee nga ɗa ƴin-ƴin po mbaɗna ŋ raakan ɗa ŋ Seyiir. »
15Esaaw woosa ɗe ne : « Mbaa, faɗa ŋ haawsiɗ ɗa ngaŋ ɓooɓiŋ ngo. » Yaŋhooɓa woosa ɗe ne : « Wa carɗaa, ŋ waaɗee rek ne fu teyɗuk ko moɗoɗ. »
16Mbaɗi, Esaaw kooɗissa waas, a gurdeeɗa Seyiir, 17waaye Yaŋhooɓa yurahha kur ka na woyse Sukkoot. A haɓiɗta kahan nga, a nammba ɗiipiɗ ɗoopaat caŋ ɗe nga ; weɗ tah ɗiska teekuusa Sukkoot (ɗiip).
18Yaŋhooɓa reyiɗ Kanaan moɗoɗ kotii ŋ pulohaŋ ɗe Paddan-Aram, a yipee ŋ fiki kur ka na woyse Sisem. 19A romohee yohna a yipohee ɗiip caŋ ɗe ngaŋ kuɓuucaŋ Hamor, baabiŋ Sisem. Candoomaŋ wa nikee ƴel haalis teemet (100). 20A haɓiɗta seeƴkoha nga ; a teekkaa El-Elohe-Israayel (Koohiŋ Israayel a yi Kooh).
Currently Selected:
Camba 33: YM
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
