Pula 6

Nikiɗi gapohiɗ ne a hey mucɗe Israayel ca

1Nikiɗi woosa Musaa ne : « Ɗiski wa nik ndii kotii, fu hey hote ini ŋ tuman Firawna. Wa yaah ɓitiɗ weɗ na hee tahe po ɗu faɗsu ɗu coot te yaaheem weɗ na hee tahe a aañ ɗu, ɗu coot. » 2Kooh woyissa Musaa ne : « Mi, a mi Nikiɗi. 3Ŋ teeɓkee Ibrahiima na Isaahha na Yaŋhooɓa ne ŋ Koohi Min. Waaye ŋ teeɓkeeɗi ɓa ŋ Nikiɗi, tiikiŋ ngo. 4Ŋ namiɗ ambtiɗoh na ɓa ; ŋ gappa ɓa on kur kaŋ Kanaan wa ɓa nikohee findi hanhe. 5Ɓaatta nga, ŋ kerhiɗ leehuk ciŋ Israayel ci ɓi Misra tum ñaam, te yit, ŋ naandsukiɗ ambtiɗohiŋ ngo.

6Weɗ tah po, woyiɗ to Israayel ci ne : “ Ñam Nikiɗi, ŋ hey ɗu pulɗohe ŋ pangkiŋ ɗu miskiɗi, wi ɓi Misra deg ɗu, ŋ muciɗ ɗu ŋ kiñaamki ɗu nikoh. Na hatiliŋ yaahiŋ ngo, ŋ hey ɗu wirndukɗe na miskiɗ laayiɗ, ŋ tos ɗu nga ɓa. 7Ŋ hey ɗu tume cuuɓiŋ ngo, ŋ nik Koohiŋ ɗu. Ɗu hey inhe ne ñam Nikiɗi Koohiŋ ɗu, yi pulɗoh ɗu ŋ pangki miskiɗi ɓi Misra deg ɗu. 8Ŋ hey ɗu ɓaye ŋ kur ka ŋ giñee ne ŋ hey wa one Ibrahiima, Isaahha na Yaŋhooɓa. Ŋ hey ɗu wa one, ɗu raakoota, ñam Nikiɗi. ” » 9Musaa ɓayoh woo ceem ɗaa ŋ Israayel ca waaye ɓa sikɗukɗi ɗe sagu tiisa na kiñaamka miskiɗa ɓa nikohe.

10Wa Musaa ƴut woo na Israayel ca, Nikiɗi woosa Musaa ne : 11« Kaɗa fu woya na Firawna, buuraŋ Misra, a faɗ Israayel ci ɓa pul kur ce. » 12Musaa loffa Nikiɗi ne : « Israayel ci sah sikɗukɗi so, moo Firawna na hee so sikɗukohe na, mi yi minɗi woo ? » 13Waaye Nikiɗi woosa na Musaa na Aaruna, a eɗta ɓa ɓi nakoh ŋ ini kaɗ ŋ Israayel ca na Firawna buuraŋ Misra, ne Israayel ca pulɗu Misra.

Cuuɓiŋ Musaa na Aaruna

14Ɓii ɓeɗ kilifaaci, heɗ kahan ciŋ Israayel. Kuɓuuciŋ Ruben yi saawiŋ Yaŋhooɓa nikee : Hanook, Pallu, Hesroon na Karmii. Ɓeem ɓeɗ nikee kilifa ŋ cuuɓ ci puloh ŋ Ruben.

15Kuɓuuciŋ Simeyong nikka : Yemuwel, Yamiin, Ohad, Yakiin, Sohar na Sawul yi yaay ɓa ɓaahee ŋ ɓi Kanaan. Ɓeem ɓeɗ nikee kilifa ŋ cuuɓ ci puloh ŋ Simeyong.

16Cii ceɗ tiik ciŋ ɓi rimkoh ŋ Lewi, na ɓi rimkoh nga ɓa. Kuɓuuciŋ Lewi nikee : Geerson, Kehaat na Meraari. Lewi pesiɗ kiis teemet na kiis ndaŋkiyaah-kaahay na kiis yasna-kanak (137).

17Kuɓuuciŋ Geerson nikee Libni na Semeyi, ɓeɗ nikee caaciŋ cuuɓ ciŋ ɓa haf ɓa.

18Kuɓuuciŋ Kehaat nikka Amraam, Isaar, Hebron na Usiyel. Kehaat pesiɗ kiis teemet na kiis ndaŋkiyaah-kaahay na kiis kaahay (133).

19Kuɓuuciŋ Meraari nikka Mahli na Muusi.

Ɓeem ɓeɗ nikee kilifa ŋ ɓooɓiŋ Lewi, yaa nu nga ɗah, na cuuɓiŋ ɗa.

20Amraam tokee bajaniŋ ɗe na woyse Yokebet, a raakka na ɗe kuɓu ƴaar kanak Aaruna na Musaa. Amraam pesiɗ kiis teemet na kiis ndaŋkiyaah-kaahay na kiis yasna-kanak (137).

21Kuɓuuciŋ Isaar nikee Kore, Nefek na Sikri.

22Kuɓuuciŋ Usiyel nikka Mikayel, Elitsaafaan na Sitri.

23Aaruna tokee Eliseba kuɓu Aminadaab, a raakka na ɗe kuɓu ƴaar nikiis : Nadab, Abihu, Elasaar na Itamaar. Eliseba namee nik taambɗoh Nahson.

24Kuɓuuciŋ Kore nikee Asiir, Elkana na Abyasaf. Ɓeem ɓeɗ nikee kilifa ŋ cuuɓ ci puloh ŋ Kore.

25Elasaar kuɓkiŋ Aaruna tokee ŋ kuɓuuciŋ Putiyel, a raakka na ɗe kuɓu ƴaar, Pinhas.

Ɓeem ɓeɗ nikee kilifa ŋ cuuɓ ci puloh ŋ Lewi.

26E Aaruna yeem na Musaa yeem, ɓeɗ Nikiɗi nakee ne ɓa puliɗ Israayel ca Misra, ɓa adgiɗoh cuuɓ cuuɓ, ɓa kaɗe. 27E ɓeɗ ɓeem, ɓeɗ woyee na Firawna buuraŋ Misra ne a faɗ Israayel ca ɓa pul ŋ kur ce.

Nikiɗi woosisiɗ Musaa na Aaruna

28Mbeha Nikiɗi woyoh na Musaa ŋ Misra, 29a woyee ɗe ne : « Ñam Nikiɗi, kaɗa fu woya Firawna buuraŋ Misra in ci ŋ woo ɗa jen. » 30Waaye Musaa lofee Nikiɗi ne : « Fu hot nga, ŋ tasiɗ min woo ; Firawna na hee so na sikɗukohe ? »

Currently Selected:

Pula 6: YM

Highlight

Copy