Pula 39

Haɓɗiŋ kulɓaaciŋ seeƴkiɗoh ci

1Ɓa ɓayya ooy bulo na ruumind eɗfiɗ na ruumind coy, ɓa haɓiɗta kulɓa hew, ci ɓekkassan wuu pangka ŋ Ɗiska Hooliɗa ; ɓa haɓɗiɗta Aaruna kulɓa hoolɗuuɗ wuu Kooh, findi Nikiɗi nakohee wa Musaa. 2Ɓa teɗta efoodi#Pula 28:6 na fiil urus ambsohuuɗ na leeŋ eɗfiɗ ndengiɗ na ooy bulo na ruumind eɗfiɗ na ruumind coy. 3Ɓa ɓayya urus tiɓuuɗ, wa seeluusa fiil fiil. Ɓa ambsohhaa na ooy bulo na ruumind eɗfiɗ na ruumind coy na leeŋ eɗfiɗ, ɓa teɗtaa, wa nikka pangki feroh keeh-keeh panguk. 4Ɓa suptiɗtaa ngalla kanak ŋ lecem ci ŋ ɗafki ne wa min ɓekku. 5Wa raakka tokɗukoha ŋ kinoh ki, wa na efoodi, ceɗ hunee, ca nikee piis yino findi Nikiɗi nakohee wa Musaa. 6Ɓa ɓayya atoh peme kanak, pemeeni na woyse sooham. Ɓa ɓayya fiil urus, ɓa teɗiɗta ca ɗisik ci ca ɓeksan, ɓa fiissa tiik ciŋ kuɓuuci ƴaar ciŋ caac ɓa Israayel ŋ atoh ceem. Ca fiissee findi ñaas na ñaasohse. 7A tummba ca ŋ ngallaaciŋ efoodi ne ca naandsohee cuuɓ ciŋ Israayel, findi Nikiɗi nakohee wa Musaa.

8Ɓi feroh keeh-keeh haɓiɗta nafaani na hee nike ŋ fikiiri, ɓa haɓɗoha leeŋ eɗfiɗ ndengiɗ na fiil urus na ooy bulo na ruumind eɗfiɗ na ruumind coy, findi efoodi. 9Wa nikee kaare ne wa lemu kanak ɗah, ɓak nu nga ɗah nikka santimeetar ndaŋkiyaah-kanak na yatuus (25). 10Wa moɗsinuusa na raŋalɗoh atoh peme#39:10 Marka "pemeeciŋ efoodi" ŋ tiik ci inhassaaɗiici. nikiis : raŋalɗohi koc raakee atoh ci moɗohngaan ci na woyse :

odem, pitdaah, na baareket.

11Wi kanakɗoh raakka nopek na safiir na yaahalom.

12Wi kaahayɗoh raakka lesem na saboo na ahlamaa.

13Wi nikiisɗoh raakka tarsiis na sooham na yaspeeh.

Peme nu nga ɗah teɗɗuusa ɗiski wa ɓeksan na fiil urus, wa ɓekuusa nga. 14Tiik ciŋ kuɓuuci ƴaar ciŋ caac ɓa Israayel fiissee ŋ atoh ci ndaŋkiyaah na kanak ceem (12). Ca fiisuusa findi ñaas na ñaasohse. Peme nu nga ɗah, nikiɗta tiik cuuɓ yino.

15-18Ɓa ɓayya ceen ci urus koceet ci teɗuuɗ ci, ci ambɗu ŋ ɓekohaaciŋ pemeeci kanak ci nik ŋ efoodi. Ɓa haɓɗiɗta ca koroha urus kanak haa kiñi ŋ koñ ciŋ nafaani ŋ ɗafki. Ɓa korra ceen ci ngaŋ kiñiiceem po nafaani minnda nik ŋ fikiiri.

19-20Ɓa haɓɗissa koroha urus nikiis haa kiñi. Kanak ci, ɓekuusa ŋ koñ ciŋ nafaani ŋ kehƴi, ŋ ɓakiŋ ɗooƴi, ca laaleeɗa efoodi ; kanak ci tas ɓekuusa ŋ ngallaaciŋ efoodi ŋ kehƴi, ngaŋ fikiiri, ŋ sero ɗiski ca suptu, ŋ ɗafkiŋ tokɗukohaaniŋ kinoh ki. 21Kiñiiciŋ nafaani na ciŋ efoodi tokɗohuusa na niy bulo. Ŋ ineem nafaani ammba ŋ tokɗukohaaniŋ kinoh ki, wa yoondɗi, wa rissa ŋ ɗafuk efoodi findi Nikiɗi nakohee wa Musaa.

22A haɓiɗta kulɓaaki hutiɗi yakki hunan na efoodi, wa teɗohsee ooy bulo jen. 23Mbooh kiŋ wa nikee ŋ leerni, wa daamina'uusa po wa ndennga ne wa faarkuu. 24Ɓa ɓayya ooy bulo na ruumind eɗfiɗ na ruumind coy na ooy leeŋ ndengiɗ, ɓa haɓiɗta rim garnaat, ɓa moɗsinohha ca kehƴiŋ kulɓaaki po wa willa. 25Ɓa haɓiɗta ɓi joolooli urus koceet, ɓa ɗookka ca ŋ kehƴiŋ kulɓaaki po wa willa, ŋ harmban rim ciŋ garnaati ; 26ɓa haɓiɗta rim garnaat yino ɗah, ɓa ɗook joolooli yino po sereendiŋ kulɓaaki jen willa findi Nikiɗi nakohee wa Musaa.

27Ɓa nammba teɗ ɓi kulɓa leeŋ wuu Aaruna na kuɓuuciŋ ɗe ; 28na mbahne wuu seeƴkiɗohi yakki na ɓi mbahne wiiriis teɗohu leeŋ eɗfiɗ. Ɓa nammba ɓa haɓɗiɗ ɓi jata na leeŋ eɗfiɗ ndengiɗ. 29Ɓa haɓiɗta seentur, wa moɗsinuusa na ooy leeŋ eɗfiɗ ndengiɗ na ooy bulo na ruumind eɗfiɗ na ruumind coy findi Nikiɗi nakohee wa Musaa.

30Ɓa haɓiɗta tokkaah ŋ puk hoolɗuuɗ, wa nikee urus koceet, wa mandee na pos kidig. Woo kii fiisuusa nga an : "Wuu Nikiɗi", wa fiisuusa findi ñaas na ñaasohse. 31Wa tokuusa na tokɗoha bulo ŋ fikiiriŋ mbahneeri, findi Nikiɗi nakohee wa Musaa.

Musaa teeɓuuɗ pangka haɓɗu jen

32Panguk ciŋ Genohaani, weɗ Ɗiipi-na-Cohohse, reehoh haɓɗu ɗaa. Israayel ci haɓiɗta pangka jen findi Nikiɗi nakohee wa Musaa jok. 33Musaa komuusa Genohaani, ɗiipi na in ci haɓɗohuu wa jen : Korohaaci, kaadar ci, laat ci, kumbin ci na tufkohaaci ; 34na baasi haɓɗohu und kuy mbaal suupuuɗ ruumind, na wi haɓɗohu und inoh cookom, na ridooni ɗasɗan Ɗiski Hoolohngaani ; 35na Wahndeeni na teeɓohe Ambtiɗohi na ndooɗ ci ɓayohsana, na kunohaani, weɗ ɗiski na romkohse ; 36na taaɓli, na tumohaaci hun naa jen, na mbuuruuci degsan nga, wuu Kooh ; 37na degohaaniŋ laampaaci urus koceeti, na laampaaciŋ wa taambtiɗohiɗ ci, na in ci hun naa ; na diwliini fuuɗoha laampaaci ; 38na keesi seeƴkohaani suusohsan cuuraay ci, wi ursi ; na diwi na hoolɗohse, na cuuraayi eeñɗohaani, na ridooniŋ aasohaaniŋ ɗiipi ; 39na keesi seeƴkohaani dohohsan hoosuuɗ ci, wi moosi ; na giryaasiŋ wa nam haɓɗohu moos ruumind, na ndooɗ ci wa na ɓayohse, na tumohaaci hun naa jen ; na beñwaari na hee tumohse masmi ɓoktukohsan na degohaaniŋ wa ; 40na piis ciŋ ɗingiŋ bayaali na kumbin ciŋ wa, na tufkohaaciŋ ca ; na ridooniŋ aasohaaniŋ bayaali, na niy ciŋ wa na tatohaaciŋ wa ; na tumohaaci pangkohsan ŋ Genohaani, weɗ Ɗiipi-na-Cohohse ; 41na kulɓaaci hoolɗuuɗ ci pangkohsan ŋ Ɗiski Hooliɗi, ca nikka ciŋ Aaruna seeƴkiɗohi, na ciŋ kuɓuuciŋ ɗe ne ɓa pangkee findi seeƴkiɗoh ɗah.

42Israayel ci haɓɗeen pangkeem jen findi Nikiɗi nakohee wa Musaa jok. 43Musaa marakka pangka ɓa haɓiɗ jen, wa nikka findi Nikiɗi nakohee ɗe wa jok, Musaa barke'iɗta ɓa.

Currently Selected:

Pula 39: YM

Highlight

Copy