Pula 36

1Betsalel na Oholiyaab na ɓi ɓo' wiiriis herñiɗ, Nikiɗi oniɗ ɓa inah-inah ne ɓa haɓiɗ pangkaah nu nik ne wa haɓɗaah ŋ Ɗiski Hooliɗi ɗah. Ɓooɓeem jen nikka ɓi haɓɗan in ci Nikiɗi nakoh jen, ɓa haɓɗan ca findi Nikiɗi nakohee ɓa ca. »

2Musaa ɓeeɗkiɗukka Betsalel, Oholiyaab na ɓooɓa Nikiɗi onee hereñ jen te ɓa teyɗukka ɓaah ŋ ɓi haɓɗan pangki. 3Musaa eɗta ɓa onoh ca Israayel ca haytohee jen ne pangkaŋ Ɗiska Hooliɗa haɓɗu. Ɓaaɓ nu ree ɗah, ɓooɓa komis Musaa in ca ɓa onoh ŋ keeñ soosiɗ.

4Wa kaɗeeɗa po yaa nu nik ngaŋ pangkoh ca faɗta ina a haɓɗe. Ɓa kaɗta, 5ɓa woyeeɗa Musaa an : « In ci ɓooɓi haytoh uupiɗ fuuf ini etohu ŋ haɓɗuukiŋ in ci Nikiɗi nakoh. »

6Musaa nakohha ne wa woysaat ŋ dala ne : « Wa ƴaar haa wa ɓitiɓ haa, ali ɓo' kinaat haɓɗis in haytohaah ŋ Ɗiski Hooliɗi ! » Ɓooɓa tufkiɗta, ɓa haytohisɗi. 7In ca kooɗkiɗassee doyeen wuu pangka jen, ca uupeen sah.

Haɓɗiŋ Genohaani

8Betsalel, na pangkoh ca uupee hereñ, ɓeɗ haɓɗee Genohaani. A haɓɗohee wa haf-piis ndaŋkiyaah teɗohu ooy leeŋ eɗfiɗ ndengiɗ ambsohuuɗ na ooy bulo, na ooy ruumind eɗfiɗ na ruumind coy. A moɗsinohha piis ci ɓi nataal seruben.

9Piis ceem ceɗ hende, waa nu nga ɗah hutiiniŋ wa nikee saangal ndaŋkiyaah na nikiis (14), angiini nikka suung nikiis. 10Yatuus nga ca ambsohuusa suptuusa yino, yatuus ci tas nammba tumu ɗaa.

11-12Piis ci yatuus ci ambsohuuɗ ceem, suptiɗuusa ɓi yaah koroha ŋ ɓaki winoori ŋ sereendiŋ angiini, ca haɓɗohsee ooy bulo. Yatuus ci ambsohuuɗ ci tas nammba suptiɗu mand ɗaa. Yaah ci korohaaci ŋ piis ci ambsohuuɗ ci nikka ndaŋkiyaah-yatuus (50). Ciŋ piis ci ambsohuuɗ ci tas nammba nik ndaŋkiyaah-yatuus (50). Korohaaceem, waa nu nga ɗah korɗohuusa na morom wa ŋ piis ci cinooci ambsohuuɗ ci. 13Korɗoha ndaŋkiyaah-yatuus (50) haɓɗuusa na urus ; ca ambsohha piis ci po baasiŋ Genohaani nikka yino.

14A ɓayya find pe', a haɓɗissa haf-piis ndaŋkiyaah na yino (11) uloha baasiŋ Genohaani. 15Haf-piis ceem ceɗ hende, waa nu nga ɗah hutiiniŋ wa nikee suung ndaŋkiyaah-kaahay (30), angiini nikka suung nikiis. 16A ambsohha piis ci yatuus ci, ca nikka yino, a nammba ambsohis yasna-yinooci kiik ca, ca nikka yino.

17A haɓiɗta yaah koroha ndaŋkiyaah-yatuus (50) ŋ sereendiŋ piisi yatuusɗoh ŋ piis ci yatuus ci ambsohuuɗ ci, a nammba haɓɗis yaah koroha, ndaŋkiyaah-yatuus (50) ŋ sereendiŋ piisi koc ŋ piis ci yasna-yinooci ambsohuuɗ ci. 18A haɓiɗta korɗoha ndaŋkiyaah-yatuus (50) na moos ruumind ne a ambsoh haf-piis ci ambsohuuɗ ci po baasi nik yino.

Baas ci haɓɗohu und

19A ɓayya und kuy mbaal suupuuɗ ruumind, a haɓiɗta baas uloha baasi kanakɗohiini. A haɓɗissa baas wiiriis na und inoh cookom degaah ŋ ɗafuk weem.

Kaadar ci na laat ci

20A ɓayya hang kassiya, a haɓiɗta kaadar tufkiɗ ne ca amb Genohaani. 21Kaadar ci jen hendee hend ; waa nu nga ɗah hutiiniŋ wa nikee saangal yatuus, angiini nikka suung yino na camban. 22Kaadar ci jen findi ca hend, waa nu nga ɗah pulɗiɗuusa ndooɗ kanak findi kot, ca hunee hun waaye ca laaltiɗoheeɗi.

23A haɓiɗta kaadar ndaŋkiyaah-kanak (20) ŋ ɓak yaah-sing ne fu eɗ pulohaaɗ-noh finho, fu aasee ɗah. 24Kaadar ceem haɓɗiɗuusa tufkoha ndaŋkiyaah-nikiis (40) ŋ ooɓi, ca haɓɗohsee haalis. Kaadar nu nga ɗah raakka tufkoha kanak, kot ci kanak ciŋ kaadari joy ɓeku ŋ tufkohaaceem.

25Ɓaki winooriŋ Genohaani, wi lah yaah-ñaahum, nammba haɓɗiɗu kaadar ndaŋkiyaah-kanak (20), 26na tufkoha ndaŋkiyaah-nikiis (40) haɓɗohu haalis, kaadar nu nga ɗah raakka tufkoha kanak ŋ ooɓi.

27Ɓaki mirndoh ŋ Genohaani, ŋ ɓak muyohaaɗ-noh, raakka kaadar yasna-yino. 28Wa raakka kaadar kanak ŋ koñ ci nik ŋ fikiira ŋ ɗooƴ Genohaani. 29Hang ciŋ kaadar ceem nikka kanak ini kooɗoh kehƴi po ca reesa ŋ ɗafka, ca tokɗohuusa baahiɗ na inaa haa kiñi, kaadar ci nik ŋ koñ ci kanak ci jen tumuusa ɗaa. 30Jaarra, fikiiri raakka kaadar yasna-kaahay na tufkoha ndaŋkiyaah na yasna-yino (16) ci haɓɗohu haalis. Kaadar nu nga raakka tufkoha kanak.

31Ŋ finho ineem a haɓiɗta laat kassiya yatuus ne ca galandu ŋ kaadar ci nik ŋ ɓak yaah-sing. 32A haɓɗissa laat yatuus, ci galandsan ŋ ɓaki ñaahmi, na laat yatuus ci galandsan ŋ fikiira, ŋ ɓak muyohaaɗ-noh. 33Wiŋ leerni taambɗassan ŋ leerniŋ kaadar ci jen, wa ambohan ɓak po ɓak.

34A ulla kaadar ci na urus, a haɓiɗta in ci haa kiñi, ci laat ci taambohan, a ulla laat ci na urus.

Haɓɗiŋ ridooci

35Ƴutta a haɓiɗta rido na leeŋ eɗfiɗ ndengiɗ na ooy bulo na ruumind eɗfiɗ na ruumind coy, a moɗsinndaa na ɓi nataal seruben, wa nikka panguk feroh keeh-keeh. 36A ɓayya kumbin kassiya nikiis, a muurra ca na urus. Ca waakɗuusa koroha urus. Ca haɓɗiɗuusa tufkoha nikiis haɓɗohu haalis naayɗuuɗ.

37Aasohaaniŋ ɗiipi nammba haɓɗiɗu rido, wa haɓɗohsee leeŋ eɗfiɗ ndengiɗ, wa moɗsinuusa na ooy bulo na ooy ruumind eɗfiɗ na ruumind coy. 38Wa waakɗuusa kumbin yatuus na korohaaciŋ ca na ñoor ci wa ɓekohsan. Ñoor ci na haf ciŋ kumbin ci muuruusa na urus. Tufkohaaciŋ kumbin ci yatuus ci haɓɗohsee moos ruumind.

Currently Selected:

Pula 36: YM

Highlight

Copy