Pula 34

Musaa kaɗissiɗ ŋ ɗiskaŋ Nikiɗi ŋ tangoora

1Nikiɗi woyissa Musaa ne : « Pestissa atoh kanak po ca nik ɗapas findi ca koc, ŋ hey fiise nga ca woo ci nikee ŋ ca koc te fu pookka ca. 2Kooɗka, kim na ɓaaɓa teel, fu rap ŋ ɗafuk tangooriŋ Sinaay, fu tufuk nga ŋ fikiiso. 3Fu kaɗee ɗah, ali ɓo' kinaat hun na ɗa te ɓo' kinaat hotu ŋ ɗafuk tangoori jen ; ɗoopaat sah kinaat eleeruk ŋ ɓak ciŋ wa, wa mbaal haa, wa pe' haa, wa inoh haa. »

4Musaa pessa atoh kanak findi ca koc, a kurukka na ɓaaɓa teel, a ammba ca ŋ yaah, a rappa ŋ tangooraŋ Sinaay findi Nikiɗi nakohee ɗe wa.

Nikiɗi teeɓiɗ Musaa yaki a yak

5Nikiɗi ruhussa na eela, a rissa ŋ ɗooƴa ŋ sero Musaa, a woosa tiikiŋ ɗe haf ce po wa ɗiiɗɗeeɗa an : « Nikiɗi. » 6Ŋ ineem, Nikiɗi taammba Musaa fiki, a woosa ŋ ɗafka an :

« Ñam Nikiɗi,

Kooh yi na yirmohe te baahohe,

yi yooɓɗi ayruk,

riiffa na waaɗohaaɗ

te a dokkuu finho muk,

7a teeɓohee baah kiŋ ɗe

po ŋ junni (1000) gomal,

a ɗaasohee tumohaaɗ moɗaaɗi,

na bakaaɗ,

na ndengsiɗkoh,

waaye ɓoyi tooñ

a ambuu ɗe findi ɓoyi tumɗi in,

te a na dege deg miskiɗ

kuɓuuci na set ci

na setaat ciŋ baab ci tum moɗaaɗi

po ŋ gomala nikiisɗoh. »

8Jaarra Musaa ƴekiɗta Nikiɗi po a raɗukka ŋ kehƴi. 9A woosa ne : « Heɗ ɓoo, ŋ kiim ɗa wa kiim, nik ne fu baahohiɗ to ɗah, haya fu ɓend ɓoo. Ŋ inhiɗ ne cuuɓii wa cuuɓ ndengiɗ haf, waaye ɗaasa ɓoo tumohaaɗ ci moɗaaɗiici na bakaaɗ ciŋ ɓoo, tuma ɓoo raakuuɗiŋ ɗa. »

Nikiɗi tufkiɗissiɗ ambtiɗohiŋ ɗe na Israayel ci

10Nikiɗi loffa ɗe ne : « Ŋ hey tufkiɗe ambtiɗoh na ɗu. Ŋ hey tume, ŋ fiki cuuɓiŋ ɗa jen, keemaan ci ɓo' moosɗi hotoh ŋ ali kur na ali ɓak ŋ kehƴi ; ɓooɓi wil ɗa jen hey hote tumohaaɗ ciŋ ngo mi yi Nikiɗi. In ci ŋ lahɗohan nga ɗa, ca nikan in feyohiɗ. 11Faɗoha nof baahiɗ ini maa nakee ɗa woti. Ŋ hey aañe ŋ fikiiɗu : Amoor ci na Kanaan ci na Hit ci na Peris ci na Hiw ci na Yebuus ci.

12Wortukaat ambtiɗoh nawle na ɓooɓiŋ kur ci ɗu aasohan, mbaa ɓa nikan fiir jaɗuuɗ ŋ harmban ɗu. 13Waaye ɗu na hee hey fole seeƴkohaaciŋ ɓa, ɗu pook nataal ci, ɗu fol kumbin ci, ci ɓa na yakɗohee kooh ciŋ ɓa.

14Ali ɓo' nga ɗu ƴekɗanɗi kooh wiiriis, laam, mi yi Nikiɗi, ŋ fiir fiir po weɗ tiikiŋ ngo.

15Te ali ɓo' kinaat ambtiɗoh nawle na ɓooɓaŋ kur ka ; fu ambtiɗoh na ɓa ɗah, ɓa hey ɗa ɓeke ŋ njaalooniŋ ɓa, weɗ ne ɓa seeƴkee wuu kooh ciŋ ɓa ɗah, ɓa ɓeeɗuk ɗa ne fu ñam ŋ seeƴki. 16Te ineem hey kaɗe po fu ɓayiɗ kuɓuuciŋ ɗa ƴaar ci ɓitiɓ ŋ cafaƴ ciŋ ɓa, cafaƴ ceem ɓek ɓa ŋ njaalooni ɓa na njaalo'e, weɗ ne ñaamki ɓa na ñaamke kooh ciŋ ɓa.

17Ali ɓo' nga ɗu naayɗanɗi tiwiñ, a haɓɗee nataal, a amb ca findi Kooh.

18Yaa nu nga, fu hey feetke feetiŋ Mbuuruuci raakaaɗi lawiir ci ; ini ree neeh yasna-kanak ŋ jamanooni wa ambu ŋ caɓniŋ mbong ci, fu ñaman mbuuru raakaaɗi lawiir findi ŋ woyohee wa, laam ŋ caɓniŋ mbong ci weɗ ɗu puloh Misra.

19Kuɓuuciŋ ɗa saaw ci ƴaar ci jen, ɓa wuu so, saaw ci naar ciŋ ɗoopaat ci sah ñam raak ca findi ciŋ inoh ci, mbaal ci na pe' ci. 20Saaw ciŋ mbaam ci, fu na hee ca hey romkohe na mbaal wala pe' ; fu romkohɗi ca ɗah, fu joyiɗ weer mbooh ciŋ ca. Fu hey romkohe saaw ciŋ ɗu ƴaar ci jen te ali ɓo' hayanɗi ŋ fikiiso yaah ɓarang.

21Fu hey pangke neeh yasna-yino, wi yasna-kanakɗoh fu iɗsiɗuk, fu hey iɗsiɗke nga sah ŋ jamanooni na guurohse na wi na nguɗohse.

22Mbeh dokkiɗ yasna-kanak ŋ finho Paak, fu hey feetke feetiŋ Beleeci koc ruund ; wa kaɗ po ŋ reehɗohaaniŋ kiis ki ɗah, fu nam feetuk feetiŋ Nguɗ ci.

23Waas kaahay ŋ kiis ki, ƴaar ciŋ cuuɓi jen hey haye ŋ fikiiso mi yi Heɗ ɗu Nikiɗi, Koohiŋ Israayel. 24Laam ŋ hey aañe cuuɓ ci ŋ fikiiɗu te ŋ hey tume po ɗu raak merhey angiɗ ; ali ɓo' waaɗanɗi ɓay kur kiŋ ɗu ŋ jamanooci ɗu hayohan ŋ fikiiso waas kaahay ŋ kiis ki.

25Ɓo' nga ɗu seeƴkee ɓi ɗoopaat wuu so ɗah, ñif miŋ ca kinaat hun na in raakiɗ lawiir. Te sepet ciŋ seeƴkiŋ feetiŋ Paak neehanɗi po na ɓaaɓa.

26Ɓo' nu nga ɗu ɗah, a komaat to ini a koc nguɗ ŋ yohon ciŋ ɗe ŋ kahan ndo mi yi Nikiɗi, Koohiŋ ɗu.

Ali ɓo' nga ɗu kinaat tikoh koteng miis mi kooɗohu ŋ ndaam ce. »

27Nikiɗi woosa Musaa ne : « Woo cii ceɗ maa hee tufkiɗohe ambtiɗohiŋ ngo na ɗa, na Israayel ci ; fiisaa ca. » 28Musaa nikka ŋ tangooraŋ Sinaay na Nikiɗi ini ree neeh ndaŋkiyaah-nikiis (40), a ñamɗi, a anɗi. Nikiɗi fiissa ŋ atoh ca woo ciŋ Ambtiɗohi, Nakoh-ci-Ndaŋkiyaah-ci.

Siñaarɗiŋ fikiiriŋ Musaa

29Wa Musaa ruhus tangooraŋ Sinaay, raak ɗe na atoh ca kanak ca ŋ yaah, atoh ci ɗapas ci na teeɓohe Ambtiɗohi, fikiiriŋ ɗe siñaarɗeeɗa sagu woyi a woyee na Nikiɗi, waaye a inheeɗaa.

30Wa a ree po Aaruna na Israayel ca jen hotta fikiiriŋ ɗe siñaarɗeeɗa, ɓa kaañɗi ɗe reɓuk. 31Weɗi a ɓeeɗkoh ɓa. Aaruna na yakak caŋ Israayel jen hayya nga ɗe, a woytohha ɓa. 32Ƴutta, Israayel ca jen reɓpa, a eɗta ɓa nakoh ci jen, ci a rahsoh ŋ Nikiɗi ŋ ɗafuk tangooraŋ Sinaay. 33Wa Musaa ƴut woo na ɓa, a muurra fikiiriŋ ɗe.

34Taambohha ndeem, a kaɗeesa ŋ ɗiskaŋ Nikiɗi ɗah, a nihis muuriŋ ɗe po a puloh nga. A pulohha nga ɗah, a woo Israayel ci ini a ɓayoh nga. 35Israayel ca marakka fikiiriŋ ɗe ɗah, ɓa hot ne wa na siñaarɗe siñaariɗ, jaar a muura po findi a na dokkohisse woya na Nikiɗi.

Currently Selected:

Pula 34: YM

Highlight

Copy