Pula 30

Seeƴkohaani suusoha cuuraayi

1Nikiɗi woyissa Musaa ne : « Fu hey haɓɗe seeƴkoha suusoha cuuraay, fu haɓɗohana hang kassiya. 2Wa nikan kaare, ɓak nu nga nik suung yino te njooliini nik suung kanak. Fu hey pulɗe wiic ciŋ wa ŋ koñ ci wa ŋ ɗafki, fu puliɗndohan ca ŋ hangi wa haɓɗohsan. 3Fu heya ule na urus koceet, ɗafki na ɓak ciŋ wa jen na wiic ci, fu haɓɗiɗa banda urus po wa wil.

4Fu hey wa haɓɗiɗe inaa haa kiñi kanak ŋ ooɓ bandaani, ŋ ɓak ci kanak ci, ɓak nu nga raak yino ; in ceem nikan urus, ndooɗ ci na hee wa ɓayohse taamban nga ca. 5Haɓɗoha ndooɗ ceem ndooɗ kassiya, fu ul ca na urus.

6Fu hey dege seeƴkohaaneem ndo fu reyan ridooni ɗasiɗ Wahndeeni na teeɓohe Ambtiɗohi ɗah, [wa yurhiɗkoh na kunohaani, ɗiski na romkohse, wi nik ŋ ɗafuk Wahndeeni,] ŋ ɗiski ŋ cohan na ɗa.

7Aaruna hey suuse cuuraay eeñiɗ nga ɓaaɓ nu ree ne a kee taambkoha laampaaci ɗah. 8Niin nu ree, a kee dega laampaaci ɗah, a nam suusis. Wa nikan cuuraayi genan kaɓ ŋ fikiiso mi yi Nikiɗi, ŋ gomal nu gomal. 9Ɗu heyɗi suuse cuuraay wiiriis nga, ɗu seeƴkanɗi seeƴuk hoomɗaah nga, ɗu seeƴkanɗi na in ci na pulohe ŋ yohon ca nga ; te ɗu seeƴkanɗi seeƴuk aamaah nga.

10Kiis nu ree ɗah, Aaruna heya seeƴkiɗe waas yino ne wa tosu. A tuman ñif miŋ ɗooptiŋ seeƴki wuu bakaaɗ ci, ŋ wiic ciŋ seeƴkohaani. Wa hey seeƴkiɗasse ne wa tosu, wa nikan waas yino kiis nu ree ɗah, ŋ gomal nu gomal ; wa in ye hoolan wuu so mi yi Nikiɗi. »

Lempooci

11Nikiɗi woyissa Musaa ne : 12« Fu kindee Israayel ci ne findi ɓa hend inhu ɗah, yaa nu nga ɗah hey yo eɗe mi yi Nikiɗi, lempooni a tosohan kipes kiŋ ɗe, po naamo raakuu ŋ harmban ɓa ŋ mbehi ɓa fiiskohan. 13Inii weɗ yaa nu nga eɗohan ne a fiiskee ɗah : garam yatuus ŋ haalis, wa nikan cambaniŋ ɓeesohaani nik ŋ Ɗiski Hooliɗi. Haalseem nikan wuu so mi yi Nikiɗi.

14Yaa nu raak kiis ndaŋkiyaah-kanak (20) kaɗ ɗafka ɗah, a hey fiiske te a eɗ to wa. 15Heɗ raak-raak eɗohanɗi ini uupa te ñakiɗ eɗohanɗi ini mitɗi garam ci yasna-yinooceem, yaa nu nga hey yo ca eɗe, ca nik ini ɓa tosohan kipes ciŋ ɓa. 16Fu hey rahse haalseem jen ŋ Israayel ci, fu tuma ŋ haɓɗuuki na taambkohuukiŋ Ɗiipi-na-Cohohse ; wa nik ini naandsohan ŋ fikiiso mi yi Nikiɗi ne ɓa tosuuɗ. »

Beñwaari ɓoktukohaani

17Nikiɗi woyissa Musaa ne : 18« Fu hey haɓɗe beñwaar ɓoktukoha na degohaaniŋ wa, fu haɓɗohan ca moos ruumind. Ƴut ɗah, fu dega ŋ harmban Ɗiipi-na-Cohohse na seeƴkohaani, fu neya. 19Masmeem weɗ Aaruna na kuɓuuciŋ ɗe ɓookohan yaah ciŋ ɓa na kot ciŋ ɓa.

20Ɓa aasee ŋ Ɗiipi-na-Cohohse wala ɓa reɓee seeƴkohaani ne ɓa seeƴkee seeƴki dohsan po wa sut wuu so mi yi Nikiɗi ɗah, ɓa hey ɓookke ŋ masmeem ne ɓa kaanuu. 21Ɓa ɓookan yaah ciŋ ɓa na kot ciŋ ɓa ne ɓa kaanuu. Wa nakohi genan gen, wi Aaruna na ɓi rimkoh nga ɗe taambɗan ŋ gomal nu gomal. »

Diwi na hoolɗohse

22Nikiɗi woyissa Musaa ne : 23« Fu Musaa, ɓaya ŋ eeñɗohaaci uup neɓ : Fu ɓayan kilo miir#30:23 miir : wa cuuraay, wa na fuuɗseeɗi. Wa na woyse "myrrhe" ŋ farañse. ñifsootiɗ yatuus, na kilo kanak na camban ŋ eeñɗohaani na woyse sinaamom, na kilo kanak na camban ŋ wi na woyse kanel, 24na kilo yatuus ŋ wi na woyse kas, ca ɓeesohsan ɓeesohaaca nik ŋ Ɗiski Hooliɗi. Fu nam ɓay liitar diwliin oliiw yasna-yino. 25Fu hey ca ambsohe findi haɓɗoh eeñɗoha keeh-keeh na tumohe, wa nik diw hoolɗoha, e hoolɗuuɗ ci wuu so yiifsana.

26Diweem weɗ fu na hee yiife ŋ Ɗiipi-na-Cohohse na Wahndeeni na teeɓohe Ambtiɗohi, 27na taaɓli na tumohaaciŋ wa jen, na degohaaniŋ laampaaci na tumohaaciŋ wa, na seeƴkohaaniŋ cuuraay ci, 28na seeƴkohaani na dohohse hoosuuɗ ci na tumohaaciŋ wa jen, na beñwaari na degohaaniŋ wa. 29Fu hey hoolɗe in ceem jen wuu so, ca nikan hooloh na hooloh ; in nu laal ca ɗah jaaran nik wuu so. 30Fu hey name yiif Aaruna na kuɓuuciŋ ɗe diwi, fu hooliɗ ɓa wuu so ne ɓa pangkiɗee so findi seeƴkiɗoh.

31Fu hey woye Israayel ci ne ñam woo ne : “ Diwii wa nikan diw hoolɗoha hoolɗuuɗ ci wuu so, ŋ gomal nu gomal. 32Wa heyɗi yiifse ŋ faan ɓo', te ɗu heyɗi haɓɗe wi mand naa jok. Wa hoolɗuuɗ wuu so te ambaata findi in hooliɗ. 33Ɓo' nu haɓiɗ mand naa, a diwa ŋ faaniŋ ɓoyi nikɗi seeƴkiɗoh ɗah, a hey pulɗasse ŋ cuuɓiŋ ɗe. ” »

Cuuraayi

34Nikiɗi woyissa Musaa ne : « Waaka makind ci eeñɗohaacii : Naataap na saheelet na helbenaah#30:34 Eeñɗohaacii, e peɗeem heber eɗ ca tiik cii. Marka ini woyu ŋ "makind ci eeñɗohaaci" ŋ tiik ci inhassaaɗiici., na cuuraay koceet, waa nu nga ɗah ini fu ɓayan nga hendan hend na morom wa. 35Fu hey ca ambsohe findi haɓɗoh eeñɗoha na tumohe, wa nikan cuuraay jemiɗ, koceet, hooliɗ wuu so.

36Fu kooɗ in nga, fu oɗa po wa nik puɗ, fu tuma ŋ fiki Wahndeeni na teeɓohe Ambtiɗohi, ŋ ɗooƴ Ɗiipi-na-Cohohse, ɗiski ŋ cohan na ɗa. Cuuraayeem nikan in ye hoolan nga ɗu. 37Ɗu heyɗi haɓɗe wi mand naa jok, ɗu njirñiɗkohee wa ; ɗu na hee wa ambe findi in hoolɗuuɗ wuu so mi yi Nikiɗi. 38Yaa nu haɓiɗ mand naa ne a eeñɗuka ɗah, a hey pulɗasse ŋ cuuɓiŋ ɗe. »

Currently Selected:

Pula 30: YM

Highlight

Copy