Pula 17
17
Nikiɗi pulɗiɗ masuɓ ŋ atoh faŋ Horeb
1Findi Nikiɗi woyohee ɓa wa, Israayel ca jen kurkohha kehƴa hulangaŋ Sin, ɓa kaɗeeɗa ƴin ƴin po ɓa reesa Refidim ; ɓa yippa ɗiip caŋ ɓa nga. Waaye ŋ ndaam, ɓa raakeeɗi masmi ɓa anan. 2Ɓa waakeeɗa Musaa lahtoh, ɓa woyeeɗa ɗe ne : « Eɗa ɓoo masmi ɓoo anan. » A woosa ɓa ne : « Wa ye tah ɗu waakee so lahtoh ? Wa ye tah ɗu markiskee Nikiɗi ? » 3Ɓa sifaɗukka, ɓa lahtukeeɗa nga ɗe an : « Wa ye tah fu pulɗohha ɓoo Misra, fu hayya na ɓoo ŋ ndii ne fu ap ɓoo na sifaɗ, ɓoo na kuɓuuciŋ ɓoo na ɗoopaat ciŋ ɓoo ? »
4Musaa kiimmba Nikiɗi keeh-keeh, a woosa ɗe ne : « Ŋ joy haɓɗiɗ ɓooɓi ye Nikiɗi ? Ini hondoh ɓa tap po atoh po ŋ kaan laayisɗi ! » 5Nikiɗi loffa ɗe ne : « Adgaa ɓa, fu hun na ɓi yakak, fu ɓay ndooɗi fu laɓee ŋ kalaŋ Niil. 6Marka, ŋ hey ɗa adge, ŋ nik nden, ŋ ɗafuk atoh fi, ŋ Horeb, fu hey laɓe ndooɗi ŋ atoh feem, masuɓ hey pule nga, ɓa raak anaah. » Musaa tummba ina Nikiɗi woyee, a tuma ŋ fiki yakak ca a hunee na ɓa. 7Ndaam teekuusa Maasaa (markisuk) na Meeribaa (waak lahtoh). Laam Israayel ca waakee Musaa lahtoh, ɓa markiskeeɗa Nikiɗi ngaŋ meeksoha ɓa meeksohee an : « Nikiɗi yii ŋ harmban ɓoo wala a nikɗi nga ? »
Israayel ca miniɗ Amalek ca ŋ hiñoha
8Wa raakka mbeh Amalek ci hayya hiñohee na Israayel ci ŋ Refidim. 9Musaa hotohha na ƴaara teeku Yosuwe, a woosa ɗe ne : « Kooɗa ɓi ɓo' ndengiɗ, ɗu kaɗ hiñoha na Amalek ca ; kim ŋ hey nike ŋ ɗafuk tangoori na ndooɗiŋ Kooh ŋ yaah ciŋ ngo. » 10Yosuwe kaɗta hiñoha na Amalek ca findi Musaa nakohee ɗe wa. A yi Musaa, a hunnda na Aaruna na ƴaar teeku Hur, ɓa kaɗta, ɓa tufukka ŋ ɗafuk tangoora. 11Musaa meeɓpa yaah ŋ ɗafka ɗah, Israayel ci ɓeɗ na mine. Waaye a ruhsiɗta ca ɗah, Amalek ci ɓeɗ na mine.
12Musaa nikka na ineem po yaah ciŋ ɗe neeɓohha, Aaruna na Hur ooɓiɗta ɗe atoh, a ɓooffa nga. Yii lahha ɗe ŋ ɓakii, yum lahha ɗe ŋ ɓaki tas, ɓa ammba yaah ciŋ ɗe ne ca ruhsuu po nohi muyya. 13Yosuwe na Israayel ca laɓpa Amalek ca na hiñohoh caŋ ɓa ndang po ɓa raɗta ɓa ŋ kehƴi.
14Wa hiñoha reeh, Nikiɗi woosa Musaa ne : « Fiisa in cii ŋ teere, fu ɗaaka, ca alkohsuu. Te woya Yosuwe ne ŋ hey reehɗe Amalek ci ŋ kehƴi po ali ɓo' naandsukissanɗi ini kaɗ nga ɓa. »
15Ŋ ndaam, Musaa yippa seeƴkoha wuu Nikiɗi nga, a teekkaa tiiki tokis : "Nikiɗi a yi Raayaaniŋ Ndamiŋ ngo." 16A woosa ne : « Yaahi meeɓu yurhiɗuusa ŋ Nikiɗi, tahiɗ po Nikiɗi genan gen hiñoh Amalek ci gomal nu gomal. »
Currently Selected:
Pula 17: YM
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
