Pula 16

Kañam kaŋ Israayel ca ŋ kehƴa hulanga

1Wa ɓa ɓoof nga po caɓna kanakɗoh ŋ pulohaŋ ɓa Misra raakka neeh ndaŋkiyaah na yatuus (15), Israayel ca jen kurkohha Elim. Ɓa kaɗeeɗa po ɓa reesa kehƴa hulangaŋ Sin, ŋ harmban Elim na tangooraŋ Sinaay. 2Ŋ ndaam, Israayel ca jen lahtukeeɗa ŋ Musaa na Aaruna. 3Ɓa woyeeɗa ne : « Nikiɗi joyee ɓoo joy ap ŋ Misra ; ndaam, ɓoo nikee ɓoofiɗ na soƴeecaŋ sepet ca te ɓoo meeɗeen ñam po ɓoo kap nding. Waaye weɗɗi, ɗu ɓayiɗ ɓooɓi jen ndii ne ɓoo kaan na aɗ. »

4Nikiɗi woosa Musaa ne : « Marka ! Ŋ hey ɗu toɓɗe kañam. Kooh-nu-wiis, ɗu hey kaɗe, ɗu ɓaya nga ini mit ɗu ɗingiɗ neeh yino ; teemb ndeem, ŋ hey marke andi ɗu hey taambɗe nakoh ciŋ ngo wala. 5Ŋ mbehi yasna-yino'ɗoh, ɗu ɓay ngaŋ kañam keem ɗah, wa nikan wuu neeh kanak. »

6-8Musaa na Aaruna woosa Israayel ca jen ne : « Nikiɗi kerhiɗ lahtukiŋ ɗu nga ɗe, ŋ niini woti, a hey ɗu one sepet ñamaah. Ɗu hey inhe ne a yi Nikiɗi, yi pulɗoh ɗu Misra. Kim na ɓaaɓa, a hey ɗu name on kañam, ɗu ñam po ɗu kap ; ɗu hey hote ndamiŋ ɗe. Ini kaɗ nga ɓoo, ɓoo tus haa ; ɗu lahtukɗi nga ɓoo, ɗu na lahtuke ŋ Nikiɗi. »

9Musaa woosa Aaruna ne : « Woya Israayel ci jen ne, ɓa hayaat ɓa tufuk ŋ fiki Nikiɗi laam a kerhiɗ lahtukiŋ ɓa nga ɗe. » 10Wa Aaruna na woye na mboolndaŋ Israayel ca, ɗekka po, ɓa jen ɓa yurhiɗkohha na kehƴa hulanga. Ndamiŋ Nikiɗi teeɓukka ɓa ŋ ɗooƴ eela yipe haa kumbin. 11Nikiɗi woosa Musaa ne : 12« Ŋ kerhiɗ lahtukiŋ Israayel ci ; woyiɗ to ɓa ne : “ Ŋ niini woti, bala nohi muyan ɗah, ɗu hey ñame sepet te kim na ɓaaɓa, ɗu hey raake kañam ki kap ɗu, ɗu hey inhe ne ñam Nikiɗi, Koohiŋ ɗu. ” »

13Wa niina ree, mbaƴul#16:13 mbaƴul : a yi "caille" ŋ farañse. A sel, mand na pambi-nduuf ƴin. Ca na hune laayiɗ, te ca minɗi pund baahiɗ. ca pundeeɗa, hayeeɗa. Ca yoonnga ŋ dala po wa riiffa. Kooh wiissa na ɓaaɓa, maar keennda nga. 14Wa maara coot, ŋiisohi haa sangri raɗiɗta ŋ merhey ma ; 15Israayel ca hottaa, ɓa inahɗi ini wa nik, ɓa woyeeɗa ŋ harmban ɓa ne : « Inii wa ye ? » Musaa loffa ɓa ne : « Wa kañam ki Nikiɗi on ɗu ; 16inii, weɗ a woo nga : “ Yaa nu nga ɓayaat ini mit ɗe ɗingiɗ neeh yino, haf nu nga ɗah, andaar yino. ” »

17Ɓa tumohha ɗaa, yaa nu nga ɓayya, ɓum ɓayya juuk, ɓinooɓi ɓayya ƴissuut. 18Waaye wa ɓa ɓees ca na andaar, ɓa ɓayee juuk uupɗeeɗi te ɓa ɓayee ƴissuut mitɗeen. Yaa nu nga ɗah, ɓayee ini doy ɗe.

19Musaa woosa ɓa ne : « Ali ɓo' kinaat ɗaak nga wuu kim na ɓaaɓa. » 20Raakka ɓi kerhiɗɗi ɗe, ɓa ɗaakka ŋ caŋ ɓa po na ɓaaɓa, ca canginnda, ca oteeɗa ; Musaa ayrukka ɓa. 21Ini kooɗoh ndeem, ɓaaɓ nu ree ɗah, yaa nu nga ɗah, kaɗ ɓaya ini mit ɗe ɗingiɗ neeh yino. Kaɗta po nohi dammba ɗah, ini tas ŋ kehƴi seey.

22Ŋ mbeha yasna-yino'ɗoh, ɓa ɓayya ɗingiɗ wuu neeh kanak, weɗ ne haf nu nga ɗah, andaar kanak ; kilifaaca kaɗta ŋ Musaa, ɓa woosa ɗe wa. 23A loffa ɓa ne : « Ineem weɗ Nikiɗi nakohe ; kim, wa mbehi hoolɗi na iɗsiɗkohse, wi Nikiɗi waɗu. Utaat ini ɗu waaɗ ut, ɗu tik ini ɗu waaɗ tik, ɗu ɗaak ini tas po kim na ɓaaɓa. » 24Ɓa tummba ineem, ɓa ɗaakka wuu kim findi Musaa nakohoha, ɓa hotta ne ca otɗi, ca cangindɗi.

25Weɗ Musaa woyoh ɓa ne : « Ñamaat ca woti, ɗu heyɗi raake ali in ŋ bilaf fi, laam woti wa mbehi na iɗsiɗkohse, wi Nikiɗi waɗu. 26Ini ree neeh yasna-yino, kaɗaat ɗu ɓaya ñamaah waaye mbehi yasna-kanakɗoh, weɗ na iɗsiɗkohse ; ñamaah raakanɗi ŋ bilaf fi. »

27Raakka ɓa pul ŋ mbehi na iɗsiɗkohse ne ɓa ɓay ; ɓa hotɗi ali in. 28Nikiɗi woosa Musaa ne : « Ɗu genan gen sang taambiɗ nakoh ci na teeɓoh ciŋ ngo po kiɗa ? » 29Musaa ɓaatiɗta ɓa nga ne : « Inhaat baahiɗ ne a Nikiɗi eɗ ɗu mbehi na iɗsiɗkohse, weɗ tah a onnda ɗu ŋ mbehi yasna-yino'ɗoh ne ɗu ɓay ɗingiɗ wuu neeh kanak nga ; ŋ mbehi yasna-kanakɗoh, yaa nu nga ɗah, ɓoofaat, a puluu. »

30Ŋ ineem Israayel ca iɗsiɗukka mbeha yasna-kanakɗoh. 31Ɓa teekka kañam kaam maan (wa-ye). Wa mandee na pees koryand#16:31 koryand : pees koryand hend na pees ɓasi., wa nikee yaanow te fu ñamee wa ɗah, waa mandee na ɗangi haɓɗohu kuum. 32Musaa woosa ne : « Inii weɗ Nikiɗi nakoh : Andaar tumsaat maan po wa riif, wa ɗaaku, wuu ɓi na hee rimkohe nga ɓoo, ne ɓa hot kañam ki Nikiɗi pesɗohee ɓoo ŋ bilaf fi, wa a puliɗ ɓoo Misra. » 33Musaa woosa Aaruna ne : « Ɓaya meeme ɗaakkoha, fu tuma andaar maan po wa riif, fu ɗaaka ŋ fiki Nikiɗi, wa nik wuu ɓi na hee rimkohe nga ɓoo. » 34Findi Nikiɗi nakohee wa Musaa jok, Aaruna ɓayohhaa ɗaa ŋ ɗiska na naandsukohse ambtiɗohi Nikiɗi ambtiɗoh na ɓa, ne wa ɗaaku nga.

35Israayel ca ñamiɗ ŋ maaneem ini ree kiis ndaŋkiyaah-nikiis (40) po findi ɓa reyoh ŋ aasoha kur genohuuɗ, wa nikka Kanaan. 36(Andaar caŋ ɓa, ca nikee liitar#16:36 liitar : Musaa inheeɗi liitar, ɓa meeɗeen ɓeesoh eefaa. A fiis ne andaar ndaŋkiyaah, weɗ eefaa yino. kanak na camban.)

Currently Selected:

Pula 16: YM

Highlight

Copy