Pula 12
12
In ci nakohu ŋ Paak
1Weɗi Nikiɗi woyoh Musaa na Aaruna ŋ Misra ne : 2« Caɓnii weɗ na hee nike nga ɗu caɓni koc, weɗ caɓni koc ŋ kiis ki#12:2 caɓni koc ŋ kiis ki : caɓnii, ɓa na woyee wa "Aabiib", wa na cambe ne caɓni na pule ŋ marsa kaɗ awril leeriɗta po wa langiɗta ɗah. "Aabiib" tokis "mbong". Aabiib ŋ Israayel ci weɗ caɓni ɓa na nguɗohe lorso.. 3Kaɗaat ɗu woya cuuɓiŋ Israayel ne, neeh ndaŋkiyaah ŋ caɓnii, fah nu nga ɗah, waakaat mbaal naar mbaa suket, fah nu nga ɗah ɗoopaat yino. 4Nik ne fahi ƴissuutiɗ po wa minɗi reehiɗ mbaal mbaa suket yino ɗah, ɓa ɓeeɗkaat gentoh ciŋ ɓa uup ɓa reɓ ; ɓa marak ɓo' nu nga ɗah, ini a min ñam, ɓa ɓay ɗoopti ɓa min reehiɗ. 5A nikaat naar, a raak kiis yino te a raakuu ali sikka.
6Ɗu hey ɗe ɗaake baahiɗ po caɓni raak neeh ndaŋkiyaah na neeh nikiis (14) ; ɗu ɓi cuuɓiŋ Israayel jen, fah nu nga ɗah hey hoose ɗoopteem ne nohi muyee ɗah. 7Ɗu hey ɓaye ŋ ñif miŋ ɗe, ɗu reef ŋ leentooni na ɓak ci kanak ciŋ yahndeer kahan nu nik ne ɗoopteem hey ñamse nga ɗah. 8A na hee hey utse ŋ weka mbaɗi, ɗu ñam ɗe na mbuuru raakaaɗi lawiir na paangi aayiɗ. 9A heyɗi ñamse nonaaɗi, a heyɗi bahalse, aa hee hey utse na hafi na kot ci na in ci ŋ ɗooƴ ce. 10Ɗu heyɗi ɗaake nga wuu kim na ɓaaɓa, in nu tas nga ɗe ɗah, ɗu na hee wa hey dohe bala Kooh wiisan ɗah. 11Ɗu ñamohan ɗe an : tokɗukaat ŋ kinoh po ɗu ndeng, ñafaɗ ci ɓeku ŋ kot ci, ɗu amb ndooɗ ŋ yaah ciŋ ɗu, te ɗu ñam ɗe ñam gaawiɗ.
Ineem weɗ kañam kiŋ seeƴkiŋ Paak#12:11 "Paak" ŋ heber wa tokis "ƴakaanduk". wuu so, mi yi Nikiɗi. 12Ŋ wekeem ŋ hey aase ŋ Misra jen, ŋ ruhsiɗ kakaan ŋ saaw ciŋ ɓa jen, ini amboh ciŋ ɗoopaat ci po ɓiŋ ɓooɓi. Ŋ hey name teeɓ kooh ciŋ ɓa ne ca keeh haa, ñam Nikiɗi. 13Waaye ŋ kahan ci ɗu na hee nikohe, ñif meem hey nikee mandargaani na hee ɗu tose, ŋ hota ɗah, ŋ hey ca ƴakaandke, wa tos ɗu ŋ naamooni na ape, wi maa hee ruhsiɗe ne ŋ laɓ ɓi Misra. 14Mbeheem na hee nike ini fu inah ne, ɗu na ɓi rimkohan nga ɗu, na hee naandsuke kiis nu ree na feet yakak wuu so, mi yi Nikiɗi. Feeteem nikan nga ɗu nakohi heyɗi faɗse.
Feetiŋ Mbuuruuci raakaaɗi lawiir ci
15Ɗu ñaman mbuuru raakaaɗi lawiir ini ree neeh yasna-kanak. Ini kooɗoh ŋ mbehi koc ɗu hey nihse lawiir ci nik ŋ kahan ciŋ ɗu po ŋ mbeha yasna-kanakɗoh. Yaa nu ñam mbuuru raakiɗ lawiir ŋ neeh ceem ɗah, a hey pulɗasse ŋ cuuɓiŋ Israayel. 16Mbehi koc na wi yasna-kanakɗoh, ɗu hey cohe coh yakak wuu so, ɗu heyɗi pangke, ɗal kañam ki ɗu na hee haɓɗe yaa nu nga ɗah. 17Ɗu hey yakɗe feetiŋ Mbuuruuci raakaaɗi lawiir ceem ne ɗu naandsuk mbehi ŋ pulɗoh ɗu Misra. Ɗu heya haɓɗe, ɗu na ɓi rimkohan nga ɗu, wa nik nakohi heyɗi faɗse. 18Caɓni koc raak neeh ndaŋkiyaah na neeh nikiis (14) ɗah, ini amboh ŋ niinaŋ wa ɗu ñaman mbuuru raakaaɗi lawiir po ŋ niinaŋ mbeha ndaŋkiyaah-kanak na yino'ɗoh (21). 19Ini ree neeh yasna-kanak, lawiir joyɗi nik ŋ kahan ciŋ ɗu ; te hanhe mbaa geniɗ nu ñam inaa raakiɗ lawiir ɗah, a hey pulɗasse ŋ cuuɓiŋ Israayel. 20Kon ɗu ñamanɗi inaa raakiɗ lawiir ; na ɗisik nu ɗu min gen ɗah, ɗu ñaman ɓi mbuuru raakaaɗi lawiir. »
21Weɗi Musaa ɓeeɗkoh yakak caŋ Israayel jen, a woosa ɓa ne : « Kaɗaat ɗu ɓaya mbaal wala pe', fah nu nga ɗah, ɗu hoos ɗe, a nik Paaki. 22Ɗu ɓay ɓi car hisoɓ#12:22 hisoɓ : wa kidig ƴin. Car ci ceɗ ɓooɓa meeɗ lisoh ne ɓa farsee ɗah., ɗu hooƴ ca ŋ ñif mi ɗu na hee taaknohe ŋ ɗoopti ɗu hoosan, ɗu reefa ŋ leentooni na ɓak ci kanak ciŋ yahndeeriŋ kahan nu nik. Ali ɓo' kanaat pul ŋ kahan ce mbaɗi po Kooh wiis. 23Nikiɗi hey aase ŋ Misra jen, ne a ruhsiɗ naamo nga waaye, a hot ñif mi ŋ yahndeer ci ɗah, a hey ƴakaandke kahan ciŋ ɗu, a faɗanɗi malaakaani na yahrohe a aas nga ca.
24Ɗu na ɓi rimkohan nga ɗu, ɗu hey taambɗe nakohiŋ ɗe weem, ɗu tumee wa po faw, 25ɗu kaɗ po ɗu aas kur ka a gapee ɗu ne a hey ɗu wa one ɗah, ɗu hey wa haɓɗe. 26Kuɓuuciŋ ɗu meekis ɗu ini wa tokis ɗah, 27woyaat ɓa ne : “ Weɗ seeƴkiŋ Paak wuu Nikiɗi, yi ruhsiɗee naamo ŋ ɓi Misra, a ƴakaandukka kahan caŋ ɓoo te a muciɗta fah ciŋ ɓoo, wa ɓoo nikoh ñaam. ” » Wa Musaa reehiɗ woo, Israayel ca ƴekka ŋ kehƴi ne ɓa ñaamuk Nikiɗi. 28Ƴutta ɓa kaɗta haɓɗa jok ina Nikiɗi nakee Musaa na Aaruna.
Naamooni mirndoh : kakaan kaŋ saaw ca
29Mbaɗi ŋ ɗooƴ weka, Nikiɗi appa saaw ca ƴaar caŋ Misra jen. Ina amboh caŋ ɗoopaat ca, yaŋ ambuuɗa nik kasoona po yaŋ Firawna ya ɓoof ŋ kur ka. 30Ŋ weka mbaɗi, Firawna na dag caŋ ɗe jen na ɓi Misra jen kurukka ; rooy keeh-keeh raakka ŋ Misra, raakɗi kahna tasee raak ɓo' kaaniɗ. 31Firawna ɓeeɗukka Musaa na Aaruna ŋ ɗooƴ wekaam, a woosa ɓa ne : « Kurkaat ɗu pul ŋ ɓooɓiŋ ngo, kaɗaat ɗu ñaamka Nikiɗi, ɗu ɓi Israayel ci jen findi ɗu kiimohee wa. 32Ɓayaat sah ɗoopaat ciŋ ɗu jen findi ɗu woyoha, ɗu coot te ɗu kiim Koohiŋ ɗu a barke'iɗ to. » 33Ɓi Misra liiɓee ne ɓa jen ɓa hey kaane, weɗ tah ɓa tufukka Israayel ca, ɓa aañeeɗa ɓa ne ɓeem araat pul kur kaŋ ɓa.
34Weɗi Israayel ca ɓayndohoh mun ca ɓa siiɓe, raak ca tumuuɗi lawiir paaɗ ; ɓa poonnda kanoh caŋ ɓa na kulɓa, ɓa likukka ca. 35Ɓa haɓiɗta ina Musaa woyee ɓa, ɓa meekissa ɓi Misra ngaŋ in caŋ ɓa haɓɗohsee urus mbaa haalis, ɓa nammba ɓa meekis kulɓa. 36Nikiɗi ɓekeen ŋ keeñ ciŋ ɓi Misra ini tah ɓa baahohha Israayel ci po ɓa eɗta ɓa in ca ɓa meeksohe. Ŋ ineem, ɓa ɓarngiɗta ɓi Misra.
37Wa ɓa ɓarngiɗ ɓa, ɓa pulohha kur kaŋ Ramses, ɓa kaɗta ɓak Sukkoot. Ɓa nikee ƴaar ndengiɗ junni-teemet-yasna-yino (600.000) ne fu kinndohɗi komaakca ƴin ca na ɓitiɓ ca ɗah. 38Ɓo' laayiɗ pulohha ŋ heet wiiriis hunnda na ɓa. Mbaal caŋ ɓa na pe' caŋ ɓa na inoh ca laayeen lool, ca hunnda ca kaɗeeɗa. 39Ɓa tufkasse tufku ne ɓa pul Misra, ɓa raweeɗi haɓiɗ kañam, weɗ tah ɓa haɓiɗta mbuuru raakaaɗi lawiir na mun ca siiɓuuɗ ca guufaaɗiica ɓa pulohee na ca Misra.
40Ŋ mbeheem, weɗ Israayel ca tumoh kiis teemet-nikiis na kiis ndaŋkiyaah-kaahay (430) ŋ Misra. 41Wa kiis ceem reeh, ŋ noha mbaɗi, cuuɓiŋ Nikiɗi puleeɗa Misra rung rung, ɓa kaɗeeɗa. 42Ŋ wekaam, a neehha ɓa niiɗ wa a pulɗee ɓa Misra. Weɗ tah gomal nu hay ɗah, Israayel ci joyiɗ ɗe neeh ñaamuk ŋ wekeem.
Ɓooɓi joy ñam ŋ Paaki
43Wa in ceem raak, Nikiɗi woosa Musaa na Aaruna ne : « Inii weɗ nakohu ŋ ini kaɗ ŋ Paaki : Ali hanhe joyɗi ñam nga. 44Ñaami fu inah ne a romu romu, a miniɗ ñam nga, raak ɗa tumiɗ po a nguɗuk ɗah. 45Ɓoyi genohaah mbaa surgaani na wirndasse joyɗi ñam nga. 46Paakeem ñamohsan ŋ ɗooƴ kahan ci, ali sepet pulanɗi ŋ hari. Te ali ƴoh weersanɗi. 47Ɓo' nu nik ne fu ɓaah ŋ cuuɓiŋ Israayel ɗah, fu joyiɗ yakiɗ feeteem. 48Hanheeri gen ŋ harmban ɗu, waaɗ ɓaah ŋ seeƴkiŋ Paaki wuu Nikiɗi ɗah, ƴaar ci nik ŋ fah ce jen joyiɗ nguɗuk, a hana min haɓiɗ findi Israayel ci. Ɓoyi nguɗukɗi minɗi ɓaah nga. 49Nakohi yino ; wa faɗɗi Israayel ci, wa namɗi faɗ hanheeci gen na ɗu. » 50Weɗi Israayel ci jen haɓɗoh jok ina Nikiɗi nakee Musaa na Aaruna. 51Mbaɗi Nikiɗi puliɗta Israayel ci Misra, ɓa hunnda rung rung ɓa kaɗeeɗa.
Currently Selected:
Pula 12: YM
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
