Tum ci 6

Ɓo' yasna-kanak kooɗuuɗ ne ɓa ɓaatɗoh Apootar ci

1Ŋ jamanoocaam, taalubeeca ɓaatkeeɗa ɓaatuk, ŋ ineem Yawuut ca woyee gerek lahtukeeɗa ŋ ɓa woyee heber. Ɓa lahtukee ne, ɓitiɓ ca ƴaar caŋ ɓa kaan te ɓa ɓaahha nga ɓa, meeɗ meeɗ sagankohu ŋ paysoh ca meeɗ paysohu Kooh-nu-wiis. 2Wa Apootar ci ndaŋkiyaah na kanak ci (12) keraha, ɓa cohɗohha taalubeeca jen, ɓa woosa ɓa ne : « Wa moɗɗi ɓoo faɗ jangɗohiŋ woo kiŋ Kooh, ɓoo taambkohee paysoh kañam. 3Kon, ɓaah ciŋ ɓoo, kooɗaat ŋ ɗooƴ ɗu ƴaar yasna-kanak ɓi raak seede moɗiɗ, riiffa na Fuuɗsi Hoolohngaani te ɓa raakka liiɓohaaɗ moɗiɗ, ɓoo dengkoh ɓa pangkeem. 4Ini kaɗ ŋ ɓoo, ɓoo min taalndiɗ yurhiɗkoh kiimiŋ Kooh na pangkiŋ jangɗohiŋ woo kiŋ ɗe. »

5Ɓooɓa jen hunnda teyɗukka woo keem. Weɗ ɓa tanoh Ecen, ƴaar kosiɗ lool, te a riiffa na Fuuɗsi Hoolohngaani. Ɓa tannda a yi na Filip, Porokor, Nikanoor, Timoon, Parmenaas, na Nikola ƴaariŋ Añcos ci aasee ŋ waasiŋ Yawuut ci. 6Ɓa ɓayya ɓooɓeem ŋ Apootar ci, ɓeem degga ɓa yaah ciŋ ɓa, kiimiɗta ɓa Kooh. 7Woo kiŋ Kooh uupeeɗa nga uup pasarkoh, taalubeeca uupeeɗa nga uup laay lool ŋ Yerusalem. Te seeƴkiɗoh Yawuut laayiɗ teyɗukka kos Yeesu.

Ecen ambuuɗ

8Kooh baahohha Ecen, a onnda ɗe hatil po a tumeeɗa keemaan, a teeɓoheeɗa firnde yakak ŋ ɗooƴ ɓooɓa. 9Waaye raakka ɓi ɓo' ɓaah ŋ sinaagoga teeksee "Sinaagogiŋ Ñaam ci faɗsuuɗ ci", ɓa taastiɗoheeɗa na Ecen. Ɓooɓeem nikee Yawuut, ɓa pulohee Sireen na Aleksandiri, ɓum pulohha Silisi na Asi. 10Waaye ɓa mineeɗi ɗe ɓur, laam Fuuɗsi Hoolohngaani oneen ɗe liiɓohaaɗ moɗiɗ po a minnda woo baahiɗ.

11Ŋ ndeem, ɓa wirinnda ɓi ɓo' ne ɓa woo ne : « Ɓoo kerhiɗ Ecen woyeeɗa in moɗaaɗi ŋ Musaa na Kooh. » 12Ɓa yopoh ɓooɓa na yakak ca na jangɗohoh caŋ waasiŋ Musaa ɗaa ; ɓeem keennda Ecen, ɓa ammba ɗe, ɓa ɓayya ɗe ŋ saangnaŋ yakak caŋ Israayel. 13Ɓa ɓayya ɓi seede leyoh, ɓeem woyeeɗa ne : « Ƴaarii na kurkeeɗi ŋ woo woo moɗaaɗi ŋ ini kaɗ ŋ Kahan Kooh na waasiŋ Musaa. 14Ɓoo kerhiɗ ɗe woyeeɗa ne Yeesu yiŋ Nasareet yeem hey fole Kahniŋ Kooh wii, a ɓoƴsoh mbaah ci Musaa faɗiɗ ɓoo. »

15Ɓooɓaŋ saangnaŋ yakak ca jen junnga ŋ Ecen, markeeɗa ɗe, ɓa hotta fikiiriŋ ɗe melciɗeeɗa findi fiki malaaka.

Currently Selected:

Tum ci 6: YM

Highlight

Copy