Tum ci 10

Piyeer ŋ ɗiskaŋ Koorney

1Wa raakeen ŋ Seesare ƴaar teeku Koorney. A adgohee soldaar teemet, ɓa ɓaahee ŋ soldaar caŋ Rom, ɓi na woysee soldaar caŋ Itaali. 2Ƴaareem nikee ɓo' waaɗiɗ Kooh, ye nupan Kooh, a yi na ɓi kahan ce jen. A meeɗeen on keeh-keeh Yawuut ci raakaaɗiici te a meeɗ gen kiim Kooh.

3Wa raakka mbeh, wi kaɗ po nohi cammba soos, in hayɗohha Koorney findi heeƴ, a hotta hooliɗ malaaka Kooh aasiɗ, raakka ɗe ŋ ɗiska a nikee, woosa ɗe ne : « Koorney ! » 4A tiitta, a iiƴca malaakaani hew, a woosa ne : « Wa ye kilifaani ? » Malaakaani loffa ɗe ne : « Kooh teyɗukiɗ kiim ciŋ ɗa, a alkohɗi ɓaatɗohi fu na ɓaatɗohe ñakiɗ ci. 5Ɗiski wa nik, woosa ɓi ƴaar Yope, ɓa ɓeeɗkiɗ ɗa ƴaara teeku Simong te a woysee Piyeer. 6A dal ŋ kahan fortoh und nam teeku Simong, kahan ce nik ŋ sero cookma. »

7Wa malaakaana woyee na ɗe coot, Koorney ɓeeɗukka surga kanak ŋ surgaaciŋ ɗe na soldaar yino nupiɗ Kooh ŋ ɓi a adgoh in maañiɗ. 8Koorney naandsukka ɓa ini raak jen, ƴutta a woossa ɓa Yope.

9Ŋ Kooh-wiisiina, ɓa nikka ŋ waas po ɓa reɓeeɗa Yope, raak Piyeer rapiɗ ŋ ɗafuk kahna ne a kiim Kooh ŋ leero noh. 10A aɗukka, a waaɗta ñam. Wa a tikɗassee kañam, in puloh ŋ Kooh hayɗohha ɗe findi heeƴ. 11A hotta Eel ci rangsukiɗ, inaa haa piis yakak ambuuɗ ŋ koñ ciŋ wa nikiis ci ruhseeɗa po ŋ kehƴi. 12Heet ciŋ ɗoopaat ci jen nikka nga : ɗoopaat ci na kot ci nikiis ci na faskoh ci ŋ kehƴi na pundoh ci ŋ ɗafki.

13Raakka hoosoori woo ɗe ne : « Kurka Piyeer ! Apa fu ñam ! » 14Waaye Piyeer loffa ne : « Muk Heɗi, ŋ moosɗi ñamoh in araamiɗ wala in hoolaaɗi'iɗ ! » 15Hoosoora woyissa ɗe ne : « Ini Kooh hooliɗ, fu, kinaa araamiɗ ! » 16Ɗaa, hoosoora woyeeɗa, Piyeer lofeeɗa po wa nikka waas kaahay, jaarra ina mand na piis rapɗuusa ŋ Eel ci.

17Piyeer muuƴca ŋ ini hayɗohee ɗe findi heeƴ, an wa joy ye tokis ? Waam raak ɓooɓa Koorney woosee meeksohiɗ kahan Simong po ɓa reyiɗ nguɓu kahna. 18Ɓa ɓeeɗkohha, ɓa meeksohha an : « Simong yi na woyse Piyeer a dal ŋ ndii e ? »

19Piyeer rissa liiɓsiɗoh ŋ ini hayɗohee ɗe findi heeƴ, Fuuɗsi Hoolohngaani woosa ɗe ne : « Ƴaar kaahay ɓii waak ɗa ŋ ndii. 20Kurka fu ruhus, huna na ɓa ; kina raak hel kanak nga, ñam woos ɓa. »

21Piyeer ruhussa, a woosa ƴaaɓa ne : « Ñam ɓoyi ɗu na waake, wa ye kot ciŋ ɗu ? » 22Ɓa loffa ɗe ne : « A Koorney, ƴaar ŋ ɓi adgoh soldaar ciŋ Rom, a yi woos ɓoo. A ƴaar yurhiɗ, a nupiɗ Kooh te Yawuut ci jen seede'iɗ ɗe seede baahiɗ. A malaaka Kooh nak ɗe ne a ɓeeɗkaat ɗa ŋ kahan ce, a sikɗuk ini fu raak woyaah ɗe. » 23Jaarra Piyeer woosa ɓa ne ɓa aasaat, ɓa neeh po kim.

Wa Kooh wiis, a ɗoffa, a cooteeɗa na ɓa ; ɓi ɓo', ŋ ɓaah caŋ ɓoo kosiɗ ca ŋ kur kaŋ Yope ɓennda ɗe. 24Ŋ Kooh-wiisiina weɗ a reyoh Seesare. Raak Koorney ɓeeɗkiɗ ɓaah ciŋ ɗe, a nammba ɓeeɗuk nawleeciŋ ɗe keeh-keeh ci, a sekeeɗa Piyeer. 25Wa Piyeer na aase, Koorney kaɗta coha na ɗe, a ƴekiɗta ɗe po a reesa kehƴi, a ñaamukka ɗe. 26Waaye Piyeer kurkiɗta ɗe, woosa ɗe ne : « Kurka ! Ŋ nam nik ɓo' dong. » 27A taalndiɗta, a woyeeɗa na Koorney po a aassa kahna. A raakka ɓo' laayiɗ nangɗukohiɗ nga.

28A woosa ɓa ne : « Ɗu inhiɗ ne wa sangohuuɗ ne Yawuut ambsukoh na yi nikɗi Yawuut wala a aas kahan ce. Waaye Kooh teeɓiɗ to ne ŋ joyɗi woo ŋ ini kaɗ ŋ ɓo' ne a araamiɗ wala a hoolɗi. 29Weɗ tah, wi ɗu nakoh ho ɓeeɗkiɗu, ŋ degɗi ali woo nga, ŋ hayiɗ. Ŋ waaɗiɗ inah ini tah ɗu ɓeeɗukka so. »

30Koorney loffa ɗe ne : « Wa degiɗ neeh kaahay woti, ŋ wahtuunii, wahtuuni nohi na cambohe soos, ŋ kiimeeɗa Kooh ŋ kahan ndo. Ɗekka po ƴaar ɓekuk kulɓa melciɗ nikka jalañ ŋ fikiiso, 31a woosa so ne : “ Koorney, Kooh teyɗukiɗ kiimiŋ ɗa te a alkohɗi ɓaatɗohi fu na ɓaatɗohe ñakiɗ ci. 32Mbaa woosa ɓi ɓo', ɓa kaɗ Yope, ɓa ɓeeɗkiɗ ɗa Simong yi na woyse Piyeer. A dal ŋ Simong wiiriis fortoh und te kahan ce nik ŋ sero cookma. ” 33Ŋ jaarra woosoh nga ɗa te corka ŋ ini fu teyɗuk hay. Ɗiski wa nik ndii, ɓoo jen, ɓoo ɓii ŋ fiki Kooh ne ɓoo kerah ini Heɗi nak ɗa woyu jen. »

Woo kiŋ Piyeer ŋ kahan Koorney

34Piyeer kooɗta woo ka, woosa ne : « Ŋ inhiɗ keeh-keeh kotii ne Kooh raakɗi talsoh ŋ ɓooɓi, 35laam ɓo' nu nup ɗe te a genee tum in yurhiɗ ɗah, ŋ cuuɓ nu a min ɓaahoh ɗah, a neɓiɗ ɗe.

36A woosohiɗ woo kiŋ ɗe ŋ Israayel ci, a woosa ɓa Yegɗohiŋ Muci, wiŋ jami taamboh ŋ Yeesu Kiristaa yi Heɗ ɓo' ci jen. 37Wa camb wa Yahya woo ne “ Ɓoktukaat ! ” Ɗu inhiɗ ini raak cambohha Galile po ŋ kur caŋ Yudee jen. 38Ɗu inhiɗ findi Kooh yiifoh hatiliŋ Fuuɗsi Hoolohngaani ŋ Yeesu yiŋ Nasareet te ɗisik nu a taambeen ɗah, a tumeeɗa in baahiɗ nga, a wirɗeeɗa ɓi Seytaani ambe, laam Kooh nikee na ɗe.

39Ɓoo nak, e ɓoo seedeeciŋ in ci Yeesu tum jen ŋ Yerusalem na kur ciŋ Yawuut ci cinooci. A apuuɗ ŋ daaƴi ɓa daaƴ ɗe ŋ kurwaa, 40waaye Kooh hultiɗiɗ ɗe ŋ mbeha kaahayɗoh. A onnda ɗe ne a teeɓ haf ce ɓooɓi, 41ɓooɓi jen haa, waaye seedeeci Kooh kooɗee bala ineem, weɗ ne ɓoo, ɓi ñamee aneeɗa na ɗe wa a hulit ŋ kakaan ka.

42A nakiɗ ɓoo ne ɓoo yegiɗ cuuɓi ne a yi Kooh tufkiɗ ne a atte pesiɗ ci na kaaniɗ ci. 43Woosuuɗ ci jen seede'ɗiɗ ɗe ne : Yaa nu kos ɗe ɗah, Kooh hey ɗa ɗaase bakaaɗ ciŋ ɗa ŋ tiikiŋ ɗe. »

Fuuɗsi Hoolohngaani ruhsiɗ ŋ ɓi nikɗi Yawuut

44Wa Piyeer na woye, Fuuɗsi Hoolohngaani ruhussa ŋ ɓooɓa sikɗukee Yegɗohi jen. 45-46Yawuut ca kosiɗ ca nikee na Piyeer kerheeɗa ɓeem jombeeɗa ŋ peɗeem ci nikɗi peɗeem ciŋ ɓa, yakɗeeɗa Kooh. Yawuut ca jen feyuusa ŋ ini Kooh nam soɗ Fuuɗsi Hoolohngaani ŋ ɓi nikɗi Yawuut.

Piyeer woosa ne : 47« Ɓi rahas Fuuɗsi Hoolohngaani findi ɓoo, ɓa miniɗ sangohu ɓoktu ŋ masuɓ e ? » 48Ŋ ineem, a nakohha ne ɓa ɓoktu ŋ tiikiŋ Yeesu Kiristaa. Ƴutta, ɓa kiimmba ɗe ne a nik na ɓa ɓi neeh.

Currently Selected:

Tum ci 10: YM

Highlight

Copy