Luka 17
17
Taya Na Ukyuli Ɔbla Likpidi Na Awɔ Ɔsu
1Yesu ɔ́su nwuna batɛyane ɔnini, “Ala ani mɔɔyá na ukyuli ɔɔbla likpidi ni, adubo bɔkya. Nsu bɔbuɛ muute ukyuli ɔni lɛlɔ na ala amɛni adubɔsia asa na eduo bekyuli akɔ! 2Si béti kukɔ bonwu kɔdi báƒala-nwu ɔkwɛ na bányina-nwu bákya ɛpu kemmo muedi ni, ɔdia-nwu utulo kɔtu kɔni na Katɔti ɔdubɔni anwu ɔni maya na likpidi lɛsia-nwu lɛlɔ liduo mina banamu akɔ. 3Anwuɔsu bɛsia ala ani na bɛɛbla anu.
“Na si ƒula ɔkpana ɔ́bla-a likpidi lɛdi ni, dɔnku-nwu. Na si úkpi kɔtɔ ni, na eti akyiɛ-nwu. 4Si ɔ́bla lɛla lɛdi ɔ́ƒiɔ-ɔ maatɛ na limeyi linwi kemmo na ɔ́sɔ únwini úbo ubekpi-ɔ kɔtɔ maatɛ ɔmmɔ ni, ti kyiɛ-nwu.”
Bévele Yesu Bɔƒɔtaadi Ɔyikun Bébu
5Yesu batalane bévele Yesu banii, “Blɔti, ya na bula bɔƒɔtaadi bumomo bubu.”
6Amu na Blɔti ɔ́su-ma ɔnini, “Si bibo bɔƒɔtaadi na búdu aani lɛla lɛdi kebi kani nse blii suɛ ntulo ƒui ni, nka bɛdubɔkana na bɛsu kugyii kɔmɛni bɛnii, ‘Gyu likpo lɛmɛni na etéduo ɛpu kemmo ngye.’ Na kɔdubɔbla lɛni kani.
Yesu Ɔ́su Kalɛ Na Kabla Ɔblane Ɔbuni Ɔɔbla Kabla
7“Bɛbu ɔmɛni bɛnu. Si bina ɔdi ubo kabla ɔblane ɔni mɔɔtuma kemmo teete-nwu iye ɔɔnu-ɔ baƒonu lɛlɔ na ɔ́si kemmo úbeduo ni, bɔsu na adubɔsu-nwu anii ɔbabla na utélie kalɔ utaadi nwuna adila? 8Oowo! Mmomu adubɔsu-nwu anii, ‘Klibi lɛlɔ na asabla kɔdi, na anwa, na eti mina adila ese-mi na lɛdi lɛwɔlɔ asa na awɔ lɛnɔ adi.’ 9Útalɛka agya-nwu enu ka ɔ́bla nwuna kabla ɔblane kabla ɔsu. 10Lɛni kani na use ute amii lɛnɔ. Si bɛ́bla ala ani ƒui na lɛ́su-mii nnii bɛbla ni, bɛsu bɛnii, ‘Kabla bablane kani na bɔdi. Na bɔ́bla lɛla lɛni kani na ɔdi ka bɔbla.’ ”
Yesu Ɔ́bwi Banana Leevu Badi
11Amu ka Yesu ɔkɛ úsela Yerusalem ni, ɔ́vi Samaria ku Galilea ɔmii lɛlɔ. 12Na ka ɔdaku lɛkpaklɔ lɛdi buduo ni, banana leevu badi na beeƒi ɔlɛgyie bábasiaku-nwu. Balɛne bamɛni bénye ɔgyu. 13Na báva ku lɛdi momoomo banii, “Ati Yesu, nu-bu kɔnyana!”
14Yesu ɔ́nu-ma na ɔ́su-ma ɔnini, “Biteesie na biti bina lɛlɔ bitátina Katɔti bakpane na banu-mii kaduɛ.” Ka bakɛ bésela ni, bánu báti ka bana ɔlɛ ɔ́ba-ma.
15Nsu ka bana unwi ɔ́nu ɔ́ti ka nwuna ɔlɛ ɔ́ba-nwu ni, ɔ́sɔ únwini na uumwi Katɔti ku lɛdi momoomo. 16Na úbo úbalɛ akɔnkɔ na Yesu anumi na ɔ́gya-nwu enu. Na ɔnana ɔmmɔ ɔdi Samariani.
17Mmɔ na Yesu úye ɔnini, “Ɔɔɔdi banana leevu na lɛ́bwi yoo? Wɛ na yaalenwi bakladi básia? 18Dɛ na ɔ́bla asa na ukyuli ɔni naaadi Yudani ɔmɛni kani násɔ únwini úbo ɔnii ubagya Katɔti enu?” 19Amu na Yesu ɔ́su-nwu ɔnini, “Ta nye, na eteesie. Ƒula bɔƒɔtaadi náya na ƒula ɔlɛ ɔ́ba-a.”
Yesu Ɔ́su Kalɛ Na Katɔti Lɛga Kadikɔ Kadubo
20Amu na Ƒarisiƒuɔ badi béye Yesu banii baawia bati uwi ɔni geen na Katɔti lɛga kadikɔ kadububo. Mmɔ na Yesu údie kenye ɔnini, “Katɔti lɛga kadikɔ kelebo na ulu ɔni lɛlɔ na bekyuli bakana-ka bɔnu. 21Ɔdi ulasu ɔnii, ‘Bɛnu! Aanu-ka mɛni,’ iye ‘Aanu-ka ngye’. Ɔsika Katɔti lɛga kadikɔ kammɔ kakya bina akɔ.”
22Amu na Yesu ɔ́su nwuna batɛyane ɔnini, “Uwi ɔdi ɔdubo ɔni na bɛdubɔwia bɛnii bɛɛnu limeyi lɛni na ami, Ukyuli Ɔyawine Ubi, mebo. Nsu bilanu! 23Bekyuli badi badubo-mii akɔ bɔkya bani ndubɔsu-mii banii, ‘Bɛnu-nwu ngye,’ iye ‘Bɛnu-nwu mɛni!’ Nsu bitesie bitatáwia-mi mmɔ! 24Ɔsika kalɛ na kayaa kaabwɛ ogya taasi ɔƒɛnyi unwi teesie ɔkladi ni, lɛni geen na Ukyuli Ɔyawine Ubi limeyi lɛmmɔ lɛdubo buse. 25Nsu ni, ɔlɛka lɛka abi bubo geen na ɔmwi limeyi bekyuli beni-mi.
26“Ala ani nálɛ na Noa uwi ni, anya kani ndubo bɔlɛ na uwi ɔni na ami, Ukyuli Ɔyawine Ubi, masɔ mebo. 27Bekyuli baadi na baaní. Na banana ku beleku beeti lɛlɔ úti útédu limeyi lɛni lɛlɔ na Noa úduo ɔkɔlɔ ubendi ɔmmɔ kemmo. Na ɔnantu ɔ́na na ntukpa búyi bɔ́ƒɔ kalɔ ƒui na ɔ́du bekyuli ƒui.
28“Lɛni na ɔdubo buse aani kalɛ na úse na Lot uwi lɛnɔ. Bekyuli baadi na baaní, na baadi kuye lɛnɔ. Badi benye baakya edula, na badi benye baatú lɛtɔ. 29Na limeyi lɛni na Lot ɔ́vi ɔ́lɛ Sodom ni, ogya ku agyabi ani muunwenyi ku ɔnyi gbagbangba ási katɔ ébewi ɔma ɔmmɔ kemmo na ɔ́kyula-ma ƒui.
30“Lɛni kani na ɔdubo buse na limeyi lɛni lɛlɔ na ami Ukyuli Ɔyawine Ubi ndubɔda lɛlɛ. 31Limeyi lɛmmɔ lɛlɔ ni, ukyuli ɔni nnye nwuna ɔtɔ lɛsa ni, ɔsɔ utayu ɔnii utéduo ɔtɔ kemmo uti nwuna ala adi. Lɛni kani si kemmo na ɔdi ɔkya ni, ɔsɔ utasu ɔnii uunwíni usie kaduli. 32Binyimo lɛla lɛni nálɛku Lot ulekudi! 33Ukyuli biala ɔni mɔɔwia ka ɔƒɔ nwuna lili ngba ute lɛlɔ ni, ɔdubɔyila-mu. Na ukyuli biala ɔni nányonu nwuna ngba ni, ɔdubɔsɔ ɔkɛ-mu. 34Na usien ɔmmɔ ni, nkyuli inyɔ badubɔtɛ lɛtala linwi lɛlɔ, na Katɔti ɔdubuti unwi na ɔda ɔkladi ɔva. 35Beleku inyɔ badubunye bataakɔ ɔlaaƒɔ na kukɔ lɛlɔ. Na Katɔti ɔdubuti unwi na ɔda ɔkladi unyene. 36Banana inyɔ badubunye bataatuma na ɔkpanku unwi ɔtɔlɔku na ɔnyonu ɔkladi unyene.”
37Mmɔ na batɛyane bammɔ béye Yesu banini, “Blɔti, na wɛ?”
Amu na Yesu údie kenye ɔnini, “Kesii kani na lɛla líkpi lɛ́tɛ ni, mmɔ na begbini baasa.”
Currently Selected:
Luka 17: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
