Yohane 20
20
Batɛyane Bammɔ Bánu Ka Kaƒiɔtɔ Kese Ukpludi
1Na Kwasida ɔtanta tutuutu uwi ɔni kemmo na kadi kátabla tɔ nwaa ni, Maria Magdalene úsie kaƒiɔtɔ kammɔ kudɔ na útánu ka lɛtabi lɛni na béti bébi ubu ɔmmɔ kenye lɛsɔ liiibi. 2Anwuɔsu úkeli úsie Simon Petro ku ɔtɛyane ɔni na Yesu ɔɔyɔ́ mmɔ kudɔ. Na útásu-ma ɔnini, “Bekyuli badi bétédie Blɔti na kaƒiɔtɔ kammɔ kemmo bátɔlɔku. Na bɔɔɔgyi kesii kani na béti-nwu bétése!”
3Amu na Petro ku ɔtɛyane ɔbambadi ɔmmɔ bátɔlɔ bésie kaƒiɔtɔ mmɔ. 4Bana inyɔ ƒui bakɛ beekeli usi, nsu ɔtɛyane ɔbambadi ɔmmɔ ɔ́vi Petro na ɔ́ka-nwu kaƒiɔtɔ kudɔ mmɔ budu. 5Úbo kalɔ na ɔ́nu adi aƒualadi abuni ammɔ, nsu úteduo kaƒiɔtɔ ɔtɔ ɔmmɔ kemmo. 6Simon Petro ɔni nkpɛ kama lɛnɔ úubo úbeduo, na anwu ɔ́vi úduo kaƒiɔtɔ kammɔ kemmo na ɔ́nu adi aƒualadi ammɔ ka ewi. 7Na kɔdi kɔni na béti bamana Yesu lili lɛnɔ kɔtɛ mmɔ. Nsu kɔɔɔtɛ adi aƒualadi ammɔ kudɔ. Mmomu báƒɛ aku lɛti báva kɔmadɔ. 8Mmɔ ni, ɔtɛyane ɔbambadi ɔni náka bukeli butédu kaƒiɔtɔ kammɔ kɔtu lɛnɔ úduo ɔtɔ ɔmmɔ kemmo. Na útánu ala ammɔ lɛni kani, na ɔ́ƒɔ ɔ́di. 9Nsu úti úbeduku uwi ɔmmɔ lɛlɔ ni, bétenu tɔ kalɔ ka Yesu ɔdubɔta bɔlɛ kekpine aani kalɛ na bénweni na Bunweni Kedee Ɔku kemmo.
Yesu Údie Lɛlɔ Ɔ́tina Maria Magdalene
10Amu na batɛyane bammɔ bénwini bésie kaduli. 11Nsu Maria úbo unye kaƒiɔtɔ kammɔ anumi na uuwulo. Nsu uwi ɔni na unye uuwulo ni, ɔ́sɔ úbo kalɔ ɔ́nu kaƒiɔtɔ kammɔ kemmo. 12Mmɔ ni, ɔ́nu Katɔti batu inyɔ badi ka bakya lɛwu lɛƒualadi belie mmɔ. Unwi ulie kesii kani na Yesu ɔ́tɛ lili kakɛ, na ɔkladi lɛnɔ ulie úsie lɛgba kakɛ.
13Amu na béye-nwu banini, “Uleku, bi ɔsu na eewulo?”
Mmɔ ni, Maria lɛnɔ údie kenye ɔnini, “Bekyuli badi bébeti mina Ati bátɔlɔku. Na lɛɛɛgyi kesii kani na béti-nwu bésienku!” 14Amu ka ɔ́tu únwini ni, ɔ́nu ka Yesu unye. Nsu Maria útati ɔnii Yesu na ɔdi.
15Amu na Yesu lɛnɔ úye-nwu ɔnini, “Uleku, bi ɔsu na eewulo? Ɔma na aawia?”
Nsu Maria ɔ́kali ɔnii anwu mɔɔnu kaƒiɔtɔ kammɔ lɛlɔ. Anwuɔsu na ɔ́su-nwu ɔnini, “Ati, buvele, si awɔ nédie-nwu átɔlɔku mɛni ni, na atina-mi kesii kani na éti-nwu étése, na lisie ntéti-nwu mmɔ.”
16Amu na Yesu ɔ́kpali-nwu ɔnini, “Maria!”
Mmɔ ni, Maria únwini ɔ́nu-nwu, na ɔ́su na Hebri lɛdi kemmo ɔnini, “Rabuni!” Na nwuna kalɔ ndi Ala Ɔtinane.
17Mmɔ ni, Yesu ɔ́su-nwu ɔnini, “Tatu tada-mi, ɔsika ńtenwini tɔ ńtesie Katɔti kudɔ. Mmomu teesie mina banwani kudɔ na atásu-ma anii línwini lísela mina Ɔti ɔni ndi Katɔti kudɔ. Na anwu ndi amii lɛnɔ Ɔti ku bina Katɔti.”
18Anwuɔsu ni, Maria Magdalene úsie na útásu batɛyane bammɔ ka anwu ɔ́nu Blɔti. Na lɛla lɛni na Yesu ɔ́su-nwu ni, ɔ́sɔku-ni ɔ́su batɛyane bammɔ.
Yesu Údie Lɛlɔ Ɔ́tina Nwuna Batɛyane
19Na Kwasida kadi kammɔ useyi ni, batɛyane bammɔ básala na bákalɛ lɛlɔ bákya ɔtɔ kemmo ka baayia Yudaƒuɔ benengu bammɔ ɔsu. Amu na Yesu úbo úbenye-ma ntɛ, na ɔ́su-ma ɔnini, “Keyi buɛɛ kasiaku-mii.” 20Ka ɔ́su-ma ɔmɛni ɔ́wɔlɔ ni, Yesu úti nwuna enu ku ɔƒɛnyi ɔ́tina-ma. Na lɛlɔ lɛ́yɔ batɛyane bammɔ ka bánu Blɔti ɔsu.
21Ɔmmɔ kama ni, Yesu ɔ́sɔ ɔ́su-ma ɔnini, “Keyi buɛɛ kasiaku-mii. Kalɛ na Ati ɔ́tala-mi ni, lɛni kani na ami lɛnɔ mɔɔtala-mii.” 22Mmɔ ni, ɔ́nwuna úwi-ma na ɔ́su-ma ɔnini, “Bɛƒɔ Katɔti Kɔyu. 23Na si bíti bekyuli ekpidi bɛ́kyiɛ-ma ni, ɔɔtina ka Katɔti lɛnɔ úti ɔ́kyiɛ-ma. Nsu si bíteti bítakyiɛ-ma ni, ɔɔtina ka Katɔti lɛnɔ úteti útakyiɛ-ma.”
Yesu Údie Lɛlɔ Ɔ́tina Toma
24Uwi ɔni na Yesu úbo-ma kudɔ mmɔ ni, batɛyane leevu-inyɔ bammɔ akɔ unwi ɔni baalɔ Toma na basɔ baalɔ-nwu Nta Ubi ni, uuubo-ma akɔ. 25Anwuɔsu ka úbebo ni, batɛyane bakladi bammɔ básu-nwu banini, “Abu bɔ́ɔnu Blɔti!”
Amu na Toma ɔ́su-ma ɔnini, “Si ńtanu kɔbwɛlɛ eƒi lɛtaala na nwuna enu na liti mina lɛnimi lɛkya-nya kemmo na liti mina kɔnu lɛkya-nwu ɔƒɛnyi ni, lɛɛɛdubo bɔƒɔ bɔdi.”
26Amu na Kwasida unwi kama ni, batɛyane bammɔ básɔ bása belie ɔtɔ kemmo, na Toma lɛnɔ ɔkya-ma akɔ. Básɔ bákalɛ ɔtɔ ɔmmɔ lɛni kani. Nsu Yesu úbo na úbenye-ma ntɛ, na ɔ́su-ma ɔnini, “Keyi buɛɛ kasiaku-mii.” 27Amu na ɔ́su Toma ɔnini, “Bo, na ebeti ƒula lɛnimi akya mɛni. Na anu mina enu. Na eti ƒula kɔnu akya-mi ɔƒɛnyi. Na ada ƒula taƒɔ tadi aya. Na aƒɔ adi ɔƒɛni kani!”
28Ka Yesu ɔ́su-nwu lɛni ni, Toma údie kenye ɔnini, “Mina Ati ku Katɔti!”
29Amu na Yesu ɔ́su-nwu ɔnini, “Áƒɔ ádi ka ánu-mi ɔsu. Bekyuli bani nátanu-mi tɔ asa báƒɔ bádi ni, badubɔkɛ lɛlɔyɔ betulo!”
30Yesu ɔ́bla akɔla budie taatina pii na nwuna batɛyane anumi. Nsu ńtenweni-nya ńtakya ɔku ɔmɛni kemmo. 31Na amɛni kani na línweni líse kalɛ na bɛƒɔ bɛdi ka Yesu ndi Ukyuli Ɔƒunadi ɔmmɔ. Na anwu ndi Katɔti Ubidi ɔni na si bɛ́ƒɔ-nwu bɛ́di ni, na ɔya na bilie ngba na nwuna ɔyikun kemmo.
Currently Selected:
Yohane 20: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
