Batalane Kabla 13

Bátala Barnaba Ku Saulo

1Na Antiokia ni, Blɔti kenye bediene ku ala batinane badi bakya baƒɔtaadine lɛkpa lɛmmɔ kemmo. Na ama ndi Barnaba ku Simeon ɔni bátaalɔ Ukyuli Otondi ku Lukio ɔni nási Kirene ku Manaen ɔni ndi Ɔga Herode ɔvinkpana ɔ́si lɛnamu uwi ku Saulo. 2Amu ka bakya beemwi Blɔti na beelie kɔka ni, Katɔti Kɔyu kútemiku-ma na kɔ́su kɔnini, “Bidie Barnaba ku Saulo bise bite kabla kani ɔsu na lɛ́lɔ-ma.”

3Ɔmɛni ɔsu ka benengu bammɔ bélie kɔka na bákpali katɔ na bana lili ni, béti enu básia-ma lɛlɔ na bédie-ma ulu.

Barnaba Ku Saulo Bésie Kipro

4Na ka Katɔti Kɔyu kɔ́tina-ma ulu ni, bésie ɔma ɔni baalɔ Seleukia. Mmɔ na béti ɔkɔlɔ bávia bésie ntuntɛ kalɔ kani baalɔ Kipro. 5Na ka bétéduo ɔma ɔni baalɔ Salami kemmo ni, bésie Yudaƒuɔ kasalakɔ bátásu Blɔti litemi. Na Marko Yohane lɛnɔ ɔ́siaku-ma aani bana ubunkune kalɛ.

6Na ɔmɛni kama ni, bávi bétédu ɔma ɔni baalɔ Paƒo. Na mmɔ bátánu Yudani ɔni mɔɔƒɛ evo na úti lɛlɔ ɔ́bla ɔkɔ kenye udiene ɔni baalɔ Bar-Yesu. 7Na uvone ɔmɛni ku aban ɔgadine ɔnundane ɔni baalɔ Sergio Paulo badi bakpana. Na ɔgadine ɔmɛni ɔ́lɔ Barnaba ku Saulo ɔnii bebo babanu-nwu, ɔsika ɔɔwia ka unu Blɔti litemi. 8Nsu ka bésie ni, uvone ɔmmɔ ɔni na baalɔ lɛnɔ banii Elima na Griki lɛdi kemmo ni, ɔ́kyaku-ma unyeƒi. Na ɔ́wia ka unwini ɔgadine ɔmɛni kasusu udie litemi lɛni na Saulo ku Barnaba baasu lɛlɔ. 9-10Nsu Saulo ɔni lɛnɔ baalɔ banii Paulo ni, ɔ́nu uvone ɔmɛni ku livoƒi, na údie lɛdi ɔ́kya-nwu ku Katɔti Kɔyu ɔyikun ɔnini, “Awɔ Satan ubidi, éyi ku katɔlɔ ku lɛkwɛnkpi, na ekisi lɛbuni bɔbla, na aatu Blɔti litemi teenwini. Adubɔnuku-ni! 11Unwoti ɔdubɔya na anumi abwɛ-ɔ, na asɔ alanu ɔƒɛ weti wetédu uwi ɔdi!”

Mmɔ kani na nwuna anumi ábla suu, na ɔsɔ ulánu. Na úse kalɔ ɔɔka taamana mmɔ, na uuvele bekyuli ɔnii bada-nwu kɔnu. 12Uwi ɔni na aban ɔgadine ɔmɛni ɔ́nu lɛla lɛmɛni ni, ɔ́bla-nwu kalɛ kadi, na ɔ́ƒɔ Blɔti litemi lɛmɛni ɔ́di.

Barnaba Ku Saulo Bésie Antiokia Na Perge

13Ɔmmɔ kama ni, Paulo ku bani nsiaku-nwu béduo ɔkɔlɔ kemmo na bátɔlɔ Paƒo bésie Perge ɔni nkya Pamƒilia. Mmɔ na Marko Yohane ɔ́da-ma ɔ́nyonu, na ɔ́sɔ únwini úsie Yerusalem. 14Ka bási Perge ni, bátɔlɔ bésie Antiokia na Pisidia ɔmii lɛlɔ. Na lɛnwunameyi lɛlɔ ni, bésie Yudaƒuɔ kasalakɔ na betélie kalɔ na bekyuli bammɔ akɔ. 15Na uwi ɔni na báka ala básiku Mose ɔda bubo ɔku ku Katɔti Kenye bediene bunweni kemmo bawɔlɔ ni, kasalakɔ batɔnkune bammɔ básu banini, “Banwa, si bina akɔ ɔdi ubo litemi lɛni mɔɔkya ɔkplu na wasu ni, na ubo ubasu.”

16Amu na Paulo ɔ́ta na ɔ́talaku kɔnu na ɔ́su-ma ɔnii baba lɛsɛ, na ɔ́su-ma ɔnini, “Israelƒuɔ ku amii bani naaadi Israelƒuɔ ƒui na bɛnii bɛɛbu Katɔti ni, bise atu na binu! 17Katɔti ɔni na Israelƒuɔ baabu ni, ɔ́ƒuna bula bati kuuku na úte-ma kusɛ kusɛ. Na anwu ɔlati ɔ́tɔnku-ma ɔ́lɛku bekyuli kalɔ bɔkya kemmo na Egyipte ku nwuna ɔyikun. 18Na ɔ́nu-ma lɛlɔ na ketele kemmo ɔni na bákɛ baaví laa na akwa aavlene kemmo. 19Na ɔ́kyula kɔlɔ akpa maatɛ bekyuli na Kanaan, na úti bana kɔlɔ kɔmɛni úte Israelƒuɔ aani bana kadikɔ. 20Na ala amɛni ƒui álɛ na akwa eti yaalenwi kemmo.

“Na nwuna kama ni, Katɔti úte-ma litemi batɛne bani nádi-ma lɛlɔ útédu Kenye Udiene Samuel uwi. 21Amu na bévele-nwu banii use ɔga ute-ma. Na Katɔti úte-ma Kis ubidi Saul ɔni nási Benyamin kaba kemmo, na ɔ́di lɛga akwa aavlene. 22Nsu Katɔti ɔ́da-nwu údie liboku lɛlɔ na úti Dawid úse lɛgaboku lɛmmɔ lɛlɔ. Dawid ɔmɛni ɔdi ukyuli ɔni lɛlɔ na Katɔti ɔ́su ɔnini, ‘Lɛ́ƒuna Yese ubidi Dawid líse. Ɔdi ukyuli ɔni na mina kayi kaayɔ́, ɔsika anwu ɔdubɔbu-mi.’

23“Na ɔ́si Dawid kaba kemmo ni, Katɔti údie Ɔƒɔne ɔni ndi Yesu úte Israelƒuɔ aani kalɛ na úse-bu kenye. 24Na asa na Yesu webo ni, Ntu Ɔkpilane Yohane úbo úbasu ukyuli biala ka unwini kama ɔkya nwuna ekpidi na uti anumi ɔsia Katɔti lɛlɔ na bakpila-nwu ntu. 25Uwi ɔni na Yohane kabla kadaku kawɔlɔkɔ budu ni, úye ɔnii, ‘Bɛɛbu ka ami ndi Ukyuli Ɔƒunadi ɔmmɔ? Oowo! Nsu ni, ɔkpɛ-mi kama ɔdubo, na ami ńtedu ka lɛbla kabla kadi lite-nwu muedi.’

26“Banwa, amii bani ndi Abraham bebi ku amii bani naaadi Yudaƒuɔ nsu bɛɛbu Katɔti ni, bɔƒɔ bɔmɛni búse búte bula ƒui! 27Bekyuli bani nkya Yerusalem ku bana benengu bátanu Yesu bátati banii anwu ndi Ɔƒɔne ɔmmɔ. Nsu na nwuna bɔdu kemmo ni, báya na Katɔti kenye bediene linyese lɛni na baaká na lɛnwunameyi biala lɛlɔ líbo lɛni. 28Bátanu bɔƒiɔ bɔdi bátasiku-nwu lɛlɔ, nsu básu Pilato banii ɔya na badu-nwu. 29Uwi ɔni na bábla ala ani na Katɔti Bunweni Kedee Ɔku ɔ́su na nwuna kukpi lɛlɔ báwɔlɔ ni, bámami-nwu básiku ugyii lɛlɔ bátáva na kaƒiɔtɔ kemmo. 30Nsu Katɔti ɔ́gyila-nwu ɔ́lɛku kekpine na ɔ́sɔ úbo uli ngba. 31Emeyi ammɔ kemmo ni, bekyuli bani na anwu ku-ma bási Galilea bésie Yerusalem ni, bánu-nwu uwi pii. Na ama ndi bekyuli bani muudie-nwu kenye na Israelƒuɔ anumi.

32-33“Na ni, abu búbo mɛni bɔnii buuti litemi buni lɛmɛni buboku-mii, ka ni, Katɔti kenye kani na ɔ́su úse na bula banana bene uwi ni, kébo kéte lɛni na bula uwi lɛlɔ. Na aka ndi ɔni na Katɔti ɔ́ya na Yesu ɔ́sɔ ɔ́ta úbo uli ngba. Ɔmɛni ndi lɛla lɛni lɛlɔ na Dawid únweni na nwuna kɔgya kunyɔdi kemmo. Mmɔ ni, Katɔti ɔɔsu taasiku Yesu lɛlɔ ɔnini,

“ ‘Awɔ ndi mina ubi.

Na ɔmwi ni, línwini-ɔ ɔti.’

34Na Katɔti úse kenye úse ɔnii wagyila-nwu wasiku kekpine na wasɔ webelie ngba na ɔsɔ ulekpi kudii. Bénweni ɔmɛni bákya Bunweni Kedee Ɔku kemmo na kesii kani na Katɔti ɔ́su ɔnini,

“ ‘Ndubute-ɔ kusɛ kusɛ kedee ɔni na líse kenye ka mete Dawid.’

35Na ɔ́sɔ ɔ́su na Dawid kɔgya kɔbambadi kemmo lɛnɔ ɔnini,

“ ‘Aláya na ƒula ukyuli kedee ɔmɛni webu na kaƒiɔtɔ kemmo.’

36“Litemi lɛmɛni lɛɛɛdanku Dawid, ɔsika úlie ɔ́bla Unwoti kabla na nwuna ngba bulie uwi ƒui aani kalɛ na Katɔti ɔlati ɔɔyɔ́, na úbekpi na báva-nwu na úbu lɛnɔ. 37Nsu ukyuli ɔni na Katɔti ɔ́gyila ɔ́siku kekpine anwu ni, nwuna ɔlɔna útebu.

38“Banwa, binu! Na Yesu ɔmɛni lɛnyi kemmo ni, Katɔti ɔdubuti bina ekpidi ɔkyiɛ-mii. 39Ukyuli biala ɔni náƒɔ Yesu ɔ́di ni, Katɔti ɔdubute-nwu ubo. Ɔmɛni ndi lɛla lɛni na Mose ɔda bubo bútakana bɔbla kudii. 40Anwuɔsu bɛnu kaduɛ! Bitaya na Katɔti kenye bediene etemila ani básu alɛku-mii. 41Ɔsika Katɔti ɔ́su ɔnini,

“ ‘Amii bani naaabu mina litemi ni, bɛnu kaduɛ!

Ɔsika ndubo lɛla lɛdi bɔbla na bina uwi

lɛni na si ina bínu ka baasu-ni muedi ni,

biláƒɔ biladi.’ ”

42Uwi ɔni na bási baalɛ kasalakɔ mmɔ ni, bekyuli bamɛni básu Paulo ku Barnaba banii si ɔbla na basɔ bebo bebetemi bete-ma na lɛnwunameyi lɛni nsia lɛlɔ. 43Na ka bégyingya ni, Yudaƒuɔ pii ku bani nénwini Yudaƒuɔ na baayia Katɔti na kasalakɔ mmɔ básiaku Paulo ku Barnaba, na bákɛ beenú batalane bamɛni bɔlɛ ka benye lɛƒɔndia lɛni na Katɔti úti uute-ma mɛni kemmo kpakplaa.

44Lɛnwunameyi lɛni násia lɛmmɔ kama ni, kebu blii nka ɔma ɔmmɔ kemmo bekyuli ƒui bésie kasalakɔ mmɔ béténu Blɔti litemi lɛni na baasu. 45Na uwi ɔni na Yudaƒuɔ benengu bánu bekyuli lisu lɛni nébo kasalakɔ mmɔ ni, anumi égyie-ma, na bákyaku Paulo unyeƒi na bédumi-nwu. 46Amu na Paulo ku Barnaba bése kayi na básu-ma banini, “Ɔlɛka bɔsu Katɔti litemi buni lɛmɛni buti bute Yudaƒuɔ kudeedi. Na ka bíni litemi lɛmɛni na bɛ́su bɛnii bilayɔ ngba bɔƒɔ bɔmɛni ɔsu ni, búti-ni búselaku bani naaadi Yudaƒuɔ. 47Ɔmɛni ndi bɔkada bɔni na Katɔti úti úte-bu ɔnii,

“ ‘Lɛ́bla-mii aani bukeye líte bani naaadi Yudaƒuɔ

kalɛ na biti bɔƒɔ biboku kayawi ɔkɔkɔ biala.’ ”

48Amu ka bani naaadi Yudaƒuɔ bénu lɛla lɛni básu mmɔ ni, kubiti kɔ́da-ma, na bémwi Katɔti. Na bani ƒui na Katɔti ɔ́ƒuna úte ngba bɔƒɔ ni, bénwini baƒɔtaadine.

49Na Katɔti litemi lígyingya lɛ́kya kalɔ kammɔ lɛlɔ ƒui. 50Amu na Yudaƒuɔ batɔnkune bénwini bekyuli badi kasusu na Paulo ku Barnaba lɛlɔ. Na beleku bani lɛlɔ mbo ɔbu ku ɔma benengu ƒui bétiku otogyi na báta békpoku-ma na bágya-ma bálɛku ɔma ɔmmɔ kemmo. 51Nsu uwi ɔni na baalɛ́ ɔma ɔmɛni kemmo ni, béveli bana lɛgba kalɔ ɔtumu béwi ɔma ɔmmɔ béti bátina ka ɔma ɔmmɔ bekyuli béni-ma. Ɔmɛni kama ni, bátɔlɔ bésie Ikonion. 52Na bana kama basiakune ama ni, bákɛ lɛlɔyɔ básiku Katɔti Kɔyu kudɔ geen!

Currently Selected:

Batalane Kabla 13: lef

Highlight

Copy