Batalane Kabla 1

1-2Ɔnwa Tioƒilo, na mina ɔku udeedi kemmo ni, línweni lɛ́su ala ani ƒui na Yesu ɔ́bla na ɔ́tina úti ɔ́si uwi ɔni na úse nwuna kabla kalɔ úti útédu uwi ɔni na Katɔti úti-nwu úsienku katɔ. Asa na ɔdubuti-nwu usienku katɔ ni, Yesu ɔkɛ Katɔti Kɔyu ɔyikun lɛlɔ ɔ́tina nwuna batalane ala. 3Na emeyi aavlene kemmo na nwuna kukpi kama ni, údie lɛlɔ ɔ́tina-ma kɔlɛ kɔlɛ ɔni na ɔ́tina geen ka ɔ́kya ngba. Ama bani nánu-nwu ni, ɔ́tɛmiku-ma ɔ́siku nwuna Ɔti lɛga kadikɔ ala lɛlɔ. 4Uwi ɔni na bábasa lisu ni, úbo-ma ɔda ɔnini, “Bitatɔlɔ Yerusalem, mmomu binye bɛgya Katɔti Kɔyu bubo bɔni lɛlɔ na lɛ́su-mii lɛ́siku ka mina Ɔti ɔ́su úse ka wete-mii. 5Ɔsika Yohane anwu ni, ntu na úti ɔ́bla Katɔti ntu bɔkpila ɔdi ɔmmɔ úte bekyuli. Nsu na emeyi klukui adi kemmo ni, Katɔti ɔdubuti nwuna Kɔyu ɔkpila-mii.”

Katɔti Úti Yesu Úsienku Katɔ

6Ɔmɛni ɔsu ka batalane bamɛni ku Yesu básɔ bása ni, béye-nwu banini, “Unwoti, ɔƒaani na aawia ka asɔku Israel lɛga kadikɔ ese yoo?”

7Na Yesu ɔ́su-ma ɔnini, “Útalɛka bɛti uwi iye emeyi ani na mina Ɔti ɔ́su úse ka lɛla lɛdi lɛdubɔlɛ. 8Nsu si uwi ɔni na Katɔti Kɔyu kúbo-mii kudɔ ni, kɔdubɔƒɔ-mii lɛlɔ kemmo ƒui na kɔdubɔkya-mii ɔyikun na bɛdubɔsu-mi lɛlɔ litemi na Yerusalem ku Yudea ku Samaria wetéduku kalɔ kawɔkɔ.”

9Na ɔmɛni bɔ́su kama ni, Katɔti úti-nwu ɔ́kɔliku katɔ na benye baanu-nwu útédu ka úduo kemmo na ɔ́yii-ma anumi.

10Na ɔni benye baanu kayaa ni, kɔnakunwi nkyuli inyɔ badi bani nnyimi ala aƒualadi bédie lɛlɔ bátina-ma, 11na básu-ma banini, “Galileaƒuɔ, bi ɔsu na binye bɛɛnu katɔ lɛni? Yesu ɔni na Katɔti úti ɔ́siku-mii kudɔ úsienku katɔ mɛni ni, ɔsɔ ɔdubɔsi katɔ ubo-mii kudɔ aani kalɛ na bɛ́nu ka ɔ́si bina kudɔ úsie katɔ kalɛ kani.”

Matia Úti Yuda Keliekɔ

12Nwuna kama ni, batalane bammɔ bénwini bási kɔbi kɔni baalɔ Inɔ Egyii Kɔbi lɛlɔ mmɔ, bésie Yerusalem ɔma kemmo. Na ɔ́si mmɔ útédu ɔma kemmo mmɔ ni, wabla liluku linwi. 13Ka bétéduo ɔma kemmo ni, bésie bétéduo bana kakyakɔ. Na bekyuli bani nli mmɔ ndi Petro ku Yohane ku Yakobo ku Andrea ku Ƒilipo ku Toma ku Bartolomeo ku Mateo ku Yakobo ɔni ndi Alƒeo ubidi ku Simon ɔni basɔ baalɔ Selote ku Yakobo ubidi Yuda. 14Bekyuli bamɛni bátaasala lɛlɔ taakpali katɔ uwi biala ku beleku badi ku Yesu uni Maria ku Yesu banwani bananabi.

15Amu na emeyi ammɔ kemmo kani ni, ama bani náƒɔ bádi mmɔ bábasa, na bana bumomo bɔbla aani nkyuli eti anyɔ ku aavlanyɔ. Na mmɔ Petro ɔ́ta únye na ɔ́su-ma ɔnini, 16“Mina banwani, lɛla lɛni na bénweni na Bunweni Kedee Ɔku kemmo ni, ɔlɛka libo-nwu kemmo aani kalɛ na Katɔti Kɔyu kɔ́kɛnku Dawid lɛlɔ kútemi kɔ́siku Yuda ɔni nátɔnku bekyuli bani néƒie Yesu lɛlɔ. 17Yuda ɔdi bula lɛkpa lɛmɛni kemmo unwi, na Blɔti ɔ́ƒuna-nwu ka nka wabla batalane kabla.

18“Nsu ɔ́bla likpidi na ɔ́ƒɔ egulabi ani na béti bétéye kalɔ kani lɛlɔ na útékpi. Mmɔ ka úbuli ni, ɔ́bwɛ na nwuna aƒɔla ƒui álɛ éwi keyi. 19Nwuna kukpi kɔmɛni litemi líbegyingya na Yerusalem, na ukyuli biala únu nwuna kukpi kɔmɛni lɛlɔ litemi. Anwuɔsu ni, kesii kani na úkpi mmɔ na baalɔ Hakeldamak ɔni kalɔ ndi Ubugya Lɛku.”

20Amu na Petro ɔ́su lɛnɔ ɔnini, “Bénweni na Dawid kɔgya ɔku kemmo banini,

“ ‘Bɛsia nwuna liku kɔnu bise,

na ɔdi biala utelie mmɔ.’

Básɔ bénweni banii,

“ ‘Bɛya na ukyuli bamba unye

nwuna kalabla kenye.’

21-22Anwuɔsu ni, ɔlɛka ukyuli ɔdi uduo-bu akɔ aani litemi kama unyene kalɛ ute Blɔti Yesu bɔta bɔlɛ bekpine akɔ. Na ɔlɛka ɔbla ukyuli ɔni nákya bula lɛkpa lɛmɛni kemmo na uwi ɔni kemmo ƒui na abu ku Yesu bɔkɛ, na ɔ́si uwi ɔni na Yohane ɔ́kɔ lɛsa na Katɔti ntu bɔkpila ɔdi lɛlɔ útédu uwi ɔni na Katɔti úti Yesu úsienku katɔ.”

23Anwuɔsu bédie nkyuli inyɔ bani ndi Matia ku Yoseƒ ɔni baalɔ Barsaba na basɔ baalɔ-nwu Yusto. 24-25Na bákpali katɔ banini, “Blɔti, awɔ ngyi ukyuli biala kasusu kemmo. Anwuɔsu tina-bu nkyuli inyɔ bamɛni akɔ unwi ɔni na áƒuna, ka unye ɔtalane kenyekɔ kani na Yuda ɔ́da úse na ɔ́tɔlɔ úsie kesii kani néduku-nwu.” 26Na ka bátu egulabi bánu na nkyuli inyɔ bamɛni lɛlɔ ni, Matia ɔdi nénwini úwi na béti-nwu bébunku nkyuli leevu-unwi bammɔ.

Currently Selected:

Batalane Kabla 1: lef

Highlight

Copy