MALEKO 6

Ko se Talia Iesu i Nasaleta

(Mata 13.53-58; Luka 4.16-30)

1Ne tuku ne Iesu te koga tena, kae ne toe foki atu ki tena fa'kai mo ona soko. 2I te Sapati ne kamata a ia o akoako atu i te fale tapuaki. E tokouke tino ne i kona, kae i te lagonaga ne latou ana akoakoga, ko oko eiloa i te ofo o latou, olotou muna, “Ne maua mai ifea ne ia akoakoga katoa konei mo tena poto? E fai pefea ne ia a vavega konei! 3A ia se kamuta, ko te tama a Malia, ko te taina o Iakopo, Iose, Iuta mo Simona. A tuagane o ia konei e 'nofo mo tatou.” Tena te mea ne se talia ei ne latou a ia. 4#Ioa 4.44 Kae ne toe fai atu a Iesu ki a latou: “E 'malu te pelofeta i koga katoa kae na ko tena fenua tonu fua mo tena kaiga, e se 'malu a ia i ei.” 5E seki mafai ne ia o fai se vavega i kona, na ko mu tino ma'saki fua ne fakaeke atu ona lima ki ei, 'lei ei olotou masaki. 6Ko oko eiloa te ofo o Iesu me seai se lotou fakatuanaki.

Ko Uga atu ne Iesu ona Soko e Tinoagafulu mo te Tokolua

(Mata 10.5-15; Luka 9.1-6)

Tela fanatu ei a ia ki fa'kai katoa, o akoako atu ki tino. 7Ne 'luku mai ne ia a ona soko e tinoagafulu mo te tokolua, fai atu ei ke olo taki tokolua. Ne tuku atu foki ne ia ki a latou te pule i agaga ma'sei 8mo te fakatonuga, “Sa avegina ne otou kope i te malaga, na ko otou tokotoko fua; sa avegina foki ne falaoa, taga teu mea, io me ne tupe foki. 9Ke fai otou taka; mo ā foki ma takilua otou tilima.” 10Ne fai atu foki a ia ki a latou: “Kafai e oko atu koutou ki se fa'kai 'nofo mo tino kola e talia ne latou a koutou i olotou fale, ke oko eiloa ki te taimi e tuku ei ne koutou te koga tena. 11#Luka 10.4-11#Galu 13.51 I so se koga e se talia ei koutou ne tino, kae se faka'logo foki ki a koutou, tuetue atu te pefu i otou vae ko olo ei koutou, ke fai mo akoakoga ki a latou.” 12Tela, olo ei latou kae folafola atu ki tino ko te mea ke salamo mai i olotou agasala. 13#Iako 5.14 Ne afuli ne latou temoni e uke, e tokouke foki tino ma'saki ne milimili ne latou ki te sinu kae ne 'lei i ei olotou ma'saki.

Ko te Mate o Ioane te Papatiso

(Mata 14.1-12; Luka 9.7-9)

14 # Mata 16.14; Male 8.28; Luka 9.19 Ne logo a te tupu ko Helota#6.14: Te tupu ko Helota: Helota Anitipa, te pule o Kalilaia. i mea katoa konei, me ko salalau te tala i te takutakua o te igoa o Iesu. Muna a nisi tino, “Ko toe ola mai a Ioane te Papatiso! Ko te 'mana tena ko mafai ei ne ia o fai a galuega konei.” 15Kae fai mai muna a nisi tino, “Ko Elia tenei.” Kae muna mai nisi tino, “A ia se pelofeta e pela mo pelofeta i aso taumua.”

16I te logoga a Helota, ana muna, “Ko Ioane te Papatiso tenei, tela ne fai ne au ke 'kati tena ua, ka ko toe ola mai nei!” 17#Luka 3.19,20 Ko te fakatonuga a Helota ne puke ei a Ioane o saisai, kae 'pei ki te fale puipui. Ne fai ne Helota te mea nei, ona ko Helotia tela ko avaga mo ia, ko te avaga a tena taina ko Filipo. 18Ne tupu te mea tena ona ko te fai 'soko atu o Ioane ki a Helota: “E se 'tau mo koe o avaga ki te avaga a tou taina!” 19Tena te pogai ne ita fakamoemoe ei a Helotia ki a Ioane, kae fia tamate foki ki ei, kae seki mafai ona ko Helota. 20Ia Helota e mataku ki a Ioane me e iloa ne ia, ia Ioane se tino amiotonu kae amio 'ma, tela ne tausi faka'lei ei ne ia a Ioane. E tiga eiloa te se toka o tena loto, kae fia fakalogologo eiloa a ia ki akoakoga a Ioane i taimi katoa.

21I te okoga ki te aso fanau o Helota, ne fai ne ia se 'kaiga lasi mō tino ma'luga katoa o te malo, ko pule o kautau mo takitaki o te fenua ko Kalilaia. Tenei te taimi 'lei e fakataunu ei te mea ne fakamoemoe ki ei Helotia. 22Ne ulu atu ki ei te tama fafine a Helotia#6.22: Te tama fafine a Helotia; i naai lomiga e isi foki i ei Tena tama fafine ko Helotia. o saka, kae fakafiafia ki a Helota mo latou katoa ne 'kai tasi mo ia. Fai atu ei te tupu ki te tamafine, “Taku mai ki a au so se mea e manako koe ki ei, ka avatu eiloa ne au ki a koe.” 23Ne tauto atu foki a Helota ki a ia, “So se mea e taku mai ne koe, ka avatu ne au ki a koe, ke oko eiloa ki te afā o toku malo!” 24Ne ulu te tamafine ki tua kae fai atu ki tena matua, “Se a te mea ka taku atu ne au ki a Helota?” Kae tali mai tena matua, “Ko te ulu o Ioane te Papatiso.” 25I te taimi eiloa tena ne toe foki fakavave te tamafine ki te tupu, kae fai atu, “Au e manako ke aumai ne koe nei eiloa ki a au te ulu o Ioane i se tisi!” 26Ko oko eiloa i te fanoanoa o te tupu, ka ko se mafai o toe fakafoki tena pati, i te mea ko oti ne tauto a ia i mua o tino ami. 27Tela, fakatonu atu ei ne ia te sotia ke fano o aumai a te ulu o Ioane. Fano ei te sotia tena ki te falepuipui o 'kati te ulu o Ioane; 28aumai ei ne ia a te ulu i te tisi, tuku atu ei ki te tamafine, avatu ei ne te tamafine ki tena matua. 29Ne 'logo a soko o Ioane i te tala tenei, olo atu ei latou o ave te foitino o Ioane o tanu.

Ko Fagai ne Iesu a Tino e Lima Afe

(Mata 14.3-21; Luka 9.10-17; Ioa 6.1-14)

30Ne foki mai te kau apositolo ki a Iesu, kae tala atu ki a ia a akoakoga mo mea ne fai ne latou. 31Kae ona ko tokouke a tino ne solo mai ki a ia i kona, ko se maua ei se taimi 'lei e 'kai ei latou, tela fai atu ei Iesu ki a latou, “O'mai tou olo ki se isi koga, ko tatou ake eiloa o malo'lo malie i ei.” 32Olo ei latou i te poti, ko latou ake eiloa ki te koga lavaki.

33I te mateaga ne tino e tokouke a te olotou poti ko fano, fetuli atu ei latou i uta mai fa'kai katoa o fakatali mai mua i te koga tela ka oko atu ki ei a Iesu mo ona soko. 34#Nume 27.17; 1Tupu 22.17; 2NTupu 18.16; Eseki 34.5; Mata 9.36 Ne fanake a Iesu ki uta mai te poti, lavea ei ne ia a tino e tokouke, ko oko eiloa tena alofa ki a latou i te mea ko pela mo mamoe e seai se lotou takitaki. Tela, kamata ei a ia o akoako atu ki a latou i mea e uke. 35Ona ko leva te aso, o'mai ei ona soko ki a ia, kae fai mai, “Ko leva nei te aso, ka ko te mea nei se koga lavaki. 36E 'lei ke na tuku atu a tino ke olo ki fatoaga mo fa'kai pili mai o fakatau ne olotou meakai.” 37Ne tali atu a Iesu penei: “Avatu ne koutou ne meakai ma latou.” Kae ne fai atu latou ki a ia, “E loto koe ke olo matou o 'togi mai ne papa falaoa i tupe e lua selau tupe siliva#6.37:Tupe siliva: A te siliva e tasi tela ko te ko te togi i te aso o te tino galue (onoono ki te Mata 20.2). mo 'kai latou?” 38Ne fai atu Iesu ki a latou, “E fia papa falaoa a koutou? Olo o onoono ake.” Ne iloa ake ne latou, fai atu ei ki ei, “E lima papa falaoa mo ika e luagamata.”

39Ne fakatonu atu a Iesu ki ona soko ke fai atu ki tino katoa, ke 'nofo ifo ki lalo i potukau. 40Ne 'nofo ifo latou i potukau e taki lau i nisi, kae taki tinolima i nisi. 41Ne puke ne Iesu papa falaoa e lima mo ika e luagamata, kilo ake ei ki te lagi kae fai te fakafetai ki te Atua. Ne tofitofi ne ia papa falaoa kae tuku atu ki ona soko ke tufa atu ki tino. Ne vaevae foki ne ia a ika e luagamata i a latou katoa. 42Ne ma'kona katoa latou i te 'kaiga. 43Ne 'tae ake ne latou a toega meakai, falaoa mo ika, e tusa mo te sefululua tapola ne 'fonu. 44A latou kola ne 'kai e tusa mo te lima afe tagata.

Ko Sasale Iesu i Luga o te Vai

(Mata 14.22-23; Ioa 6.15-21)

45I te taimi eiloa tena fai atu ei a Iesu ki ona soko ke sopo ki te poti o 'mua atu ki Petesaita, ki te sua feitu o te namo, kae ke uga ake ne ia tino ke olo. 46I te otiga ne fakamavae atu a ia ki ona soko, fano ei a ia ki te mauga o 'talo. 47I te okoga ki te afiafi, a te poti ko nofo i te kogaloto o te namo, ka ko Iesu tokotasi fua i uta. 48Ko lavea ne ia ona soko ko fi'ta i te puluga o te poti, i te matagi e 'pono; tela fanatu ei a ia ki a latou i te vaveao e sasale i luga i te vai. Ka ko ia e pela me e fakaseke o fano.#6.48: sasale fakaseke i olotou tafa; io me fakatasi atu ki a latou. 49Ka ko lavea atu ne latou a ia e sasale i luga i te vai, e leake eiloa latou me se agaga. Tela, paka'laga ei latou i te ma'taku. 50I te laveaga ne latou a ia ko oko eiloa te olotou ma'taku. Faipati mai ei a Iesu ki a latou i te taimi eiloa tena, ana muna, “Sa ma'taku! 'Lototoa! Ko au fua tenei.” 51Tela, sopo ake ei a ia ki te lotou poti, kae malu mo te matagi. Ko oko eiloa i te ofo mo te n'umi o olotou mafaufau. 52Ne seki malamalama latou i te vavega ne fai ki falaoa, i olotou mafaufau koi 'nefu eiloa.

Ko Faka'lei ne Iesu a Tino Masaki i Kenesaleta

(Mata 14.34-36)

53Ne olo ki te sua feitu o te namo, oko atu ei ki te koga fenua ko Kenesaleta, tau ei i kona te lotou poti. 54Ne 'sopo ifo latou mai te poti; matea mai ei ne tino a Iesu. 55Ne 'tele sale latou i te fenua katoa, o aumai tino ma'saki, e takato i luga i olotou moega ki mua o Iesu, ki so se koga e iloa ne latou e nofo ei a ia. 56Ki so se koga ne fano ki ei a Iesu, i fa'kai katoa mo fatoaga, ne avatu ne tino ki a ia olotou tino ma'saki ki maketi, kae fakamolemole mai ki a Iesu ke fakapatele ake a tino ma'saki ki kapakapa o tena gatu. Tela la, ko latou kola ne fakapatele olotou lima ki ei, ne 'lei katoa olotou ma'saki.

Currently Selected:

MALEKO 6: Tusi Tapu

Highlight

Copy