MATAIO 5

Ko te Lauga i Luga i te Mauga

1I te mateaga ne Iesu a te vaitino, fanake ei a ia ki te mauga; nofo ki lalo, o'mai ei ona soko ki a ia, 2faipati atu ei a ia o akoako atu ki a latou:

Ko te Manuia Tonu

(Luka 6.20-23)

3“Amutia a latou kola e iloa ne latou i a latou e ma'tiva faka te Agaga me e o latou te Malo o te lagi.

4 # Isa 61.2 “Amutia a latou kola e fanoa'noa:

me fakamafanafanagina latou.

5 # Sala 37.11 “Amutia a latou kola e loto malalo:

me fai mo latou a folafolaga a te Atua.

6 # Isa 55.1,2 “Amutia a latou kola e fia 'kai kae fia inu i te amiotonu:

me ma'kona latou.

7“Amutia a latou kola e a'lofa atu:

me a'lofagina latou.

8 # Sala 24.3,4 “Amutia a latou kola e loto 'ma:

me lavea ne latou te Atua.

9“Amutia a latou kola e fakatupu te filemu:

me taku latou ko tama a te Atua.

10“Amutia a latou kola e fakasauagina i te amiotonu:

me e o latou te Malo o te lagi.

11 # 1Pete 4.14 “Amutia a koutou kola e muna maseigina kae fakasauagina ne tino, kae 'ti atu a mea ma'sei katoa ki a koutou ona ko au. 12#2NTupu 36.16; Galu 7.52 Ke 'lifu kae ke fia'fia foki koutou: me i te otou taui lasi e i te lagi; i te mea ne pena foki eiloa latou o fakasaua ki pelofeta kola ne muamua i a koutou.”

Ko te Masima mo te Mainaga

(Male 9.50; Luka 14.34-35)

13 # Male 9.50; Luka 14.34,35 “A koutou ko te masima mō tino katoa; kae kafai e magalo te masima, se a la te mea ka faka'kona ki ei? E seai se mea e toe aoga ki ei; na ko te pei keatea kae lakalaka ne tino.

14 # Ioa 8.12; 9.5 “A koutou ko te mainaga o te lalolagi; e se mafai o se matea te fa'kai manafai e tu i luga o te mauga. 15#Male 4.21; Luka 8.16; 11.33 E se tutu te moli ne se tino o tuku ki lalo o te kumete, kae tuku eiloa ki luga o te tugamoli; kae ka maina atu ki tino katoa kola i loto i te fale. 16#1Pete 2.12 Ke pena o maina atu te otou mainaga ki mua o tino, ko te mea ke lavea mai ne tino otou galuega 'lei, ke 'viki atu ei latou ki te otou Tamana tela i te lagi.”

Ko te Akoakoga e Uiga ki te Tulafono

17“Ke se manatu koutou i a au ne vau o ofa te Tulafono, io me ko pelofeta. Au ne seki vau o ofa kae o fakataunu faka'lei. 18#Luka 16.17 Masaua, me e ui eiloa e se galo atu te lagi mo te lalolagi, ka pena foki o se galo atu se mataimanu foliki o te Tulafono, seiloga ke oko ki te gataga o mea katoa. #5.18: gataga o mea katoa; io me ko akoakoga katoa ko fakataunu. 19Tela la, so se tino e ofa ne ia se fakatonuga e tasi e tafa foliki i fakatonuga konei, kae akoako atu ki tino; e taku a ia se tino e tafa malalo i te Malo o te lagi. So se tino foki e tausi ki Tulafono konei kae akoako atu ki tino, e taku a ia se tino maluga i te Malo o te lagi. 20Me i a au e fai atu ki a koutou; me kafai e se sili a te otou amiotonu i faiakoga o te Tulafono mo Falesaio, e se 'sao atu eiloa a koutou ki te Malo o te lagi.”

Ko te Akoakoga e Uiga ki te Kaitaua

21 # Eso 20.13; Teu 5.17 “Ko lagona ne koutou me ne fai mai a tino taumua, ‘Sa tatino; kae kafai se tino e tatino, e nofosala a ia i te fakamasinoga.’ 22Kae fai atu au ki a koutou: so se tino e ita #5.22: kafai koe e ita; i nisi lomiga e fakaaoga foki ieimanafai e seai se pogai e kaitaua ei koe. ki tena taina, e nofosala a ia i te fakamasinoga. So se tino foki e muna masei ki so se tino, e fakasala a ia i te Fono; so se tino foki e fetu ne ia so se tino, e fakasala a ia i te afi o Kēna. 23Kafai foki e avatu ne koe tau taulaga ki te fata faitaulaga, kae masaua ne koe me isi se mea e ita ei a se tino ki a koe, 24tuku la tau taulaga i tafa o te fata faitaulaga, kae fano mua koe o faka'lei mo te tino tena, fakamuli ko vau ei koe o tuku atu tau taulaga ki te Atua.

25“Ke vave o faka'lei koulua mo te tino tela e tagi me nofo mo koe ana mea, ka koi sasale koulua i te auala o olo ki te fakamasinoga; i te mea mana tuku atu ne ia koe ki te famasino, ka ko te famasino ka tuku ne ia koe ki te pulisimani, ka ko te pulisimani ka pei ne ia koe ki te fale puipui. 26E tonu, au e fai atu ki a koe, e se mafai eiloa koe o 'tala ki tua, seiloga ko oti ne 'togi tau sala.”

Ko te Akoakoga e Uiga ki te Mulilua

27“Ko oti foki ne lagona ne koutou me ne fai mai penei, ‘Sa mulilua.’ 28Kae fai atu au ki a koutou: so se tino e onoono atu ki se fafine kae manako ki ei tena loto, ko mulilua a ia i te loto. 29Kafai ko tou mata fakaatamai e fai ne ia ke agasala koe, tapale kae pei keatea. Me e sili atu eiloa manafai e galo se vaega o tou foitino i lo te pei o tou foitino katoa ki Kēna. 30Kafai ko tou lima fakaatamai e fai ne ia koe ke agasala, kati kae pei keatea. Me sili atu eiloa manafai e galo se vaega o tou foitino i lo te pei o tou foitino katoa ki Kēna.”

Ko te Akoakoga e Uiga ki te 'Tala Avaga

(Mata 19.9; Male 10.11-12; Luka 16.18)

31“Ne fai mai foki, ‘So se tino e fakateka tena avaga; ke avatu ki a ia se pepa mavae.’ 32#Mata 19.9; Male 10.11,12; Luka 16.18; 1Koli 7.10,11 Kae fai atu au ki a koutou: so se tino e fakateka ne ia tena avaga kae seki mulilua te fafine, ko fakamulilua ne ia te fafine, so se tino foki e avaga ki te fafine ne fakateka, ko mulilua foki a ia.”

Ko te Akoakoga e Uiga ki te Tautoga

33 # Levi 19.12; Nume 30.2; Teu 23.21 “Ko lagona ne koutou me ne fai atu penei ki tino taumua, ‘Sa tauto fakaloiloi koe; kae ke avatu ne koe ki te Aliki a mea ne tauto ei a koe.’ 34#Iako 5.12; Isa 66.1; Mata 23.22 Kae fai atu au ki a koutou: sa tauto ki te lagi manafai e fai sau feagaiga, me ko te nofogaaliki tena o te Atua. 35#Isa 66.1; Sala 48.2 Sa tauto foki ki te lalolagi me ko te mea tena e 'tu ei vae o te Aliki. Sa tauto foki ki te igoa o Ielusalema, i te mea ko te fa'kai tena o te Tupu Sili. 36Sa tauto foki koe ki tou ulu, me se mafai ne koe o fakasinā io me o fakauli se laulu e tasi. 37Kae ke fai atu koutou penei, ‘Ao’ me ‘Ikai’, me ko so se muna ake e fai ne koutou, e mafua mai eiloa i te Tino Masei.”

Ko te Akoakoga e Uiga ki te Taui mo Sui

(Luka 6.29-30)

38 # Eso 21.24; Levi 24.20; Teu 19.21 “Ko lagona foki ne koutou me ne fai mai penei, ‘E sui te mata ki te mata, e sui foki te nifo ki te nifo.’ 39Kae fai atu au ki a koutou: sa taui ne koutou te masei ki te masei; so se tino e 'pa mai ki tou kalafau fakaatamai, toe fuli atu foki ki a ia a tou sua kalafau ke 'pa. 40Kafai se tino e ave ne ia koe ki te fakamasinoga me manako ki tou tilima, tuku atu foki la ne koe ki ei tou peleue. 41Kafai se sotia e fai malo atu ke amo ne koe tena avega i se maila e tasi, amo ne koe i maila e lua. 42Tuku atu se mea ki te tino e akai mai ki a koe, sa 'teke foki ne koe a ia tela e fia kaitalafu i a koe.”

Alofa ki ou Fili

(Luka 6.27,28,32-36)

43“Ko lagona foki ne koutou me ne fai mai penei, ‘Ke alofa atu koe ki tou tuakoi, kae takalialia ki tou fili.’ 44Kae fai atu au ki a koutou: ke a'lofa atu koutou ki otou fili, 'talo foki mō latou kola e fakasaua ki a koutou, 45ko te mea ke fai koutou mo tama a te otou Tamana tela i te lagi, tela e fakamaina mai ne ia a tena la ki tino amio ma'sei mo tino amio 'lei, e faka'to foki ne ia a te vaiua ki tino amiotonu mo tino amio ma'sei. 46Me kafai koutou e a'lofa atu ki tino kola e a'lofa mai ki a koutou, se a la te taui e maua i ei? E a, e se fai foki ne tino ao lafoga a te mea tena? 47Kafai e fakapito fua a te otou atafai ki otou taugasoa, e a, e isi se mea e sili atu ne fai ne koutou i lo tena? E a, e se fai foki pena ne tino o fenua fakaatea? 48#Levi 19.2; Teu 18.13 Tela la, ke katoatoa te 'lei otou amio, e pela mo te otou Tamana tela i te lagi, e katoatoa tena lei.”

Currently Selected:

MATAIO 5: Tusi Tapu

Highlight

Copy