MATAIO 4

Ko te Fakaosoosoga o Iesu

(Male 1.12-13; Luka 4.1-13)

1 # Epe 2.18; 4.15 Fakamuli ifo, ne takitaki ne te Agaga a Iesu ki te koga lavaki ke fakaosoosogina a ia ne te Tiapolo. 2Ne fakalikiliki a ia i aso e fa sefulu, lagona ei ne ia te fiakai. 3Ne vau a te Tiapolo ki a ia, kae muna mai, “Kafai koe ko te Tama a te Atua, fakatonu ake ke liu falaoa a fatu konei.” 4#Teu 8.3 Ne tali atu a Iesu, “Muna a te Tusi, ‘E se na ko meakai fua e ola ei te tino, ka ko muna katoa kola e 'to mai i te gutu o te Atua.’ ”

5Ne toe ave ne te Tiapolo a Iesu ki te Fa'kai Tapu, kae tuku a ia i te koga tafa maluga o te Fale Tapu, 6#Sala 91.11,12 kae muna mai ki a ia, “Kafai koe ko te Tama a te Atua, lele ki lalo i te laukele; me i muna a te Tusi,

‘E fakatonu ne te Atua ana agelu mō koe:

E sapo ake a koe ne latou i olotou lima,

Ko te mea ke se mafai o pa'kia ou vae i fatu.”’

7Ne tali atu a Iesu, “Kae ne muna mai foki a te Tusi, ‘E se 'tau mo koe o tofotofo a te Aliki tou Atua.’ ”

8Ne toe ave foki a Iesu ne te Tiapolo ki te mauga tafa maluga, kae ne fakaasi atu katoa ki a ia a malo o te lalolagi mo olotou 'malu. 9Muna a te Tiapolo, “E avatu katoa ne au ki a koe a mea konei, manafai koe e totuli ifo o tapuaki mai ki a au.” 10#Teu 6.13Ne tali atu a Iesu, “Fano keatea e Satani! Muna a te Tusi, ‘Tapuaki ki te Aliki tou Atua, me ko ia fua e tavini koe ki ei!”’

11Ne tiakina a Iesu ne te Tiapolo, o'mai ei agelu o fesoasoani ki a ia.

Ko Kamata te Galuega a Iesu i Kalilaia

(Male 1.14-15; Luka 4.14-15)

12 # Mata 14.3; Male 6.17; Luka 3.19,20 I te lagonaga ne Iesu me ko oti ne falepuipui a Ioane, fano ei ki Kalilaia. 13#Ioa 2.12Ne seki nofo a ia i Nasaleta, kae ne fano o nofo i Kapanaumi, se fa'kai e tu i tafa o te namo o Kalilaia, i te kogā laukele o Sepulona mo Nafatali. 14Ne fai a te mea nei ke fakataunu ei a muna a te pelofeta ko Isaia ne fai:

15 # Isa 9.1,2 “Ko te fenua o Sepulona mo te fenua o Nafatali,

I te auala e tau ki tai, i te sua feitu atu o te Iolitana,

Ko Kalilaia o fenua fakaatea!

16Ko latou kola e 'nofo i te pouliga

E matea ne latou se mainaga lasi!

Ko latou foki kola e 'nofo i te fenua pouli o te mate,

E 'pula atu ki a latou te mainaga!”

17 # Mata 3.2 I te taimi eiloa tena, ne kamata a Iesu o talai atu penei: “Ke salamo koutou mai i otou agasala, me ko pili mai te Malo o te lagi!”

Ko Kalagagina ne Iesu a Tino Fai-ika e Tokofa

(Male 1.16-20; Luka 5.1-11)

18I te sasalega a Iesu i tafa o te namo o Kalilaia, ne matea ne ia te tautaina kola ne tino Fai-ika, ko Simona tela e igoa ki a Petelu mo tena taina ko Anitelea, e peipei te la tili i te namo. 19Kae ne fai atu a ia ki a laua, “Tautali mai i a au, ke fai ne au koulua mo fai a tino Fai-ika ki tino.” 20I kona foki eiloa, tiakina o la tili kae olo tasi mo ia.

21I tena fanatuga eiloa tena, matea ei ne ia a te sua tautaina, ko Iakopo mo Ioane ko tama a Sepetaio, e 'nofo i luga i te poti mo te la tamana ko Sepetaio, e ponopono olotou tili; tela kalaga atu ei a Iesu ki a laua. 22I kona foki eiloa, tiakina te poti mo te la tamana; kae tau'tali i a Ia.

A Iesu ko Akoako atu, Folafola atu kae Faka'lei Masaki

(Luka 6.17-19)

23 # Mata 9.35; Male 1.39 Ne fano saale a Iesu i Kalilaia katoa, o akoako atu i olotou fale tapuaki, o folafola atu foki a te Tala 'Lei o te Malo, kae o faka'lei foki a tino ma'saki kola e maua ne masaki valevale. 24Ko salalau te tala e uiga ki a ia i te fenua katoa o Sulia, tela aumai ei ki a ia a tino katoa kola e maua ne masaki valevale mo te fi'ta: ko tino e pukea ne temoni, ko tino e maua ne te masaki pole, mo tino masaki faka'mate; ne faka'lei katoa latou ne Iesu. 25Ne tau'tali a te vaitino e tokouke i a ia mai Kalilaia, Tekapoli, Ielusalema, Iutaia, pela foki mo fenua katoa i te sua feitu o te Iolitana.

Currently Selected:

MATAIO 4: Tusi Tapu

Highlight

Copy