MATAIO 15
15
Ko Akoakoga a Tupuga o Tino Iutaia
(Male 7.1-13)
1Ne o'mai a nisi Falesaio mo faiakoga o te Tulafono mai Ielusalema ki a Iesu, kae fai mai ki a ia: 2“Ai a e se faka'logo ei ou soko ki te akoakoga ne tuku fakasolo mai ne o'tou tupuga ki a tatou, me e se 'fano olotou lima manafai e 'kai?” 3Ne tali atu a Iesu, “Ai a foki la koutou e se faka'logo ei ki fakatonuga a te Atua, kae fakasilisili ne koutou otou akoakoga? 4#Eso 20.12; Teu 5.16; Eso 21.17; Levi 20.9 I te Atua ne fakatonu mai, ‘Ava ki tou tamana mo tou matua. So se tino foki e pati masei ki tena tamana mo tena matua, a te tino tena e 'tau o tamate.’ 5Kae akoako ne koutou, me so se tino e fai atu ki tena tamana mo tena matua penei, ‘So se mea a aku e aoga ki a koulua, a te mea tena ko te taulaga ki te Atua.’ Tela la, ko se 'tau a ia o ava ki ona matua. 6A latou e se manako o ava ki olotou tamana.#15.6: olotou tamana; nisi lomiga olotou tamana io me ko olotou matua. I te faifaiga tenei ko fakaseaoga ei ne koutou a tulafono a te Atua, ko te mea ke tautali eiloa koutou ki otou akoakoga. 7A koutou ne tino 'loi! Ko tutonu eiloa ki a koutou a te muna a te pelofeta ko Isaia!
8 #
Isa 29.13 (LXX) ‘A tino konei e ava mai fua ki a au i olotou gutu
Ka ko olotou loto e 'mao mai i a au.
9E se aoga olotou tapuakiga ki a au,
I te mea ko akoako atu ne latou a akoakoga a tino ke fai pela me ne tulafono a te Atua!”’
Ko mea e Fakamasei a te Tino ke se 'Ma
(Male 7.14-23)
10Ko kalaga atu a Iesu ki tino kae fai atu, “Faka'logo mai, ko te mea ke iloa ne koutou! 11E se ko te mea e ulu ki te gutu o te tino e fakamasei ei a ia, ka ko te mea tela e vau mai te gutu o te tino, e fakamasei ne ia a te tino.”
12Ko o'mai ona soko kae fai mai ki a ia, “E iloa ne koe i Falesaio ne ita i te lagonaga ne latou a tau fakamatalaga tena?” 13Ne tali atu a Iesu, “So se lakau e seki 'toki ne toku Tamana faka te lagi, e unu keatea. 14#Luka 6.39 Tuku fua i ei, me ko latou eiloa ne takitaki 'kivi. Kae kafai ko te tino 'kivi e takitaki ne ia te sua tino 'kivi, e 'to laua ki te lua.” 15Kae ne fai mai Petelu ki a ia, “Fakamatala mai ake ki a matou a te tala fakatusa tena.” 16Kae ne tali atu a Iesu, “A koutou foki koi pouliuli eiloa! 17E se iloa ne koutou i te mea e ulu ki te gutu, e fano ki te tinae, ko fano ei i tena fanoga? 18#Mata 12.34Ka ko te mea e vau i te gutu, e fanake tonu eiloa mai te loto, tena te mea e fakamasei ne ia a te tino. 19Me ko te loto e mafua mai ei a mafaufauga ma'sei: ko te tatino, ko te mulilua, ko te fina lalolagi, ko te kaisoa, ko te faitala loi, mo te fatufatu. 20A mea konei e fakamasei ne latou a te tino, ka ko te kai mo lima e se 'fano, e se fakamasei ei a te tino.”
Ko te Fakatuanaki o te Fafine
(Male 7.24-30)
21Ko tuku ne Iesu a te koga tena, kae fano ki te koga fenua pili ki fa'kai ko Tulo mo Saitonu. 22Kae kiloke, a te fafine Kanana ne nofo i te koga tena, ne vau ki a ia kae kalaga mai, “Te Aliki te Tama a Tavita, alofa mai ki a au! A taku tama fafine ko pukea masei ne te temoni.” 23Ka ko Iesu ne seki tali atu ki tena pati. Ne o'mai ei ona soko kae ne fakamolemole atu ki a ia penei: “Uga atu ke na fano, mo te logoa mai i o'tou tua.” 24Ne tali atu a Iesu, “Au ne uga mai fua ki mamoe 'galo o te kaiga o Isalaelu.” 25Kae ne vau te fafine o totuli i ona mua, kae fai mai, “Te Aliki, fesoasoani mai ki a au.” 26Ne tali atu a Iesu, “E se 'tau o tuku atu a meakai a tamaliki ki kuli.” 27Ne tali mai te fafine, “Te Aliki, e tonu eiloa koe, ka ko kuli e 'kai foki ki matutuga o mea kola e tatela mai i te laulau a olotou pule.” 28Ne tali atu a Iesu ki a ia, “A koe se fafine e lasi tou fakatuanaki! Ko te mea e manako koe ki ei, e fai eiloa pena.” Kae i mo taimi eiloa kona, malosi ei tena tama.
Ko Faka'lei ne Iesu a Tino Ma'saki e Tokouke
29Ne tuku ne Iesu a te koga tena, kae sasale atu i tafa o te namo o Kalilaia. Ne fanake ki luga i te mauga, sagasaga ei ki lalo. 30Ne o'mai ki a ia te vaitino, kae ne aumai ne latou a tino 'pili, tino 'kivi, tino vae 'mutu, tino gūgū, mo nisi tino ma'saki ake foki, kae ne tuku fakapilipili ne latou ki ona vae. Ne faka'lei katoa eiloa ne ia olotou masaki. 31A tino ne ofo i te 'kiloatuga ki tino gūgū ko fai'pati, a tino vae 'mutu ko 'lei, a tino 'pili ko sasale, mo tino 'kivi ko 'kite. Tela, 'viki atu ei latou ki te Atua o Isalaelu.
Ko te Fagaiga o te Fa Afe
(Male 8.1-10)
32Ne kalaga atu a Iesu ki ona soko kae fai atu, “Au ko alofa i tino, me ko tolu nei aso i te motou 'nofoga, kae seki 'kai eiloa latou. Au e se loto ke uga atu ke olo kae seki 'kai, me mana mata'po i te auala.” 33Ne fesili mai a soko ki a ia, “E maua ifea ne tatou ne meakai mo fagai a tino konei, i te koga nei se koga lavaki?” 34Ne fesili atu a Iesu ki a latou, “E fia otou falaoa kona?” Ne tali mai latou, “E fitu falaoa mo mu ika foliki.” 35Ne fakatonu atu ne Iesu a tino ke 'nofo ifo ki lalo. 36Kae ne puke ei ne ia a falaoa e fitu mo ika, ko fakafetai, ko tofitofi ne ia, kae tuku atu ei ki ona soko, ke tufatufa atu ne latou ki tino. 37Ne 'kai katoa, ko ma'kona; 'fao ake ei ne latou a tapola e fitu, ko 'fonu i toega meakai. 38A tino ne 'kai e fa afe tagata, kae e se faitau a fafine mo tamaliki.
39I te otiga ne uga ne ia a tino ke olo, sopo ei ki te poti o fano ki te koga fenua o Makatani.
Currently Selected:
MATAIO 15: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
