MATAIO 13

Ko te Tala Fakatusa i te Tino Toki Saito

(Male 4.1-9; Luka 8.4-8)

1I te aso eiloa tena, ne fano a Iesu ki tua mai te fale o sagasaga i kaugutu o te namo o Kalilaia, o akoako atu. 2#Luka 5.1-3Ne mumu mai ki ona tafa a te vaitino, tena fano ei a ia ki luga o te poti o sagasaga i ei; ka ko te vaitino e 'tu i te tafatai. 3E uke a mea ne akoako ne ia ki a latou i tala fakatusa.

“A te tino toki saito ne fano o toki a saito. 4Kae i tena 'tokiga, a nisi fuaga ne 'to i te auala, ne 'lele mai a manueva, kai ei ne latou. 5Ka ko nisi fuaga ne 'to i luga i te koga pa'papa, tela e manifi te one i ei. Ne vave ola ake a fuaga, i te mea e se matolu te kele i ei. 6Ne velasia a fuaga i te fanakega o te la, magemage ei, i te mea ko seai ne olotou aka. 7A nisi fuaga ne 'to ki va o lakau makai'kai, kae ne ola saitia i va o lakau makai'kai. 8Ko nisi fuaga foki ne 'to ki te laukele ola 'lei, ko ola ake kae fua mai ei a nisi fuaga ki te taki tolu sefulu, taki ono sefulu mo te taki selau.” 9Ne fai atu a Iesu, “Ko te tino e lagona ne ia aku muna, fai la!”

Ko te Uiga o te Tala Fakatusa

(Male 4.10-12; Luka 8.9-10)

10Ne oko mai a soko o Iesu kae ne fesili mai a latou penei: “Ai a e faipati ei koe ki tino i tala fakatusa?” 11Ne tali atu a Iesu ki a latou, “Ko oti ne tuku atu ke iloa ne koutou a mea 'funa o te Malo o te lagi, ka ko latou e seki tuku atu ki ei. 12#Mata 25.29; Male 4.25; Luka 8.18; 19.26 Ko te tino tela ne fakalogo kae fai, ka fakaopoopo atu ke uke ana mea ke lava 'lei a ia kae toega foki, ka ko te tino tela ne fakalogo kae se fai, ka ave keatea a mea katoa mai i a ia, ke oko eiloa ki mea fo'liki e i a ia. 13Tena te mea ne faipati ei au ki a latou i tala fakatusa; i te mea e kilo'kilo fua latou kae e se matea ne latou, e faka'logo kae se lagona; e se maina foki a latou i ei. 14#Isa 6.9,10 (LXX) E tonu ei a muna a te pelofeta ko Isaia ki a latou:

‘E faka'logo, faka'logo koutou kae se malamalama,

E kilo'kilo, kilo'kilo koutou, kae se lavea, 15I te mea ko pu'pu a loto o te fenua nei,

Ko faka'tuli foki olotou taliga

Ko 'moe 'kini foki olotou mata,

I te mea mana matea ne olotou mata,

Io me lagona ne olotou taliga,

Me mana malamalama foki i olotou loto,

Kae 'fuli mai ei ki a au,

Ko fakaola ei ne au a latou.’ 16#Luka 10.23,24 Amutia otou mata mo otou taliga, me ko kilo kae faka'logo foki ki ei. 17E tonu au e fai atu ki a koutou, me e tokouke a pelofeta mo tino amiotonu ne ma'nako o 'kilo ki te mea ko matea ne koutou, kae ne seki 'kilo ki ei. Ne fia faka'logo foki ki te mea ko lagona ne koutou, kae ne seki faka'logo eiloa ki ei.”

Ko Fakamatala ne Iesu a te Uiga o te Tala Fakatusa i te Tino Toki Saito

(Male 4.13-20; Luka 8.11-15)

18“Faka'logo mai la ki te uiga o te tala fakatusa ki te tino toki saito. 19Ko te tino tela e lagona ne ia a te tala e uiga ki te Malo kae se maina i ei, e pau a ia mo fuaga kola ne 'to i te auala. Kafai e vau te Tino Masei, ko ave ei keatea ne ia a te mea tela ne toki i tena loto. 20A te fuaga tela ne to i te koga pa'papa, ko te tino tela e lagona ne ia te muna, kae talia foki eiloa ne ia mo te fiafia; 21ka ko te mea e seai ne ona aka, e toetoe fua te taimi ne ola ei i tena loto. Kafai la e oko fakavave mai a puapuaga mo fakasauaga ona ko te Muna a te Atua, se mea vave foki eiloa o tiakina atu ne ia te Muna a te Atua. 22Ka ko te fuaga tela ne toki i va o lakau makai'kai, ko te tino tela e lagona ne ia te muna, ka ko te mea e fiafia malosi tena loto ki mea faka te olaga pela foki mo koloa; tela la, ko ola saitia te Muna a te Atua, ko seai ei ne ona fua e maua. 23Ka ko te fuaga tela e toki i te laukele ola 'lei, ko te tino tela e lagona ne ia te muna kae maina foki i ei. Ko ia eiloa tena ka fua mai ne ia ne fuaga saito o taki tolu sefulu, taki ono sefulu, mo te taki selau.”

Ko te Tala Fakatusa ki Mouku

24E penei te sua tala fakatusa ne fai atu ne Iesu ki a latou, “A te Malo o te lagi e fakatusa ki te tino ne toki ne ia a fuaga 'lei i tena manafa. 25Kae i te sua po, i te taimi ko 'moe ei a tino, ne vau tena fili o toki a mouku i va o saito, oti fano ei keatea. 26Ne ola ake lakau, ko 'fua mai kae 'sae ake foki mo mouku. 27Ko olo atu a tino ga'lue ki te pule o te kaiga kae fai atu ki a ia, ‘Te aliki, ne toki ne koe a fuaga 'lei i tou manafa! Kae maifea foki la a mouku ma'sei kola ko ola ake i ei?’ 28Ne tali atu a ia ki a latou, ‘Ko te fili ne fai ne ia.’ Ne fai atu a tino ga'lue ki a ia, ‘E loto la koe ke olo matou o unu keatea a mouku?’ 29Ne tali mai te pule, ‘Ikai, kafai e unu ne koutou a mouku, ko tena uiga ka maunu ake foki a saito. 30Tuku eiloa ke ola ake talua pena, ke oko ki te aso e kati ei te saito. I te aso tena, ko muna atu ei au ki tino kati saito, ‘Unu muamua a mouku kae 'sai ki saitaga ke 'sunu, kae kati a saito kae 'luku ki loto i toku fale saito.”’

Ko te Tala Fakatusa ki te Fuaga o te Sinapi

(Male 4.30-32; Luka 13.18-19)

31Tenei foki te sua tala fakatusa ne fai atu ne Iesu ki a latou, “A te Malo o te lagi, e fakatusa ki te fuaga o te sinapi tela ne puke ne te tino o 'toki i tena manafa. 32Ko te fuaga pito foliki i fuaga katoa, kae i tena tupuakega, ko lasi atu i lakau katoa. Ko fai mo matua lakau, ko o'mai foki manu lele o fai olotou ofaga i luga i ona kaula.”

Ko te Tala Fakatusa o te Mea Faka'fete

(Luka 13.20-21)

33Tenei foki a te sua tala fakatusa ne fai atu ne Iesu ki a latou, “A te Malo o te lagi e pela mo te mea faka'fete. E puke ne te fafine o palu ki te tisi falaoa, ko 'fete ei te paluga katoa.”

Ko te Pogai o te Fakaaogaga ne Iesu a Tala Fakatusa

(Male 4.33-34)

34Ne fakaaoga ne Iesu a tala fakatusa o akoako a mea konei ki tino. Me ko tala fakatusa faeloa e fakaaoga ne ia o akoako atu ki tino. 35#Sala 78.2 Ne fai ne ia a mea konei ke fakamaonia ei a te muna a te pelofeta penei,

“E fakaaoga ne au a tala fakatusa ma fai e faipati atu au ki a latou,

E taku atu foki ne au ki a latou a mea 'funa mai te kamataga o te lalolagi.”

Ko Fakaasi atu ne Iesu a te Uiga o te Tala Fakatusa ki Mouku

36Ne tuku ne Iesu a te vaitino kae ulu ki loto i te fale. Ne o'mai ona soko ki a ia, kae fai mai, “Fakamatala mai ki a matou a te uiga o te tala fakatusa ki mouku kola e ola i te laukele.” 37Ne tali atu a Iesu, “A te tino tela ne 'toki ne ia a fuaga 'lei, ko te Tama a te Tagata ko au tena. 38A te laukele ko te lalolagi, ka ko fuaga 'lei ko tino o te Malo o te lagi, a mouku ko tino a te Tino Masei. 39A te fili tela ne 'toki ne ia a mouku ko te Tiapolo; a te aso kati saito, ko te gataga o te lalolagi. A tino kati saito ko agelu. 40E pela mo mouku e fakaputu o 'sunu ki te afi, ko te fakatusa tena o te gataga o te lalolagi. 41I te aso tena, e uga mai ne te Tama a te Tagata ana agelu, o 'vae keatea mai tena Malo a tino e fakaagasala ne latou a tino, mo tino amio masei, 42kae pei ki te afi, tela e fakatau'tagi kae gaii olotou nifo i ei. 43Ka ko tino amiotonu, e maina pela mo te la i te Malo o te lotou Tamana. Ko te tino e lagona ne ia aku muna, fai la!”

Ko te Tala Fakatusa o te Koloa Taua ne 'Funa

44“A te Malo o te lagi, e pela mo te koloa taua ne 'funa i te laukele. Ne maua ne te sua tagata, kae ne toe 'funa ne ia. Ko oko eiloa i tena fiafia, fano ei o 'togi atu ana mea katoa, mo 'togi te laukele tena.”

Ko te Tala Fakatusa ki te Penina

45“A te Malo o te lagi, e pela foki mo se tino fai koloa, e salasala ki penina taua. 46I te mauaga ne ia a te penina e sili i te taua, fano ei o 'togi ana mea katoa, mo 'togi te penina tena.”

Ko te Tala Fakatusa ki te Tili

47“A te Malo o te lagi, e pela mo te tili ne pei ki te tai, kae 'tu i ei a ika valevale. 48Kafai ko fonu a te tili i ika, ko 'futi ake ei ki uta ne tino Fai-ika, ko 'nofo ki lalo, o fakavasega a ika 'lei o 'fao ki loto i olotou ola, kae tiaki a ika ma'sei. 49E pena eiloa a te gataga o te lalolagi. E o'mai a agelu o 'vae keatea a tino ma'sei mai tino amiotonu. 50Kae pei atu a tino ma'sei ki te afi tela e fakatau'tagi i ei a tino kae gaii olotou nifo.”

Ko Koloa Mua mo Koloa Fou

51Ne fesili atu a Iesu ki a latou penei, “E a, e maina koutou i mea katoa konei?” Ne tali mai a latou ki a ia, “Ao.” 52Muna a Iesu ki a latou, “Ko tena uiga, ko faiakoga katoa o te Tulafono kola ko fai mo soko o te Malo o te lagi, e pela latou mo se pule o te fale, e tapale ne ia keatea a mea fou mo mea mua mai tena fale koloa.”

Ko se Talia a Iesu i Nasaleta

(Male 6.1-6; Luka 4.16-30)

53I te otiga ne tala atu ne Iesu a tala fakatusa konei, tuku ei ne ia te koga tena, 54kae foki atu ki tena fenua tonu. Ne akoako atu ei a ia i te lotou fale tapuaki, ka ko tino kola ne fakalogo'logo ki a ia ne ofo. Ne fesili ifo ei latou i a latou eiloa, “Ne maua ne ia pefea te poto tenei, mo te fai vavega? 55E se ko ia tena ko te tama a te kamuta? E se ko Malia tena matua? E se ko ia tena ko te taina o Iakopo, Iosefa, Simona, mo Iuta? 56A ona tuagane konei katoa eiloa e 'nofo mo tatou i konei. Ne maua pefea ne ia a mea katoa konei?” 57#Ioa 4.44Tela, 'teke ei ne latou a Iesu, kae fai atu ei a ia ki a latou, “A te pelofeta e 'malu i so se koga, kae e se 'malu i tena fenua mo tena kaiga.” 58E se uke a vavega ne fai ne ia i kona, i te mea e se fakatuanaki a latou.

Currently Selected:

MATAIO 13: Tusi Tapu

Highlight

Copy