LUKA 8

Ko Fafine ne Olo Fakatasi mo Iesu

1Fakamuli ake, ne malaga Iesu i loto i fa'kai 'lasi mo fa'kai fo'liki, o takutaku atu te Tala 'Lei e uiga ki te Malo o te Atua, kae ne olo mo te tinoagafulu mo te tokolua soko, 2#Mata 27.55-56; Male 15.40-41; Luka 23.49e pela foki mo nisi fafine kola ne 'nofo i ei agaga ma'sei mo masaki. Ko Malia te Makatala, tela ne afuli mai i ei temoni e tokofitu; 3ko Ioana te avaga a Kusa, ko te pule i te fale o Helota; ko Susana foki mo isi fafine e tokouke, kola ne fesoasoani ki a Iesu mo ona soko i te lotou tausiga.

Ko te Tala Fakatusa ki te Tagata Toki Saito

(Mata 13.1-9; Male 4.1-9)

4A tino ne o'mai ki a Iesu mai fa'kai kesekese; kae i te tokoukemaiga o tino, ne fai atu ne Iesu a te tala fakatusa tenei:

5“E isi se tagata ne fano o 'toki ana fuaga saito. I te luluga ne ia ana fuaga i luga i tena manafa, e isi ne fuaga ne 'to i luga i te alatu, kae ne lakalaka ne tino, kae ne kai foki ne manulele. 6A nisi fuaga ne 'to i luga i te laukele fatufatua, kae i te olaakega o lakau, ne toe magemage, i te mea e se 'siu te laukele. 7A nisi fuaga ne 'to ki loto i va o lakau makai'kai, ne ola fakatasi ake kae ne ola saitia. 8Ka ko nisi fuaga ne 'to ki te laukele e ola 'lei. Ne ola lakau kae ne fua mai taki selau fuaga i te lakau.” Kae ne toe faipati atu a Iesu penei, “Faka'logo mai la manafai e isi ne otou taliga!”

Ko te Uiga o te Tala Fakatusa

(Mata 13.10-17; Male 4.10-12)

9Ne fesili atu soko o Iesu ki a ia, me se a te uiga o te tala fakatusa tenei. 10#Isa 6.9 Muna a Iesu, “A te iloa o mea 'funa i te Malo o te Atua, ko oti ne tuku atu ki a koutou; kae ki nisi tino, e fakaasi atu i tala fakatusa, ko te mea ke mafai ne latou o 'kilo ki ei kae se lavea, o faka'logo foki kae se maina i ei.”

Ko Fakamatala ne Iesu a te Tala Fakatusa e Uiga ki te Tagata Toki Saito

(Mata 13.18-23; Male 4.13-20)

11“Tenei te uiga o te tala fakatusa: A te fuaga ko te muna a te Atua. 12A te fuaga tela ne to i te alatu, e fakasino ki tino kola ne lagona ne latou; kae ne vau te Tiapolo o toe ave te muna keatea mai i olotou loto, ko te mea ke se talitonu latou, kae ke mo a foki ma 'sao latou. 13A te fuaga tela ne to i te laukele fatufatua, e fakasino ki tino kola ne lagona ne latou te muna, kae ne talia ne latou mo te fiafia. Ka ko te mea ne seki lagona malosi ki olotou loto; ne talitonu fua latou i ne mo taimi, kae ne to keatea i taimi ne fakaosoosogina ei latou. 14A te fuaga tela ne to i va o lakau makai'kai, e fakasino ki tino kola ne lagona ne latou; ka ko te uke o mea e mafaufau 'mafa ki ei, pela foki mo koloa mo mea fakafiafia o te olaga nei, ne taomia ei latou; kae ne seki ma'tua foki olotou fua. 15A te fuaga tela ne to ki loto i te laukele ola 'lei, e fakasino ki tino kola ne lagona ne latou te muna, kae ne tausi ne latou i te loto fiafia mo te fakamaoni, kae ne tumau eiloa ke oko ki te taimi ne fua mai ei.”

Ko te Moli i Lalo o te Kumete

(Male 4.21-25)

16 # Mata 5.15; Luka 11.33 “E seai se tino e fa'ka se moli ko fakapulou ei ki se kumete, io me tuku mai lalo o se moega. Kae ke tuku eiloa ki luga i te tugamoli, ko te mea ke lavea ne tino te mainaga i te taimi e o'mai ei ki loto. 17#Mata 10.26; Luka 12.2 So se mea e 'funa ka fakaasi, mo so se mea foki e taotao ke galo, ka maua kae ka fakaasi ke iloa ne tino.

18 # Mata 25.29; Luka 19.26 “Tela la, ke fakaeteete koutou, kae fakalogo faka'lei; i te mea ko te tino tela e isi sena mea, ka toetuku atu ne mea ki a ia, ka ko te tino tela e seai ne ana mea, ka ave keatea mai i a ia a te mea foliki i tena taofi e i a ia.”

Ko te Matua mo Taina o Iesu

(Mata 12.46-50; Male 3.31-35)

19Ne o'mai te matua mo taina o Iesu ki a ia, kae ne seki mafai o oko ki a ia i te mea e tokouke a tino. 20E isi se tino ne muna atu ki a Iesu, “A tou matua mo ou taina, kola e 'tu i tua e fia fetaui ki a koe.” 21Muna a Iesu ki a latou katoa, “A toku matua mo oku taina, ko tino kola e lagona ne latou te muna a te Atua, kae tausi ne latou.”

Ko Fakamalu ne Iesu te Afā

(Mata 8.23-27; Male 4.35-41)

22I te aso e tasi, ne 'sopo Iesu mo ona soko i se poti kae ne fai atu ki a latou, “Tou olo ki te isi feitu o te namo.” Tela, fano ei te lotou malaga. 23I te taimi ne fano ei te lotou poti, ka ko Iesu e moe. Ne agi malosi te matagi i luga o te namo, kae ne kamata o fonu te poti i te vai, tela ka tupu ei se fakalavelave lasi ki a latou. 24Ne o'mai ona soko kae ne 'fagu a ia ke ala, olotou muna: “Te Aliki! A matou ka 'mate!” Ne tu ake ki luga a Iesu kae fakatonu atu ki te afā mo te vai sousou ke gata. Ne gata te afā mo te sou o te namo, ka ko oko eiloa i te malū. 25Tela, faipati atu ei a ia ki ona soko, “Tefea te otou fakatuanaki?” Ka ko latou ko ofo kae ma'taku, kae faipati i a latou eiloa, “Ko oi te tino tenei? E fai atu ne ia fakatonuga ki matagi mo peau, kae ne faka'logo ki a ia!”

Ko te Faiga ne Iesu ke 'Lei te Tagata ne 'Nofo i ei Temoni

(Mata 8.28-34; Male 5.1-20)

26Iesu mo ana soko ne faimalaga i te poti ki te fenua ko Kelasa,#8.26: Kelasa; I nisi lomiga e isi iei Katala (onoono ki te Mata 8.28); nisi lomiga ko Kelekesa. tela e tu i te isi feitu o te namo e feagai mo Kalilaia. 27I te taimi ne oko ake ei a Iesu ki uta, ne fakafetaui mai ki a ia a te tagata mai te fa'kai tena, ko te tagata e 'nofo temoni i a ia. Ko leva te taimi ne nofo a ia e seai ne ona gatu, ka ko se nofo foki i se fale, kae nofo faeloa i tanuga. 28I te laveaga ne ia a Iesu, ne kalaga malosi, kae ne fakasiga ki lalo i ona mua, kae ne faipati mo te leo maluga penei: “Iesu te Tama a te Atua Tafasili i te Maluga! Se a te mea e manako koe o fai ki a au? Au e fakamolemole atu ki a koe, sa fakasala mai au!” 29Ne faipati a ia penei, i te mea ko oti ne fai te fakatonuga a Iesu ki te agaga masei, kae tiga eiloa te tausi o ia pela me se pagota, ne saisai ona lima mo vae ki filifili, ne 'motu ne ia filifili kae ne ave a ia ne te temoni ki te vao. 30Ne fesili atu a Iesu ki a ia, “Ko oi tou igoa?” Ne tali mai a ia, “A toku igoa ko ‘Lekeono,”’ i te mea e tokouke temoni ko oti ne ulu ki loto i a ia. 31A temoni ne fakamolemole ki a Iesu, ke se uga latou ke olo ki mone.#8.31:Mone: E isi se mafaufauga e fai pela me i temoni ka falepuipui i koga 'poko o te lalolagi ke oko eiloa ki te lotou fakasalaga fakaoti.

32E isi se lafu puaka e pili mai, e kai'kai i te feitu o te mauga. A temoni ne fakamolemole ki a Iesu, ke tuku atu latou ke olo ki puaka. 33Tela, olo ei temoni ki tua mai te tagata, kae ne ulu ki loto i puaka. Ne 'tele ifo a te lafu puaka ki lalo i tafa o te mauga, 'to ki loto i te vai, ma'lemu 'mate eiloa.

34Ne lavea ne tino tausi puaka a te mea ne tupu, tela 'tele ei latou kae fakasalalau atu a te tala i te fa'kai mo fenua katoa. 35Ne olo atu a tino o onoono i te mea ne tupu. Ne o'mai latou ki a Iesu, kae ne maua ne latou a te tagata tela ne olo keatea mai i a ia temoni e nofo i vae o Iesu, ko iai ona gatu ka ko atamai foki, kae ne ma'taku katoa latou. 36A tino kola ne lavea ne latou, ne tala atu ki tino a te faiga ke 'lei te tagata tena. 37Tela, fakamolemole atu ei tino katoa o te fenua ko Kelasa ki a Iesu ke fano keatea, i te mea ko oko eiloa i te ma'taku latou katoa. Tela, sopo ei a Iesu ki te poti o fano keatea. 38A te tagata tela ne olo keatea mai i a ia a temoni, ne fakamolemole penei ki a Iesu, “Talia mai au ke fanatu i a koe.” Kae ne uga ne Iesu a ia ke fano, kae ne faipati atu penei: 39“Foki ki tou kaiga, kae fakamatala atu a mea ko oti ne fai ne te Atua mo koe.” A te tagata ne fano i te fa'kai katoa, kae ne fakamatala ne ia a mea ko oti ne fai ne Iesu mō ia.

Ko te Tama Fafine a Iailo mo te Fafine Tela ne Fakapatele ki te Gatu o Iesu

(Mata 9.18-26; Male 5.21-43)

40I te taimi ne toe foki mai ei a Iesu ki te isi feitu o te namo, e tokouke ne fakafetaui ki a ia, i te mea ne fakatalitali latou katoa ki a ia. 41I kona foki eiloa, kae oko mai te tagata e igoa ki a Iailo. Ko ia te pule o te fale tapuaki i te koga tena. Ne totuli i mua o Iesu, kae fakamolemole ki a ia ke fanatu ki tena fale, 42me i tena tama fafine, ko tena fuatasi, ko sefulu lua ona tausaga, ko tai mate.

I te taimi ne fanatu ei a Iesu, ko i takitaki tino i ona feitu katoa. 43E isi se fafine i te koga tena, ne tafe tena sua i tausaga e sefulu lua, ko palele eiloa ana tupe ne 'togi ki tokita,#8.43: I naai lomiga e se sae iei ko oti ne fakamaumau a ana mea katoa ki luga i tokita. kae e seai eiloa se tino ne mafai o fai ke 'lei tena masaki. 44Ne vau a ia i tino kola ne o'mai i tua o Iesu, kae ne fakapatele ki te kapakapa o tena gatu, kae ne gata fakavave te tafe o tena sua. 45Ne fesili atu a Iesu, “Ko oi te tino ne fakapatele mai ki a au?” A tino katoa ne faka'fiti, kae ne muna mai Petelu, “Te Aliki, a koe ko mumu ne tino kae fakatauteke atu ki a koe.” 46Kae ne tali atu a Iesu, “E isi eiloa se tino ne fakapatele mai ki a au, me ne iloa ne au te tekaga keatea o te mana mai i a au.” 47Ne lavea ne te fafine i a ia ko iloa, tela, vau ei a ia, ko polepole i te mataku, kae ne totuli i mua o Iesu. I kona foki eiloa, fakaasi atu ne ia ki a Iesu mo tino katoa a te ala ne fakapatele atu ei a ia ki a ia, mo te 'lei fakavave o tena masaki. 48Muna a Iesu ki a ia, “Taku tama fafine, ko ola koe i tou fakatuanaki. Fano mo te manuia.”

49I te taimi ne fai ei muna konei a Iesu, kae oko mai te avefekau mai te fale o te pule o te fale tapuaki. Ana muna ki a Iailo, “A tau tama fafine ko mate, sa toe fakalavelave ki te Faiakoga.” 50Ne lagona ne Iesu kae fai atu ki a Iailo, “Sa mataku; talitonu fua, ko te mea eiloa ko 'lei a ia.” 51I tena okoga ki te fale, ne seki talia ne ia se tino ke olo laua ki loto, kae na ko Petelu, Ioane mo Iakopo, mo matua ei o te tamaliki. 52A tino katoa i te koga tena, e 'tagi kae fanoa'noa ona ko te tamaliki. Muna a Iesu, “Sa 'tagi, a te tamaliki e seki mate e moe fua!” 53Ne fakatauemu latou katoa ki a ia, i te mea ne iloa ne latou i te tamaliki ko mate. 54Ka ko Iesu ne puke ki te lima o te tamaliki kae kalaga ki luga, “Nofo mai ki luga!” 55Ne toe ola, kae ne nofo ake fakavave; kae ne fai atu te fakatonuga a Iesu ki a latou ke fagai. 56Ko oko eiloa i te ofo ona matua, kae ne fakatonu atu a Iesu ki a laua, ke sa tala atu ki so se tino a te mea ne tupu.

Currently Selected:

LUKA 8: Tusi Tapu

Highlight

Copy