LUKA 7

Ko te Faiga ne Iesu ke 'Lei te Masaki o te Tavini a te Takitaki o te Tokoselau

(Mata 8.5-13)

1I te palelega ne faipati ne Iesu a mea katoa konei ki tino, fano ei ki Kapanaumi. 2E isi se takitaki o te tokoselau o te malo Loma i kona, ne masaki tena tavini fagasele, ka ko tai mate. 3I te itula ne logo ei te takitaki tena i te tala e uiga ki a Iesu, ne uga atu ne ia ne toeaina Iutaia ke olo o fakamolemole ki a ia, ke vau o fai ke 'lei tena tavini. 4Ne o'mai latou ki a Iesu, kae ne fakamolemole malosi ki a ia penei: “A te tagata tenei e 'tau eiloa o maua ne ia tou fesoasoani. 5A ia e alofa ki tino o tatou, ka ko ia foki eiloa ne faite ne ia te fale tapuaki mo matou.” 6Ne olo latou fakatasi mo Iesu. E seki na lo ko 'mao a ia mai te fale, ka ko uga mai ne te takitaki tena ona taugasoa, o fai mai penei ki a ia: “Te Aliki, sa fai te mea nei mo mea e fakalavelave ki a koe, me e seai soku aoga ke ulu mai ei koe ki loto i toku fale, 7ko toku manatu foki me se 'tau mo au o fakaoko atu ki a koe. Ke fai mai fua tau fakatonuga, ko toe malosi ei taku tavini. 8Au foki, se tagata e nofo mai i lalo i pulega a takitaki ma'luga, kae isi ne sotia mai i lalo i a au. E fai taku fakatonuga ki te tino tenei, ‘Fano!’ ko te mea eiloa ko fano; e fai taku fakatonuga ki te tino tela, ‘Vau!’ ko te mea eiloa ko vau; kae fai atu foki taku fakatonuga ki taku pologa. ‘Fai te mea tenei!’ ko te mea eiloa ko fai.” 9Ne ofo a Iesu i te lagonaga ne ia a te mea tenei; ne takapili atu a ia kae ne fai atu ki te vaitino kola ne tau'tali atu i a ia, “Au e muna atu ki a koutou, me ka seki maua eiloa ne au se fakatuanaki penei i Isalaelu!” 10A tino kola ne o'mai mo te fekau, ne toe 'foki ki te fale o te takitaki tena, kae maua atu ei ne latou tena tavini ko malosi.

Ko te Fakaolaga ne Iesu te Tama Tagata a te Fafine ko Mate Tena Avaga

11Fakamuli ake,#7.11: I te otiga mai tua i kona; I nisi lomiga e isi iei I te sua aso. ne fano a Iesu ki te fa'kai e igoa ki a Naina; ka ko ona soko mo tino e tokouke ne olo fakatasi mo ia. 12I tena okoga ki te mataloa o te fa'kai, e isi ne tino ne solo mai i kona, e amo ne latou te tino mate, ka ulu mai ki tua. A te tino mate ko te tama tagata eiloa e tokotasi a te fafine ko mate tena avaga, kae tokouke a tino mai i te fa'kai ne o'mai fakatasi mo ia. 13I te itula ne lavea ei ne te Aliki te fafine, a tena loto ne fonu i te alofa ki a ia, kae ne faipati atu ki a ia penei, “Sa tagi.” 14Ne saele atu a Iesu kae ne puke ki te pusa o te tino mate, kae ne 'tu a tino kola e amo ne latou. Ne faipati atu penei a Iesu, “Te tamataene! Au e muna atu ki a koe, tu ki luga!” 15Ne nofotu ake ki luga a te tino mate kae kamata o faipati, kae ne tuku atu a ia ne Iesu ki tena matua. 16Ko oko eiloa i te ma'taku o tino katoa, kae 'viki ki te Atua penei: “Ko sae mai nei se pelofeta sili mo tatou, mo te Atua ko oko mai o fakasao ona tino!” 17A te tala tenei ki a Iesu, ne oko atu ki koga katoa o Iutaia mo fenua i ona tafa.

Ko Avefekau mai i a Ioane te Papatiso

(Mata 11.2-19)

18A mea katoa konei, ne tala atu ne taugasoa o Ioane ki a ia. Ne kalaga atu a Ioane ki se tokolua o latou ke o'mai ki a ia, 19kae ne uga ke olo ki te Aliki o fesili ki a ia penei, “Ko koe te tino tela ne muna mai a Ioane me ka vau, io me e 'tau mo matou o fakatalitali ki se isi tino?” 20I te taimi ne oko mai ei a laua ki a Iesu, a la muna, “A maua ne uga mai ne Ioane te Papatiso o fesili atu, ‘Ko koe te tino tela ne fai mai ei a ia me ka vau, io me e 'tau mo matou o fakatalitali ki se isi tino?’ ” 21I te taimi eiloa tena, ko tokouke a tino ne fai ne Iesu ke 'lei olotou masaki; ko masaki ma'sei, mo agaga ma'sei, kae ne faka'pula foki ne ia a mata o tino 'kivi e tokouke. 22#Isa 35.5-6; Isa 61.1 Ne tali atu a ia penei ki avefekau a Ioane: “'Foki kae tala atu ki a Ioane a mea ko oti ne lavea ne koulua, mo mea foki ko oti ne lagona ne koulua: a tino 'kivi ko 'pula olotou mata, a tino 'pili ko mafai o sasale, a lepela ko 'lei olotou masaki,#7.22:Ko oti ne faka'lei: Onoono ki te 5.12. a tino 'tuli ko 'logo olotou taliga, a tino 'mate ko toe ola, mo te Tala 'Lei ko folafola atu ki tino ma'tiva. 23Ke manuia a ia tela e seai sona loto fakalotoloto lua ki a au!”

24I te ologa o avefekau a Ioane, ne kamata a Iesu o faipati e uiga mo Ioane ki te vaitino penei: “I te ologa a koutou ki a Ioane i te vao, se a te mea ne fakamoemoe koutou o 'kilo ki ei? Se lau mouku e gaofe i te agi o te matagi? 25Se a te mea ne olo koutou o 'kilo ki ei? Se tagata e pei ki gatu fakagaligali? Kiloke, a tino e pei ki gatu pena kae ola i se olaga 'lei, e maua i fale o tupu! 26Fai mai ki a au, se a te mea ne fakamoemoe koutou o 'kilo ki ei? Se pelofeta? Ao, au e muna atu ki a koutou, ne lavea ne koutou a te tino e sili atu eiloa i se pelofeta. 27#Male 3.1 Me i a Ioane, ko te tino tela ne fai mai ei te Tusi penei, ‘Kiloke, tenei taku avefekau, ka uga atu ne au a ia ke mua i a koe o fakatoka te ala mo koe.”’ 28Muna a Iesu, “Au e muna atu ki a koutou, me e sili atu a Ioane i tino katoa ko oti ne fanau mai; ka ko ia tela e tafa foliki i te Malo o te Atua, e sili atu i a ia.”

29 # Mata 21.32; Luka 3.12 A tino katoa mo tagata ao lafoga, ne lagona ne latou ana muna; a latou ko tino kola ne faka'logo ki fakatonuga tonu a te Atua, ka ko oti foki ne papatiso ne Ioane. 30Ka ko Falesaio mo faiakoga o te Tulafono, ne seki talia ne latou faiga a te Atua mō latou; kae ne se loto latou ke papatiso ne Ioane.

31Muna a Iesu, “Nei, se a te mea ka mafai ne au o fakatusa ki ei kautama i aso nei? E 'pau latou me ne a? 32E 'pau latou mo ne tamaliki e saga'saga i te malae. Ne ka'laga atu te potu kau e tasi ki te sua potu kau penei: ‘Ne fakatagi atu ne matou a pese o fakaipoipoga mo koutou, ka ko koutou e se 'saka! Ne usu ne matou pese o tanuga o tino 'mate, ka ko koutou e se 'tagi! ’ 33Ne vau a Ioane te Papatiso, ne fakalikiliki mō tapuakiga, ne seki inu foki ki uaina, kae ne muna mai koutou pela, ‘A ia se tagata e fakavalevale!’ 34Ne vau foki au ko te Tama a te Tagata, ne kai kae inu, kae muna mai foki koutou pela, ‘Kilo mai ki te tagata tenei! A ia se tino gafula kae inu uaina, se taugasoa o tino ao lafoga mo tino ma'sei!’ 35A te poto o te Atua, e fakaasi tonu mai i ana galuega.”

Ko Iesu i te Fale o Simona te Falesaio

36A Iesu ne ami ne te Falesaio e igoa ki a Simona ke 'kai laua, tela fanatu ei a Iesu ki tena fale, fakapale ifo ei tena tulilima o kai. 37#Mata 26.7; 14.3; Ioa 12.3 E isi se fafine i te fa'kai tena, ne ola i se ola fina lalolagi. Ne logo a ia i a Iesu e kai i te fale o te Falesaio, tela aumai ei ne ia se fagu alapasa e fonu i sausau, 38kae ne tu mai tua i vae o Iesu, e tagi kae faka'sofi ifo ona loimata ki vae o Iesu. Ne fakamalo ne ia a vae o Iesu ki ona laulu, ne sogi ki vae, kae ne 'ligi te sausau ki luga i ona vae. 39I te laveaga ne te Falesaio tela ne ami ne ia a Iesu a te mea tenei, ana muna i tena loto eiloa, “Kafai a te tagata tenei se pelofeta eiloa, e 'tau o iloa ne ia me ko oi te fafine tenei e puke atu ki a ia, me i a ia se fafine agasala.” 40Ne faipati mo te leo lasi a Iesu ki a Simona, ana muna, “Simona, e isi ne aku mo muna e fia fai atu ki a koe.” Ne tali mai a Simona, “Ko 'lei e te Faiakoga fai mai la au muna.” 41Muna a Iesu, “E tokolua tagata ne kaitalafu tupe i se tagata. A te sua tino e selau tala tena kaitalafu, ka ko te sua tino e sefulu tala. 42E seai se tino o laua ne mafai o toe 'togi atu tena kaitalafu, tela fakamagalo ei ne te tagata tena a la kaitalafu. Ko oi la te tino o laua e sili tena alofa ki a ia?” 43Ne tali mai Simona penei, “A toku taofi, ko te tino tela ne uke tena kaitalafu ne fakamagalo.” Muna a Iesu, “E tonu tau tali.” 44Ne mafuli atu a Iesu ki te fafine kae ne muna atu ki a Simona: “E lavea ne koe a te fafine tenei? Au ne vau ki loto i tou fale, kae ne seki tuku mai ne koe ki a au ne vai mo 'fulu oku vae, ka ko te fafine tenei, ko oti ne 'fulu ne ia oku vae ki ona loimata, kae ne fakamalo ki ona laulu. 45Ne seki fakafetaui mai koe ki a au ki se sogi, ka ko ia nei e seki gata tena sogi ki oku vae talu tena oko mai. 46Ne seai sau sinu ne aumai mō 'mili toku ulu, ka ko ia nei ko oti ne milimili ne ia oku vae ki te sausau. 47Tenei la, au e fai atu ki a koe, i te lasi o te alofa ne fakaasi mai ne te fafine, e fakapatonu ei a te uke o ana agasala ko oti ne fakamagalo. Ko te tino tela e foliki te mea ne fakamagalogina, ko te mea foki eiloa e foliki tena alofa e fakaasi.” 48Muna a Iesu ki te fafine, “Ko magalo au agasala.” 49A nisi tino kola ne 'kai fakatasi latou, ne kamata o faipati i olotou loto penei, “Ko oi te tino tenei, tela e mafai ne ia o fakamagalo agasala?” 50Ka ko Iesu ne muna atu ki te fafine, “Ko ola koe i tou fakatuanaki; fano la mo te manuia.”

Currently Selected:

LUKA 7: Tusi Tapu

Highlight

Copy