LUKA 2

Ko te Fanau mai o Iesu

(Mata 1.18-25)

1Ko aso tonu eiloa kona ne avatu ei te fakatonuga a te tupu ko Kaisala Aokuso, ki tino katoa ke tusi olotou igoa. 2I te taimi o te tusiga igoa, ko Kulenio te kovana o Sulia. 3Ne olo a tino katoa o tusi olotou igoa i fa'kai o olotou tupuga.

4A Iosefa ne vau mai Nasaleta i Kalilaia ki Iutaia, ki te fa'kai e igoa ki a Petelema, tela ne fanau ei te tupu ko Tavita. Ne fano ki kona Iosefa me i a ia se tino ne tupu mai i te gafa o Tavita, 5ko te mea ke tusi fakatasi o la igoa mo Malia, tela ne fai feagaiga laua ke fai te la avaga, me i a Malia ko faitama. 6I te la 'nofoga i Petelema, ko oko nei ki te taimi tonu ka fanau ei a ia. 7Ne fanau mai ne ia tena tama matua, kae ne fakapulupulu ki laugatu kae fakamoe i te tali fagai manu, me ko seai se koga mo latou i te fale talimalo.

Ko Tausi Mamoe mo Agelu

8E isi ne tausi mamoe ne 'nofo i te koga vao tena i te po, e tausi olotou mamoe. 9Ne fakasae mai te agelu a te Aliki ki a latou, kae ne maina atu te 'malu o te Aliki ki luga i a latou. Ko oko eiloa latou i te ma'taku. 10Kae ne fai atu te agelu ki a latou, “Sa ma'taku, kiloke, ko aumai ne au te tala 'lei mo koutou, ka fakafiafia ei tino katoa! 11I te po eiloa tenei i te fa'kai o Tavita, ko fanau ei te otou fakaola ko Keliso te Aliki! 12Tenei te fakailoga e fakamaoni ei a te mea nei ki a koutou: Ka maua atu ne koutou se tamaliki e fakapulupulu ki laugatu e moe i te tali fagai manu!”

13I kona foki eiloa, ne lavea atu ne latou te kau o te lagi e 'tu fakatasi mo te agelu, kae 'viki ki te Atua penei:

14“Ko te vikiga o te Atua i koga tafasili i te maluga.

Ke i te lalolagi te filemu, mō tino katoa kola e fiafia ki ei te Atua!”

15Ne olo keatea agelu mai i a latou, ko 'foki atu ki te lagi, kae ne faipati ake te sua tino ki te sua tino, “Tou olo ki Petelema o kilo ki te mea tenei ko oti ne tupu, tela ne fakailoa mai ne te Aliki.” 16Ne olo fakavave latou kae ne maua atu ne latou a Malia mo Iosefa, kae ne lavea foki ne latou a te tamaliki e takato i te tali fagai manu. 17I te laveaga ne tausi mamoe te tamaliki, ne tala atu ne latou ki a laua fakamatalaga a te agelu e uiga mo te tamaliki tenei. 18Ka ko tino katoa kola ne 'logo i te tala tenei, ne ofo latou i mea katoa ne tala atu ne tausi mamoe. 19Ne masaua katoa ne Malia a mea konei, kae ne mafaufau malosi ki ei. 20Ne 'foki atu tausi mamoe, ne 'viki kae fakafetai ki te Atua mo mea katoa ne lagona kae lavea ne latou; me ko mea tonu eiloa kona ne fai atu ei te agelu ki a latou.

Ko te Fakaigoaga o Iesu

21 # Levi 12.3; Luka 1.31 I te valu o aso, ko te taimi tena ko 'tau ei o pilitome te tamaliki, ne fakaigoa ki a Iesu, te igoa ne taku mai ne te agelu, ka koi tuai o fakafua i te tinae o tena matua.

Ko te Fakatapuga o Iesu i te Fale Tapu

22 # Levi 12.6-8 # Levi 12.6-8 Ko oko ki te taimi ko 'tau ei Iosefa mo Malia o fai te mea tela e fakatonu mai ne te Tulafono a Mose, ke fai te faka'maga, tela ne 'kave ei ne laua te tamaliki ki Ielusalema o tuku atu ki te Aliki. 23#Eso 13.2,12 Tenei te mea e tusi i te tulafono a te Aliki: “A toekimua tagata katoa, ke fakatapu latou mo te Aliki.” 24Ne olo foki laua o avatu te taulaga, e pela mo te mea e fakatonu mai ne te tulafono a te Aliki, “Ke avatu se ava lupe io me se ava punua lupe.”

25E isi se tagata ne nofo i Ielusalema, a tena igoa ko Simeona. Se tagata e 'lei kae mataku ki te Atua, kae ne nofo eiloa o fakatalitali mo te fakaolaga o Isalaelu. Ne nofo i a ia te Agaga Tapu. 26Ne fakaasi tonu ne te Agaga Tapu ki a ia, me ka lavea ne ia te Keliso a te Aliki ka koi tuai o mate. 27Ne takitaki Simeona ne te Agaga Tapu ki loto i te Fale Tapu. I te taimi ne aumai ei te tamaliki ko Iesu ne ona matua ki loto i te Fale Tapu, o fai fakailoga e pela mo te mea ne fakatonu mai ne te Tulafono, 28ne apai ake ne Simeona te tamaliki i ona lima, kae ne fakafetai ki te Atua penei:

29“Te Aliki, ko oti ne tausi ne koe tau feagaiga,

Kae ke tuku atu tau tavini ke fanatu mo te filemu.

30Me ko oti ne lavea tonu ne oku mata tau fakaolataga.

31Tela ko oti ne fakatoka ne koe i mata o tino katoa:

32 # Isa 42.6; 49.6; 52.10 Ko te mainaga e fakasino ne ia te alatu ki tino o fenua fakaatea.

Mo te 'malu o tou fenua ko Isalaelu.”

33Ne ofo ona matua i mea kola ne faipati ki ei Simeona e uiga ki a ia. 34Ne fakamanuia atu Simeona ki a laua kae faipati penei ki a Malia tena matua: “Kiloke, ne filifilia ne te Atua te tamaliki tenei, mō te fakamalepega mo te toe fakaolaga o te tokoukega o Isalaelu; ka fai foki a ia mo fakailoga mai te Atua tela ka takalia'lia ki ei te tokoukega o tino. 35Ka fakaasi foki ne ia olotou mafaufauga 'funa. A te fanoanoa ko fakatusa ki se pelu mata 'kai, tela ka fakamalepe ne ia tou loto.”

36-37E isi se pelofeta fafine e igoa ki a Ana, ko te tamaliki a Fanuelu, kae tupu mai i te matakaiga o Asela. Ko lomatua, kae fitu tausaga ne ola fakatasi ei laua mo tena avaga. Kae ne nofo taka a ia i tausaga e valu sefulu fa.#2.37: nei ko valu sefulu fa a ona tausaga; io me a ia ne nofo taka mo se valu sefulu faa tausaga. E seki tiaki eiloa ne ia te Fale Tapu i te taeao mo te afiafi, o tapuaki ki te Atua i te fakalikiliki mo te fai tinoga. 38I te itula tonu eiloa tena, ne oko mai ei a ia o siki tena fakafetai ki te Atua, kae ne faipati e uiga mo te tamaliki, ki a latou katoa kola ne fakatalitali ki te fakasaolotoga o Ielusalema.

Ko te 'Fokiatuga ki Nasaleta

39 # Mata 2.23 I te palelega ne fai ne laua faifaiga kola e manakogina ne te tulafono a te Aliki, ne toe 'foki ki Kalilaia, ki te la fa'kai tonu ko Nasaleta. 40Ne tupu ake te tamaliki i te foitino malielie mo te poto, me i te alofa o te Atua ko mautakitaki i a ia.

Ko Iesu i te Fale Tapu

41 # Eso 12.1-27; Teu 16.1-8 I tausaga takitasi, e masani o olo sale matua o Iesu ki Ielusalema ki te Paseka. 42I te katoaga o te sefulu lua ona tausaga, ne olo latou ki te Paseka i Ielusalema, e pela eiloa mo te masani. 43I te otiga o te Paseka, ne 'foki atu latou ki te lotou fa'kai, ka ko Iesu ne nofo i Ielusalema. Kae ne se iloa ne ona matua; 44ne manatu laua me kati la e 'numi fakatasi mo te kau malaga a latou, ka ko tusa mo te aso e tasi ne faimalaga ei latou, ne kamata ei o salasala ne laua ki o la kaiga mo taugasoa. 45Ne seki maua, toe 'foki atu ei ki Ielusalema o salasala a ia. 46I te tolu o aso, ne maua ei ne laua a ia i loto i te Fale Tapu, e saga'saga mo faiakoga Iutaia, e fakalogologo kae fai fesili atu ki a latou. 47A latou katoa kola ne fakalogo'logo ki a ia, ne ofo i tena poto o tali fesili. 48A ona matua ne ofo i te laveaga ne laua, kae ne fai atu tena matua ki a ia, “Taku tama, ai a ne fai ei ne koe te mea tenei ki a maua? A maua mo tou tamana ne salasala ki a koe mo te manavase.” 49Ne tali atu a Iesu ki a laua, “Ai a e salasala mai ei koulua ki a au? E se iloa ne koulua me ko 'tau au o nofo i loto i te fale o toku Tamana?” 50Kae ne seki atafia ne laua te mea ne fai atu ei a ia ki a laua.

51'Foki ei latou mo Iesu ki Nasaleta, kae ne fakalogo ki a laua. Ne taofi mau ne tena matua a mea katoa konei i tena loto. 52#1Samu 2.26; Faata 3.4 Ne tupu ake Iesu i te foitino mo te poto, kae ne alofagina ne te Atua mo tino.

Currently Selected:

LUKA 2: Tusi Tapu

Highlight

Copy