LUKA 1
1
Fakatomuaga
1Ki taku pele ko Teofilo. E tokouke a tino ne taumafai o tusi a tala e uiga ki mea ne 'tupu ki a tatou. 2Ne tusi ne latou a tala kola ko oti ne tala mai ki a tatou, ne latou kola ne 'kilo ki mea konei mai te kamataga, kae ne folafola atu ne latou te muna. 3Ki tou 'malu, ko oti ne sukesuke ne au faka'lei a mea katoa mo olotou mafuaga; tela la, ne manatu au me se mea 'lei ke tusi atu ne au se tala tukufakasolo mō koe. 4Ko fai ne au te mea tenei, ko te mea ke iloa ne koe te tonuga katoatoa o mea katoa kola ko oti ne akoako koe ki ei.
Ko te Folafolaga o te Fanau mai o Ioane te Papatiso
5 #
1NTupu 24.10
I te taimi o Helota te tupu o Iutaia,#1.5 Iutaia: A te pati tenei e fakauiga ki Palesitina katoa. e isi te faitaulaga e igoa ki a Sakalia, ne tupu mai i te kaiga faitaulaga o Avia. Ka ko Elisapeta te igoa o tena avaga; kae ne tupu mai foki i te kaiga faitaulaga. 6Ne amiotonu laua i mua o te Atua, kae ne tausi ki tulafono mo fakatonuga a te Aliki. 7Ne seai ne tama'liki a laua i te mea e se fanau Elisapeta, ka ko ma'tua foki laua.
8I te aso e tasi ne fai a te galuega a Sakalia fakafaitaulaga i mua o te Atua, e tusa mo te fakasologa o lotu i aso takitasi. 9E pela mo te tu e masani ei a faitaulaga, ne maua ne Sakalia te tofiga i te mea ko tu tonu te vili ki a ia, ke fa'ka ne ia te taulaga 'sunu i loto i te Fale Tapu o te Aliki. 10Ne 'luku i tua te vaitino, e fai olotou tinoga i te itula e fai ei te taulaga 'sunu. 11Ne fakasae mai te agelu a te Aliki ki a ia, e tu mai i te feitu fakaatamai o te fata-fai-taulaga, i te koga tela e fa'ka i ei taulaga 'sunu. 12I te laveaga ne Sakalia, ne mataku kae polepole. 13Ne fai mai te agelu ki a ia: “Sa mataku e Sakalia! Ko oti ne lagona ne te Atua tau tinoga, ka ko tau avaga ko Elisapeta ka fanau ne ia se tamaliki tagata ma koe, ke fakaigoa ne koe ki a Ioane. 14Ka lasi tou fiafia, kae ka tokouke foki ka fia'fia ki tena fanau mai! 15#Nume 6.3 Me i a ia e taua i mua o te Aliki. E se 'tau mo ia o inu ki te uaina io me ne mea inu malosi. Mai i te taimi e fanau mai ei a ia e fonu tena olaga i te Agaga Tapu. 16Ka fakafoki mai ne ia te tokoukega o Isalaelu ki te Aliki te lotou Atua. 17#Mala 4.5-6 Ka muamua atu a ia i te agaga mo te malosi o Elia, ke 'fuli ne ia loto o tamana ki fanau, mo tino fakalogoga'ta ki te poto o tino fai mea tonu, o fakatoka tino mō te Aliki.”
18Muna a Sakalia ki te agelu, “E mafai pefea o iloa ne au manafai e tonu? Au ko matua, e pela foki taku avaga.” 19#Tani 8.16; 9.21Ne tali mai te agelu, “Au ko Kapilielu. Au e tu atu i mua o te Atua, tela ne uga mai ne ia au ke vau ki a koe, o fakailoa atu te tala fiafia tenei. 20Kiloke, ona ko tou se talitonu, a koe ka gūgū; ka se toe faipati eiloa koe, ke oko ki te aso e fakataunu ei te tonuga o taku feagaiga ki a koe.”
21Ka ko tino ne faka'tali mai eiloa ki a Sakalia, kae ne ōfo latou me ai a ko leva ei a ia i loto i te Fale Tapu. 22I tena vauga ki tua, ne se mafai ne ia o faipati ki a latou. Ne iloa ake ei ne latou me isi se fakaasiga ne matea ne Sakalia i loto i te Fale Tapu; i te mea ne faipati ki fakailoga, mo ko gūgū eiloa a ia.
23I te otiga o tena tiute i te Fale Tapu, ne toe foki atu Sakalia ki tena fale. 24E se leva foki aso mai tua ifo, ne faitama tena avaga ko Elisapeta, kae tusa mo te lima masina ne se fakasaesae ki tino, kae fai ana pati penei: 25“Ko oko mai aso e fesoasoani mai ei te Aliki, a te Aliki ko oti ne fesoasoani ki a au o ave keatea toku luma mai i tino.”
Ko te Folafolaga o te Fanau mai o Iesu
26I te ono masina o te faitamaga a Elisapeta, ne uga mai ne te Atua te agelu ko Kapilielu, ki te fa'kai o Kalilaia e igoa ki a Nasaleta. 27#Mata 1.18 Me isi se fekau mō te tamafine ne fai feagaiga ke avaga mo te tagata e igoa ki a Iosefa, tela ne tupu mai i te matakaiga o Tavita, ka ko te igoa o te tamafine ko Malia. 28Ne vau te agelu ki a ia kae fai mai, “Ke i a koe te filemu! A te Aliki e fakatasi mo koe, me ko oti ne fakamanuia atu ki a koe!” 29Ne se toka te mafaufau o Malia ona ko te fekau ne aumai ne te agelu, kae ne mafaufau 'mafa me se a te uiga o ana pati. 30Muna a te agelu ki a ia, “Sa mataku e Malia, me i te Atua ko oti ne fakamanuia atu ki a koe. 31Kiloke, a koe ka faitama, ka fanau ne koe se tama tagata, kae ka fakaigoa ne koe a ia, ko Iesu. 32#2Samu 7.12,13,16; Isa 9.7E sili a ia, kae ka fakaigoa foki ko te Tama a te Atua Tafasili i te Maluga. A ia ka fai ne te Aliki te Atua mo tupu, e pela eiloa mo tena tupuna ko Tavita. 33Ka fai a ia mo tupu tumau o te fanauga a Iakopo, ko tena malo foki e seai se gatamaiga.”
34Muna a Malia ki te agelu, “Au se tamafine fua e seki avaga, kae ka mafai pefea o tupu te mea nei?”
35Ne tali mai te agelu, “Ka oko atu ki a koe te Agaga Tapu, ka nofo foki i a koe te mana o te Atua. Ona ko te feitu tenei, ka fakaigoa te tamaliki tapu tena, ko te Tama a te Atua. 36Kae kiloke, masaua tou tino ko Elisapeta. Ko iloa 'lei me se afu, ko matua foki, kae i te taimi nei ko faitama, ko ono ona masina. 37#Kene 18.14Me e seai se mea e se mafai ne te Atua o fai.”
38Muna a Malia, “Ko au ko te tavini a te Aliki. Ke oko eiloa te mea tena ki a au, e pela mo au pati.”Ne fano ei keatea te agelu mai i a ia.
Ko Asiasi atu Malia ki a Elisapeta
39Mai tua ifo i kona, ne asiasi atu Malia ki a Elisapeta, ne fakatokatoka Malia o fakavave atu ki te koga e uke mauga, ki te fa'kai e tasi o Iuta. 40Ne ulu atu ki loto i te fale o Sakalia, kae fakatalofa atu ki a Elisapeta. 41I te itula ne lagona ei ne Elisapeta te fakatalofa a Malia, kae gasue mo te tamaliki i loto i tena tinae. Ne pukea ei Elisapeta ne te Agaga Tapu, 42faipati malosi atu ei ki a Malia: “Amutia koe i fafine katoa! Ke amutia foki te tamaliki tela ka fanau ne koe. 43Ai a ko ala ei o tupu se mea sili penei ki a au, i te matua o toku Aliki ko vau o asiasi mai ki a au? 44I taku lagonaga tau fakatalofa, kae gasue mo te fiafia te tamaliki i loto i toku tinae. 45E manuia foki a te fafine tela e talitonu, me oko eiloa a mea kola ne faipati mai ei te Aliki ki a ia.”
Ko te Pese Tavae a Malia
46 #
1Samu 2.1-10
Muna a Malia:
“Ko tavae atu toku loto ki te Aliki,
47Ko fiafia foki toku agaga ki te Atua toku Fakaola.
48 #
1Samu 1.11
I te mea ne manatua ne ia au ko tena tavini se aoga!
Kae kiloke, mai i te itula nei o fano ki mua, ka fakaamutia mai kautama katoa ki a au.
49Ona ko mea 'lasi ne fai ne te Atua Malosi mo oku;
A tena igoa foki e tapu.
50E alofa foki ki a latou katoa kola e ma'taku ki a ia, i kautama katoa.
51Ne 'fola tena lima malosi.
Kae ne fakamaofa ne ia tino fakamata'mata mo olotou aofaga.
52 #
Iopu 5.11; 12.19 Kae tuku ifo foki ne ia ki lalo tino sili mai i olotou nofoga aliki.
Kae siki ake ki luga tino ma'lalo.
53Ne fagai ne ia tino fia 'kai ki mea 'lei.
Kae afuli tino maumea ke olo loa o mativa.
54Ne tausi ki tena feagaiga ne fai mo tupuga o tatou;
Ne vau foki o fesoasoani ki tena tavini ko Isalaelu.
55 #
Kene 17.7
Kae ne masaua foki ne ia o alofa ki a Apelaamo mo ana fanau katoa, ke oko ki te se gata mai!”
56Ne 'nofo Malia mo Elisapeta i masina e tolu, toe foki ei ki tena fale.
Ko te Fanau mai o Ioane te Papatiso
57Ko oko nei ki te itula tonu ko 'tau ei o fanau Elisapeta, kae ne fanau ne ia se tamaliki tagata. 58Ne 'logo ona tuakoi pela foki ona kaiga i te gali o te mea a te Aliki ne fai ki a ia, tela ne fakatau fia'fia ei latou mo ia.
59 #
Levi 12.3
I te valu o aso o te tamaliki, ne o'mai latou o pilitome kae ke fakaigoa foki ki a Sakalia, te igoa o tena tamana. 60Kae ne fai atu tena matua, “Ikai! A tena igoa ko Ioane.” 61Kae muna mai latou ki a ia, “E seai eiloa se tino o tou kaiga e tokotasi e igoa pena.” 62Ne fai ne latou ne fakailoga ki tena tamana, e fai atu ei ki a ia me ko oi a te igoa o te tamaliki e manako ei a ia. 63Ne fai atu Sakalia ki se ma tusitusi ke aumai, kae ne tusi ne ia penei, “A tena igoa ko Ioane.” Ne ofo ei latou. 64I te itula eiloa tena ne toe mafai ei ne Sakalia o faipati, kamata eiloa o 'viki ki te Atua. 65Ne ma'taku katoa ona tuakoi, ka ko te tala e uiga ki mea konei ne pa ki fa'kai katoa o Iutaia. 66A tino katoa kola ne 'logo i te tala tenei, ne mafaufau ki ei kae fai ake penei, “Kae ka pefea nei a uiga o te tamaliki tenei? Me ko iloa 'lei nei, ko nofo i a ia te mana o te Aliki.”
Ko te Valoaga a Sakalia
67Ne pukea tena tamana ko Sakalia ne te Agaga Tapu, kae ne 'valo penei:
68“Ke tavae ne tatou te Aliki te Atua o Isalaelu!
Me ne vau o fesoasoani kae fakasaoloto ona tino.
69Ne fakatu ake ne ia te Fakaola mō tatou,
Mai te kaiga o tena tavini ko Tavita.
70Tenei te mea tela ko leva ne 'valogina ne ana pelofeta 'malu:
71Ne tauto me ka fakaola ne ia tatou mai i o'tou fili,
Fakatasi mo latou kola e kaitaua mai ki a tatou.
72Ne fai mai ana muna me ka alofa a ia ki tamana o tatou,
Kae manatua faeloa ne ia tena feagaiga tapu.
73Ne fai tena feagaiga mautakitaki ki te tou tamana ko Apelaamo,
74Kae ne tauto me ka fakaola ne ia tatou mai i o'tou fili,
Kae fakasaoloto foki tatou ke tavini atu ki a ia mo te se ma'taku.
75Ke tapu kae ke amiotonu foki tatou i ona mata,
I aso katoa o te tou olaga.
76 #
Mala 3.1
Ka ko koe e taku tama, ka fakaigoa ki te pelofeta a te Atua Tafasili i te Maluga;
Ka mua koe i te Aliki o fakatoka te alatu mō ia.
77O folafola atu ki ona tino me ka fakaolagina latou,
I te fakamagaloga o agasala a latou.
78E alatu i te alofa 'nau o te tou Atua,
Kae ka fakatu ake ne ia se mainaga ke oko mai ki a tatou.
79 #
Isa 9.2
O fakamaina atu ei latou kola e 'nofo i te pouliga mo te ata o te mate,
Kae takitaki o'tou vae ki te auala o te filemu.”
80Ne tupu ake te tamaliki i te foitino malosi mo te agaga; ne nofo i te vao, ke oko eiloa ki te aso ko 'tau ei o fakaasi atu a ia ki tino Isalaelu.
Currently Selected:
LUKA 1: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
