IOANE 7

Ko Iesu mo Ona Taina

1I te palelega o mea konei, faimalaga sale ei a Iesu i Kalilaia, me ne seki manako a ia o faimalaga sale i Iutaia, i te mea i tagata Iutaia ne salasala ki a ia o tamate. 2#Levi 23.34; Teu 16.13I te taimi tenei, ko pili ki te 'Kaiga o Fale Tapuaki Ave Sale i Malaga. 3Tela, muna mai ei ona taina ki a ia, “Tuku te koga nei kae fano ki Iutaia, ko te mea ke lavea foki ne ou soko a galuega e fai ne koe. 4Me e seai se tino e fai funa sena mea, manafai e manako a ia ke iloa ne tino. Kafai e fai ne koe a mea konei, fakaasi atu foki koe ki te lalolagi.” 5Ke oko foki ki ona taina, e seai se tino e talitonu ki a ia. 6Tela, muna atu ei a Iesu ki a latou, “E seki oko mai nei toku taimi; ka ko koutou, e pau faeloa i a koutou so se taimi. 7E se mafai a tino o te lalolagi o takalia'lia ki a koutou; kae takalia'lia mai ki a au, i te mea e molimau au i te lalolagi me masei ana amio. 8Olo koutou ki te 'kaiga. I a au se fanatu #7.8: Au se fanatu; i nisi lomiga e isi kae fai penei A au koi tuai o fanatu. me seki oko ki toku taimi tonu.” 9Ne fai atu ne ia muna konei ki a latou, nofo ei a ia i Kalilaia.

Ko Iesu i te 'Kaiga o Fale Tapuaki Ave Sale i Malaga

10I te ologa o taina o Iesu ki te 'kaiga, ne fano foki a ia; kae ne seki fano fakaasiasi, kae ne fano 'muni. 11I te taimi tena, a tino Iutaia ne salasala ki a ia i te 'kaiga, kae faipati penei, “A Iesu nei tefea?” 12Ko oko eiloa i te musu'musu o tino e tokouke e uiga ki a ia. Muna a isi tino, “A ia se tagata 'lei,” kae muna mai isi tino, “Ikai, e fakavalea ne ia a tino.” 13Kae seai eiloa se tino ne faipati fakaasiasi e uiga ki a ia, me mataku i tino Iutaia.

14I te piliga ki aso fakapalele o te 'Kaiga o Fale Tapuaki Ave Sale i Malaga, ne fano a Iesu ki te Fale Tapu kae ne fai tena akoakoga i ei. 15Kae ne ofo a tino Iutaia, olotou muna, “Ne poto pefea a ia nei, me seki fano eiloa ki se akoga?” 16Ne tali atu a Iesu ki a latou, “A akoakoga e fai atu ne au e se e a aku, kae e a ia tela ne uga mai ne ia au. 17Ko te tino tela e fiafia o fai te loto o te Atua, ka iloa 'lei ne ia me ne aumai aku akoakoga mai te Atua io me mai i a au. 18A te tino tela e faipati mō ia ake eiloa, e 'sala eiloa ki tona vikiga; ka ko te tino tela e 'sala ki te vikiga o te tino ne uga mai ne ia a ia, e fai mea tonu, kae seai foki se 'se i a ia. 19Ne seki tuku atu ne Mose a te Tulafono ki a koutou? Kae seai se tino o koutou e tausi te Tulafono. Ai a e salasala ei koutou ki a au o tamate?” 20Ne tali mai a tino, “E isi se temoni i loto i a koe! Ko oi te tino e fia tamate ki a koe?” 21Ne tali atu a Iesu ki a latou, “Ko oti ne fai ne au a te galuega e tasi, kae ne ofo katoa koutou i ei. 22#Levi 12.3; Kene 17.10Tena te pogai ne tuku atu ei ne Mose ki a koutou te pilitome; e se fai pela me ne mafua mai i a Mose, kae mai tupuga o koutou, kae ne pilitome ne koutou a tino i te Sapati. 23#Ioa 5.9Kafai e pilitome se tagata i te Sapati, ko te mea ke se ofa te Tulafono a Mose, kae ai a la e kaitaua mai ei koutou ki a au, i taku faiga ke malosi a te tagata i te Sapati? 24Sa fakamasino ki mea matea, kae fakamasino ki te fakamasinoga tonu.”

E se ko Ia te Keliso?

25Muna a nisi tino Ielusalema, “E se ko ia tenei e fia tamate ne latou? 26Kae kiloke, ko faipati tonu eiloa a ia, kae seai eiloa se tino o latou ne fai sena pati ki a ia. Ko iloa 'lei nei ne tino pule me ko te Keliso tonu eiloa tena? 27E iloa ne tatou a te koga ne vau i ei te tagata tenei, ka ko te Keliso manafai ko vau a ia, e seai se tino e iloa ne ia me vau mai fea.”

28Ne faipati ki luga a Iesu i te Fale Tapu i te taimi ne akoako atu ei a ia, ana muna, “Ko iloa katoa ne koutou au? Ko iloa foki ne koutou te koga ne vau au i ei? Ne seki vau au i a au eiloa, ka ko ia tela ne uga mai ne ia au, e tonu eiloa, kae se iloa ne koutou a ia. 29Kae e iloa ne au a ia, i a au ne vau mai i a ia, ne uga mai foki ne ia au.” 30Tela la, ko fia puke latou ki a ia; kae ne seki iai eiloa se lima o se tino ne oko ki a ia, i te mea ka seki oko ki tona taimi. 31Kae e tokouke ko talitonu ki a ia mai te vaitino konei, olotou muna, “Kafai ko vau te Keliso, e a, e uke atu fakailoga ka fai ne ia i fakailoga ko oti ne fai ne te tagata tenei?”

Ko Uga atu Sotia o Puke Iesu

32Ko 'logo Falesaio i tino ko musu'musu e uiga ki a Iesu; uga ei ne latou mo faitaulaga sili a ofisa o puke mai a ia. 33Muna atu ei a Iesu ki a latou, “Ne mo aso fua koi 'toe e 'nofo ei tatou, ko fano ei au ki a ia tela ne uga mai ne ia au. 34Ka salasala koutou ki a au, kae ka se maua au ne koutou. Ko te koga foki e nofo au i ei, e se mafai ne koutou o oko ki ei.” 35Ko faipati tino Iutaia i a latou eiloa penei, “Tefea te koga ka fano a ia ki ei, tela ka se mafai o iloa ne tatou a ia? Ka fano a ia ki tino Iutaia kola e salalau valevale i Eleni, o fakaakoako atu tino Eleni? 36Se a te uiga o tena pati tela ne fai mai, e salasala koutou ki a au, kae ka se maua au ne koutou; ko te koga foki e nofo au i ei, e se mafai ne koutou o oko ki ei?”

Ko te Punavai o te Ola

37 # Levi 23.36 I te toe aso lasi o te 'kaiga, ne tu ki luga a Iesu kae faipati atu mo te leo maluga, ana muna, “Kafai se tino e fia inu, ke vau ki a au o inu. 38#Saka 14.8E pela mo muna a te Tusi, ‘Ko te tino e talitonu ki a au, ka tafe mai i tona loto a te vai o te ola.”’#7.38: A muna a Iesu i te foaitau e 37-38 e mafai o fuli ke penei: “Ko sose tino tela e fia inu e tau o vau ki a au o inu. 38 E pela mo muna a te Tusi, “Ko te tino e talitonu ki a au, ka tafe mai i tona loto a te vai o te ola. ’ ” 39A te pati tena ne fai atu ne ia, e fakasino ki te Agaga tela ka maua ne tino e talitonu ki a ia; i te mea i aso kona ka seki tuku mai te Agaga Tapu, me ka seki oko Iesu ki tona 'malu.

Ko Manatu Kesekese a Tino

40E tokouke a tino ne lagona ne latou te muna tenei, kae ne fai'pati penei: “E tonu eiloa, tenei te Pelofeta.” 41Muna a isi tino, “Tenei te Keliso.” Ka ko isi tino ne muna ake penei: “E se tupu mai Kalilaia te Keliso! 42#2Samu 7.12; Mika 5.2E a, ne seki fai mai te Tusi i te Keliso e tupu mai i te gafa o Tavita, kae fanau mai foki i Petelema, i te fa'kai ne nofo i ei Tavita?” 43Tela, kesekese ei manatu o tino e uiga ki a ia. 44Nisi tino o latou ne fia puke ki a ia, kae ne seki patele atu eiloa se lima o se tino ki a ia.

Ko te se Talitonu o Takitaki Iutaia

45Ko foki mai sotia ki faitaulaga sili mo Falesaio, kae fesili atu latou penei ki sotia, “Ai a ne seki aumai ei ne koutou a Iesu?” 46Ne tali mai sotia, “E seki iai eiloa se tagata ne faipati pela mo te tagata tenei!” 47Ne tali atu a Falesaio ki a latou, “E a, a koutou foki ko fakasegina? 48Kai iloa eiloa ne koutou se tino pule tokotasi o tatou, io me se Falesaio ko talitonu ki a ia? 49A tino konei, e se iloa ne latou te Tulafono a Mose; tela la, ka malaia latou.” 50#Ioa 3.1,2Muna a Nikotemo ki a latou, ko ia tela ne fano ki a Iesu i te po, kae se tokotasi o latou, 51“E mafai o fakasala se tino i te tou Tulafono, kae seki fakamasino muamua a ia, ke iloa ei ana mea ne fai?” 52Ne tali mai latou ki a ia, “A koe foki se Kalilaia? Sukesuke ki Tusi, ka iloa ei ne koe, me e seai eiloa se pelofeta e tupu mai#7.52: e seai eiloa se pelofeta ko oti ne vau; tasi o lomiga e isi ei se fakamunaga tenei e seai eiloa se Pelofeta ko oti ne vau. i Kalilaia.”

Currently Selected:

IOANE 7: Tusi Tapu

Highlight

Copy