Maɛ 5

Jusu sà jɔ̍gbau due jeědih de̍e̍

(Matio 8.28-34; Luu 8.26-39)

1Wɛ̀ Jusu ke ɔ̍ kòà tàn pɛ̍nu̍ klaa laa̍ u̍h nyni̍ dě ɛ̍ fɔ̌ dɛɛ we̍, dě Kɛwlasa fɔɔ. 2Jusu naɛ àn sɔ dě blǎgbè di̍i̍ ka-ɛ, nɛ̀ jɔ̍gbau ɔ̀ blě-a jeědih dǒ ɔ̍ de̍e̍-ɛ, ɔ̍ sɔ dě nyɔ̍ i̍ tè wɔ̍ᵻ di̍i̍ wɛ̀ ɔ̍ ji̍ dǒ Jusu we̍. 3Dě wɔ̍ᵻ laa̍ di̍i̍ bo jɔ̍gbau la ɔ̍ tǐn. Nyɔ̍ se̍ ɔ̍ sa̍n-a bɛ̌ɛ, jɔɔdbǔ-a chɛ̀ bo nyɔ̍ se̍ ɔ̍ sa̍n-ɛ bɛ̌ɛ. 4U̍h-a sa̍n ɔ̍ bu̍hᵻ ke ɔ̍ sɔ̍nᵻ chɛ̍chɛ̍, jɛ nɛ̀ ɔ̍ chɛ̍n jɔɔdbǔᵻá chɛ̀ nɛ-a ɔ̍ sɔ̍nᵻ i̍-ɛ, iě ɔ̍ chlà-ɛ nɛ̍ne̍ɛ̍ nɛ-a dě ɔ̍ bu̍hᵻ i̍-ɛ. Sɔ ɔ̍ kmu-u tìh nyɔ̍ se̍ ɔ̍ gbè we̍ gbɛ̍n-ɛ bɛ̌ɛ. 5Wlù ke sɔ̀n-ɛ, ɔ̍ nɛ dě wɔ̍ᵻ laa̍ nynɛ̌ ke dě tlu̍hᵻ di̍i̍, wɛ̀ ɔ̍ wǐi i̍ iě ɔ̍ tbaɛ ɔ̍ chɛ̀ sɔɔ̌ᵻ i̍.

6Ɔ̍ nɛ dě nya̍ wɛ̀ ɔ̍ po̍ Jusu jlǐhɛ̍-ɛ, wɛ̀ ɔ̍ gba̍ ple̍-ɛ dě ɔ̍ we̍. Iě ɔ̍ po̍ kɔlu̍ᵻ wlù dǒ ɔ̍ jǔ. 7Wɛ̀ ɔ̍ plǎn, ɔ̍ la̍a̍, “Jusu, Nyɔ̍ Wɔ̍n Sìì Nyɔsoa-a Jǔ, ka àn pɔ̀n ìè ǎn tìh nu̍ ɛ? Ǎn ba̍le m̀, po̍-e Nyɔsoa we̍ wlùh, bɔ̌ ǐn kàn gbɛ̍n-ɛ.” 8Dɛ̍nu̍ɛ, Jusu sèàɛ̍ jeědih la wlùh ɛ̍ iě dǒ jɔ̍gbau la de̍e̍ sɔ, ɛ̍ kɔn ɛ̍ bla̍ dɛ̍ la.

9Wɛ̀ Jusu tèle ɔ̍ i̍, ɔ̍ la̍a̍, “Àn nynɛ̌ ɛ?”

Wɛ̀ jɔ̍gbau la̍a̍, “Ǎn nynɛ̌ bo Sùɛ̀, dɛ̍nu̍ɛ, à tìè i̍.” 10Wɛ̀ ɔ̍ ba̍le Jusu dɛ̍blɔ ɔ̍-ɔ je̍e jeědih dě fɔ̌ laa̍ we̍ sà.

11Ɛ̍ ti̍ laa̍ nɛ̀ fùùh be̍e̍ᵻ kɔǎn-ɛ dǒ tà-a chɛ̀ i̍, i̍h-a di̍ dɛ̍ dě tlu̍h gbèɛ̀n i̍. 12Wɛ̀ jeědih ba̍le Jusu ɔ̍ iě i̍h dě be̍e̍ᵻ ku̍u̍ dbo̍, wɛ̀ i̍h iě-e gbǎ. 13Wɛ̀ ɔ̍ sà jeědih laa̍ wlu̍ kɛ̍n. Iě i̍h sɔ dǒ jɔ̍gbau laa̍ de̍e̍ wɛ̀ i̍h gbǎ dě be̍e̍ᵻ ku̍u̍. Be̍e̍ᵻá chɛ̀ bɛ̌ɛ wlǔ sɔɔ̌n (2,000) nu̍-ɛ. Wɛ̀ i̍h wa̍n dě gbuǔh tɔ̀ɔ̀n kɛ̍n i̍ iě i̍h gbǎ pɛ̍nu̍ klaa kɛ̍n, wɛ̀ i̍h sie niɔ̍ kli̍hgbɛ̍.

14Wɛ̀ ùh-a gbɛ̀n-a dǒ be̍e̍ᵻá chɛ̀ we̍ i̍-ɛ ple̍, u̍h gba̍ kunǎ dě wlɔ̀ ke klèᵻ we̍ i̍ kli̍hgbɛ̍. Wɛ̀ nyɔ̍gbei wɛ̀-e i̍ u̍h mu̍, u̍h iě dɛ̍ ɛ̀ gbǎ-a jě. 15Ti̍ u̍h nyni̍-a dǒ Jusu we̍-ɛ, wɛ̀ u̍h jě jɔ̍gbau ɔ̀ jeědih dɔu nɛ-a dǒ de̍e̍ de-ɛ, nɛ̀ ɔ̍ ji̍ ɔ̍ chɛ̀ we̍, iě ɔ̍ pa̍ dɛ̍ɛ̍ nmɔ jii̍ ɔ̍ tè i̍. Sɔ ɛ̍ po̍ u̍h faɔn. 16Dɛ̍ la ɛ̀ gbǎ-aɛ, nyɔ̍ ùh jě-a ɛ̍-ɛ, u̍h bo ùh sèàɛ̍ nyɔ̍gbei wlùh, ɛ̍ ke ka be̍e̍ᵻ nu̍-a niɔ̍ sie-ɛ ke.

17Wɛ̀ u̍h-a ba̍le Jusu ɔ̍ iě dě u̍h we̍ fɔɔ sɔ.

18Ti̍ Jusu-a gbǎ-a la̍ dě de̍ blǎgbè di̍i̍-ɛ, wɛ̀ jɔ̍gbau ɔ̀ jeědih nɛ-a dǒ de̍e̍ de-ɛ, ɔ̍ ba̍le Jusu ɔ̍ ke ɔ̍ iě mu̍.

19Jusu la̍a̍, “Iěe, bɔ̌ mu̍-ɛ, jɛ mu̍ wlɔ̀ wɛ̀ ka Joi nu̍-a ìn wɔɛ jě-ɛ, iě ɔ̍ nu̍-a ìn dɛ̍ we̍-ɛ, ìè àn chɛ̌ wlùh sèàɛ̍.”

20Iě jɔ̍gbau laa̍ ɔ̍ mu̍. Wɛ̀ fɔ̌ u̍h-a dǎɛ-a Wlɔ̀ᵻ Pùè-ɛ, ɔ̍ na ɛ̍ we̍ kli̍hgbɛ̍. Iě ɔ̍ bla̍ dɛ̍ᵻ kli̍hgbɛ̍ ìh Jusu nu̍-a ɔ̍ pùn-ɛ. Sɔ ɛ̍ wlǔh i̍ nyɔ̍ kli̍hgbɛ̍ ùh wɔ̌n-a i̍h-ɛ de̍e̍.

Jusu sà-e nynɔ̌gbaɔ jǔ iě ɔ̍ pǔh-i nynɔ̌ due

(Matio 9.18-26; Luu 8.40-56)

21Ti̍ Jusu tàn-a ɔ̍ mu̍-a dě de̍ pɛ̍nu̍ klaa de̍e̍-ɛ, wɛ̀ nyɔ̍ dɔu gbǎ tàdùè dǒ ɔ̍ we̍ pɛ̍nu̍ wɔ̍i̍n. 22Iě jɔ̍gbau due ji̍, ɔ̍ nynɛ̌ bo Jaleɔ. Ɔ̍ nu̍ wɛɛ sà gbò wlu̍ i̍ kɔn nyɔ̍-a due. Ɔ̍ jě-a Jusu-ɛ, wɛ̀ ɔ̍ chlìi i̍ dǒ ɔ̍ jǔ. 23Iě ɔ̍ gbɛ̍n Jusu-a bu̍h i̍, ɔ̍ ba̍le ɔ̍. Ɔ̍ la̍a̍, “Ǎn jǔ nynɔ̌gbaɔ-a ji̍ mɛ̌ la̍, dbǎkà, ji̍ ìè ɔ̍ sɔ̍n dlǔ tè ɔ̍ iě pǔh, wɛ̀ ɔ̍ iě kmɔ̌ nɛ.”

24Wɛ̀ Jusu gbǎ dǒ Jaleɔ de̍e̍ u̍h-a mu̍. Nɛ̀ nyɔ̍ tlùgbei̍ po̍ ɔ̍ dě pìe̍e̍ u̍h-a mu̍ dě Jaleɔ blǐ gbò.

25Nɛ̀ nynɔ̌ due nɛ dǒ gbɔ̍ɔ̍ laa̍ nmi̍i̍wlì wɛ̌-a nu̍ ɔ̍. Ɛ̍ nu̍ ɔ̍ wɛ̀ dǒ sɔ̀nᵻá pùè jɔ̌ sɔɔ̌n di̍i̍. 26Nɛ̀ kǎ ɔ̍ sàɛ̀ jua̍i̍ ɔ̍ mu̍ kwɛ̍i̍n nyɔ̍ we̍i̍ ke sǔh. Ɔ̍ tu̍ ɛ̍ tìh ɔ̍ ple̍ ɔ̍ wlǐ kli̍hgbɛ̍ wɛ̀, jɛ ɛ̍-ɛ chɛ̍n-o dɛ̍, ɛ̍ gbǎ dě de̍i̍ sǔh. 27Nynɔ̌ laa̍ sɔ ɔ̍ wɔ̌n Jusu-a pɔ̀n, wɛ̀ ɔ̍ pa̍ dě nyɔ̍ tlùgbei̍ laa̍ nynɛ̌ dǒ ɔ̍ de̍e̍. 28Iě ɔ̍ la̍a̍ dě ɔ̍ chɛ̀ we̍, “Pò ɛ̍ tù ɔ̍ plɛ̀i̍-a mlǎ-a chɛ̀ iě i̍ tǔh-ɛ, nɛ̀ ǎn mu̍ pǔh.”

29Wɛ̀ ɔ̍ tǔh Jusu-a plɛ̀i̍ i̍, sɔ ɔ̍ nmi̍i̍wlì kǎ-ɛ sǔh. Iě ɔ̍ juo-o dɛ̍ i̍ dě ɔ̍ ku̍sɔ̀n ka ɔ̍ wɛ̌ bɔ̌-a wɛ̀-ɛ. 30Dǒ tàdùè laa̍ Jusu juo-o dɛ̍ i̍ ka gbǐh sɔ-a dě ɔ̍ ku̍sɔ̀n-ɛ. Wɛ̀ ɔ̍ fèàɛ̀ dě nyɔ̍ tlùgbei̍ laa̍ nynɛ̌, iě ɔ̍ la̍a̍, “Nyɔ̍ bo ɔ̀ tǔh ǎn jliɛ̍ i̍ ɛ?”

31Ɔ̍ kòà la̍a̍, “Nɛ̀ jě nyɔ̍ dɔu la ùh po̍-a ìn dě pìe̍e̍-ɛ, wɛ̀ nàà nɛ̀ nyɔ̍ bo ɔ̀ tǔh ìn i̍ ɛ?”

32Jɛ nɛ̀ kǎ Jusu-a gbèɛ̀ɛ̍n i̍ sǔh, ɔ̍ iě nyɔ̍ nu̍-a dɛ̍ laa̍ jě. 33Sɔ nynɔ̌ juo dɛ̍ ɛ̀ nɛ-a ɔ̍ pùn-ɛ, wɛ̀ ɔ̍ ku̍ blě tlɛ̍-ɛ dǒ faɔn we̍, iě ɔ̍ chlìi i̍ dǒ Jusu jǔ. Wɛ̀ ka ɛ̍ nu̍-a nɛ-ɛɛ, iě ɔ̍ sèàɛ̍ ɛ̍ we̍ i̍ kli̍hgbɛ̍ dě Jusu we̍. 34Wɛ̀ Jusu la̍a̍, “Nynɔ̌ chɛ̀, àn wlùh gbaɛ bo ɛ̀ nu̍ ɛ̍ wɛ̀ ìn pǔh. Mu̍ pɛlɛpɛ, ìn pǔh wɛ̀ kleǐnklein.”

35Jusu-a bla̍-a ɛ̀ la-ɛ, nɛ̀ nyɔ̍-a sɔ dě Jaleɔ blǐ gbò, u̍h la̍a̍, “Àn nynɔ̌gbaɔ jǔ mɛ̌ wɛ̀. Dɛ̍nu̍ àn bɛ̌ɛ Dlǔtu wɔ̍ɔ̍n i̍ ke̍ sǔh ɛ?”

36Jɛ nɛ̀ Jusu-a sà u̍h-a wlu̍ dounᵻ i̍. Wɛ̀ ɔ̍ la̍a̍ dě Jaleɔ we̍, “Bɔ̌ faɔn ple̍-ɛ, wlùh gbaɛ nɛ due bo ìè blě.” 37Wɛ̀ Jusu sà nyɔ̍ duuh wìè-i. Ɔ̍ gba̍ Pitɛ ke, Chɔɔn ke ɔ̍ de̍di̍i̍ Chiin. Kǎ u̍h tìè kleǐn u̍h mu̍. 38Wɛ̀ u̍h nyni̍ dě Jaleɔ blǐ gbò. Nɛ̀ nyɔ̍gbei-a fìn-i u̍h-a we̍le, wɛ̀ ɔ̍ jɛɛ u̍h kɛ̍n. 39Iě ɔ̍ pa̍ gbò, wɛ̀ ɔ̍ la̍a̍ dě u̍h we̍, “Dɛ̍ bo ɛ̀ po̍ mɔ̀-a wlùh dě de̍i̍ wɛ̀ mɔ̀-a fìn ɛ? Nynɔ̌gbaɔ jǔ la ɔ̍ se̍ mɛ̌, jɛ ɔ̍ mɔ̌-ɛ.”

40Sɔ u̍h-a kǐhlɛ ɔ̍ la̍-ɛ sǔh. Iě ɔ̍ po̍ u̍h kli̍hgbɛ̍ sɔ̀n i̍. Wɛ̀ ɔ̍ dǔ jǔ de̍ ke ɔ̍ baa, ɛ̍ ke ɔ̍ kòà nɛ-a ta̍a̍n-a ke. Iě u̍h pa̍ dě gbòju kɔn di̍i̍ nynɔ̌gbaɔ jǔ pɛ̌n-a i̍-ɛ. 41Wɛ̀ ɔ̍ gbɛ̍n nynɔ̌gbaɔ jǔ-a sɔ̍n i̍, wɛ̀ ɔ̍ la̍a̍, “Talita kum,” ɛ̍ gbɔ̀ nu̍, “Nynɔ̌gbaɔ jǔ, ǎn sèàɛ̍ ìn wlùh ìè bloɔ̍ sɔ.”

42Sɔ nynɔ̌gbaɔ jǔ wa̍n bloɔ̍ sǔh, iě ɔ̍ na. Nynɔ̌gbaɔ jǔ-a chɛ̀ ɔ̍ sɔ̀nᵻ nu̍ pùè jɔ̌ sɔɔ̌n. Sɔ ɛ̍ wlǔh i̍ u̍h de̍e̍ kaa̍. 43Wɛ̀ Jusu gbɛ̍n-ɛ u̍h wɔ̍i̍n u̍h-u je̍e nyɔ̍-o-nyɔ̍ wlùh sèàɛ̍. Iě ɔ̍ la̍a̍, “Mɔ̀ nyǐ ɔ̍ dɛ̍ ɔ̍ iě di̍.”

Currently Selected:

Maɛ 5: KDNT

Highlight

Copy