Maɛ 2

Jusu pǔh-i klɔ-nyɔ̍

(Matio 9.1-8; Luu 5.17-26)

1Wǐh gbɔ̍ sì-aɛ, wɛ̀ Jusu ji̍ dǒ de̍ Kepanium. Iě ɔ̍ pɔ̀n sɛ̍ i̍ ka ɔ̍ nɛ-a dǒ wlɔ̀-ɛ. 2Wɛ̀ nyɔ̍ dɔu wɛ̀ de̍, sɔ dě gbò jǐ-i, iě flɔn la̍ se̍ dǒ gbò wɔ̍i̍n-a chɛ̀ nɛ. Wɛ̀ ɔ̍ bla̍ Nyɔsoa-a tìh dě u̍h we̍. 3Wɛ̀ jɔ̍gbauᵻ nyìɛ̍ ja klɔ-nyɔ̍ dǒ ɔ̍ we̍. 4Jɛ nɛ̀ u̍h se̍ dě Jusu we̍ nyni̍-ɛ bɛ̌ɛ, dɛ̍nu̍ɛ, nyɔ̍ tlùgbei̍ nɛ dǒ gbò wɔ̍i̍n. Ɛ̍ kɔn u̍h sà biě dě gbò tɔ̀u̍n we̍ tà ɔ̍ bla̍ɛ-a i̍-ɛ. U̍h wɔ̀-a ɛ̍ sà-ɛ, iě klɔ-nyɔ̍ sǐi dě sabli̍ di̍i̍ wɛ̀ u̍h ja ɔ̍ wlù dǒ Jusu we̍. 5Dɛ̍ nyɔ̍ laa̍ u̍h nu̍-a wlùh gbaɛ blě-ɛ, ɛ̍ bo Jusu jě. Iě ɔ̍ la̍a̍ dě klɔ-nyɔ̍ we̍, “Ǎn jǔ, àn gblɛ̍n sɔ̀ɛ̀n-a tìh tǎli-ɛ i̍ wɛ̀.”

6Nɛ̀ telě nǎ poe nyɔ̍ duuh tè-o i̍. Wɛ̀ u̍h-a pu̍e̍e ɛ̍ wlùh i̍, 7u̍h la̍a̍, “Jɔ̍gbau la dɛ̍nu̍ ɔ̍ nu̍ la̍a̍n wlu-ɛ ɛ? Ɔ̍ blaɛ Nyɔsoa wɔ̍n. Nyɔ̍ dɔɔ se̍a gblɛ̍n sɔ̀ɛ̀n-a tìh i̍ tǎli, Nyɔsoa due gbài̍ bo ɔ̀ nu̍ ɛ̍.”

8Sɔ dɛ̍ u̍h-a naɛ-a wlùh i̍-ɛ, ɛ̍ sùù sǐ Jusu-u dǒ tàdùè laa̍. Wɛ̀ ɔ̍ la̍a̍ dě u̍h we̍, “Dɛ̍nu̍ mɔ̀-a naɛ dɛ̍ kaɛn la wlùh i̍ ɛ? 9Jɔ̍gbau la ɔ̍ gblɛ̍n sɔ̀ɛ̀n-a tìh i̍ tǎli-ɛ jɛ ǎn sà-a ka dǒ wɔ̍i̍n-ɛ ke, jɛ ǎn mu̍-a ka sɔ bloɔ̍ ìè na nu̍-ɛ, jɛwe̍ bo ɛ̍ pe̍ɛ i̍ ɛ? 10Jɛ ǎn pɔ̀n mɔ̀ iě ɛ̍ i̍ juo ka Nyi̍ɔ̍-a Jǔ blě-a tùn nɔ̌ bloɔ̍ ɔ̍ iě-a gblɛ̍n sɔ̀ɛ̀n-a tìh i̍ tǎli-ɛ.” Iě ɔ̍ la̍a̍ dě klɔ-nyɔ̍ we̍, 11“Ǎn sèàɛ̍ ìn wlùh, sɔ bloɔ̍, dǔ àn sabli̍-i ìè gbò we̍ mu̍.”

12Wɛ̀ ɔ̍ sɔ bloɔ̍, iě ɔ̍ dǔ ɔ̍ sabli̍-i dǒ nyɔ̍ kli̍hgbɛ̍ jlǐhwai, wɛ̀ ɔ̍ mu̍. Sɔ ɛ̍ wlǔh i̍ nyɔ̍ kli̍hgbɛ̍ de̍e̍, iě u̍h-a po̍ Nyɔsoa tìhwe̍. Wɛ̀ u̍h la̍a̍, “À-a se̍a dɛ̍ nɛka la jě sàì.”

Jusu dǎ Liifaɛ

(Matio 9.9-13; Luu 5.27-32)

13Wɛ̀ Jusu mu̍ dě de̍ pɛ̍nu̍ klaa nɛ-a dě Kaladii fɔɔ-ɛ wɔ̍i̍n dɛ. Wɛ̀ nyɔ̍ tlùgbei̍ mu̍ dě ɔ̍ we̍, iě ɔ̍ po̍ u̍h nǎ dě Nyɔsoa dɛ di̍i̍. 14Ti̍ ɔ̍ sì-aɛ, dǒ ɔ̍ jě-e Afia-a jǔ Liifaɛ. Nɛ̀ ɔ̍ tè i̍ dǒ ɔ̍ taa̍sìh sà gbò juwɛ sɔ̀n. Wɛ̀ Jusu la̍a̍ dě ɔ̍ we̍, “Gbǎ dǒ ǐn de̍e̍.” Liifaɛ sɔ bloɔ̍, iě ɔ̍ gbǎ dǒ ɔ̍ de̍e̍.

15Ti̍ Jusu-a di̍-a dɛ̍ dě Liifaɛ blǐ gbò-ɛ, wɛ̀ taa̍sìh sà nyɔ̍ dɔu ke gblɛ̍n sɔ̀ɛ̀n nyɔ̍ gbǎ ɔ̍ ke ɔ̍ kòà nynɛ̌ u̍h-a di̍ dɛ̍. Dɛ̍nu̍ɛ, nyɔ̍ dɔu-a na ɔ̍ we̍. 16Fɛlesii nyɔ̍ duuh ùh-a po̍-a nyɔ̍ nǎ dǒ telě we̍-ɛ, wɛ̀ u̍h jě u̍h ke Jusu-a dɛ̍ tàdùè di̍-i la̍. Iě u̍h tèle ɔ̍ kòà i̍, u̍h la̍a̍, “Dɛ̍nu̍ ɔ̍ ke taa̍sìh sà nyɔ̍ ke gblɛ̍n sɔ̀ɛ̀n nyɔ̍-a di̍-i dɛ̍ tàdùè ɛ?”

17Jusu wɔ̌n-a u̍h-a wlu̍-ɛ, iě ɔ̍ la̍a̍ dě u̍h we̍, “Nyɔ̍ ùh nɛ-a blee-ɛ, u̍h se̍ kwɛ̍i̍n nyɔ̍ i̍ pɔ̀n. Jɛ poa-nyɔ̍ nɔ̀ɔ̍, u̍h-a pɔ̀n ɔ̍ i̍. Ǐn se̍ i̍ slɛ̌-nyɔ̍ i̍ pɔ̀n la̍-a ji̍, jɛ gblɛ̍n sɔ̀ɛ̀n nyɔ̍ bo ǐn ji̍ i̍ pɔ̀n la̍-a.”

Dɛ̍nu̍ Jusu-a kòà se̍ jlǔh po̍ ɛ?

(Matio 9.14-17; Luu 5.33-39)

18Ɛ̍ nu̍ ti̍ due nɛ̀ Chɔɔn-a kòà ke Fɛlesii nyɔ̍-a po̍ jlǔh dě Nyɔsoa dɛ di̍i̍. Wɛ̀ nyɔ̍gbei mu̍ dě Jusu we̍, u̍h la̍a̍, “Dɛ̍nu̍ Chɔɔn-a kòà ke Fɛlesii nyɔ̍-a kòà-a po̍ jlǔh wɛ̀ nàɛ̀ nɔ̀ɔ̍, u̍h-u po̍ jlǔh ɛ?”

19Iě Jusu la̍a̍ dě u̍h we̍, “Pò nynɔ̌ delee-a kɔan nɛ dǒ nynɔ̌ jla̍ ja peě kɛ̍n-ɛ, nɛ̀ dihwi̍hᵻ se̍ jlǔh po̍ mu̍. 20Jɛ ɛ̍ mu̍ ti̍ kɔn wɛ̀ nynɔ̌ delee-a kɔan iě dě u̍h nynɛ̌ we̍ sà-ɛ, wɛ̀ u̍h iě jlǔh po̍.

21“Nyɔ̍ se̍ kɔn ɔ̍ iě jliɛ̍ delee-a fɔ̌ plɛ̀i̍ soa pǎ-ɛ. Pò nyɔ̍ nu̍ ɛ̍ wɛ̀ jliɛ̍ delee iě-e jeǎ-ɛɛ, nɛ̀ ɛ̍ mu̍ plɛ̀i̍ soa-a fǎle-ɛ dě de̍i̍ po̍. 22Nɛ̀ nyɔ̍ se̍ kɔn ɔ̍ iě nmɔ̍ delee dě dɛ̍ku sòlɛ̀ soa di̍i̍ po̍ ke. Pò nyɔ̍ nu̍ ɛ̍-ɛ, nɛ̀ ɛ̍ mu̍ sòlɛ̀ laa̍ wa̍, nɛ̀ nmɔ̍-a chɛ̀ ke sòlɛ̀-a mu̍-u gbɔ̀lɔ. Ɛ̍ tìh-ɛ, dě dɛ̍ku sòlɛ̀ delee di̍i̍ bo nmɔ̍ delee iě gbǎ.”

Jusu bla̍ wlè-weɛ̍-a tìh we̍i̍

(Matio 12.1-8; Luu 6.1-5)

23Dǒ ti̍ due di̍i̍ nɛ̀ ɛ̍ nu̍ Juu-a wlè-weɛ̍, wɛ̀ Jusu ke ɔ̍ kòà-a jii dě kwǐ kɛnɛ̌-a klè di̍i̍. U̍h-a sì-aɛ, wɛ̀ ɔ̍ kòà chɛ̍n i̍h dlǔ i̍. 24Wɛ̀ Fɛlesii nyɔ̍ la̍a̍ dě ɔ̍ we̍, “Gbɛ̀n-e, àn kòà-a wa̍-a à wlè-weɛ̍-a telě-ɛ, nɛ̀ jě u̍h ae?”

25Wɛ̀ ɔ̍ la̍a̍ dě u̍h we̍, “Ti̍ mɔ̌-a nu̍-a Depe ke ɔ̍ na-nyɔ̍ u̍h-a pɔ̀n-a di̍-dɛ̍ i̍-ɛ, dɛ̍ ɔ̍ nu̍-a mɔ̀-ɔ se̍a ɛ̍ slè dě Nyɔsoa-a wlu̍ di̍i̍ ae? 26Dě à telě di̍i̍-ɛ, blèe̍ jɛ u̍h sà-ɛa Nyɔsoa kwlǎ-a, nɛ̀ nyɔ̍ dɔɔ-ɔ di̍ ɛ̍ dɛ. Nɛ̀ slaǎ sà nyɔ̍ nɛ due bo ɔ̀ di̍ ɛ̍. Jɛ ti̍ Abaeata nu̍-a slaǎ sà nyɔ̍ klaa-ɛ, Depe pa̍-a dě Nyɔsoa-a gbò sɔ̀n-ɛ, iě ɔ̍ ke ɔ̍ ba̍ᵻ di̍ blèe̍ laa̍.”

27Jusu wɔ̌an chlà-a tìh-ɛ, ɔ̍ la̍a̍, “Nyɔsoa nu̍ wlè-weɛ̍ dǒ nyi̍ɔ̍ we̍, jɛ ɔ̍ se̍ nyi̍ɔ̍ nu̍ dǒ wlè-weɛ̍ we̍. 28Ɛ̍ tìh-ɛ, Nyi̍ɔ̍-a Jǔ bo ɔ̀ nu̍ Joi dǒ wlè-weɛ̍ we̍.”

Currently Selected:

Maɛ 2: KDNT

Highlight

Copy