Matio 8
8
Jusu pǔh-i jɔ̍gbau due
(Maɛ 1.40-45; Luu 5.12-16)
1Ti̍ Jusu-a sɔ-a la̍ dě tlu̍h kɛ̍n-ɛ, nɛ̀ nyɔ̍ tlùgbei̍ wɔ̀ dǒ ɔ̍ de̍e̍. 2Dǒ-o bo jɔ̍gbau due ji̍-i dǒ ɔ̍ we̍, nɛ̀ wìèìdih-a nu̍ ɔ̍-ɛ. Wɛ̀ ɔ̍ chlìi i̍ dǒ ɔ̍ jǔ, ɔ̍ la̍a̍, “Nyɔ̍ klaa, pò ìn wɔ̌ɛn ɛ̍-ɛ, nɛ̀ ìn bɛ̌ɛ ɛ̍ nu̍-ɛ iě fɛ̍nɛ wa.”
3Wɛ̀ Jusu slɛ̌ɛ sɔ̍n i̍ iě ɔ̍ tǔh ɔ̍ i̍. Ɔ̍ la̍a̍, “Ǐn wɔ̌ɛn ɛ̍-ɛ, fɛ̍nɛ dode̍.” Dǒ tàdùè laa̍ ɔ̍ wìèìdih bɔ̌-ɛ. 4Wɛ̀ Jusu la̍a̍ dě ɔ̍ we̍, “Bɔ̌ nyɔ̍-o-nyɔ̍ wlùh sèàɛ̍-ɛ, jɛ mu̍ ìè àn chɛ̀ Nyɔsoa-a slaǎ sà nyɔ̍ i̍ to. Nɛ̀ ìn sà slaǎ ɛ̀ Mose-a telě la̍ nyɔ̍ iě-a nu̍-ɛ, ɛ̍ iě ɛ̍ to dě nyɔ̍ kli̍hgbɛ̍ we̍ ka ìn fɛ̍nɛ-aɛ.”
Chape-a wlùh gbaɛ-ɛ po̍ Jusu gbǐh
(Luu 7.1-10)
5Ti̍ Jusu sǐ-a dǒ Kepanium wlɔ̀ i̍-ɛ, wɛ̀ Wloma-a fledlǔ-a chape ji̍ dǒ ɔ̍ we̍. Iě ɔ̍ ba̍le ɔ̍. 6Ɔ̍ la̍a̍, “Nyɔ̍ klaa, ǎn pòi̍ju-a poa-ɛ, ɔ̍ pɛ̌n i̍ dě gbò. Ɔ̍ se̍ bloɔ̍ sɔ-ɛ bɛ̌ɛ, sɔ ɛ̍ sàɛ̀ ɔ̍ jua̍i̍ kaa̍. Ɛ̍ kɔn ǐn ji̍ nɔ̌ ìn we̍.”
7Wɛ̀ Jusu la̍a̍, “Ǎn mu̍ dě ìn blǐ gbò mu̍ iě ɔ̍ pǔh-i.”
8Jɛ chape laa̍ ɔ̍ la̍a̍, “Joi, ǐn se̍ dɛ̍ i̍ blaɛ ìè dě ǐn we̍ gbò ji̍. Wlu̍ bo ìè ǐn nyǐ sǔh iě gba̍, nɛ̀ ǎn pòi̍ju-a mu̍ pǔh. 9Mɔ̍ la ǎn chɛ̀ nɛ dǒ nyɔ̍ sɔ̀n, iě fledlǔ nɛ dǒ ǐn sɔ̀n ke. Pò na̍a̍ dě jɔ we̍, ‘Mu̍-ɛ,’ nɛ̀ ɔ̍ mu̍ i̍. Pò na̍a̍ dě dɔɔ we̍, ‘Ji̍-ɛ,’ nɛ̀ ɔ̍ ji̍ i̍. Nɛ̀ pò na̍a̍ dě ǎn pòi̍ju we̍, ‘Nu̍ dɛ̍ la-ɛ,’ nɛ̀ ɔ̍ nu̍ ɛ̍-ɛ.”
10Jusu wɔ̌n-a ɔ̍ wlu̍ la-ɛ, sɔ ɛ̍ wlǔh i̍ ɔ̍ de̍e̍. Iě ɔ̍ la̍a̍ dě nyɔ̍ ùh wɔ̀-a dǒ ɔ̍ de̍e̍-ɛ we̍, “Ɛ̍ se̍ pàɔ̀n, ɛ̀ jɔ̍gbau la ɔ̍ nu̍-a wlùh gbaɛ blě-ɛ, nɛ̌ se̍a ɛ̍ we̍ nyɔ̍ jě sàǐtòò da̍a Eslɔɛ bloa̍ kɛ̍n. 11Jɛ bɔ̌ ǐn sèàɛ̍ mɔ̀ wlùh, nyɔ̍ dɔu-a mu̍ tà kli̍hgbɛ̍ sɔ. Wɛ̀ u̍h ke Eblaɛɛn ke, Ase ke, Jekɔ iě dǒ teble̍ gbɔ̀ plɛɛn dǒ Nyɔsoa-a kmɔ̌ wlu̍ i̍ kɔn la. 12Sɔ nɛ̀ nyɔ̍ ùh kɔn ùh iě-a dě Nyɔsoa-a kmɔ̌ wlu̍ i̍ kɔn-ɛ di̍i̍ nɛ de-ɛ, u̍h-a mu̍ sɔ̀n poe-ɛ dě kwile-e. Dě u̍h-a mu̍ nɛ u̍h iě fìn, u̍h iě nynɛ̌ di̍ kìàǎnkìàǎn.” 13Wɛ̀ Jusu la̍a̍ dě chape laa̍ we̍, “Mu̍ gbò we̍. Ka ìn nu̍-a ɛ̍ wlùh gbaɛ-ɛ, kǎ ɛ̍ mu̍ nɛ dǒ ìn we̍.”
Dǒ ɔ̍ pòi̍ju nyna ɔ̍ pǔh.
Jusu pǔh-i nyɔ̍ dɔu
(Maɛ 1.29-34; Luu 4.38-41)
14Ti̍ Jusu pa̍-a dě Pitɛ blǐ gbò-ɛ, nɛ̀ gbèwè gbɛ̍n Pitɛ-a bila̍ nynɔ̌ ɔ̍ pɛ̌n i̍. 15Wɛ̀ ɔ̍ tǔh nynɔ̌ laa̍ ɔ̍ sɔ̍n i̍ iě ɔ̍ gbèwè bɔ̌. Wɛ̀ ɔ̍ sɔ bloɔ̍, iě ɔ̍ nu̍ Jusu-a dɛ̍i̍.
16Ti̍ ɛ̍ nu̍-a flìwe̍-ɛ, nyɔ̍gbei ja nyɔ̍ dɔu dǒ ɔ̍ we̍. Duuh blě jeědih dǒ u̍h de̍e̍. Iě ɔ̍ wlu̍-a sǔh nu̍ jeědih laa̍ i̍, wɛ̀ ɔ̍ pǔh-i poa-nyɔ̍ kli̍hgbɛ̍. 17Ɛ̀ la ɛ̍ nɛ-ɛ, wɛ̀ Nyɔsoa-a tu̍owli po̍ nyɔ̍ Asaia-a wlu̍ ɔ̍ bla̍-ɛ, ɛ̍ iě tìh-a taǐn nu̍. Ɔ̍ la̍a̍, “Ɔ̍ sà à poa-a dɛ̍ᵻ kli̍hgbɛ̍ ku̍u̍-i, iě ɔ̍ gba̍ à wɛ̌ᵻ kli̍hgbɛ̍.”
Nyɔ̍ɔ-a pɔ̀n Jusu-a kòà nu̍-ɛ i̍
(Luu 9.57-62)
18Ti̍ Jusu jě-a nyɔ̍ tlùgbei̍ dlɛ̌-a ɔ̍-ɛ, iě ɔ̍ sèàɛ̍ ɔ̍ kòà wlùh, ɔ̍ la̍a̍, “Mɔ̀ à tàn à iě dě pɛ̍nu̍ klaa la de̍e̍ gbǎ.” 19Wɛ̀ telě nǎ poe nyɔ̍ due ji̍ dǒ ɔ̍ we̍, iě ɔ̍ la̍a̍, “À Dlǔtu, ǎn mu̍ dǒ ìn de̍e̍ gbǎ. Nɛ̀ tà ìn pa̍-a, ǎn mu̍-o pa̍.”
20Wɛ̀ Jusu la̍a̍ dě ɔ̍ we̍, “Kwlǎ nmi̍i̍ blě pɛ̌na̍ wɛ̀ na̍wɛ̍ᵻ blě tlěᵻ. Jɛ Nyi̍ɔ̍-a Jǔ nɔ̀ɔ̍, ɔ̍ se̍ tè la̍ kɔn.”
21Wɛ̀ jɔ̍gbau dɔɔ ɔ̀ nu̍-a ɔ̍ kòà-a due-ɛ, ɔ̍ la̍a̍, “Nyɔ̍ klaa, bɔ̌ ǐn mu̍ iě ǐn baa i̍ tè ke̍ sàǐtòò.”
22Wɛ̀ Jusu la̍a̍ dě ɔ̍ we̍, “Mɔ̀ɔ̍, gbǎ dǒ ǐn de̍e̍. Bɔ̌ mɛ̌-nyɔ̍ iě u̍h-a chɛ̀-a mɛ̌-nyɔ̍ i̍ tè.”
Jusu po̍ tìlèè poɔ bɔ̌ i̍
(Maɛ 4.35-41; Luu 8.22-25)
23Wɛ̀ ɔ̍ gbǎ dě blǎgbè di̍i̍, iě ɔ̍ kòà gbǎ dě ɔ̍ we̍. 24U̍h iě-a kèle-ɛ, nɛ̀ tìlèè poɔ chɛn ja̍i̍ wɛ̀ dě u̍h we̍ pɛ̍nu̍ klaa kɛ̍n. Sɔ ɛ̍ wlǎ la̍ pɛ̍nu̍-a dǒ dě blǎgbè di̍i̍ sǔh. Jɛ nɛ̀ Jusu-a mɔ̌-ɛ. 25Iě ɔ̍ kòà mu̍ dě ɔ̍ we̍, wɛ̀ u̍h bla̍ ɔ̍ kɛ̍n i̍. U̍h la̍a̍, “Joi, sèìe àɔ̀ lě. À ji̍ la̍ niɔ̍ sie la wa.”
26Ɔ̍ la̍a̍, “Dɛ̍ po̍ mɔ̀ faɔn ɛ? Mɔ̀-a wlùh gbaɛ se̍ i̍ ku̍ gbɛɛ̍.” Wɛ̀ ɔ̍ sɔ bloɔ̍, iě ɔ̍ po̍ poɔ ke pɛ̍nu̍-a dǒ bɔ̌ i̍. Wɛ̀ poɔ ke dǒ nɛ tùàa̍n.
27Sɔ ɛ̍ wlǔh i̍ u̍h de̍e̍, wɛ̀ u̍h-a tèle-e we̍ i̍. U̍h la̍a̍, “Dɛ̍ɛ jɔ̍gbau we̍ la ɛ? Poɔ ke dǒ bei-a jě ɔ̍ wlu̍ dɛ̍ɛ̍ wa.”
Jusu pǔh-i jeědih-a de̍e̍ nɛ nyɔ̍ sɔɔ̌n
(Maɛ 5.1-20; Luu 8.26-39)
28Jɔ̍gbauᵻ sɔɔ̌n ùh jeědih nɛ-a dǒ de̍e̍-ɛ, u̍h nɛ Kadawla fɔɔ. Dě gbàlɔ̍ᵻ di̍i̍ bo u̍h tǐn. Jɛ u̍h-a wɔ̍n kma tìh nyɔ̍-ɔ jii dě fɔ̌ laa̍ we̍. Ti̍ Jusu tàn-a nǐ-ɛ, dě-e bo ɔ̍ wlǔh-i. 29Wɛ̀ u̍h wǐ, u̍h la̍a̍, “Nyɔsoa-a Jǔ, ka àn pɔ̀n ìè à tìh nu̍ ɛ? Ìn ji̍-i ìè à kàn gbɛ̍n sasǎ wɛ̀ ti̍ iě-o nyni̍-ɛ dǔ ae?”
30Nɛ̀ be̍e̍ᵻ sùɛ̀ nɛ dǒ gbɔ̍ɔ̍ laa̍ i̍h-a di̍. 31Wɛ̀ jeědih ba̍le Jusu. I̍h la̍a̍, “Pò ìn ja à i̍ nu̍ mu̍-ɛ, nɛ̀ ìn po̍ à dǒ be̍e̍ᵻ sùɛ̀ laa̍ de̍e̍ o.”
32Iě ɔ̍ la̍a̍ dě i̍h we̍, “Mɔ̀ mu̍.” Wɛ̀ i̍h sɔ dǒ jɔ̍gbauᵻ laa̍ de̍e̍. Iě i̍h mu̍ dǒ be̍e̍ᵻ de̍e̍. Wɛ̀ be̍e̍ᵻ sùɛ̀ laa̍ i̍h wa̍n dě gbuǔh tɔ̀ɔ̀n kɛ̍n i̍, iě i̍h gbǎ pɛ̍nu̍ klaa kɛ̍n. Dǒ i̍h sie-e niɔ̍ kli̍hgbɛ̍.
33Iě ùh-a gbɛ̀n-a dǒ be̍e̍ᵻ we̍ i̍-ɛ, u̍h gba̍ ple̍-ɛ wlɔ̀. Wɛ̀ ka be̍e̍ᵻ nu̍-a niɔ̍ sie-ɛ ke jeědih nu̍-a dǒ jɔ̍gbauᵻ laa̍ de̍e̍ sɔ-ɛ, iě u̍h po̍ i̍h-a kunǎ kli̍hgbɛ̍. 34Wɛ̀ wlɔ̀ kli̍hgbɛ̍ wɛ̀-e i̍, u̍h mu̍ dě Jusu we̍. Iě u̍h ba̍le ɔ̍, u̍h la̍a̍, “Dbǎkà, sɔ nɔ̌ à we̍ fɔɔ.”
Currently Selected:
Matio 8: KDNT
Highlight
Share
Copy
Want to have your highlights saved across all your devices? Sign up or sign in
The New Testament in Western Krahn published as KU̍O̍ DELEE © The Bible Society in Liberia, 1999.
