Matio 19

Jusu flɔn-ɛ nynɔ̌ kwlǎ sà dɛ we̍i̍

(Maɛ 10.1-12; Luu 16.18)

1Ti̍ Jusu wɔ̀-a ìh la bla̍-aɛ, iě ɔ̍ sɔ Kaladii fɔɔ wɛ̀ ɔ̍ mu̍ dě Judia fɔɔ, dě Jɔɔdɛn nǐ-a fɔ̌ dɛɛ we̍. 2Ɔ̍ wɔ̌an mu̍ tìh-ɛ, nyɔ̍ tlùgbei̍ wɔ̀ dǒ ɔ̍ de̍e̍, wɛ̀ ɔ̍ pǔh-i u̍h dě tà-a chɛ̀.

3Wɛ̀ Fɛlesii nyɔ̍ ji̍ dǒ ɔ̍ we̍ iě u̍h-a tɛ̀n ɔ̍, u̍h la̍a̍, “Nyɔsoa-a telě la̍ ka nyɔ̍ jě-ɛ ɔ̍ nu̍ nynɔ̌ kwlǎ sà-a sǔh ae?”

4Wɛ̀ Jusu la̍a̍, “Mɔ̀-ɔ se̍-a Nyɔsoa-a wlu̍ slè sàì ae? Ɛ̍ la̍ sɔ dě tɔ̀blɔ̍ɔ̍-ɛ, Nyɔsoa nu̍ nyi̍ɔ̍-a nynɔ̌ ke je̍ɔ̍. 5Iě ɔ̍ la̍a̍, ‘Ɛ̍ tìh-ɛ, jɔ̍gbau-a mu̍ dǒ ɔ̍ de̍ ke ɔ̍ baa we̍-e sɔ, wɛ̀ ɔ̍ ke ɔ̍ nynɔ̌ iě i̍ tùi. Nɛ̀ u̍h nɛ-a sɔɔ̌n-ɛ, u̍h-a mu̍ nyɔ̍ due nu̍.’ 6Sɔ nɛ̀ u̍h se̍ sɔɔ̌n nɛ dɛ, jɛ nɛ̀ u̍h nɛ due wɛ̀. Ɛ̍ tìh-ɛ, dɛ̍ Nyɔsoa tùi-a i̍-ɛ, nyɔ̍ dɔɔ bɔ̌ ɛ̍ i̍ sèàɛ̍.”

7Wɛ̀ u̍h tèle ɔ̍ i̍, u̍h la̍a̍, “Wɛ̀ dɛ̍nu̍ Mose-a telě la̍ nɛ̀ nyɔ̍ nyǐ nynɔ̌ chlǐh-dɛ̍ wɛ̀ nyɔ̍ iě ɔ̍ kwlǎ sà-a dǔ ɛ?”

8Iě Jusu la̍a̍, “Mose sà mɔ̀ wlu̍ kɛ̍n mɔ̀ iě mɔ̀-a nynɔ̌ kwlǎ sà, dɛ̍nu̍ɛ, mɔ̀-a dlǔ kmu-i. Jɛ ɛ̍ se̍ dě tɔ̀blɔ̍ɔ̍ i̍ sɔ. 9Bɔ̌ ǐn sèàɛ̍ mɔ̀ wlùh, nyɔ̍ ɔ̀ kɔn nynɔ̌ se̍-a nynɛ̌à nu̍ wɛ̀ ɔ̍ iě ɔ̍ kwlǎ sà, ɔ̍ iě nynɔ̌ dɔɔ blě-ɛ, nɛ̀ nynɛ̌à bo ɔ̍ nu̍.”

10Wɛ̀ ɔ̍ kòà la̍a̍ dě ɔ̍ we̍, “Pò ɛ̍ nu̍ ka nɛ-ɛ dǒ nynɔ̌ ke kɔan nynɛ̌ we̍-ɛ, nɛ̀ ɛ̍ mu̍ jii̍ nmɔ nyɔ̍ bɔ̌ nynɔ̌ blě-ɛ sǔh kleǐn.”

11Jusu la̍a̍, “Ɛ̍ se̍ nyɔ̍ kli̍hgbɛ̍ ùh se̍ nǎ la i̍ gbɛ̍n-ɛ bɛ̌ɛ. Jɛ nyɔ̍ ùh Nyɔsoa nyǐ-a ɛ̍-ɛ, u̍h bo ùh bɛ̌ɛ ɛ̍ i̍ gbɛ̍n-ɛ. 12Nyɔ̍ duuh se̍ nynɔ̌ dɛ bɛ̌ɛ, dɛ̍nu̍ɛ, kǎ u̍h nɛ wɛ̀ u̍h wlǔh, wɛ̀ wlɔ̀ nyi̍ɔ̍ nu̍ la̍a̍n duuh-a tìh. Iě duuh-a tù Nyɔsoa-a kmɔ̌ wlu̍ i̍ kɔn tìh wɛ̀ u̍h se̍ nynɔ̌ blě. Nyɔ̍ ɔ̀ bɛ̌ɛ-a wlu̍ la i̍ gbɛ̍n-ɛ, nɛ̀ ɔ̍ gbɛ̍n ɛ̍ i̍.”

Jusu tè nynuu̍plìh sɔ̍n dlǔ

(Maɛ 10.13-16; Luu 18.15-17)

13Wɛ̀ nyɔ̍gbei-a ja u̍h-a nynuu̍plìh dǒ Jusu we̍, ɔ̍ iě u̍h sɔ̍n dlǔ tè wɛ̀ ɔ̍ iě dǒ u̍h-a tàà ba̍le. Jɛ ɔ̍ kòà po̍ nyɔ̍ laa̍ bɔ̌ i̍ u̍h-u je̍e u̍h-a nynuu̍ dǒ Jusu we̍ ja. 14Iě ɔ̍ la̍a̍, “Mɔ̀ bɔ̌ nynuu̍plìh la u̍h iě nɔ̌ ǐn we̍ ji̍. Mɔ̀ bɔ̌ u̍h wìè-i sà-a. Dɛ̍nu̍ɛ, nyɔ̍ ùh nɛ-a ka-a, u̍h bo ùh kɔn dǒ Nyɔsoa-a kmɔ̌ wlu̍ i̍ kɔn-ɛ we̍.”

15Wɛ̀ ɔ̍ tè u̍h sɔ̍n dlǔ iě ɔ̍ dǔ mu̍-ɛ.

Ɛ̍ kma-a pàn-nyɔ̍ iě dǒ Nyɔsoa de̍e̍ gbǎ

(Maɛ 10.17-31; Luu 18.18-30)

16Wɛ̀ jɔ̍gbau due ji̍ dǒ Jusu we̍ iě ɔ̍ tèle ɔ̍ i̍, ɔ̍ la̍a̍, “Dlǔtu, dɛ̍ chɛ̀ we̍ iě nu̍ wɛ̀ iě kmɔ̌ sie feɛ blě ɛ?”

17Wɛ̀ Jusu la̍a̍, “Dɛ̍nu̍ àn tèle ǐn i̍ dɛ̍ chɛ̀ tìh ɛ? Nyɔ̍ due gbài̍ bo ɔ̀ nu̍ nyɔ̍ chɛ̀. Pò ìn ja pɔ̀n ìè kmɔ̌ sie feɛ blě-ɛ, nɛ̀ ìn jě Nyɔsoa-a telě dɛ̍ɛ̍.”

18Wɛ̀ jɔ̍gbau la̍a̍, “Telě jihwe̍ ɛ?”

Iě Jusu la̍a̍, “Bɔ̌ nyɔ̍ gbe̍ja̍a̍ po̍-ɛ, bɔ̌ nynɛ̌à nu̍-ɛ, bɔ̌ jlǐ-ɛ, bɔ̌ nyɔ̍ si̍h i̍ tùi-ɛ, 19nɛ̀ ìn jě ìn de̍ ke ìn baa dɛ̍ɛ̍, nɛ̀ ìn jbɛɛ ìn pònyɔ̍-ɔ ka àn chɛ̀-ɛ.”

20Wɛ̀ jǔgbèlà laa̍ ɔ̍ la̍a̍, “Ǐn gbɛ̍n telě jih kli̍hgbɛ̍ la̍ nɔ̀ɔ̍ i̍ wɛ̀. Dɛ̍ dɛɛ we̍ sie-o iě nu̍ ɛ?”

21Jusu la̍a̍, “Pò nàa̍ àn nu̍-dɛ̍ iě gblɛ̍ja̍i̍ wɛ̀-ɛ, nɛ̀ ìn mu̍ ìè àn kɔn-dɛ̍ᵻ kli̍hgbɛ̍ ple̍, ìè i̍h-a wlǐ nyɔ̍gbà nyɔ̍ nyǐ, nɛ̀ àn mu̍ pàn dě ja̍i̍wlɔ̀. Nɛ̀ ìn ji̍ ìè dǒ ǐn de̍e̍ gbǎ.”

22Ti̍ jǔgbèlà laa̍ ɔ̍ wɔ̌n-a wlu̍ la-ɛ, sɔ ɔ̍ wlùh gbǎ seɔn-ɔ. Iě ɔ̍ mu̍, dɛ̍nu̍ɛ, ɔ̍ blě kɔn-dɛ̍ᵻ dɔu.

23Wɛ̀ Jusu la̍a̍ dě ɔ̍ kòà we̍, “Ɛ̍ se̍ pàɔ̀n, ɛ̍ mu̍ i̍ kma kaa̍ wɛ̀ pàn-nyɔ̍ iě dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ. 24Bɔ̌ ǐn gba̍ ɛ̍ kɛ̍n i̍ dɛ, ɛ̍ kma i̍ pàn-nyɔ̍ iě dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ, ɛ̍ sìì gbo̍ kɛ̍ɛ̍n bli-a dě mɛnɔ̍-a gbɔ̀ di̍i̍ jii-ɛ.”

25Ti̍ ɔ̍ kòà wɔ̌n-a ìh la-ɛ, sɔ ɛ̍ kèle u̍h i̍ kaa̍, iě u̍h tèle tìh i̍, u̍h la̍a̍, “Nɛ̀ nyɔ̍we̍ bo ɔ̀ mu̍-o pǔh ɛ?”

26Wɛ̀ Jusu gbɛ̀n u̍h ja̍ iě ɔ̍ la̍a̍, “Dǒ nyi̍ɔ̍ we̍ nɔ̀ɔ̍, nɛ̀ ɛ̍ kma nu̍-ɛ. Jɛ dǒ Nyɔsoa we̍ nɔ̀ɔ̍, dɛ̍ᵻ kli̍hgbɛ̍ se̍ nu̍-ɛ kma.”

27Wɛ̀ Pitɛ la̍a̍ dě ɔ̍ we̍, “Gbɛ̀n-e, à tǎli dɛ̍ᵻ kli̍hgbɛ̍ i̍ wɛ̀ à gbǎ dǒ ìn de̍e̍. Nɛ̀ dɛ̍ we̍ à mu̍-o jě ɛ?”

28Wɛ̀ Jusu la̍a̍ dě u̍h we̍, “Tìh-a taǐn àn sèàɛ̍ mɔ̀ wlùh, ti̍ dɛ̍ᵻ kli̍hgbɛ̍-a mu̍-a delee i̍ gbǎ-ɛ, nɛ̀ Nyi̍ɔ̍-a Jǔ-a mu̍ i̍ tè dǒ ɔ̍ nynɛ̌ gbalǎ kɛ̍n dě ɔ̍ tìh-a i̍ bɛ̌-ɛ di̍i̍. Nɛ̀ mɔ̀ɔ̍ ùh gbǎ-a dǒ ǐn de̍e̍-ɛ, wɛ̀ mɔ̀ iě dǒ nynɛ̌ gbalǎᵻá pùè jɔ̌ sɔɔ̌n kɛ̍n i̍ tìèe̍ ke, wɛ̀ mɔ̀ iě Eslɔɛ nyɔ̍-a chɛ̌tu-a pùè jɔ̌ sɔɔ̌n wlu̍ i̍ kɔn. 29Nyɔ̍-o-nyɔ̍ ɔ̀ mu̍-a ɔ̍ gbòᵻ o, de̍di̍i̍ᵻ jɔ̍gbauᵻ o, de̍di̍i̍ᵻ nynɔ̌gbaɔᵻ o, de̍ o, baa o, nynuu̍ o, klèᵻ o, ɔ̍ mu̍-a i̍h-a dɛ̍ i̍ tǎli ǎn tìh-ɛ, nɛ̀ ɔ̍ mu̍ i̍h-a gbɔ̍ᵻá kmɛ jě dǒ kɛ̍n. Wɛ̀ ɔ̍ iě kmɔ̌ sie feɛ blě dɛ. 30Jɛ nyɔ̍ dɔu ùh wɔ̀-a ka nya̍-ɛ, u̍h-a mu̍ de̍ wɔ̀. Wɛ̀ juh wɔ̀-a ka de̍-ɛ, u̍h iě nya̍ wɔ̀.”

Currently Selected:

Matio 19: KDNT

Highlight

Copy