Matio 11

Chɔɔn ɔ̀ po̍-a nyɔ̍ nǐ dlǔ-ɛ dbo̍ ɔ̍ kòà dě Jusu we̍

(Luu 7.18-35)

1Ti̍ Jusu wɔ̀-a ɔ̍ kòà-a pùè jɔ̌ sɔɔ̌n laa̍ slǔh po̍-ɛɛ, wɛ̀ ɔ̍ wlǔh-i gbààn ɔ̍ mu̍ dě wlɔ̀ᵻ diih di̍i̍ ɔ̍ iě nǎ po̍, wɛ̀ ɔ̍ iě Nyɔsoa tìh bla̍ dě nyɔ̍gbei we̍.

2Chɔɔn ɔ̀ po̍-a nyɔ̍ nǐ dlǔ-ɛ, ti̍ ɔ̍ nɛ-a dě kasoo-ɛ, dǒ ɔ̍ wɔ̌n-ɛ Klai-a nu̍-dɛ̍ᵻá pɔ̀n, wɛ̀ ɔ̍ dbo̍ ɔ̍ kòà dě ɔ̍ we̍. 3U̍h mu̍-aa, iě u̍h la̍a̍, “Mɔ̀ Chɔɔn la̍ ɔ̀ mu̍-a ji̍-ɛ, mɔ̀ bo ae? Àe̍e̍ à gbàɛ̀ nyɔ̍ dɔɔ-a tìh ke̍ dɛ dǒ ìn de̍e̍ ae?”

4Wɛ̀ Jusu la̍a̍, “Mɔ̀ mu̍ de̍ mɔ̀ iě Chɔɔn kunǎ po̍ dǒ dɛ̍ᵻ mɔ̀ jě-a ke dɛ̍ᵻ mɔ̀ wɔ̌n-a we̍. 5Dɔ̌-nyɔ̍-a jě la̍ i̍, klɔ-nyɔ̍-a na la̍-ɛ, wìèìdih-a nu̍ nyɔ̍ fɛ̍nɛ wɛ̀, sǔn-nyɔ̍-a wɔ̌n la̍ i̍, mɛ̌-nyɔ̍-a wlǔh la̍-e, iě pɔ̀n chɛ̀-a bla̍-ɛ la̍ dě nyɔ̍gbà nyɔ̍ we̍. 6Nyɔ̍ ɔ̀ se̍-a se̍a̍ dǒ ǎn wlùh gbaɛ we̍-ɛ, nɛ̀ ɔ̍ nmɔ i̍.”

7Chɔɔn-a kòà-a sɔ-a la̍-oɛ, wɛ̀ Jusu tè wlu-ɛ gbɔ̀ dě nyɔ̍ tlùgbei̍ laa̍ we̍ Chɔɔn tìh. Ɔ̍ la̍a̍, “Ti̍ mɔ̀ mu̍-a dě Chɔɔn we̍ kwlǎslò we̍-ɛ, dɛ̍ mɔ̀ mu̍ jě la̍ ɛ? Dli̍h wlɔ̍nᵻ ìh poɔ-a gba̍-a, i̍h bo mɔ̀ mu̍ jě la̍ ae? 8Pò ɛ̍ se̍ la̍a̍n nɛ-ɛ, nɛ̀ dɛ̍ we̍ bo mɔ̀ mu̍ jě la̍ ɛ? Àe̍e̍ mɔ̀ mu̍ jlii̍ chɛ̀-ɛ pa̍ nyɔ̍ jě la̍ sǔh ae? Iěe, nyɔ̍ ɔ̀ pa̍-a jlii̍ chɛ̀-ɛ, nɛ̀ dě blǔh baa-a gbò sɔ̀n bo ɔ̍ nɛ. 9Nɛ̀ dɛ̍ mɔ̀ mu̍ jě la̍-a la̍ ɛ? Nyɔsoa-a tu̍owli po̍ nyɔ̍ bo mɔ̀ mu̍ jě la̍ ae? I̍i̍n, kǎ ɛ̍ nɛ, jɛ jɔ mɔ̀ jě-a ka-ɛ, ɔ̍ sìì Nyɔsoa-a tu̍owli po̍ nyɔ̍-a chɛ̀. 10Ɔ̀ la ɔ̍ kɔn tìh bo Nyɔsoa-a wlu̍ la̍a̍, ‘Ǎn mu̍ ǎn tu̍owli po̍ nyɔ̍ nya̍ dbo̍ dě ìn jǔ, ɔ̍ iě àn wìè gba̍a̍ po̍.’ 11Ɛ̍ se̍ pàɔ̀n, ǎn sèàɛ̍ mɔ̀ wlùh, nyɔ̍-ɔ se̍a nɔ̌ kmɔ̌ la we̍ nɛ ɔ̀ iě-a wɔ̍n ku̍ ɔ̀ iě-a Chɔɔn ɔ̀ po̍-a nyɔ̍ nǐ dlǔ-ɛ sìì-ɛ. Jɛ ɔ̀ se̍-a dɛ̍kɛ̍n gbǎ kaa̍ dě Nyɔsoa-a kmɔ̌ wlu̍ i̍ kɔn-ɛ di̍i̍-ɛ, ɔ̍ ku̍ wɔ̍n ɔ̍ sìì Chɔɔn. 12Sɔ dě Chɔɔn-a ti̍ we̍ wɛ̀ ɛ̍ iě-a ti̍ la jɛɛ-ɛ, dǒ Nyɔsoa-a kmɔ̌ wlu̍ i̍ kɔn-ɛ sà tìh jě-ɛ. Iě dɛ̍ᵻá kloǒ nu̍ nyɔ̍-a pɔ̀n ɛ̍ klànklàn gbɛ̍n-ɛ i̍. 13Dɛ̍nu̍ɛ, Nyɔsoa-a tu̍owli po̍ nyɔ̍ kli̍hgbɛ̍ ke telě sà Nyɔsoa-a wlu̍ i̍ kɔn-kmɔ̌ la ɛ̍ tìh i̍ te̍e̍ iě ɛ̍ dǔ Chɔɔn jɛɛ-ɛ. 14Ilaɛja ɔ̀ kɔn ɔ̀ iě-a ji̍-ɛ, ɔ̍ bo ɔ̀ nu̍-a Chɔɔn. Mɔ̀ wɔ̌ɛn ɛ̍ we̍ ae? 15Nyɔ̍ flɔn-a dounᵻɛ́, nɛ̀ ɔ̍ po̍-e dounᵻ.

16“Dɛ̍ we̍ bo iě ti̍laa nyɔ̍ la i̍ blaɛ ɛ? U̍h wɔ̀ nynuu̍plìh ùh nɛ-a dě dɔɔ̌ gbale̍e̍-ɛ, wɛ̀ u̍h-a nu̍-a po̍-e ìn ba̍ we̍ wlu̍ ìn ba̍ po̍-e ìn we̍ wlu̍-ɛ. 17U̍h la̍a̍, ‘À ble̍ mɔ̀-a nynɔ̌ jla̍ ja duǐh, wɛ̀ mɔ̀ se̍ de̍le. Wɛ̀ à ble̍ kǔ-a mɛ̌-duǐh, wɛ̀ mɔ̀ se̍ fìn.’ 18Chɔɔn ji̍-aɛ, ɔ̍ po̍ jlǔh iě ɔ̍ se̍ nǎ. Wɛ̀ nyɔ̍ɔ la̍ nɛ̀ ɔ̍ blě jeědih dǒ ɔ̍ de̍e̍. 19Nyi̍ɔ̍-a Jǔ ji̍-aɛ, iě ɔ̍ di̍ dɛ̍ wɛ̀ ɔ̍ nǎ. Iě u̍h la̍a̍, ‘Ɔ̍ nyni wɔ̍i̍n iě ɔ̍ sìèè ɔ̍ chɛ̀ nmɔ̍ wlì. Gbɛ̀n-e, ɔ̍ ke taa̍sìh sà nyɔ̍ ke gblɛ̍n sɔ̀ɛ̀n nyɔ̍ jbɛɛ.’ Jɛ Nyɔsoa-a flɔ̍nwlùh-a flɔn-ɛ ɛ̍ chɛ̀ we̍ i̍ dǒ ɛ̍ nu̍-dɛ̍ we̍.”

Wlɔ̀ᵻ diih se̍ wlùh gbaɛ blě

(Luu 10.13-15)

20Iě wlɔ̀ᵻ gbàɛ̀ Jusu dǔ-a jbaɛdih dɔu di̍i̍ i̍ poe-ɛ, wɛ̀ i̍h-i se̍-a i̍ bǐi-ɛ, sɔ ɔ̍ chɛ̀ la̍ i̍h we̍ sǔh. 21Ɔ̍ la̍a̍, “Kɔwlasiin wlɔ̀, chlě dǒ ìn we̍. Bɛseida wlɔ̀, chlě dǒ ìn we̍ ke. Dɛ̍nu̍ɛ, jbaɛdih ìh dǔ-a poe-ɛ mɔ̀ di̍i̍ i̍-ɛ, pò i̍h poe-ɛ dě Taiɛ ke Saidɔn wlɔ̀ᵻ di̍i̍ de-ɛ, nɛ̀ nyɔ̍ nɛ-a dǒ i̍h di̍i̍-ɛ, u̍h-a mu̍ dlǐh jlii̍ pa̍ u̍h iě bii dlǔ po̍ de tɛin, wɛ̀ ɛ̍ iě ɛ̍ to ka u̍h bǐi-a i̍-ɛ. 22Jɛ ǎn sèàɛ̍ mɔ̀ wlùh, ti̍ ɛ̍ mu̍-a sàwi̍h sì ti̍ nu̍-ɛ, nɛ̀ Nyɔsoa-a mu̍ Taiɛ ke Saidɔn wlɔ̀ᵻ wɔɛ jě ɛ̍ iě mɔ̀ sìì. 23Kepanium wlɔ̀, mɔ̀ bo ɔ̀ pɔ̀n wɔ̍n ku̍-ɛ i̍ ae? Iěe, àn mu̍ wlù ji̍ ìè dě kàn nɛ̍ di̍i̍ gbǎ. Jbaɛdih ìh poe-a dǒ ìn di̍i̍-ɛ, wɛ̀ i̍h iě poe-ɛ dǒ Sɔdɔm wlɔ̀ di̍i̍ de-ɛ, nɛ̀ ɛ̍ se̍-e gbɔ̀lɔ mu̍ sèàn de. 24Ǎn sèàɛ̍ mɔ̀ wlùh, ti̍ ɛ̍ mu̍-a sàwi̍h sì ti̍ nu̍-ɛ, Nyɔsoa-a mu̍ Sɔdɔm wlɔ̀ wɔɛ jě ɛ̍ iě ìn sìì.”

Nyɔ̍ juo Jǔ-ɛ, nɛ̀ àn wlùh-a mu̍ i̍ tè

(Luu 10.21-22)

25Dǒ ti̍ laa̍ di̍i̍ bo Jusu wlu-i, ɔ̍ la̍a̍, “Baa, mɔ̀ ɔ̀ nu̍-a bloa̍ ke ja̍u̍n-a Joi-ɛ, ǐn po̍ ìn tlɔ̌. Dɛ̍nu̍ɛ, dɛ̍ᵻ ìn sìle-a flɔ̍nwlùh kɔn nyɔ̍ ke dɛ̍ juo nyɔ̍ jii̍-ɛ, i̍h bo ìn toe ka plǒai nyɔ̍. 26I̍i̍n, Baa, àn gbǐh po̍ dɛ̍ bo.”

27Ɔ̍ la̍a̍, “Ǐn Baa nyǐ ǐn dɛ̍ᵻ kli̍hgbɛ̍ wɛ̀. Nyɔ̍ dɔɔ se̍ Jǔ juo. Jɛ Baa nɛ due kɔn tɛ̀ ǐn sà-o. Iě nyɔ̍ dɔɔ wɔ̍ se̍ Baa juo ke. Jɛ Jǔ nɛ due kɔn tɛ̀ ǐn sà-o, ɛ̍ ke nyɔ̍ ùh Jǔ tba̍-a chèɛ̀ ɔ̍ iě-a Baa toe-ɛ ke.

28“Nyɔ̍ ùh gbɛ̀-ɛ bla̍-a ke ùh kɔn gbǐh-a nu̍-a sɔɔn-ɛ, mɔ̀ ji̍ nɔ̌ ǐn we̍. Ǎn mu̍ ɛ̍ nu̍ mɔ̀ iě feɛ i̍ jě. 29Mɔ̀ gba̍ ǎn kɛ̌n wìè mɔ̀ iě ǐn dɛ̍ we̍ cheǎn-ɛ, dɛ̍nu̍ɛ, ǐn gbɛ̍n gba̍n, wɛ̀ ǐn ja ǎn chɛ̀ wlù. Pò mɔ̀ nu̍ la̍a̍n-ɛ, nɛ̀ mɔ̀-a wlùh-a mu̍ i̍ tè. 30Ǎn kɛ̌n wìè bo ɛ̀ se̍ gba̍-a kma, wɛ̀ ǎn gbɛ̀ fěle kwa̍.”

Currently Selected:

Matio 11: KDNT

Highlight

Copy