Luu 20

Nyɔ̍ bo ɔ̀ nyǐ Jusu tùn ɛ?

(Matio 21.23-27; Maɛ 11.27-33)

1Dǒ weɛ̍ due di̍i̍, wɛ̀ Jusu po̍ nyɔ̍ nǎ iě ɔ̍ bla̍ pɔ̀n chɛ̀-a tìh dě Nyɔsoa-a slaǎ sà gbò sɔ̀n. Wɛ̀ slaǎ sà nyɔ̍ klaaᵻ ke, telě nǎ poe nyɔ̍ ke nyɔ̍ klaaᵻ ji̍ dǒ ɔ̍ we̍. 2Wɛ̀ u̍h la̍a̍, “Sèàɛ̍ à wlùh, nyɔ̍we̍ bo ɔ̀ nyǐ ìn tùn wɛ̀ àn nu̍ ìh la ɛ? Nyɔ̍ ɔ̀ nyǐ-ɛ ìn tùn-ɛ, sǐ ɔ̍ nynɛ̌.”

3Wɛ̀ Jusu la̍a̍, “Ǎn mu̍ mɔ̀ dɛ̍ due i̍ tèle ke. Mɔ̀ sèàɛ̍ ǐn wlùh, 4nyɔ̍ bo ɔ̀ nyǐ Chɔɔn tùn ke wɛ̀ ɔ̍ po̍ nyɔ̍ nǐ dlǔ ɛ? Nyɔsoa bo ɛɛ, àe̍e̍ wlɔ̀ nyi̍ɔ̍ bo ae?”

5Sɔ u̍h-a sǔh-a pu̍e̍e la̍ ɛ̍ wɔ̍ɔ̍n i̍ sǔh. U̍h la̍a̍, “Pò à la̍a̍, ‘Nyɔsoa bo-ɛ,’ nɛ̀ ɔ̍ mu̍ ka dǎ, ‘Dɛ̍nu̍ mɔ̀ se̍ ɔ̍ tìh chɛ̀ po̍ la̍ ɛ?’ 6Iě pò à la̍a̍, ‘Wlɔ̀ nyi̍ɔ̍ bo-ɛ,’ nɛ̀ nyɔ̍ kli̍hgbɛ̍-a mu̍ à sɔɔ̌ᵻ i̍ tbaɛ. Dɛ̍nu̍ɛ, u̍h juo ɛ̍ kleǐn ka Chɔɔn nu̍-a Nyɔsoa-a tu̍owli po̍ nyɔ̍-ɛ.” 7Wɛ̀ u̍h la̍a̍, “À se̍ nyɔ̍ ɔ̀ nyǐ-a ɔ̍ tùn-ɛ juo.”

8Wɛ̀ Jusu la̍a̍ dě u̍h we̍, “Iě nɛ̀ nyɔ̍ ɔ̀ nyǐ-a ǐn tùn wɛ̀ ǎn nu̍-a ìh la-ɛ, ǐn se̍ ɔ̍ nynɛ̌ sǐ mu̍ ke.”

Jusu po̍ klè i̍ gbɛ̍n nyɔ̍-a nɛnǎ

(Matio 21.33-46; Maɛ 12.1-12)

9Wɛ̀ Jusu po̍ nɛnǎ la dě nyɔ̍gbei we̍. Ɔ̍ la̍a̍, “Jɔ̍gbau due bo ɔ̀ nu̍ tlo-dɛ̍ᵻá klè. Wɛ̀ ɔ̍ siee ɛ̍ klè i̍ gbɛ̍n nyɔ̍, iě ɔ̍ mu̍ dihwa̍a̍ wlè la̍. 10Tlo-dɛ̍ᵻ laa̍ i̍h-a gbǎn-a ti̍ nyni̍-a doǒ-ɛ, iě ɔ̍ dbo̍ ɔ̍ pòi̍ju dě klè i̍ gbɛ̍n nyɔ̍ laa̍ we̍ u̍h iě ɔ̍ naɛ tlo-dɛ̍ᵻá buǒᵻ ja. Jɛ u̍h bla̍ pòi̍ju laa̍, iě ɔ̍ flɔn kwa̍a̍ i̍ u̍h dbo̍ ɔ̍ de̍. 11Wɛ̀ ɔ̍ dbo̍ pòi̍ju dɔɔ dɛ. Iě u̍h bla̍ ɔ̍ ke. Wɛ̀ u̍h nu̍ ɔ̍ tɛ̀n dɛ̍ᵻ jii̍. Wɛ̀ ɔ̍ flɔn kwa̍a̍ i̍ u̍h dbo̍ ɔ̍ de̍. 12Wɛ̀ ɔ̍ dbo̍ ta̍a̍n naɛ. Iě u̍h tba̍-ɛ ɔ̍ dɛ̍ᵻ i̍, wɛ̀ u̍h sà ɔ̍ dǒ klè. 13Wɛ̀ klè joi-a chɛ̀ la̍a̍, ‘Dɛ̍ iě nu̍-ɛ wèè? Ǎn mu̍ ǎn tìh kma jǔ deě dbo̍. Ǐn juo ɛ̍-ɛ u̍h-a mu̍ ɔ̍ nɔ̀ɔ̍ dɛ̍ɛ̍ jě.’ 14Jɛ klè i̍ gbɛ̍n nyɔ̍ jě-a jǔ laa̍-ɛ, iě u̍h la̍a̍, ‘Ɔ̍ tèwlìɛ̍ bo ɔ̀ ji̍-a dě de̍à, mɔ̀ à dbǎ ɔ̍, nɛ̀ kɔn-dɛ̍ᵻ la i̍h-a mu̍ à i̍ wɛ̀ɛ̀.’ 15Wɛ̀ u̍h sà ɔ̍ dǒ klè, iě u̍h dbǎ ɔ̍.”

Wɛ̀ Jusu tèle u̍h i̍, ɔ̍ la̍a̍, “Nɛ̀ dɛ̍ klè joi-a mu̍ ka klè i̍ gbɛ̍n nyɔ̍ laa̍ nui ɛ? 16Nɛ̀ ɔ̍ mu̍ ji̍ wɛ̀ ɔ̍ iě klè i̍ gbɛ̍n nyɔ̍ laa̍ dbǎ, wɛ̀ ɔ̍ iě klè-a chɛ̀ nyɔ̍ duuh nyǐ.”

Nyɔ̍gbei wɔ̌n-a ɔ̍ wlu̍ la-ɛ, iě u̍h la̍a̍, “Sakǒ, ɛ̍ bɔ̌-a nɛ-ɛ.”

17Wɛ̀ Jusu gbɛ̀n u̍h ja̍ iě ɔ̍ la̍a̍, “Nɛ̀ Nyɔsoa-a wlu̍ ɛ̀ la̍a̍,

‘Sɔɔ̌ ɛ̀ gbò po̍ nyɔ̍ tba̍-a chla-ɛ,

ɛ̍ bo ɛ̀ bɔ̌ɛ-a gbò-a sìtù nu̍-ɛ wɛ̀-ɛ,’

nɛ̀ ɛ̍ gbɔ̀-a nynɛ̌ ɛ? 18Nyɔ̍ ɔ̀ mu̍-a i̍ kà dǒ sɔɔ̌ la kɛ̍n-ɛ, nɛ̀ ɔ̍ mu̍ ja̍ i̍ chlà-ɛ. Jɛ nyɔ̍ ɔ̀ sɔɔ̌-a chɛ̀-a mu̍-a kɛ̍n gbǎ-ɛ, nɛ̀ ɔ̍ mu̍ i̍ waɛ.”

Nyɔ̍ bo ɔ̀ iě taa̍sìh sà ɛ?

(Matio 22.15-22; Maɛ 12.13-17)

19Wɛ̀ telě nǎ poe nyɔ̍ ke slaǎ sà nyɔ̍ klaaᵻ fɔ̀n dɛ̍ we̍ u̍h iě Jusu gbɛ̍n de dǒ ti̍ laa̍ di̍i̍. Dɛ̍nu̍ɛ, u̍h juo ɛ̍ ka ɔ̍ poe-a u̍h nɛnǎ la i̍-ɛ. Jɛ u̍h-a ple̍ nyɔ̍gbei jǔ. 20Ɛ̍ tìh-ɛ, u̍h pɔ̀n jii la̍ i̍, iě u̍h pɛ̌ɛ nyɔ̍ u̍h iě i̍ slɛ̌-nyɔ̍ wɔ̀, wɛ̀ u̍h iě Jusu gbɛ̍n dǒ ɔ̍ chɛ̀-a wlu̍ kɛ̍n, wɛ̀ u̍h iě ɔ̍ kwlǎ sà dě kɔ̀mla̍-a tùn blě nyɔ̍ ùh blě-a gbǐh-ɛ we̍. 21Iě u̍h tèle ɔ̍ i̍, u̍h la̍a̍, “Dlǔtu, à juo ɛ̍-ɛ, mɔ̀ bo ɔ̀ sà tìh-a taǐn, iě àn poe nyɔ̍ tìh-a taǐn nǎ, wɛ̀ nɛ̀ sà wìè fɔ̌ due. Jɛ àn toe nyɔ̍ Nyɔsoa-a tìh-a taǐn wìè. 22Sèàɛ̍ à wlùh, à telě sà à wlu̍ kɛ̍n à iě taa̍sìh sà dě Wloma nyɔ̍-a Bloa̍ Joi we̍ ɛɛ, àe̍e̍ ɛ̍ se̍ à wlu̍ kɛ̍n sà ae?”

23Jɛ Jusu juo dě u̍h-a gblàa̍ di̍i̍, iě ɔ̍ la̍a̍ dě u̍h we̍, 24“Mɔ̀ to ǐn wliɛ̍-a chɛ̀ i̍ iě ɛ̍ jě. Nyɔ̍ kɔn dlǔ ke nynɛ̌ bo ìh nɛ da̍a ɛ̍ kɛ̍n ɛ?”

U̍h la̍a̍, “Bloa̍ Joi bo.”

25Wɛ̀ Jusu la̍a̍ dě u̍h we̍, “Dɛ̍ ɛ̀ kɔn-a dǒ Bloa̍ Joi we̍-ɛ, nɛ̀ mɔ̀ nyǐ ɛ̍ Bloa̍ Joi. Nɛ̀ dɛ̍ ɛ̀ kɔn-a dǒ Nyɔsoa we̍-ɛ, mɔ̀ nyǐ ɛ̍ Nyɔsoa.”

26Sɔ u̍h se̍ ɔ̍ gbɛ̍n-ɛ bɛ̌ɛ dǒ wlu̍ ɔ̍ bla̍-a kɛ̍n dǒ nyɔ̍gbei jlǐhwai. Jɛ ɔ̍ wlu̍ laa̍ ɛ̍ wlǔh-i u̍h de̍e̍. Sɔ u̍h nɛ tìi̍n wɛ̀ sǔh.

Jusu po̍ nyɔ̍ nǎ dǒ-e wlǔh dɛ we̍

(Matio 22.23-33; Maɛ 12.18-27)

27Wɛ̀ Sadiusii nyɔ̍-a duuh ùh la̍ nyɔ̍ se̍-ae wlǔh mu̍ dode̍-ɛ, u̍h ji̍ 28Jusu i̍ tèle la̍. U̍h la̍a̍, “Dlǔtu, Mose-a telě ɔ̍ chlǐh-a dǒ àɔ̀ we̍-ɛ, ɛ̍ la̍a̍, ‘Pò jɔ̍gbau blě nynɔ̌ iě u̍h se̍ jǔ wlǔh-i wɛ̀ ɔ̍ iě mɛ̌-ɛ, nɛ̀ ɔ̍ de̍di̍i̍ kɔn ɔ̍ iě nynɔ̌ laa̍ blě, wɛ̀ u̍h iě nynuu̍ wlǔh-i dǒ ɔ̍ de̍di̍i̍ we̍.’ 29Ɛ̍ nu̍ de̍di̍i̍ᵻ mɛ̀sɔɔ̌n, iě u̍h-a klaa naɛ blě nynɔ̌. Jɛ u̍h se̍ nynuu̍ wlǔh-i wɛ̀ ɔ̍ mɛ̌. 30Wɛ̀ jɔ po̍-a sɔɔ̌n-ɛ blě ɔ̍, iě ɛ̍ nɛ ɔ̍ jii̍ ke. 31Iě ta̍a̍n naɛ blě ɔ̍, wɛ̀ ɛ̍ nɛ ɔ̍ jii̍ ke. Kǎ ɛ̍ nu̍ u̍h kli̍hgbɛ̍ nɛ-a mɛ̀sɔɔ̌n-ɛ, iě u̍h-a nyɔ̍ se̍-o jǔ si̍e̍ wɛ̀ u̍h mɛ̌. 32Ɛ̍ se̍-o siee, nynɔ̌-a chɛ̀ mɛ̌-ɛ ke. 33Nɛ̀ɛ̍, ka ɔ̍ dǔ-a u̍h nɛ-a mɛ̀sɔɔ̌n-ɛ, ti̍ mɛ̌-nyɔ̍-a mu̍-ae wlǔh-ɛ, nɛ̀ nyɔ̍ kɔn nynɔ̌ ɔ̍ mu̍ nu̍ gbe̍i̍n ɛ?”

34Wɛ̀ Jusu la̍a̍ dě u̍h we̍, “Ti̍laa jɔ̍gbauᵻ ke nynɔ̌gbaɔᵻá tǐn-i blǐ. 35Jɛ nyɔ̍ ùh-a mu̍-ae wlǔh wɛ̀ u̍h iě-a dě kmɔ̌ jɛ mu̍-a ji̍-ɛ di̍i̍ nɛ-ɛ, u̍h bo Nyɔsoa slè-e nyɔ̍ chɛ̀. U̍h nɔ̀ɔ̍, u̍h se̍ blǐ tǐn-i mu̍. 36Nɛ̀ u̍h se̍ mɛ̌ mu̍ dɛ, dɛ̍nu̍ɛ, nɛ̀ u̍h wɔ̀ Nyɔsoa-a ǐnchɔ̀ wɛ̀. Iě u̍h nu̍ Nyɔsoa-a nynuu̍, dɛ̍nu̍ɛ, u̍h wlǔh-e. 37Mose flɔn-ɛ ɛ̍ we̍i̍ ka mɛ̌-nyɔ̍-a mu̍-ae wlǔh-ɛ. Ɛ̍ nɛ dě ɔ̍ chlǐh-dɛ̍-a fɔ̌ ɛ̀ tba̍ dǒ si̍n-i kwlǎ fàn pùn i̍-ɛ di̍i̍. Dě ɔ̍ dǎɛ Joi Eblaɛɛn ke, Ase ke Jekɔ-a Nyɔsoa. 38Ɔ̍ se̍ Nyɔsoa dǒ mɛ̌-nyɔ̍ we̍. Jɛ ɔ̍-ɔ Nyɔsoa dǒ kmɔ̌ i̍ tè nyɔ̍ we̍. Dɛ̍nu̍ɛ, dǒ ɔ̍ pùn bo nyɔ̍ kli̍hgbɛ̍ nɛ-ɛ kmɔ̌.”

39Wɛ̀ telě nǎ poe nyɔ̍-a duuh la̍a̍, “Dlǔtu, ɛ̀ ìn bla̍-aɛ, ɛ̍ taǐn bo.” 40Sɔ u̍h se̍ ɔ̍ dɛ̍ i̍ tèle-ɛ bɛ̌ɛ dɛ.

Nyɔ̍ bo ɔ̀ nu̍ Nyɔsoa-a Chèɛ̀ Tba̍ju ɛ?

(Matio 22.41-46; Maɛ 12.35-37)

41Wɛ̀ Jusu la̍a̍ dě u̍h we̍, “Ka ɛ̍ nu̍ wɛ̀ u̍h la̍ Nyɔsoa-a Chèɛ̀ Tba̍ju la Depe-a tloemlai bo ɛ? 42Dɛ̍nu̍ɛ, Depe-a chɛ̀ la̍a̍ dě Duǐh Chlǐh-dɛ̍ di̍i̍,

‘Joi la̍a̍ dě ǎn Joi we̍,

Tè i̍ da̍a ǎn di̍na̍ we̍ te̍e̍

43iě ɛ̍ nu̍ ìè àn nyɛ̌-nyɔ̍ kɛ̍n i̍ na.’

44Depe-a chɛ̀-a dǎɛ ɔ̍ Joi, nɛ̀ dɛ̍ ɛ̀ nu̍ ɔ̍ Depe-a tloemlai we̍i̍ ɛ?”

Jusu tù nyɔ̍ slɛ̌n dǒ telě nǎ poe nyɔ̍ we̍

(Matio 23.1-36; Maɛ 12.38-40)

45Nyɔ̍ kli̍hgbɛ̍-a po̍-a dě Jusu we̍ dounᵻɛ́, iě ɔ̍ la̍a̍ dě ɔ̍ kòà we̍, 46“Mɔ̀ nu̍ mɔ̀-a chɛ̀-a nɛnɛ̌ dǒ telě nǎ poe nyɔ̍ we̍. U̍h jbɛɛ dɛ̍wlo̍o̍ pa̍ dɛ-ɛ dǒ wlɔ̀ i̍ nala, wɛ̀ nyɔ̍ iě u̍h ja̍ tè dǒ u̍h nyinɔ̍ i̍ sà la̍ dě dɔɔ̌ gbale̍e̍. U̍h jbɛɛ tà chɛ̀ i̍ tè-ɛ i̍ ma̍u̍ dě Juu nyɔ̍-a wɛɛ sà gbòᵻ sɔ̀n i̍ ke peě kɛ̍n i̍. 47U̍h-a bla̍ tèwànynɔ̌gbaɔᵻ jlǐhɛ̍ dlǔ, iě u̍h-a jǎ u̍h-a kɔn-dɛ̍ᵻ kɛ̍n. Ɛ̍ tìh u̍h-a tɛn-ɛ ba̍le-ɛ dlǔ wɛ̀ u̍h iě u̍h-a chɛ̀ dě nyɔ̍ jlǐh i̍ nmɔ-ɛ. U̍h naɛ kàn gbɛ̍n-ɛa mu̍-o dɛ̍ i̍ sìì.”

Currently Selected:

Luu 20: KDNT

Highlight

Copy