Luu 10

Jusu dbo̍ kòà-a kwela mɛ̀sɔɔ̌n jɔ̌ sɔɔ̌n

1Ɛ̀ la ɛ̍ wɔ̀-a nɛ-ɛɛ, wɛ̀ Joi tba̍ nyɔ̍-a kwela mɛ̀sɔɔ̌n jɔ̌ sɔɔ̌n (72) duuh chèɛ̀. Wlɔ̀ᵻ kɔn di̍i̍ i̍ ke tà kli̍hgbɛ̍ ɔ̍ chɛ̀-a mu̍-a i̍ mu̍-ɛ, wɛ̀ ɔ̍ dbo̍ u̍h-a sɔɔ̌n sɔɔ̌n nya̍. 2Iě ɔ̍ la̍a̍ dě u̍h we̍, “Klèᵻ la i̍h tìè i̍, jɛ i̍h-a chɛ̍n-nyɔ̍ se̍ i̍ tìè. Ɛ̍ tìh-ɛ, mɔ̀ wlu dě klè joi we̍ ɔ̍ iě kɔɔ chɛ̍n-nyɔ̍ dɔu nɔ̌ klè la dbo̍. 3Mɔ̀ mu̍, ǎn dbo̍ mɔ̀ ka nyɔ̍-a dbo̍ blawɛ̌ᵻ nynuu̍ dě gbɛ̍n-nmi̍i̍ nynɛ̌ we̍-ɛ. 4Mɔ̀ bɔ̌ pɔsɛ̍, àe̍e̍ gbèèkǔ, àe̍e̍ bu̍h-u po̍-dɛ̍ᵻ gba̍-a. Nɛ̀ mɔ̀ bɔ̌ i̍ nyna-a dǒ wìè-i nyɔ̍ nyinɔ̍ i̍ sà tìh. 5Gbò mɔ̀-a mu̍-a di̍i̍ pa̍-ɛ, nɛ̀ mɔ̀ la̍a̍, ‘À sà-ɛ gbò la nǐ wɔ̍n o.’ Kǎ mɔ̀ iě dǎ sàì. 6Nɛ̀ pò nyɔ̍ chɛ̀ nɛ deě-ɛ, nɛ̀ mɔ̀-a pɔ̀ìě-a mu̍ ɔ̍ we̍ sie. Jɛ pò ɛ̍ we̍ nyɔ̍ se̍ nɛ-ɛ, nɛ̀ mɔ̀ gbɛ̍n mɔ̀-a pɔ̀ìě i̍ dode̍. 7Nɛ̀ mɔ̀ koe dě gbò-a taǐn laa̍ di̍i̍, mɔ̀ iě nǐ ke di̍-dɛ̍ u̍h-a mu̍-a mɔ̀ nyǐ-ɛ di̍. Dɛ̍nu̍ɛ, dbo̍ nu̍ nyɔ̍ kɔn ɔ̍ iě pɛ̌ɛ la jě. Jɛ mɔ̀ bɔ̌ gbòᵻ di̍i̍ i̍ ple̍-ɛ. 8Pò mɔ̀ sǐ dǒ wlɔ̀ jɛ di̍i̍ i̍, wɛ̀ u̍h iě mɔ̀-a tìh i̍ gbɛ̍n-ɛ, nɛ̀ mɔ̀ di̍ dɛ̍-o-dɛ̍ u̍h-a mu̍-a mɔ̀ nyǐ-ɛ. 9Nɛ̀ mɔ̀ pǔh-i poa-nyɔ̍ nɛ-a dǒ wlɔ̀ laa̍ di̍i̍-ɛ. Nɛ̀ mɔ̀ la̍a̍ dě wlɔ̀ nyɔ̍ kli̍hgbɛ̍ we̍, ‘Nyɔsoa-a kmɔ̌ wlu̍ i̍ kɔn-ɛ nɛ mɔ̀ i̍ wɛ̀.’ 10Jɛ pò mɔ̀ sǐ dǒ wlɔ̀ di̍i̍ i̍, iě u̍h se̍ mɔ̀-a tìh i̍ gbɛ̍n-ɛ, nɛ̀ mɔ̀ mu̍ dě gbale̍e̍ wèa̍, mɔ̀ la̍a̍, 11‘Mɔ̀-a wlɔ̀-a blǔh-a chɛ̀ nɛ-a à bu̍hᵻ i̍-ɛ bo à gbàbo-a, wɛ̀ mɔ̀ iě ɛ̍ i̍ jě. Jɛ mɔ̀ bɔ̌ mǎle-ɛ ka Nyɔsoa-a kmɔ̌ wlu̍ i̍ kɔn-ɛ nɛ-a mɔ̀ i̍ wɛ̀-ɛ.’ 12Ǎn sèàɛ̍ mɔ̀ wlùh, weɛ̍ kɔn di̍i̍ ɛ̍ mu̍-a sàwi̍h sì ti̍ nu̍-ɛ, Nyɔsoa-a mu̍ Sɔdɔm wlɔ̀ wɔɛ jě ɛ̍ iě wlɔ̀ laa̍ sìì.

Wlɔ̀ᵻ ìh se̍-a wlùh gbaɛ blě-ɛ

(Matio 11.20-24)

13“Kɔwlasiin wlɔ̀, chlě dǒ ìn we̍. Bɛseida wlɔ̀, chlě dǒ ìn we̍ ke. Dɛ̍nu̍ɛ, jbaɛdih ìh dǔ-a poe-ɛ dě mɔ̀ di̍i̍ i̍-ɛ, pò i̍h poe-ɛ dě Taiɛ ke Saidɔn wlɔ̀ᵻ di̍i̍ de-ɛ, nɛ̀ nyɔ̍ nɛ-a dě i̍h di̍i̍-ɛ, u̍h-a mu̍ dlǐh jlii̍ pa̍ u̍h iě bii dlǔ po̍ de tɛin, wɛ̀ ɛ̍ iě ɛ̍ to ka u̍h bǐi-a i̍-ɛ. 14Jɛ ti̍ ɛ̍ mu̍-a sàwi̍h sì ti̍ nu̍-ɛ, nɛ̀ Nyɔsoa-a mu̍ Taiɛ ke Saidɔn wlɔ̀ᵻ wɔɛ jě ɛ̍ iě mɔ̀ sìì. 15Kepanium wlɔ̀, mɔ̀ bo ɔ̀ pɔ̀n wɔ̍n ku̍-ɛ i̍ ae? Iěe, àn mu̍ wlù ji̍ ìè dě kàn nɛ̍ di̍i̍ gbǎ.”

16Jusu la̍a̍ dě ɔ̍ kòà we̍, “Nyɔ̍ ɔ̀ mu̍-a mɔ̀-a wlu̍ i̍ wɔ̌n-ɛ, nɛ̀ ǎn wlu̍ bo ɔ̍ wɔ̌n i̍. Nɛ̀ nyɔ̍ ɔ̀ mu̍-a mɔ̀ chla tba̍-aɛ, nɛ̀ mɔ̍ bo ɔ̍ tba̍ chla. Nyɔ̍ ɔ̀ tba̍-a ǐn chla-aɛ, nɛ̀ nyɔ̍ ɔ̀ dbo̍-a m-ɛ bo ɔ̍ tba̍ chla.”

Jusu-a kòà ji̍ de̍

17Wɛ̀ kòà-a kwela mɛ̀sɔɔ̌n jɔ̌ sɔɔ̌n (72) laa̍ u̍h blě mɔna̍ nu̍-ɛ u̍h ji̍ de̍ka. Iě u̍h la̍a̍, “Joi, jeědih bei-a chɛ̀-a jě à dɛ̍ɛ̍ dǒ àn nynɛ̌ kɛ̍n wa.”

18Wɛ̀ Jusu la̍a̍ dě u̍h we̍, “Ǐn jě Setɔn-a i̍ kà la̍, ka nǐ chlɛ jlǐh dě ja̍u̍n wlì-ɛ. 19Gbɛ̀n-e, ǐn nyǐ mɔ̀ gbǐh mɔ̀ iě sɛ̍ᵻ ke kèǎnkèànᵻ kɛ̍n i̍ na, wɛ̀ mɔ̀ iě Setɔn-a gbǐh kli̍hgbɛ̍ wɔ̍n sìì, nɛ̀ dɛ̍ se̍ mɔ̀ nu̍ mu̍. 20Mɔ̀ bɔ̌ mɔna̍ nu̍-ɛ jeědih-a mɔ̀ dɛ̍ɛ̍ jě tìh. Jɛ mɔ̀ nu̍ mɔna̍ ka mɔ̀-a nynɛ̌ chlǐh-a wɛ̀ dě ja̍i̍wlɔ̀-ɛ.”

Jusu po̍ Nyɔsoa tlɔ̌

(Matio 11.25-27; 13.16-17)

21Dǒ ti̍ laa̍ di̍i̍-ɛ, nɛ̀ Jusu nmɔ-ɛ dě Nyɔsoa-a Sùù di̍i̍. Wɛ̀ ɔ̍ la̍a̍, “Baa, mɔ̀ ɔ̀ nu̍-a bloa̍ ke ja̍u̍n-a Joi-ɛ, ǐn po̍ ìn tlɔ̌. Dɛ̍nu̍ɛ, dɛ̍ᵻ ìn sìle-a flɔ̍nwlùh kɔn nyɔ̍ ke dɛ̍ juo nyɔ̍ jii̍-ɛ, i̍h bo ìn toe ka plǒai nyɔ̍. I̍i̍n, Baa, àn gbǐh po̍ dɛ̍ bo.

22“Ǐn Baa nyǐ ǐn dɛ̍ᵻ kli̍hgbɛ̍ wɛ̀. Nyɔ̍ dɔɔ se̍ Jǔ juo. Jɛ Baa nɛ due kɔn tɛ̀ ǐn sà-o. Iě nyɔ̍ dɔɔ wɔ̍ se̍ Baa juo ke. Jɛ Jǔ nɛ due kɔn tɛ̀ ǐn sà-o, ɛ̍ ke nyɔ̍ Jǔ tba̍-a chèɛ̀ ɔ̍ iě-a Baa toe-ɛ ke.”

23Wɛ̀ Jusu bǐi dě ɔ̍ kòà we̍ i̍, iě ɔ̍ bla̍ u̍h slǎn. Ɔ̍ la̍a̍, “Jlǐh ìh-a jě-a dɛ̍ᵻ mɔ̀-a jě-aɛ, i̍h nmɔ i̍. 24Ǎn sèàɛ̍ mɔ̀ wlùh, ìh mɔ̀ jě-aɛ, Nyɔsoa-a tu̍owli po̍ nyɔ̍ dɔu ke blǔh baaᵻá pɔ̀n i̍h jě-ɛ i̍ de, jɛ u̍h se̍ i̍h jě. U̍h-a pɔ̀n ìh mɔ̀ wɔ̌n-aɛ wɔ̌n-ɛ i̍ de, jɛ u̍h se̍ i̍h wɔ̌n.”

Gblɛ̍n-ɛ nmɔ Sɛmewlea jǔ-a nɛnǎ

25Wɛ̀ telě nǎ poe nyɔ̍ nyna i̍ ɔ̍ iě Jusu i̍ tɛ̀n. Iě ɔ̍ la̍a̍, “Dlǔtu, dɛ̍ iě nu̍ wɛ̀ iě kmɔ̌ sie feɛ blě ɛ?”

26Iě Jusu la̍a̍ dě ɔ̍ we̍, “Ka Nyɔsoa-a wlu̍ dǎ ɛ? Ka ìn nu̍ ɛ̍-ɛ i̍ wɔ̌n-ɛ ɛ?”

27Iě ɔ̍ la̍a̍, “Ɛ̍ la̍a̍, ‘Jbɛɛ àn Joi Nyɔsoa-a dǒ àn pɔluh kli̍hgbɛ̍ we̍, dǒ àn kmɔ̌ kli̍hgbɛ̍ we̍, dǒ àn gbǐh kli̍hgbɛ̍ we̍, ɛ̍ ke àn wlùh kli̍hgbɛ̍ ke. Nɛ̀ ìn jbɛɛ ìn pònyɔ̍-ɔ ka àn chɛ̀-ɛ.’ ”

28Wɛ̀ Jusu la̍a̍ dě ɔ̍ we̍, “Ɛ̍ taǐn bo ìn sà-a. Nu̍ ìh la, nɛ̀ àn mu̍ kmɔ̌ sie feɛ blě.”

29Jɛ ɔ̍ pɔ̀n ɔ̍ iě ɛ̍ to ka ɔ̍ slɛ̌-a i̍-ɛ. Iě ɔ̍ la̍a̍ dě Jusu we̍, “Nyɔ̍we̍ bo ɔ̀ nu̍ ǐn pònyɔ̍ ɛ?”

30Wɛ̀ Jusu sà ɔ̍ wlu̍ pɔ̀n we̍. Ɔ̍ la̍a̍, “Jɔ̍gbau due bo ɔ̀ sɔ dǒ Juluslɛn iě ɔ̍ mu̍ dǒ Jɛwlekoo wlɔ̀ di̍i̍. Wɛ̀ jlǐ-nyɔ̍ gbɛ̍n ɔ̍, iě u̍h bla̍ ɔ̍, wɛ̀ u̍h chɛn-ɛ ɔ̍ gbaǎn. Wɛ̀ u̍h si̍e̍ ɔ̍ mɔ̀ kǔ mɔ̀ nyi̍ɔ̍ dǒ wìè-i. 31Nɛ̀ Nyɔsoa-a slaǎ sà nyɔ̍-a gba̍ wìè laa̍ ke. Ɔ̍ jě-a jɔ̍gbau laa̍-ɛ, iě ɔ̍ blaɛ ɔ̍, ɔ̍ sì. 32Wɛ̀ Liifaɛ jǔ ji̍ ke. Ɔ̍ nyni̍-a dǒ tà-a chɛ̀-ɛ, wɛ̀ ɔ̍ jě jɔ̍gbau laa̍, iě ɔ̍ blaɛ ɔ̍ ke. 33Jɛ Sɛmewlea jǔ ɔ̀ mu̍-a wìèlè-ɛ, ɔ̍ nyni̍-a dǒ jɔ̍gbau laa̍ we̍-ɛ, wɛ̀ ɔ̍ jě ɔ̍. Sɔ ɛ̍ po̍ ɔ̍ wɔɛ. 34Wɛ̀ ɔ̍ mu̍ dǒ ɔ̍ we̍, iě ɔ̍ po̍ ɔ̍ chìèᵻ chlǎn ke nmɔ̍ i̍. Wɛ̀ ɔ̍ sa̍n i̍h. Iě ɔ̍ po̍ ɔ̍ dǒ ɔ̍ chɛ̀-a soo̍pà kɛ̍n, wɛ̀ ɔ̍ gba̍ ɔ̍ dǒ dihwi̍h gbò di̍i̍, dǒ ɔ̍ gbɛ̀n-ɛ ɔ̍ we̍ i̍. 35Sɔ̀n sɛ̀n-aɛ, iě ɔ̍ sà-e sebla̍ wlǐ-a jɔ̌ sɔɔ̌n, wɛ̀ ɔ̍ nyǐ i̍h nyɔ̍ ɔ̀ gbɛ̀n-a dǒ gbò laa̍ we̍ i̍-ɛ. Wɛ̀ ɔ̍ la̍a̍, ‘Gbɛ̀n dǒ jɔ̍gbau la we̍ i̍ o. Dɛ̍ àn mu̍-a ple̍ dǒ i̍h de̍e̍-ɛ, ǐn ji̍ de̍ka-ɛ, nɛ̀ ǎn mu̍ ɛ̍ pɛ̌ɛ o.’

36“Dě àn chɛ̀ di̍i̍-ɛ, u̍h nɛ-a ta̍a̍n-ɛ, nyɔ̍we̍ bo ɔ̀ dǎɛ jɔ̍gbau la ɔ̀ jlǐ-nyɔ̍ bla̍-aɛ, ɔ̍ pònyɔ̍ ɛ?”

37Wɛ̀ telě nǎ poe nyɔ̍ la̍a̍, “Jɔ jě-a ɔ̍ wɔɛ-ɛ bo.”

Wɛ̀ Jusu la̍a̍ dě ɔ̍ we̍, “Mu̍ ìè ɛ̍ ba̍ nu̍ ke.”

Jusu mu̍ dě Mata ke Mɛle we̍ i̍ nala

38Jusu ke ɔ̍ kòà-a mu̍-a Juluslɛn-ɛ, iě u̍h nyni̍ dǒ wlɔ̀ due di̍i̍. Wɛ̀ nynɔ̌ ɔ̀ kɔn nynɛ̌ nu̍-a Mata-ɛ ɔ̍ gba̍ Jusu gbò we̍. 39Ɔ̍ blě deǐ nynɔ̌gbaɔ, ɔ̍ nynɛ̌ bo Mɛle. Wɛ̀ ɔ̍ tè i̍ dǒ Joi jǔ ɔ̍ po̍ dě ɔ̍ nǎ po̍ wlu̍ we̍ dounᵻ. 40Jɛ dbo̍ dɔu Mata-a nu̍-aɛ, sɔ ɛ̍ feǎn dǒ ɔ̍ wlì. Iě ɔ̍ mu̍ dě Jusu we̍, wɛ̀ ɔ̍ la̍a̍, “Joi, ǐn deǐ si̍e̍-a ǐn nɛ due dbo̍ la kwa̍ i̍-ɛ, nɛ̀ jě ɛ̍ ae? Sèàɛ̍ ɔ̍ wlùh ɔ̍ iě ǐn we̍ gbǎ lě.”

41Wɛ̀ Joi sà ɔ̍ wlu̍ pɔ̀n we̍. Ɔ̍ la̍a̍, “Mata, àn ku̍-a tlɛ̍-ɛ, iě sèò-a nu̍ m̀ dǒ dɛ̍ᵻ dɔu we̍. 42Dɛ̍ due bo ɛ̀ kɔn ɛ̀ iě nɛ. Dɛ̍ ɛ̀ nmɔ-a jii̍-ɛ bo Mɛle tba̍ chèɛ̀ wɛ̀, ɛ̀ se̍-a ɔ̍ kwa̍a̍ sà-ɛ mu̍-ɛ.”

Currently Selected:

Luu 10: KDNT

Highlight

Copy