Nu̍-dɛ̍ᵻ 9

Sɔɔ-a Nyɔsoa dɛ-ɛ gbǎ-a

(Nu̍-dɛ̍ᵻ 22.6-16; 26.12-18)

1Dǒ ti̍ laa̍ di̍i̍-ɛ, nɛ̀ Sɔɔ-a chɛ̍n Joi-a kòà sìì we̍ i̍ ɔ̍ iě u̍h gbe̍ja̍a̍ poe. Ɛ̍ bo ɛ̀ gba̍ ɔ̍ dě Nyɔsoa-a slaǎ sà nyɔ̍ klaa we̍. 2Wɛ̀ ɔ̍ sèàɛ̍ ɔ̍ wlùh ɔ̍ iě ɔ̍ chlǐh-dɛ̍ᵻ nyǐ, i̍h iě dě wɛɛ sà gbòᵻ nɛ-a dǒ Damaɛkɔ wlɔ̀-ɛ di̍i̍ i̍ mu̍. Wɛ̀ pò ɔ̍ jě nynɔ̌gbaɔᵻ ke jɔ̍gbauᵻ u̍h ja Joi Jusu-a Wìè gba̍-ɛ, ɔ̍ iě u̍h gbɛ̍n-nyɔ̍ we̍i̍ nu̍ ɔ̍ iě u̍h dǒ Juluslɛn gba̍.

3Wɛ̀ ɔ̍ gbǎ wìè kɛ̍n. Ɔ̍ kɔǎɛn Damaɛkɔ i̍ wɛ̀ sǔh, ɔ̍ iě-a kèle-ɛ nɛ̀ fààn nape̍ sɔ dě ja̍u̍n we̍ ɛ̍ wa̍n sààn ɔ̍ de̍e̍ i̍. 4Iě ɔ̍ kà i̍ dǒ bloɔ̍. Dǒ ɔ̍ wɔ̌n-ɛ wlu̍ ɛ̍ la̍a̍ dě ɔ̍ we̍, “Sɔɔ, Sɔɔ, dɛ̍ kɔn mɔ̍ àn jě-e klě ɛ?”

5Iě ɔ̍ la̍a̍, “Nyɔ̍ bo ɛ?”

Wɛ̀ ɔ̍ la̍a̍, “Mɔ̍ Jusu, ɔ̀ àn jě-ea klě-ɛ. 6Jɛ sɔ bloɔ̍ ìè dǒ tùgbàwlɔ̀ di̍i̍ mu̍. Dɛ̍ ìn kɔn ìè-a nu̍-ɛ, dě-e bo nyɔ̍ nɛ ɔ̍ iě ɛ̍ ìn wlùh sèàɛ̍.”

7Nyɔ̍ ùh ke Sɔɔ na-ɛa wìè-iɛ, u̍h wɔ̌n wlu̍ laa̍ jɛ u̍h se̍ nyɔ̍ jě. U̍h nyna i̍, iě u̍h se̍ wɔ̍n-a fuɛn nu̍. 8Sɔɔ sɔ-a dǒ bloɔ̍-ɛ iě ɔ̍ pɔ̀ni jlǐh, jɛ nɛ̀ ɔ̍-ɔ jě i̍. Wɛ̀ u̍h gbɛ̍n ɔ̍ sɔ̍n i̍, iě u̍h gba̍ ɔ̍ dǒ Damaɛkɔ wlɔ̀ di̍i̍. 9Wɛ̀ dě ɔ̍ jlǐh gbe-e dǒ wǐh ta̍a̍n di̍i̍, ɔ̍ se̍ niɛ̍ nǎ.

10Nɛ̀ Jusu-a kòà due nɛ dǒ Damaɛkɔ, ɔ̍ nynɛ̌ bo Ɛlenaea. Wɛ̀ Joi dǎ ɔ̍ dě se̍ mɔ̌ ja̍ di̍i̍, ɔ̍ la̍a̍, “Ɛlenaea.”

Iě Ɛlenaea la̍a̍, “Mɔ̍ la o Joi.”

11Wɛ̀ Joi la̍a̍ dě ɔ̍ we̍, “Sɔ-ɔ, mu̍ dě wìè ɛ̀ Kɔn nynɛ̌ nu̍-a Slɛ̌ i̍-ɛ kɛ̍n dě Juda blǐ gbò. Sɔɔ ɔ̀ sɔ-a dǒ Tasɔ-ɛ, dě ɔ̍ nɛ ɔ̍ ba̍le, nɛ̀ ìn tèle ɔ̍ tìh i̍. 12Mɔ̀ bo ɔ̍ jě dě ɔ̍ se̍ mɔ̌ ja̍ di̍i̍, nɛ̀ ìn ji̍ i̍ wɛ̀ ìn tè ɔ̍ sɔ̀n dlǔ ɔ̍ iě i̍ jě dode̍.”

13Iě Ɛlenaea la̍a̍, “Joi, jɔ̍gbau la ǐn dǔ ɔ̍ pɔ̀n wɔ̌n-ɛ se̍e̍ dě nyɔ̍ dɔu wɔ̍ɔ̍n. U̍h la̍ ɔ̍ nu̍ dɛ̍ᵻ gbàìn gbàìn dǒ àn nyɔ̍ nɛ-a dě Juluslɛn-ɛ pùn. 14Ɛ̍ kɔn tìh bo slaǎ sà nyɔ̍ klaaᵻ nyǐ ɔ̍ tùn wɛ̀ ɔ̍ ji̍ nɔ̍ɔ̀ ɔ̍ iě nyɔ̍ ɔ̀ mu̍-a àn nynɛ̌ i̍ dǎ-a gbɛ̍n.”

15Jɛ Joi la̍a̍ dě ɔ̍ we̍, “Mu̍, dɛ̍nu̍ɛ, ǐn tba̍ ɔ̍ chèɛ̀ wɛ̀ ɔ̍ iě ǐn jǔ dbee, wɛ̀ ɔ̍ iě ǎn nynɛ̌ dě ùh se̍-a Juu nyɔ̍-ɛ ke blǔh baaᵻ we̍ gba̍, ɛ̍ ke dě Eslɔɛ nyɔ̍ we̍ ke. 16Nɛ̀ ǎn mu̍ ɛ̍ ɔ̍ i̍ to ka ɔ̍ mu̍-a jua̍i̍ sàɛ̀-ɛ nu̍ dɛ̍blɔ dǒ ǎn nynɛ̌-a tìh we̍-ɛ.”

17Wɛ̀ Ɛlenaea mu̍ iě ɔ̍ pa̍ dě Sɔɔ we̍ gbò, wɛ̀ ɔ̍ tè ɔ̍ sɔ̍n dlǔ. Ɔ̍ la̍a̍, “De̍di̍i̍ Sɔɔ, ti̍ àn ji̍-a nɔ̍ɔ̀-ɛ, Joi Jusu ɔ̀ wlùh-ia ìn i̍ dǒ wìè-iɛ, ɔ̍ bo ɔ̀ dbo̍ m̍ nɔ̌ ìn we̍ ìè i̍ jě dode̍, Nyɔsoa-a Sùù iě ìn i̍ jǐi.” 18Dǒ tàdùè laa̍ dɛ̍ ɛ̀ sɔ-a dě ɔ̍ jlǐh-ɛ, ka dɛ̍-a kɔ̌n-ɛ. Sɔ ɔ̍ jě la̍ i̍ dode̍ sǔh. Wɛ̀ ɔ̍ sɔ bloɔ̍, iě ɔ̍ poe-ɛ nǐ dlǔ. 19Iě ɔ̍ di̍ dɛ̍, wɛ̀ ɔ̍ dǔ gbǐh jě-ɛ dode̍.

Sɔɔ dɛ wlǔh i̍ nyɔ̍gbei de̍e̍

Sɔɔ sì wǐh gbɔ̍ dě Jusu-a kòà nɛ-a dǒ Damaɛkɔ-ɛ we̍. 20Dǒ ɔ̍ nyna iě ɔ̍ mu̍ dě wɛɛ sà gbòᵻ sɔ̀n i̍ wɛ̀ ɔ̍ bla̍ tìh, ɔ̍ la̍a̍, “Jusu nu̍ Nyɔsoa-a Jǔ.”

21Nyɔ̍ kli̍hgbɛ̍ ùh wɔ̌n-a ɔ̍ wlu̍-ɛ, sɔ ɛ̍ wlǔh i̍ u̍h de̍e̍, wɛ̀ u̍h-a tèle-e we̍ i̍. U̍h la̍a̍, “Pò nyɔ̍ dǎ nynɛ̌ la-ɛ, jɔ̍gbau ɔ̀ gbɔ̀lɔ-a nyɔ̍-ɔ dě Juluslɛn-ɛ, ɛ̍ se̍ ɔ̍ mɔ ae? Ɛ̍ se̍ ɔ̍ iě u̍h gbɛ̍n wɛ̀ ɔ̍ iě u̍h slaǎ sà nyɔ̍ klaaᵻ we̍ gba̍ tìh ɔ̍ se̍ nɔ̍ɔ̀ ji̍ ae?”

22Jɛ gbǐh-a gbǎ dě Sɔɔ ku̍u̍ te̍e̍ kleǐn, iě ɔ̍ flɔn-ɛ ɛ̍ we̍i̍ te̍gbe̍i̍n ka Jusu bo ɔ̀ nu̍-a Nyɔsoa-a Chèɛ̀ Tba̍ju-ɛ. Sɔ ɛ̍ se̍ Juu nyɔ̍ nɛ-a dǒ Damaɛkɔ-ɛ wlu̍ wɔ̍n nyǐ.

23Ɛ̍ gba̍ wǐh dɔu wɛ̀ Juu nyɔ̍ gbòe i̍, iě u̍h sɔ̌ u̍h iě ɔ̍ dbǎ. 24Jɛ nyɔ̍ di̍ Sɔɔ-a doun ka u̍h-a fuo-a saǎn wɔ̍n wlù ke sɔ̀n u̍h iě-a ɔ̍ dbǎ-a. 25Wɛ̀ ɔ̍ kòà dǔ ɔ̍-ɔ maɔ̍, u̍h po̍ ɔ̍ dě tìa̍a̍n di̍i̍. Wɛ̀ u̍h jaɛ ɔ̍ dǒ saǎn-a fɛ̍nwɔn we̍, iě u̍h tlìh-i ɔ̍.

Sɔɔ mu̍ Juluslɛn i̍ nala

26Ti̍ Sɔɔ mu̍-a dǒ de̍ Juluslɛn-ɛ, sɔ ɔ̍ pɔ̀n Jusu-a kòà nɛ-a deě-ɛ nynɛ̌ gbǎ-a i̍, jɛ nɛ̀ u̍h-a ple̍ ɔ̍ jǔ. Dɛ̍nu̍ɛ, ka ɔ̍ iě-a Jusu-a kòà nu̍ wɛ̀-ɛ, u̍h se̍ ɛ̍ tìh chɛ̀ po̍. 27Jɛ Banaba dǔ ɔ̍, iě ɔ̍ gba̍ ɔ̍ dě gba̍tòà we̍. Wɛ̀ ɔ̍ sèàɛ̍ u̍h wlùh ka Sɔɔ jě-a Joi dǒ wìè-i iě Joi wlu-a dě ɔ̍ we̍-ɛ. Wɛ̀ ɔ̍ bla̍ Nyɔsoa-a tìh gbài̍gbài̍ dǒ Damaɛkɔ wlɔ̀ di̍i̍, dǒ Jusu-a nynɛ̌ kɛ̍n. 28Wɛ̀ Sɔɔ sie dǒ u̍h we̍, ɔ̍ ke u̍h-a nu̍ mu̍-ɔn ji̍-ɔn dǒ Juluslɛn. Wɛ̀ ɔ̍ bla̍ tìh gbài̍gbài̍ dǒ Joi-a nynɛ̌ kɛ̍n. 29Iě ɔ̍ wlu dě Juu nyɔ̍ ùh-a po̍-a Klii wlu̍-ɛ we̍, ɔ̍ ke u̍h-a sà wɔ̍ɔ̍n i̍. Sɔ u̍h-a pɔ̀n la̍ ɔ̍ dbǎ-a i̍ sǔh. 30Jɛ ti̍ de̍di̍i̍ᵻ juo-ao dɛ̍ i̍-ɛ, iě u̍h dǔ ɔ̍ wɛ̀ u̍h gba̍ ɔ̍ dǒ Sɛsewlia wlɔ̀ di̍i̍. Iě u̍h dbo̍ ɔ̍ dǒ Tasɔ wlɔ̀ di̍i̍.

31Sɔ chɔchi̍h nyɔ̍ kli̍hgbɛ̍ nɛ-a dě Judia ke, Kaladii ke Sɛmewlea bloa̍ kɛ̍n i̍-ɛ, u̍h-a wlùh tè i̍, wɛ̀ u̍h-a gbǐh-a gbǎ-e. Nɛ̀ ka u̍h-a ple̍-a Joi-a faɔn-ɛ, nɛ̀ kǎ Nyɔsoa-a Sùù-a gbǎ u̍h we̍. Iě u̍h ku̍ dɛ̍blɔ.

Pitɛ nɛ Leda ke Jɔɔpa

32Pitɛ na Nyɔsoa nyɔ̍ we̍ i̍ na na-a, wɛ̀ ɔ̍ mu̍ dě juh tǐn-a dǒ Leda wlɔ̀ di̍i̍-ɛ we̍ i̍ nala weɛ̍ due we̍. 33Dě ɔ̍ jɛɛ jɔ̍gbau due ɔ̍ nynɛ̌ bo Enia. Ɔ̍ klɔ-ɛ, tà ɔ̍ pɛ̌n-a i̍-ɛ, dǒ ɔ̍ nui dɛ̍ᵻ kli̍hgbɛ̍ dǒ sɔ̀nᵻ mɛ̀ta̍a̍n di̍i̍. 34Wɛ̀ Pitɛ la̍a̍ dě ɔ̍ we̍, “Enia, Jusu Klai pǔh-i m̀ wɛ̀. Sɔ bloɔ̍ ìè àn bèe̍ nma̍le.” Dǒ ɔ̍ nyna iě ɔ̍ sɔ bloɔ̍. 35Nyɔ̍ kli̍hgbɛ̍ nɛ-a dǒ Leda ke Seɛwlɔn fɔɔ-ɛ, iě u̍h jě ɔ̍, wɛ̀ ɛ̍ fèàɛ̀ u̍h kli̍hgbɛ̍ dě Joi we̍.

36Nɛ̀ nynɔ̌ due nɛ dǒ Jɔɔpa wlɔ̀ di̍i̍ ɔ̍ nynɛ̌ bo Tabita (ɛ̍ Klii wlu̍ nu̍ Dɔɔka. Ɛ̍ gbɔ̀ nu̍ kwɛ̍). Ɔ̍ blě wlùh gbaɛ-ɛ. Ɔ̍ nu̍ dɛ̍ᵻ chɛ̀ ti̍ kli̍hgbɛ̍ we̍ iě ɔ̍ gbǎ nyɔ̍gbà nyɔ̍ we̍. 37Dǒ ti̍ laa̍ di̍i̍ bo ɔ̍ poa-ɛ iě ɔ̍ mɛ̌. Wɛ̀ u̍h dle ɔ̍ kǔ iě u̍h pɛ̌n-ɛ ɔ̍ i̍ dě ja̍i̍ gbòju di̍i̍. 38Jɛ Jɔɔpa ke Leda se̍ we̍ i̍ ti̍ɛ̍ɛn, wɛ̀ Jusu-a kòà nɛ-a Jɔɔpa-a iě u̍h wɔ̌n Pitɛ-a nynɛ̌ dǒ Leda. U̍h dbo̍-e jɔ̍gbauᵻ sɔɔ̌n, u̍h tù u̍h wlu̍ wɔ̍n u̍h iě Pitɛ dǎ. U̍h la̍a̍, “Dbǎkà, wa̍n bloɔ̍ ìè nɔ̌ àɔ̀ we̍ ji̍.” 39Wɛ̀ Pitɛ wa̍n bloɔ̍, ɔ̍ gbǎ dǒ u̍h de̍e̍ ɔ̍ ke u̍h mu̍. U̍h nyni̍-a wlɔ̀-ɛ, iě u̍h-a gba̍ Pitɛ dě ja̍i̍ gbòju di̍i̍ tà nynɔ̌-a kǔ pɛ̌n-a i̍-ɛ. Wɛ̀ tèwànynɔ̌gbaɔᵻ kli̍hgbɛ̍ nɛ-a dǒ wlɔ̀-a chɛ̀ di̍i̍-ɛ, iě u̍h dlɛ̌ Pitɛ u̍h-a fìn. Ti̍ Dɔɔka tè-a kmɔ̌ i̍-ɛ, plɛ̀i̍ᵻ ke wola̍ᵻ ɔ̍ tba̍-a dǒ u̍h we̍-ɛ, nɛ̀ kǎ u̍h-a to i̍h Pitɛ i̍. 40Jɛ Pitɛ po̍ u̍h kli̍hgbɛ̍ sɔ̀n i̍. Wɛ̀ ɔ̍ po̍ kɔlu̍ᵻ wlù iě ɔ̍ ba̍le. Iě ɔ̍ fèàɛ̀ dě nynɔ̌-a kǔ we̍, wɛ̀ ɔ̍ la̍a̍, “Tabita, sɔ bloɔ̍.” Wɛ̀ ɔ̍ pɔ̀ni jlǐh, ɔ̍ jě-a Pitɛ-ɛ, iě ɔ̍ sɔ bloɔ̍ ɔ̍ tè i̍. 41Wɛ̀ Pitɛ dǔ ɔ̍ ja̍i̍ iě ɔ̍ nyna i̍. Iě Pitɛ dǎ wlùh gbaɛ-ɛ blě nyɔ̍ ke u̍h-a tèwànynɔ̌gbaɔᵻ, wɛ̀ ɔ̍ nɛ feɛ wɔ̍i̍n iě ɔ̍ sà ɔ̍ kwlǎ dě u̍h we̍. 42Ɛ̍ pɔ̀n laa̍ bo ɛ̀ sɛ̍ i̍ dǒ Jɔɔpa, iě nyɔ̍ dɔu gbaɛ Joi wlùh. 43Wɛ̀ Pitɛ sì wǐh dɔu dǒ Jɔɔpa dǒ Samo ɔ̀ nu̍-a dɛ̍ᵻ ku̍ᵻɛ́ we̍.

Currently Selected:

Nu̍-dɛ̍ᵻ 9: KDNT

Highlight

Copy