Nu̍-dɛ̍ᵻ 7

Slifɛn wlu dě taɔ pa̍ nyɔ̍ we̍

1Wɛ̀ Nyɔsoa-a slaǎ sà nyɔ̍ klaa tèle Slifɛn i̍, ɔ̍ la̍a̍, “Dɛ̍ u̍h bla̍-a dǒ ìn pùn-ɛ, kǎ ɛ̍ nɛ chɛ̀ ae?”

2Iě Slifɛn la̍a̍, “De̍di̍i̍ᵻ ke baaᵻ, mɔ̀ tba̍ dounᵻ i̍. Ti̍ à baa klaa Eblaɛɛn tǐn-a dě Mɛsopotemia bloa̍ kɛ̍n-ɛ, dě-e bo tìh-a i̍ bɛ̌-ɛ Nyɔsoa wlǔh-i ɔ̍ i̍, wɛ̀ ɔ̍ dǔ dǒ Awlɛn wlɔ̀ di̍i̍ tǐn la̍ mu̍-ɛ. 3Ɔ̍ la̍a̍ dě Eblaɛɛn we̍, ‘Tǎli àn chɛ̌ ke ìn blǐ bloa̍ i̍. Blǔh ǎn mu̍-a ìn toe-ɛ, dě ɛ̍ kɛ̍n ìè mu̍.’ 4Iě ɔ̍ sɔ dǒ Kaodia bloa̍ kɛ̍n, wɛ̀ ɔ̍ tǐn Awlɛn. Ti̍ Eblaɛɛn baa mɛ̌-aɛ, wɛ̀ Nyɔsoa dbo̍ ɔ̍ da̍a blǔh la kɛ̍n. Da̍a bo mɔ̀ tǐn-a ka. 5Nɛ̀ Nyɔsoa se̍ ɔ̍ blǔh-a fɔ̌ nyǐ ke̍. Ɛ̍ gbɛna due-a chɛ̀ bo ɔ̍ se̍ ɔ̍ nyǐ. Jɛ ɔ̍ po̍ wlu̍ tɔ̀ma̍a̍ ɔ̍ la̍ Eblaɛɛn ke ɔ̍ tloemlai bo ùh-a mu̍ blǔh la kɔn. Dǒ ti̍ laa̍ di̍i̍-ɛ nɛ̀ Eblaɛɛn se̍-a jǔ-a chɛ̀ wlǔh-i. 6Ɛ̀ la bo Nyɔsoa bla̍ dě ɔ̍ we̍. Ɔ̍ la̍a̍, ‘Àn tloemlai-a mu̍ dihwi̍hᵻ nu̍ dě dakɔ̍ kɛ̍n, nɛ̀ u̍h-a mu̍ u̍h kèi̍ᵻ we̍i̍ nu̍. Wɛ̀ u̍h iě u̍h tìh i̍ nu̍ dǒ sɔ̀nᵻá kmɛ nyìɛ̍ (400) di̍i̍. 7Jɛ blǔh kɔn kèi̍ᵻ u̍h-a mu̍-a nu̍-ɛ, nɛ̀ ǎn mu̍ ɛ̍ kàn gbɛ̍n. Pò ɛ̍ sì i̍-ɛ, nɛ̀ u̍h-a mu̍ dě blǔh-a chɛ̀ kɛ̍n sɔ, wɛ̀ u̍h iě ǐn wɛɛ sà da̍a.’ 8Wɛ̀ Nyɔsoa toe Eblaɛɛn plɔ̀n gbǎ-a, ɛ̍ iě juola nu̍ dǒ ku̍o̍ ɔ̍ po̍-aɛ we̍. Iě Eblaɛɛn wlǔh-i Ase. Wǐh mɛ̀ta̍a̍n sì-aɛ, wɛ̀ ɔ̍ po̍ ɔ̍ plɔ̀n. Wɛ̀ Ase wlǔh-i Jekɔ, wɛ̀ Jekɔ dǔ à blǔh baaᵻá pùè jɔ̌ sɔɔ̌n laa̍ wlǔh-iɛ.

9“Blǔh baaᵻ laa̍ u̍h nu̍ Josɛ wlɛ̀n we̍ iě u̍h ple̍ ɔ̍ dě Iche bloa̍ kɛ̍n. Jɛ Nyɔsoa nɛ ɔ̍ we̍, 10iě ɔ̍ sèìe ɔ̍ dě wě kli̍hgbɛ̍ ɔ̍ jii-a wɔ̍i̍n-ɛ di̍i̍. Wɛ̀ Nyɔsoa nyǐ Josɛ flɔ̍nwlùh. Iě ɔ̍ nu̍ ɛ̍ wɛ̀ Iche nyɔ̍-a blǔh baa Fewlo wlǎ Josɛ wlùh dlǔ i̍. Wɛ̀ Fewlo nu̍ ɔ̍ Iche nyɔ̍-a wlu̍ kwa̍ blě nyɔ̍ we̍i̍, ɛ̍ ke ɔ̍ chɛ̀-a gbò kli̍hgbɛ̍ ke. 11Wɛ̀ mɔ̌ gbǎ dě Iche ke Keinan bloa̍ kli̍hgbɛ̍ kɛ̍n. Sɔ à baaᵻ jě di̍-dɛ̍ dɛ, iě u̍h-a sàɛ̀ jua̍i̍ dɛ̍blɔ. 12Ti̍ Jekɔ wɔ̌n-a di̍-dɛ̍ᵻá nynɛ̌ dě Iche-ɛ, wɛ̀ ɔ̍ dbo̍-e à baaᵻ sàǐtòò. 13Jɛ gbɔ̍ᵻ sɔɔ̌n naɛ u̍h gba̍-aɛ, dǒ Josɛ sà-ɛ ɔ̍ chɛ̀ tà dě ɔ̍ de̍di̍i̍ᵻ we̍. Wɛ̀ Fewlo dǔ Josɛ-a chɛ̌ juo-ɛ. 14Iě Josɛ dǔ ɔ̍ baa Jekɔ ke ɔ̍ chɛ̌ kli̍hgbɛ̍ wlu̍ we̍ dbo̍-ɛ, u̍h iě Iche ji̍. U̍h kli̍hgbɛ̍ u̍h nu̍ kwela mɛ̀sɔɔ̌n jɔ̌ m̀m̌ (75). 15Wɛ̀ Jekɔ mu̍ dě Iche, dě ɔ̍ ke à baaᵻ mɛ̌-ɛ. 16Iě u̍h-a kǔᵻ ja-ɛɛ dode̍ Seɛkem, wɛ̀ u̍h tè u̍h i̍ dě gbàlɔ̍ biě Eblaɛɛn tɛ̀n-aɛ di̍i̍, ɛ̀ ɔ̍ tɛ̀n-a wlǐ gbɔ̍-ɔ dě Amɔ nyɔ̍ kwa̍a̍-ɛ.

17“Wlu̍ Nyɔsoa po̍-a tɔ̀ma̍a̍ dě Eblaɛɛn we̍-ɛ, ti̍ ɛ̍ nɛ-ɛ ti̍-a kɔǎn la̍ we̍-ɛ, sɔ à nyɔ̍ nɛ-a dě Iche-ɛ, u̍h-a pàɛ̀n la̍ nya̍ kaa̍ sǔh. 18Wɛ̀ blǔh baa dɔɔ gbǎ dǒ gbalǎ i̍ dě Iche. Jɛ ɔ̍ nɔ̀ɔ̍, ɔ̍ se̍ Josɛ-a dɛ we̍ i̍ ju̍o̍e. 19Ɔ̍ boe à nyɔ̍ɔ i̍ iě ɔ̍ nu̍ u̍h kà i̍. Ɔ̍ nu̍ à baaᵻá kloǒ wɛ̀ ɔ̍ po̍ u̍h-a nynuu̍pli sɔ̀n i̍ u̍h iě mɛ̌. 20Dǒ ti̍ laa̍ di̍i̍ bo Mose wlǔh-i. Ɔ̍ nmɔ jii̍, iě ɔ̍ nmɔ dě Nyɔsoa jlǐh i̍. Ɔ̍ baa bei gbɛ̀n dǒ ɔ̍ we̍ i̍ dǒ chǔhᵻ ta̍a̍n di̍i̍ dě gbò. 21Ti̍ u̍h po̍-a ɔ̍ sɔ̀n-ɛ, wɛ̀ Fewlo-a jǔ nynɔ̌gbaɔ dǔ ɔ̍-ɔ. Iě ɔ̍ gbàɛ̀n ɔ̍, ɔ̍ chɛ̀-a jǔ ka. 22Wɛ̀ Mose poe-ɛ nǎ dǒ Iche nyɔ̍-a flɔ̍nwlùh kli̍hgbɛ̍ we̍. Sɔ ɔ̍ wlu-ɛ ke ɔ̍ nu̍-dɛ̍ᵻ ku̍ wɔ̍n.

23“Ti̍ Mose-a sɔ̀nᵻ nu̍-a kwela nyìɛ̍-ɛ, wɛ̀ ɔ̍ po̍ tìh gbɔ̀ ɔ̍ iě dě ɔ̍ blǐ Eslɔɛ nyɔ̍ we̍ i̍ nala mu̍. 24Ɔ̍ mu̍-aɛ, dǒ ɔ̍ jě-e u̍h-a due nɛ̀ Iche jǔ-a nu̍ ɔ̍ kà i̍. Wɛ̀ ɔ̍ wlǔh ɔ̍ kɛ̍n iě ɔ̍ sàɛ̀ Iche jǔ laa̍ gba̍a̍ ɔ̍ dbǎ ɔ̍. 25Mose jajeɛ̍ ɔ̍ chɛ̀-a nyɔ̍-a mu̍ ɛ̍ i̍ juo de, ka Nyɔsoa-a mu̍-a ɔ̍-ɔ jii wɛ̀ ɔ̍ iě-a u̍h sèìe-ɛ. Jɛ u̍h se̍ ɛ̍ i̍ juo. 26Sɔ̀n sɛ̀n-aɛ, Mose iě-a mu̍-ɛ, nɛ̀ Eslɔɛ nynuu̍ sɔɔ̌n-a fɔ̀n-ɛ. Sɔ ɔ̍ pɔ̀n u̍h-a wlu̍ tàdùè po̍-ɛ i̍. Wɛ̀ ɔ̍ la̍a̍, ‘Mɔ̀ɔ̍ la mɔ̀ɔ̍ de̍di̍i̍ᵻ, dɛ̍nu̍ mɔ̀-a sǔh-a fɔ̀n ɛ?’ 27Sɔ jɔ nu̍-a ɔ̍ ba̍ kà i̍-ɛ, ɔ̍ tǔn Mose kleǐn. Ɔ̍ la̍a̍, ‘Nyɔ̍ bo ɔ̀ nu̍ ìn à wlu̍ kwa̍ blě nyɔ̍ ke à sàwi̍h sì nyɔ̍ we̍i̍ ɛ? 28Ka ìn nu̍-a Iche jǔ laa̍ dbǎ-a sɔ̀nwa̍n-a, kǎ àn pɔ̀n ìè ǐn dbǎ-a nu̍ ke ae?’ 29Mose wɔ̌n-a ɔ̍ wlu̍ la-a, iě ɔ̍ ple̍ ɔ̍ mu̍ dě Mediɛn bloa̍ kɛ̍n, dě ɔ̍ tǐn. Dě-e bo ɔ̍ wlǔh-i jɔ̍gbauᵻ nynuu̍ sɔɔ̌n.

30“Dě ɔ̍ nɛ wɛ̀ sɔ̀nᵻá kwela nyìɛ̍ sì, wɛ̀ Nyɔsoa-a ǐnchɔ̀ wlǔh-i ɔ̍ i̍ dě kwlǎslò we̍ dǒ Saɛnaɛ Tlu̍h gbɔ̀ì. Dě nɛ̍-a pàìbǒ di̍i̍ bo ɛ̍ jii dǒ kwlǎ fàn ja̍. 31Mose jě-a nɛ̍ laa̍-ɛ, sɔ ɛ̍ flɔn-ɛ ɔ̍ wɔ̍n. Wɛ̀ ɔ̍ klɛɛn dǒ ɛ̍ we̍ ɔ̍ iě ɛ̍ ja̍ gbɛ̀n chɛ̀gbɛɛ. Dǒ ɔ̍ wɔ̌n-ɛ Joi-a wlu̍. 32Wlu̍-a chɛ̀ la̍a̍, ‘Mɔ̍ ìn baaᵻá Nyɔsoa, mɔ̍ Eblaɛɛn ke Ase ke Jekɔ-a Nyɔsoa.’ Sɔ Mose-a ku̍-a tlɛ̍ la̍-ɛ sǔh, wɛ̀ ɔ̍ se̍ dě tà-a chɛ̀ gbɛ̀n-ɛ bɛ̌ɛ. 33Wɛ̀ Joi la̍a̍ dě ɔ̍ we̍, ‘Sà bu̍hdih bu̍hᵻ i̍, dɛ̍nu̍ɛ, blǔh kɔn kɛ̍n ìn nyna-a i̍-ɛ, ɛ̍ nɛ gbàìn. 34Ǎn nyɔ̍ nɛ-a dě Iche-ɛ, ka u̍h-a nu̍-a kà jě-ɛɛ, ǐn jě ɛ̍ wɛ̀. Iě ǐn wɔ̌n u̍h-a flɛ̀n i̍ wlǎ wlu̍ wɛ̀. Ǐn ji̍ nɔ̌ sɔ̀n wɛ̀ iě u̍h sèìe. Ji̍ da̍a, ǎn mu̍ ìn dě de̍ Iche dbo̍.’

35“Mose u̍h tba̍-a chla, iě u̍h la̍a̍, ‘Nyɔ̍ bo ɔ̀ nu̍ ìn à wlu̍ kwa̍ blě nyɔ̍ ke à sàwi̍h sì nyɔ̍ we̍i̍ ɛ?’ Ɔ̍-ɔ due laa̍ bo Nyɔsoa dbo̍-a ɔ̀ iě-a ka u̍h-a wlu̍ kwa̍ blě nyɔ̍ ke u̍h-a sèìe nyɔ̍ nu̍. Ɔ̍ ǐnchɔ̀ ɛ̀ wlǔh-ia Mose i̍ dǒ kwlǎ fàn ja̍-ɛ, ɛ̍-ɛ bo ɔ̍ jii wɛ̀ ɔ̍ nu̍ ɛ̍. 36Nyɔ̍ wɔ̍n flɔn-ɛ dɛ̍ᵻ ke jbaɛdih bo Mose po̍ wɛ̀ ɔ̍ sà u̍h dě Iche, ɛ̍ ke dǒ Jbǒ Sàɛ̀n wɔ̍i̍n ke. Ɔ̍ nu̍ i̍h ke dě kwlǎslò we̍ dǒ sɔ̀nᵻá kwela nyìɛ̍ di̍i̍. 37Mose laa̍ bo ɔ̀ sèàɛ̍ Eslɔɛ nyɔ̍ wlùh, ɔ̍ la̍a̍, ‘Nyɔsoa-a mu̍ mɔ̀ ɔ̍ tu̍owli po̍ nyɔ̍ we̍ dbo̍ ka ɔ̍ nu̍-a ǐn dbo̍-ɛɛ. Ɔ̍ mu̍ mɔ̀ de̍di̍i̍ᵻá nyɔ̍ due nu̍.’ 38Mose laa̍ bo ɔ̀ nɛ dě u̍h-a gbɔ̀ù nynɛ̌ iě ɔ̍ ke à baaᵻ na dě kwlǎslò we̍, ɛ̍ ke Nyɔsoa-a ǐnchɔ̀ jɛ wlu-a ɔ̍ we̍ dǒ Saɛnaɛ Tlu̍h kɛ̍n-ɛ ke. Dǒ ɔ̍ jě-e kmɔ̌ nɛ tu̍owli ɔ̍ iě sìì nɔ̌ àɔ̀ we̍.

39“Jɛ à baaᵻ se̍ ɔ̍ wlu̍ nu̍. Wɛ̀ u̍h tba̍ ɔ̍ chla, iě u̍h-a wlùh-a mu̍ dě de̍ Iche. 40Wɛ̀ u̍h sèàɛ̍ Ewlɔn wlùh, u̍h la̍a̍, ‘Mɛ̍ nyɔsoa dǒ àɔ̀ we̍ à iě dǒ ɛ̍ de̍e̍ wɔ̀. Jɛ Mose jɔ sà-a à dě Iche-ɛ, dɛ̍ nu̍-a ɔ̍-ɛ à se̍ ɛ̍ juo.’ 41Dǒ-o bo u̍h mɛ̍-ɛ bli plɔ̀ dǒ ti̍ laa̍ di̍i̍, ɛ̍ nu̍ kwɛ̍i̍n gbo̍. Iě u̍h-a sà slaǎ u̍h-a nu̍ mɔna̍ dǒ u̍h-a chɛ̀-ɛ sɔ̍n-a mɛ̍-dɛ̍ we̍. 42Ɛ̍ kɔn Nyɔsoa poe u̍h kɛ̍n i̍, iě ɔ̍ sà u̍h kwlǎ u̍h iě fa̍n-dɛ̍ᵻ nɛ-a dě ja̍u̍n wlì-ɛ wɛɛ sà. Kǎ ɛ̍ nu̍ chlǐh-ɛ dě Nyɔsoa-a tu̍owli po̍ nyɔ̍-a chlǐh-dɛ̍ di̍i̍, ɛ̍ la̍a̍,

‘Mɔ̀ɔ̍ Eslɔɛ nyɔ̍, sɔ̀nᵻá kwela nyìɛ̍

mɔ̀ nu̍-a dě kwlǎslò we̍-ɛ, nmi̍i̍ mɔ̀-a dba̍-aɛ,

dǒ ǐn we̍ bo mɔ̀-a sà-ɛ i̍h slaǎ ae?

43Iěe, Molɔ kwɛ̍i̍n gbo̍ kɔn wɛ̀ɛ̀ sɔ̍n wlù mɔ̀-a blě-aɛ,

ɛ̍ kɔn tìh bo, ɛ̍ ke chǔhtlɛ̀n Wlefan ɛ̀ nu̍-a mɔ̀-a nyɔsoa-a ke.

I̍h bo ìh nu̍ kwɛ̍i̍n gbo̍ᵻ mɔ̀ mɛ̍ mɔ̀ iě wɛɛ sà.

Ɛ̍ tìh-ɛ, ǎn mu̍ mɔ̀ dě Babeloun bloa̍ de̍e̍ dbo̍ fe̍i̍n.’

44“À baaᵻ blě ku̍o̍-a Wɛ̀ɛ̀ Sɔ̍n Wlù dě kwlǎslò we̍. Nyɔsoa bo ɔ̀ po̍ Mose slɛ̌ chèɛ̀ i̍ wɛ̀ ɔ̍ nu̍ ɛ̍. Ka ɔ̍ nu̍-a ɛ̍ ɔ̍ chèɛ̀ i̍ po̍-ɛ, kǎ ɔ̍ nu̍ ɛ̍ nu̍-ɛ. 45Ɛ̍-ɛ laa̍ bo ɛ̀ gbǎ dě à baaᵻ kwa̍a̍ ke wɛ̀ u̍h ke Jasua gbɛ̍n blǔh ɛ̀ kɔn nyɔ̍ Nyɔsoa nu̍-a i̍ dǒ u̍h jlǐhwai-ɛ. Dǒ blǔh laa̍ kɛ̍n bo ɛ̍ nɛ te̍e̍ iě ɛ̍ nu̍ Depe naɛ ti̍. 46Ɔ̍ kɔn tìh bo Nyɔsoa kma. Wɛ̀ ɔ̍ tèle Nyɔsoa i̍ ɔ̍ iě ɔ̍ bu̍h i̍ sà-ɛ, wɛ̀ ɔ̍ iě tǐn la̍ i̍ pɔ̀n dǒ Jekɔ-a Nyɔsoa we̍. 47Jɛ Sɔlɔma bo ɔ̀ po̍ gbò laa̍ dǒ ɔ̍ we̍.

48“Jɛ gbòᵻ ìh nyi̍ɔ̍ po̍-aɛ, Sìì Nyɔ̍ Wɔ̍n Nyɔsoa la ɔ̍-ɔ tǐn dě i̍h di̍i̍. Kǎ ɛ̍ nu̍ ka chlǐh-ɛ dě Nyɔsoa-a tu̍owli po̍ nyɔ̍-a chlǐh-dɛ̍ di̍i̍,

49‘Ja̍u̍n bo ɛ̀ nu̍ ǎn nynɛ̌ gbalǎ,

iě bloa̍ nu̍ ǎn bu̍hᵻ kɛ̍n i̍ tba̍ dɛ̍.

Gbò tu̍ we̍ mɔ̀-a mu̍ po̍ dǒ ǐn we̍ ɛ?

Tà ǎn mu̍-a fɔ-ɛɛ, doǒ le̍e ɛ?

50Ìh kli̍hgbɛ̍ la ɛ̍ se̍ ǎn chɛ̀ ɔ̀ se̍ i̍h nu̍ ae?’

51“Mɔ̀ɔ̍ la mɔ̀ ku̍ dlǔ iě mɔ̀-a pɔluh nyni wɔ̍n, wɛ̀ mɔ̀-a wɔ̌n-ɛ Nyɔsoa-a tu̍owli dounᵻ. Ɛ̀ kɔn taǐn mɔ̀ baaᵻ nu̍-a Nyɔsoa-a Sùù bu̍hᵻ i̍ tbaɛ-ɛ, ɛ̍ bo mɔ̀-a nu̍-a ke. 52Nyɔsoa-a tu̍owli po̍ nyɔ̍ jɔwe̍ bo mɔ̀ baaᵻ se̍ klě jě-e ɛ? Kǎ u̍h nu̍ tɛin wɛ̀ ùh po̍-a gbànwli I̍ Slɛ̌ Nyɔ̍-a ji̍-i tìh-ɛ, iě u̍h dbǎ u̍h. Ɔ̍ chɛ̀ bo mɔ̀ sà-a kwlǎ, iě mɔ̀ poe-a gbe̍ja̍a̍. 53Telě ɛ̀ Nyɔsoa-a ǐnchɔ̀ ja-aɛ, nɔ̌ mɔ̀ we̍ bo ɛ̍ wlǔh-i iě mɔ̀ se̍ ɛ̍ dɛ̍ɛ̍ jě.”

Nyɔ̍gbei dbǎ-ɛ Slifɛn sɔɔ̌ᵻ i̍

54Ti̍ taɔ pa̍ nyɔ̍ wɔ̌n-a Slifɛn-a wlu̍ la-a, sɔ u̍h sɔ̀n-ɛ dǒ jlu̍h we̍, iě u̍h-a kɔ̍ mlǎ i̍. 55Jɛ nɛ̀ Nyɔsoa-a Sùù jǐ dě Slifɛn ku̍u̍ wɛ̀ ɔ̍ gbɛ̀n dě ja̍i̍ dě ja̍u̍n we̍ iě ɔ̍ jě Nyɔsoa-a tìh-a i̍ bɛ̌-ɛ. Nɛ̀ Jusu nyna i̍ dǒ Nyɔsoa-a di̍na̍ we̍. 56Iě Slifɛn la̍a̍, “Mɔ̀ gbɛ̀n-e, ǐn jě ja̍u̍n ɛ̍ pɔ̀ni wɔ̍i̍n, Nyi̍ɔ̍-a Jǔ nyna i̍ dǒ Nyɔsoa-a di̍na̍ we̍.”

57Wɛ̀ u̍h sà-ɛ ɔ̍ slɛ̀ wɔ̍n, iě u̍h ka̍n u̍h-a dounᵻ. Sɔ u̍h wlǎ dě ɔ̍ ja̍ sǔh. 58Wɛ̀ u̍h blě ɔ̍ i̍ klǎ-a u̍h sà ɔ̍ dǒ wlɔ̀, wɛ̀ u̍h-a tbaɛ ɔ̍ sɔɔ̌ᵻ i̍. Nyɔ̍ ùh nu̍-a dɛ̍-a chɛ̀-ɛ, jǔgbèlà u̍h-a dǎɛ-a Sɔɔ-ɛ, ɔ̍ bo u̍h siee u̍h-a jlii̍. 59U̍h nɛ dǒ Slifɛn sɔɔ̌ᵻ i̍ tbaɛ la̍ sǔh wɛ̀ ɔ̍ ba̍le, ɔ̍ la̍a̍, “Joi Jusu, gbɛ̍n ǎn sùù i̍ o.” 60Wɛ̀ ɔ̍ wlǎ kɔlu̍ᵻ wlù iě ɔ̍ wǐ, ɔ̍ la̍a̍, “Joi, bɔ̌ u̍h-a gblɛ̍n sɔ̀ɛ̀n la we̍ gbǎ-a o.” Ɔ̍ wɔ̀-a dɛ̍ la bla̍-aɛ, iě ɔ̍ mɛ̌.

Currently Selected:

Nu̍-dɛ̍ᵻ 7: KDNT

Highlight

Copy