Markoo̱ 15

Bi̱ tsꞌén tsangínjo̱ Kjisoo̱ ngindyi̱ko̱n xtitjón Pilatoo̱

(Matioo̱ 27:1-2,11-14; Rkaa̱ 23:1-5; Juaa̱ 18:28-38)

1Kó nga ꞌniú ta̱jño̱ó, ngije kamátikó xtín já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá, ko̱jo já chji̱ni̱e̱kjo̱a̱kitii̱, ko̱jo ngayeje jáxaá, tsangínjo̱ Kjisoo̱, kó ńꞌniú ikindyia, sꞌe̱ kiniꞌánkꞌasꞌiee̱n Pilatoo̱. 2Kó Pilatoo̱, bi̱ tsꞌén asíyaá:

–A jí xí nda̱ Ree̱ xota̱ jundíoo̱ ji.

Kó Kjisoo̱, bi̱ katsó:

–Ja̱ bo̱a̱ kjiꞌi ni xi tꞌísé ji.

3Kó já ngito̱ko̱o̱ chináꞌmii̱ achichí kjín ni xi yíngítaꞌinni. 4Ta̱nga Pilatoo̱, ti̱ bi̱ ti̱ katsó nginí nga asíyaá Kjisoo̱:

–A ko̱ndókjo̱e̱jín ji. Jànꞌa̱n achichí ni xi tjifongítaꞌinnii̱.

5Ta̱nga Kjisoo̱ ngiti̱ jmí ni katsójín, kó ngaskande kijíndikón maá Pilatoo̱.

Bi̱ tsꞌén katseꞌéjeé nga si̱ꞌankꞌien Kjisoo̱

(Matioo̱ 27:15-31; Rkaa̱ 23:13-25; Juaa̱ 18:38—19:16)

6Kó xki̱ nga ma sꞌué paskuaa̱, Pilatoo̱ ꞌbijñándé ngo nda̱ xi tjiꞌyá ndo̱bo̱a̱yà, ta̱ xi míꞌá xota̱ na̱xi̱ńdaá. 7Kó ngo nda̱ xi ꞌmí Barraba̱ kisꞌijña ndo̱bo̱a̱yà, kó ki̱a̱ nijan kisꞌijñajo̱ xota̱ xi nijan katsꞌénkꞌién ini̱ma̱ nga askjanjo̱ xtín jájún xi chji̱a̱ni Roma̱. 8Kó nga jachó xota̱ na̱xi̱ńdaá, ítsꞌi̱yanii̱ nga tsíꞌaá Pilatoo̱ tsi̱ꞌe̱ nga sa̱ꞌín xikó tsꞌén síkijí. 9Kó Pilatoo̱, bi̱ katsoó xota̱ na̱xi̱ńdaá:

–A mejénjnú nga kꞌuijñándé an nda̱ Ree̱ xota̱ jundíoo̱.

10Bo̱a̱ katsó ngatꞌa̱ ja̱bo̱a̱ jè be Pilatoo̱ nga já ngito̱ko̱o̱ chináꞌmii̱ ta̱ kjo̱a̱a̱ kjo̱a̱ꞌontakón nga katsꞌénkꞌasꞌienni Kjisoo̱. 11Ta̱nga já ngito̱ko̱o̱ chináꞌmii̱ indyiátsobeé xota̱ na̱xi̱ńdaá, tsi̱ꞌe̱ nga Barrabaa̱ ku̱i̱ꞌa nga kꞌuijñándé. 12Kó Pilatoo̱, ti̱ bi̱ ti̱ katsó nginií xota̱ na̱xi̱ńdaá:

–Ja̱ mí xí mejénjnú nga sa̱ꞌinjo̱ an, nda̱ xi Ree̱ xota̱ jundío̱ ndyi̱ꞌmìjnúu̱.

13Kó kui xotaa̱, ti̱ askjandáyà má nginí, nga bi̱ katsó:

–¡Tjatꞌe ji kro!

14Ta̱nga Pilatoo̱, bi̱ katsoó:

–Ja̱ mí ni xi ndajín xi katsꞌén.

Ta̱nga ta̱sá má ꞌniú ngase askjandáyà xotaa̱, nga bi̱ katsó:

–¡Tjatꞌe ji kro!

15Kó Pilatoo̱, tsi̱ꞌe̱ nga katsꞌénnikon xota̱ na̱xi̱ńdaá, íjñandé Barrabaa̱, sꞌe̱ jaskan katsjákjo̱a̱ tsi̱ꞌe̱ nga akjaa̱ Kjisoo̱, sꞌe̱ katsꞌénkꞌasꞌien, tsi̱ꞌe̱ nga kjótꞌa kroo̱.

16Kósꞌe̱ jájuún iskjíbé Kjisoo̱, kó kijíjo̱ ndi̱tsen ndiꞌa nínga niꞌánjeé xotaa̱, kó ki̱a̱ kamátikó jájún xi ngasee̱. 17Kó ngo ńjño koán kiniꞌánkajá, kósꞌe̱ kiniꞌándaa̱ ngo korona̱ ndaꞌyá, sꞌe̱ ikꞌíꞌá to̱ko̱. 18Kó ítsꞌi̱yani xotaa̱ nga askjandáyà, nga bi̱ katsoó:

–¡Tinde nda̱ Ree̱ xota̱ jundío̱!

19Kó ngo yáxá tsꞌanié to̱ko̱ ko̱jo atítiajón, kó indyiátꞌa xò tsií tikoó tsi̱ꞌe̱ nga kamábendikón ꞌne̱ ja̱ma. 20Sꞌe̱ ngije tsajnókie, jaꞌáxiín ńjño koán xi katsꞌénkajá, sꞌe̱ ti̱ katsꞌénkajá nginí ńjño xi tsi̱ꞌe̱, xi ja̱bo̱a̱ yajá, kósꞌe̱ tsꞌaxié kui ngi̱ndiee̱, tsi̱ꞌe̱ nga ko̱ótꞌa kro.

Bi̱ tsꞌén akjatꞌa kro Kjisoo̱

(Matioo̱ 27:32-56; Rkaa̱ 23:26-49; Juaa̱ 19:17-30)

21Kó ngo nda̱ xi ꞌmí Ximo̱ xi chji̱a̱ni na̱xi̱ńdáꞌniú Sirene̱, na̱ꞌmii̱ Rijaá ko̱jo Rufoo̱, xi kjoeꞌeni ngi̱jin jno̱o̱, kó ta̱ kuí ma ora̱ kjoaꞌa ki̱a̱a̱, kiniꞌaán kjo̱a̱ꞌniú kuí nda̱a̱ tsi̱ꞌe̱ nga asíko̱jo nga yaꞌajo̱ kroo̱ Kjisoo̱.

22Kó tsangínjo̱ Kjisoo̱ ngo ngi̱ndie xi ꞌmí Ngólngota̱, ngi̱ndiee̱ ńdato̱ko̱ ini̱ma̱: Tsó kui eén. 23Kó katseꞌeé bino̱ xi kiniꞌánkꞌájinni ni sa xi ꞌmí mirra̱, ta̱nga Kjisoo̱ katsꞌejín. 24Ngije akjatꞌa kro, jájuún katsatonjo̱ kjo̱a̱chꞌáṉcha̱ ńjñoo̱ Kjisoo̱, míra̱ xi sa̱ko̱ó nga ngo nga ngo.

25Chi̱bo̱a̱ nijan nga ta̱jñó nga akjatꞌa kro. 26Kó ngo yátie akjatꞌa to̱ko̱ kroo̱ xi akjatꞌaa̱ ngo én xí bi̱ tsó: “NDA̱ REE̱ XOTA̱ JUNDÍOO̱.” 27Kó nijan akjatꞌajo̱ kro ko̱jo jó jáchéjé, ngo nga fojnií, ko̱jo ngo nga skoón. 28Kó bo̱a̱ tsꞌén jatjosón ni xi tsó xo̱jo̱n eén Néná, nínga bi̱ tsoó: “Kó bo̱a̱ tsꞌén ki̱a̱ kamáxki̱jo xota̱ xi ndajín.”

29Kó xota̱ xi jaꞌa ki̱a̱a̱, achichí chꞌo katsoó Kjisoo̱, kó katsꞌénkatjí má to̱ko̱, nga bi̱ katsó:

–¡Ji xi niꞌínkixóndé jí na̱ngo̱xi̱i̱ Néná, sꞌe̱ xi ma ján ni̱xtjin niꞌínde nginí, 30ꞌna̱xiéꞌé so̱bo̱e̱ ji yojòo̱, kó ti̱tjaje̱n ji kroo̱!

31Ti̱ bo̱a̱ ti̱ tsꞌén tsajnókie já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱ nga ja̱kꞌi̱e̱ ja̱ngaján, bi̱ katsoó xkjín:

–Tsꞌaxiéꞌá kje̱ꞌe xota̱, ta̱nga májiín ꞌboxiéꞌá soboá yojoo̱. 32¡Kui Kristoo̱, nda̱ Ree̱ Israee̱l! ¡Ngatjatjajen kroo̱ ngotꞌe̱ ꞌne̱, tsi̱ꞌe̱ nga xcha̱jne̱ kó sꞌi̱jinjne̱ kui!

Kó ngaskande kui já xí nijan kisitꞌajo̱ kro Kjisoo̱ xi chꞌo katsoó nga.

33Kó nga kamándisꞌueé, kisꞌiejñó ngayeje nga̱sondiee̱ ngaskande nga kamá chi̱bo̱a̱ ján. 34Kó nga kamá chi̱bo̱a̱ ján nga kamángixón, Kjisoo̱ ꞌniú askjandáyà, nga bi̱ katsó:

–Eloí, Eloí, lama sabaktani. (Ne tsa̱ꞌa̱n, Ne tsa̱ꞌa̱n, ánní nga tiꞌbíjñímasínní. Tsó kui eén.)

35Kó tjín xota̱ xi síndo ki̱a̱a̱, nga tsintꞌié ni xi katsó Kjisoo̱, bi̱ katsó:

–Jànꞌa̱n xi tjítsó nga tsꞌénchji̱a̱a̱ nda̱ chji̱ni̱e̱ꞌe̱én Néná xi ꞌmí Eliyaa̱.

36Kó ngo nda̱ tsanga má nga kijíkjaꞌá ngo nixó xi katsꞌénkꞌandyi̱ni bino̱ san, sꞌe̱ ngo yáxá ítokó, sꞌe̱ katsjaá Kjisoo̱ tsi̱ꞌe̱ nga kꞌuí, kó bi̱ katsó kui nda̱a̱:

–Xióchònjnú, akjénráa̱ nga Eliyaa̱ kjo̱e̱ꞌekꞌénje̱ngi.

37Ta̱nga Kjisoo̱ ꞌniú askjandáyà, jeꞌetsíꞌoón, sꞌe̱ kꞌien. 38Kósꞌe̱ ńjñotjibé xi tjíchjáni ngi̱ya nínga ꞌniú ndikoón na̱ngo̱xi̱i̱ jó tjín kamá nga katjondiyá, ndeskande nkꞌa jàn ngaskande ngindie jàn. 39Kó kui nda̱jun ngito̱ko̱, xi sikón kje̱n Kjisoo̱, nga bo̱a̱ tsꞌén jeꞌetsíꞌoón Kjisoo̱ nga kꞌien, bi̱ katsó:

–Ja̱koxi̱ boá nga kui nda̱a̱ xi ndií Néná.

40Kó kjín má ínchjín xí ta̱ kjín askotsijee̱n ni xi kamaá, ngi̱jii̱n kui ínchjiín kisꞌińdo na̱ Riya̱ Lenaa̱, ko̱jo na̱ Riya̱ na̱aa̱n Sandiyaá ko̱jo Kosiee̱, ko̱jo na̱ Salomee̱. 41Kuí ínchjiín xi tsajátji̱ngii̱ Kjisoo̱, kó kuí boá xi katsꞌénseén nga kisꞌijña nangi Ngalilea̱. Kó ti̱ kjín ngase ínchjín xí kisꞌińdo ki̱a̱a̱ xi nijan kijíjo̱ Kjisoo̱ nga kijí na̱xi̱ńdáꞌniú Jerusale̱n.

Bi̱ tsꞌén akjanijín Kjisoo̱

(Matioo̱ 27:57-61; Rkaa̱ 23:50-56; Juaa̱ 19:38-42)

42Kó nga kamángixoón, nga ni̱xtjin nga tjimíndyionda, ngo ni̱xtjin ngindiee̱ nga kjo̱chó ni̱xtjin ndikoón, 43jachó ngo nda̱ xi ꞌmí Kosie̱, nda̱ xi chji̱a̱ni na̱xi̱ńdá Arimatea̱, xi tjiín xá ki̱a̱ ngi̱jii̱n já ngito̱ko̱o̱, kui xi ti̱ tsꞌénkoyaa̱ nga ko̱tíxoma Néná nga, kó kamákón nga kijíkoón Pilatoo̱, sꞌe̱ tsíꞌaá yojo kꞌiee̱n Kjisoo̱. 44Kó Pilatoo̱ achichí kijíndikoón nga tsintꞌié nga je kꞌien Kjisoo̱, kó tsíchji̱a̱a̱ nda̱jun ngito̱ko̱o̱, kó asíyaá tsi je tsienii̱ nga kꞌien, 45kó ngije katsóyà nda̱jun ngito̱ko̱o̱ nga je kꞌien Kjisoo̱, Pilatoo̱ katsꞌénkꞌasꞌiee̱n yojo kꞌiee̱n nda̱ xi ꞌmí Kosiee̱. 46Ngo ńjñotjibé tsꞌatsie kui nda̱a̱, kó ngije tsꞌenje̱ngi kroo̱ yojo kꞌiee̱n Kjisoo̱, ítsakjájón kui ńjñotjibeé sꞌe̱ íjñá yojoo̱ Kjisoo̱ ngo ngi̱ya nga̱tsjo̱ó xí tikón ngo na̱xi̱, sꞌe̱ katsꞌéngátíkjayá ngo ndi̱jo̱ xi íchjáni nga̱ntjo̱a̱a̱ kui ti̱xa̱nga̱tsjo̱ó. 47Kó na̱ Riya̱ Lenaa̱, ko̱jo na̱ Riya̱ na̱aa̱n Kosiee̱ askotsijen ki̱a̱ nínga akjanijín Kjisoo̱.

Currently Selected:

Markoo̱ 15: MAIX

Highlight

Copy